“Enero 6–12. 1 Nephi 1–7: ‘Ako Moadto ug Mobuhat,’” Dali, Sunod Kanako—Alang sa mga Indibidwal ug mga Pamilya: Basahon ni Mormon 2020 (2020)
“Enero 6–12. 1 Nephi 1–7,” Dali, Sunod Kanako—Alang sa mga Indibidwal ug mga Pamilya: 2020
Si Lehi nga Nagbiyahe Duol sa Pulang Dagat, ni Gary Smith
Enero 6–12
1 Nephi 1–7
“Ako Moadto ug Mobuhat”
Girekord ni Nephi ang “mga butang sa Dios” (1 Nephi 6:3). Samtang magtuon ka sa rekord ni Nephi, bantayi ang mga butang sa Dios nga imong makita, ilabi na ang mga impresyon gikan sa Espiritu.
Irekord ang Imong mga Impresyon
Ang Basahon ni Mormon nagsugod sa sugilanon mahitungod sa usa ka tinuod nga pamilya nga nakasinati og tinuoray nga mga pakigbisog. Nahitabo kini niadtong 600 BC, apan adunay mga butang niini nga istorya nga tingali pamilyar sa mga pamilya karon. Kini nga pamilya nagpuyo sa usa ka kalibutan nga nagkagrabe ang pagkadautan, apan ang Ginoo misaad kanila nga kon sila mosunod Kaniya, Siya mogiya kanila ngadto sa kaluwasan. Diha sa dalan sila adunay maayong mga panahon ug dili maayong mga panahon; ilang nasinati ang daghang mga panalangin ug mga milagro, apan sila usab adunay kaugalingong mga problema sa panaglalis ug panagbingkil. Panagsa ra sa kasulatan nga adunay taas nga sugilanon sa usa ka pamilya nga naningkamot sa pagsunod sa ebanghelyo: usa ka amahan nga nakigbisog nga ang iyang pamilya madasig sa pagtuo, mga anak nga naghukom kon motuo ba kaniya, usa ka inahan nga nahadlok sa kahimtang sa iyang mga anak, ug mga igsoong lalaki nga nakigbisog sa kasina ug panagbingkil—ug usahay pagpasaylo sa usag usa. Sa kinatibuk-an, adunay tinuod nga gahum sa pagsunod sa mga ehemplo sa hugot nga pagtuo—nga gipakita niini nga pamilya—bisan pa sa ilang pagkadili hingpit.
Mga Ideya alang sa Personal nga Pagtuon sa Kasulatan
Ang mga kasulatan bililhon kaayo.
Ang unang unom ka mga kapitulo sa Basahon ni Mormon adunay daghang pakisayran sa sagradong mga basahon, sagradong mga rekord, ug sa pulong sa Ginoo. Samtang nagbasa ka sa 1 Nephi 1–6, unsay imong nakat-unan mahitungod kon ngano nga ang pulong sa Dios “bililhon kaayo”? (1 Nephi 5:21). Unsa ang gitudlo niini nga mga tudling kanimo mahitungod sa mga kasulatan? Unsay imong nakita nga nakadasig nimo sa pagsiksik sa mga kasulatan uban sa dakong pasalig?
Tan-awa usab sa “Scriptures Legacy” (video, ChurchofJesusChrist.org).
Ang Basahon ni Mormon nagpamatuod ni Jesukristo.
Sa matinuorong katuyoan nga gipahayag diha sa ulohan nga pahina—nga pagkombinser sa tanan nga si Jesus mao ang Kristo—ang Basahon ni Mormon nagsugod sa talagsaong panan-awon ni Lehi mahitungod sa Manluluwas. Unsa man ang imong nakat-unan bahin ni Jesukristo gikan sa unsay nakita ni Lehi? Unsa ang pipila ka “mahinungdanon ug kahibulongan” nga mga buhat sa Manluluwas sa imong kinabuhi? (1 Nephi 1:14).
Kon ako magtinguha ug mosalig sa Ginoo, Siya makapahumok sa akong kasingkasing.
Bisan og si Laman, Lemuel, ug Nephi nagdako tanan sa mao ra nga pamilya ug adunay susamang mga kasinatian, adunay dakung kalainan tali sa paagi sa ilang pagsanong sa balaang direksyon nga nadawat sa ilang amahan niini nga kapitulo. Samtang magbasa ka sa 1 Nephi 2, tan-awa kon mahibaloan ba nimo ngano nga ang kasingkasing ni Nephi nahumok samtang ang mga kasingkasing sa iyang mga igsoon wala. Mahimo usab nga imong hunahunaon ang imong kaugalingong mga tubag sa direksyon gikan sa Ginoo, pinaagi sa Espiritu Santo o sa Iyang propeta. Kanus-a ka mibati nga gipahumok sa Ginoo ang imong kasingkasing aron mas andam kang modawat sa Iyang direksyon ug tambag?
Ang Dios moandam og paagi alang nako sa pagbuhat sa Iyang kabubut-on.
Sa dihang ang Ginoo misugo ni Lehi ug sa iyang pamilya nga kuhaon ang mga palid nga tumbaga gikan ni Laban, wala Siya mohatag og pihong mga instruksyon kon unsaon sa pagtuman niini nga sugo. Sa kasagaran mao usab kini sa ubang mga sugo o sa personal nga mga pagpadayag nga atong madawat gikan sa Dios, ug kini maoy hinungdan nga kita mobati sama nga Siya misugo “og malisud nga butang” (1 Nephi 3:5). Unsa ang nakapadasig nimo mahitungod sa tubag ni Nephi ngadto sa sugo sa Ginoo, nga makita sa 1 Nephi 3:7, 15–16? Mibati ka ba og bisan unsa nga nagdani aron “moadto ug mobuhat”?
Samtang magtuon ka sa 1 Nephi 1–7, pangitaa ang mga paagi nga giandam sa Dios alang ni Lehi ug sa iyang pamilya. Giunsa Niya kini sa paghimo alang kanimo?
Tan-awa usab sa Mga Proverbio 3:5–6; 1 Nephi 17:3; “Obedience,” Gospel Topics, topics.ChurchofJesusChrist.org; Book of Mormon Videos collection sa ChurchofJesusChrist.org o sa Gospel Library app.
Ang paghinumdom sa mga buhat sa Dios makahatag kanako og pagtuo sa pagsunod sa Iyang mga sugo.
Sa dihang si Laman ug Lemuel daw kabagulbulon, sa kasagaran sila si Nephi ug Lehi anaa ra sa duol sa pag-awhag ug pagpahimangno kanila. Kon kamo daw kabagulbulon, ang pagbasa sa mga pulong nila ni Nephi ug Lehi makahatag og bililhong tambag ug panglantaw. Giunsa ni Nephi ug Lehi sa pagsulay og tabang ang mga sakop sa ilang pamilya aron makaangkon og lig-on nga pagtuo sa Dios? (tan-awa sa 1 Nephi 4:1–3; 5:1–8; 7:6–21). Unsay imong nakat-unan gikan sa ilang mga ehemplo nga makatabang kanimo sa sunod nga higayon nga ikaw matintal sa pagbagulbol o pagrebelde?
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang ipasabut og maayo ug hisgutan aron matubag ang mga panginahanglan sa imong pamilya. Ania ang pipila ka mga ideya.
1 Nephi 1–7
Sa tibuok 1 Nephi 1–7, pwede nimong awhagon ang mga sakop sa pamilya sa pag-ila sa mga inter-aksyon sa mga sakop sa pamilya ni Lehi ug Sariah. Unsay atong makat-unan gikan niini nga mga relasyon nga makatabang sa atong pamilya?
Gimahal ni Nephi ug sa iyang pamilya ang mga pulong sa mga propeta.
1 Nephi 2:20
Ang baruganan sa 1 Nephi 2:20 gibalikbalik kanunay sa tibuok Basahon ni Mormon. Sa unsang paagi ang mga sakop sa imong pamilya makagamit niini sa ilang kinabuhi samtang tun-an ninyo ang Basahon ni Mormon niining tuiga? Tingali pwede kamong magtinabangay sa paghimo og poster nga adunay saad sa Ginoo niini nga bersikulo ug ibutang kini sa inyong panimalay. Magsilbi kining pahinumdom sa paghisgot matag karon ug unya kon sa unsang paagi ninyo nakita nga ang Ginoo mipalambo sa inyong pamilya sa dihang gituman ninyo ang Iyang mga sugo. Ikonsiderar ang pagbutang niini nga mga kasinatian diha sa poster.
1 Nephi 2:11–13; 3:5–7
Tingali ang imong pamilya makabenepisyo gikan sa pagtimaan sa kalainan sa tubag nila ni Laman ug Lemuel ngadto sa sugo sa Ginoo ug sa tubag ni Nephi. Unsay atong makat-unan gikan sa 1 Nephi 2:11–13; 3:5–7 mahitungod sa pagbagulbol? Unsa nga mga panalangin ang moabut kon kita magpakita og pagtuo?
1 Nephi 3:19–20; 5:10–22; 6
Kini nga mga bersikulo makadasig sa imong pamilya sa pagtipig og rekord sa importanting mga hitabo ug mga kasinatian gikan sa inyong kinabuhi. Tingali makasugod kamo og journal sa pamilya, susama sa mga rekord nga gihimo nila ni Nephi ug Lehi mahitungod sa mga kasinatian sa ilang pamilya. Unsa kaha ang inyong ilakip sa inyong rekord sa pamilya?
1 Nephi 7:19–21
Unsa ang nakapadani nato mahitungod sa ehemplo ni Nephi niini nga mga bersikulo? Sa unsang paagi ang atong pamilya mapanalanginan kon kita “tinuoray gayud nga mopasaylo” sa usag usa?
Alang sa dugang nga mga ideya sa pagtudlo sa mga bata, tan-awa ang latid [outline] karong semanaha diha sa Dali, Sunod Kanako—Alang sa Primary.
Pagpalambo sa Atong Pagtudlo
Tun-i ang mga kasulatan kanunay. Usa ka importanting paagi sa makahuluganong pagtudlo diha sa panimalay mao ang paghimo og makanunayong mga oportunidad sa pagkat-on alang sa inyong pamilya. Si Presidente Thomas S. Monson mitudlo, “Ang pagpaspas og basa dili kaayo epektibo sama sa kada adlaw nga pagbasa ug paggamit sa mga kasulatan diha sa atong mga kinabuhi” (“Himoa ang Imong Kaugalingon nga Labing Maayo,”Liahona, Mayo 2009, 68).
Akong Gisunod ang Tingog sa Espiritu, ni Walter Rane