Adan ug Eva, ni Douglas Fryer

Pebrero 3–9

2 Nephi 1–5

“Kami Mipuyo subay sa Matang sa Pagkamalipayon”

Ang mga kasulatan makamugna og oportunidad nga makabaton og personal nga pagpadayag. Samtang magbasa ka sa 2 Nephi 1–5, makaplagan nimo nga ang Ginoo adunay piho nga butang nga Iyang gustong itudlo kanimo.

Irekord ang Imong mga Impresyon

Kon ikaw nasayud nga ang imong kinabuhi matapos na, unsa ang katapusan nga mga mensahe ang gusto nimo nga ipakigbahin niadtong imong labing gihigugma? Sa dihang si propeta Lehi mibati nga hapit na matapos ang iyang kinabuhi, iyang gipundok ang iyang mga anak sa katapusang higayon aron sa pagpanagna ug pagpakigbahin sa mga kamatuoran sa ebanghelyo nga iyang gimahal ngadto sa mga tawo nga iyang gimahal. Mitudlo siya og kalingkawasan, pagkamasulundon, sa Pagkapukan ni Adan ug Eva, katubsanan pinaagi ni Jesukristo, ug hingpit nga kalipay. Dili tanan sa iyang mga anak ang midawat sa iyang katapusang pagpamatuod, apan kadtong kinsa midawat—uban sa minilyon nga mibasa niini karon—nakakita diha sa iyang pagpamatuod og mga baruganan alang sa pagpuyo “subay sa matang sa pagkamalipayon” (2 Nephi 5:27).

Mga Ideya alang sa Personal nga Pagtuon sa Kasulatan

2 Nephi 2

Gawasnon ako nga mopili sa kinabuhing dayon.

Si Elder D. Todd Christofferson miingon: “Apan tuyo sa Dios nga ang Iyang mga anak molihok sumala sa moral nga kabubut-on nga gihatag Niya kanila. … Iyang plano ug kabubut-on nga kita mismo ang modesisyon para sa atong kinabuhi” (“Gawasnon sa Kahangturan, nga Molihok alang sa Ilang Kaugalingon,” Liahona, Nob. 2014,17). Sa iyang mga pagtulun-an mahitungod sa kabubut-on, giila ni Lehi ang importante nga mga kondisyon nga makahimo sa kabubut-on nga posible ug makahimo nato sa pagkab-ot sa atong balaan nga potensyal, lakip sa mosunod:

1. Usa ka kahibalo sa maayo ug dautan (2 Nephi 2:5)

2. Usa ka balaod gihatag ngadto sa katawhan (2 Nephi 2:5)

3. Katugbang, makadani nga mga pagpili (2 Nephi 2:11)

4. Gahum sa paglihok (2 Nephi 2:16)

Samtang magbasa ka sa 2 Nephi 2, unsay imong nakat-unan mahitungod sa matag usa niini nga mga kondisyon sa kabubut-on ug sa ilang relasyon sa usag usa? Unsay mahitabo sa atong kabubut-on kon ang usa o daghan niini nga mga kondisyon nawala? Unsa pay imong nakat-unan mahitungod sa kabubut-on gikan sa mga pulong ni Lehi?

2 Nephi 2:22–29

Ang Pagkapukan ug ang Pag-ula ni Jesukristo importante nga mga bahin sa plano sa Langitnong Amahan.

Daghang mga tawo nagtan-aw sa Pagkapukan ni Adan ug Eva nga usa ka mangilngig nga hitabo. Hinoon, ang mga pagtulun-an ni Lehi mahitungod sa Pagkapukan nagpadayag ngano nga kini kinahanglan nga bahin sa plano sa Amahan alang sa atong mahangturong kauswagan. Samtang ikaw magbasa niini nga mga bersikulo, pangitaa ngano nga ang Pagkapukan kinahanglan nga mahitabo aron kita—nga mga anak sa Langitnong Amahan—mouswag. Sa unsa nga paagi nga ang maulaong sakripisyo sa Manluluwas motubos nato gikan sa Pagkapukan?

Tan-awa usab sa Moises 5:9–12; 6:51–62; “Fall of Adam and Eve,” Gospel Topics, topics.ChurchofJesusChrist.org.

2 Nephi 3:6–24

Si Joseph Smith giorden nang daan sa pagpahiuli sa ebanghelyo.

Ang katapusang bahin sa 2 Nephi 3 naglakip sa usa ka panagna nga gihatag ni Jose sa Ehipto mahitungod sa umaabut nga manalagna nga pareho niya og ngalan (tan-awa sa bersikulo 14–15)—Joseph Smith. Aduna usab kini daghan nga ikasulti mahitungod sa misyon ni Joseph Smith. Unsa ang gisulti sa mga bersikulo 6–24 nga buhaton ni Joseph Smith, nga usa ka “pinili nga manalagna,” sa pagpanalangin sa katawhan sa Dios? Sa unsa nga paagi nga ang buhat ni Joseph Smith “labing bililhon” nganha kanimo?

Usa sa importante nga bahin sa misyon ni Joseph Smith mao ang pagdala sa mga sinulat sa binhi ni Jose, nga anaa sa Basahon ni Mormon. Unsa ang imong makat-unan gikan niini nga kapitulo mahitungod sa kaimportante sa Basahon ni Mormon?

Tan-awa usab sa Hubad ni Joseph Smith, Genesis 50:24–38 (sa Giya ngadto sa mga Kasulatan).

Propeta sa Ginoo, ni David Lindsley

2 Nephi 4:15–35

Mahimo kong moduol sa Dios sa akong kahuyang.

Bag-o lang nawad-an si Nephi sa iyang amahan. Ang responsibilidad sa paggiya sa iyang pamilya anaa na karon kaniya. Gibati niya nga gilibutan sa tintasyon ug nawad-an og paglaum tungod sa iyang mga sala. Bisan ang imong mga sirkumstansya lahi kay ni Nephi, mahimo nimong mapahisama sa pipila sa iyang mga hunahuna ug mga emosyon nga narekord sa 2 Nephi 4:15–35. Unsa ang nakatabang ni Nephi sa iyang mga kasakit? Sa unsa nga paagi nga ang tubag ni Nephi sa iyang mga hagit makatabang nimo sa pag-atubang sa imong mga pakigbisog?

2 Nephi 5

Ang kalipay makita sa pagsunod sa ebanghelyo.

Unsaon nimo sa paghatag og kahulugan sa kalipay? Si Nephi misulat nga ang iyang katawhan nagpuyo “subay sa matang sa pagkamalipayon” (2 Nephi 5:27). Mahimo nimong pangitaon ang mga pagpili nga gihimo ni Nephi ug sa iyang katawhan nga misangpot ngadto sa kalipay—mga paagi nga sila misuporta sa usag usa ug sa ilang mga pamilya, unsay ilang gihatagan og bili sa ilang komunidad, ug uban pa. Unsay imong nakat-unan nga makatabang nimo sa paghimo og kinabuhi sa kalipay, sama sa gibuhat sa katawhan ni Nephi?

2 Nephi 5:20–21

Unsa ang tunglo nga miabut sa mga Lamanite?

Sa panahon ni Nephi ang tunglo sa mga Lamanite mao nga sila “[gi]pahimulag gikan sa atubangan sa Ginoo … tungod sa ilang kadautan” (2 Nephi 5:20–21). Nagpasabut kini nga ang Espiritu sa Ginoo gikuha gikan sa ilang kinabuhi. Sa dihang ang mga Lamanite sa kadugayan midawat sa ebanghelyo ni Jesukristo, “ang tunglo sa Dios wala na mosunod kanila” (Alma 23:18).

Ang Basahon ni Mormon nag-ingon usab nga ang timaan sa itum nga panit miabut sa mga Lamanite human ang mga Nephite mibulag kanila. Ang matang ug dagway niini nga timaan wala masabti sa hingpit. Ang timaan sa sinugdanan mipaila sa mga Lamanite gikan sa mga Nephite. Sa kadugayan, sa dihang ang mga Nephite ug mga Lamanite pareho nga miagi og mga panahon sa kadautan ug pagkamatarung, ang timaan dili na tukma nga ilhanan sa kahimtang sa mga Lamanite atubangan sa Dios.

Ang mga propeta sa atong panahon mimatuod nga ang itum nga panit dili timailhan sa pagkawalay gusto o pagtunglo sa Dios. Ang Simbahan mihangup sa pagtulun-an ni Nephi nga ang Ginoo “wala maglimud kang bisan kinsa nga moduol ngadto kaniya, itum ug puti, ulipon ug gawasnon, lalaki ug babaye” (2 Nephi 26:33). Si Presidente Russell M. Nelson mideklarar: “Gipasabut og maayo sa Ginoo ang Iyang mahinungdanon nga doktrina mahitungod sa patas nga oportunidad sa Iyang mga anak. … Ang panagkalahi sa kultura, pinulongan, pamayhon, kaliwat, ug nasyunalidad molubad ngadto sa pagkawalay kahulugan kon ang tawong matinud-anon mosulod sa dalan sa pakigsaad ug moduol sa atong pinalangga nga Manunubos” (“President Nelson Remarks at Worldwide Priesthood Celebration” [Hunyo 1, 2018], newsroom.ChurchofJesusChrist.org).

Tan-awa usab ang “Till We All Come in the Unity of the Faith” (video, ChurchofJesusChrist.org).

Mga Ideya alang sa Pamilya nga Pagtuon sa Kasulatan ug Family Home Evening

Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka ideya.

2 Nephi 1:13–25

Unsa ang gitudlo niini nga mga bersikulo kanato mahitungod sa dakong panghinaut sa usa ka matarung nga ginikanan alang sa iyang mga anak?

2 Nephi 3:6

Basaha pagdungan ang “Manalagna” sa Giya ngadto sa mga Kasulatan. Sa unsa nga paagi nga usa ka manalagna si Joseph Smith? Nganong mapasalamaton man kita sa buhat nga nahimo ni Joseph Smith? (tan-awa sa 2 Nephi 3:6–24).

2 Nephi 4:20–25

Samtang basahon ninyo ang 2 Nephi 4:20–25 pagdungan, hunong human sa matag bersikulo ug dapita ang mga sakop sa pamilya sa pagpakigbahin sa dihang ilang nasinati o nabati ang gihulagway ni Nephi. Unsa ang nahimo sa Dios alang sa atong pamilya?

2 Nephi 5

Unsa ang pipila ka paagi nga ang imong pamilya nagpuyo “subay sa matang sa pagkamalipayon”? Samtang ang imong pamilya mobasa sa 2 Nephi 5, mahimo nimong hisgutan ang mga butang nga giampingan sa mga Nephite: pamilya (bersikulo 6), ang mga sugo (bersikulo 10), ang mga kasulatan (bersikulo 12), edukasyon (bersikulo 15), mga templo (bersikulo 16), trabaho (bersikulo 17), ug ang mga calling sa Simbahan (bersikulo 26). Usa ka paagi sa paghimo niini mao ang pagpangita sa mga butang nga nagrepresentar sa pipila niining mga butanga ug maghisgot kon unsaon nato sa pagpakita nga kita, sama sa mga Nephite, naghatag og bili niining sama nga mga butang.

Alang sa dugang nga mga ideya sa pagtudlo sa mga bata, tan-awa sa latid [outline] karong semanaha sa Dali, Sunod Kanako—Alang sa Primary.

Pagpalambo sa Atong Pagtudlo

Pagmapaniiron. Kon hatagan nimo og pagtagad ang mga panghitabo sa mga kinabuhi sa imong mga anak, makakaplag ka og labing maayo nga mga oportunidad sa pagtudlo. Ang mga komentaryo nga gihimo sa imong mga anak o mga pangutana nga ilang ipangutana mahimo usab nga mga oportunidad sa pagtudlo. (Tan-awa sa Pagtudlo sumala sa Pamaagi sa Manluluwas, 16.)

Si Lehi ug ang Iyang Katawhan Miabut sa Bag-ong Kalibutan, ni Clark Kelley Price