“Beberuare 10-16. 2 Nibwaai 6-10: ‘O Ai Korakorara Ana Baire Atuara!’” Nakomai, Irirai—Ibukin te Moanrinan: Ana Boki Moomon 2020 (2020)
“Beberuare 10-16. 2 Nibwaai 6-10,” Nakomai, Iriirai—Ibukin te Moanrinan: 2020
Ma Akea Au Taeka, Ma e na Tauaki Am Taeka, iroun Harry Anderson
Beberuare 10–16
2 Nibwaai 6:10
“O Ai Korakorara ana Baire Atuara!”
N am tai ni wareka te ka 2 Nibwaai 6-10, ukera te kairiiri mai iroun te Tamnei bwa tera ae ko na reirei iaona. Te kabwarabwara aio ao Nakomai, Iriirai —Ibukiia Aomata n Tatabemaniia ao Utu a na anganiko iango riki tabeua.
Korea Am Namakin
Kaungaa te Tibwatibwa
Kaungaia ataei bwa a na iai aia tai are a na tibwauai bwaai ake a reiakinna ibukin Iesu Kristo ao Ana Mwakuri ni Kamaiu n aia tai ni kamatebwaia 2 Nibwaai 6-10 i bon irouia ke ma aia utu.
Reirei te Reirei: Ataei aika a Uarereke
E kamaiuai Iesu Kristo man te bure ao te mate.
Ko na kanga ni kabongana 2 Nibwaai 9:7-13 ao 20-23 ni buokiia ataei bwa a na mataata bwa Iesu Kristo e kamaiuia aomata ni kabane man te mate ao e anganiira te kona bwa ti na rairi nanora man ara bure?
Waaki ni Kakukurei aika a Kona ni Karaoaki
-
Karakina nakoia ataei karakinan te aomata are e bwaka inanon te mwanono ae e nano are teuanne ke neienne e aki kona n tamwarake n otinako. E roko temanna te mwaane ao e tabekia ni kaotinakoa man te mwanono. Ko na bae n tangiria ni korea tamnein te karaki aei iaon te burakibooti ke karaoa te kaotioti iaona ma ataei. Kabwarabwaraa bwa te mwanono aei titebo ma te mate ao te mwaane are e buoka te aomata bon titebo ma Iesu Kristo, are e kamaiuiia aomata ni kabane man te mate n anganakiira te bwai n tangira ae te mangauti. Tuangiia ataei bwa te aomata are e bwaka n te mwanono e a manga bwaka riki n te mwanono teuana. N te tai aio te tia kamaiu e a anganna te kai n tamwarake ni kabongana n otinako man te mwanono. Kabwarabwaraa bwa te mwanono aio titebo ma te bure ao te kai n tamwarake bon Ana Mwakuri ni Kamaiu Iesu Kristo, are e anganiira te kona n rairi nanora ao ni kabwaraaki ara bure. Wareka 2 Nibwaai 9:22-23, ao kaota am koaua iaon Iesu Kristo ao Ana Mwakuri ni Kamaiu.
-
Baane anenea te anene iaon ana tangira Iesu Kristo, n aron “I Feel My Savior’s Love” (Aia Boki n Anene Ataei, 74–75). Kaoiia ataei bwa a na korei tamnein bwaai ake a buokiia n ataa ana tangira te Tia Kamaiu ibukiia.
“E kukurei nanou n te raoiroi.”
Ko na kangaa n kaungaia ataei ake ko reireiniia ni “[kukurei] n te raoiroi,” ke n ongeaba nakon te Uea n te aro ae e kakukurei? (2 Nibwaai 9:49).
Waaki ni Kakukurei aika a Kona ni Karaoaki
-
Wareka 2 Nibwaai 9:49 nakoia ataei, ao buokiia bwa a na kunea ao n ataa te bwai are e taekinna Iakobwa are e tangiria ao e ribaia. Tibwaua te bwai ae riki are te ataei temanna e karaoa te rinerine ae raoiroi ke te rinerine ae buakaka, ao kaoiia ataei bwa a na teirake ngkana te rinerine e karika te kukurei ao a na tekateka ngkana te rinerine e uota te nanokawaki. Bukin tera rinean te eeti e anganiira te kukurei? Nningai ae ko a tia iai n namakina te kukurei ibukina bwa ko karaoa te rinerine ae eeti?
-
Baane anenea te anene iaon te kimwareirei ae e reke man te ongotaeka, n aron “When We’re Helping” (Aia Boki n Anene Ataei, 198), ao tuangiia ataei bwa a na kakauongo bwa tera ae e kakukureira. Karekea aia tai ataei n ae temanna imwin temanna bwa e na riki bwa kanga te karo n tuangiia ataei ake tabeman bwa a na karaoa te bwai teuana. Taraia bwa ataei ake tabeman kataneiaia n ongotaeka n te aro ae kakukurei.
Reirei te Reirei: Ataei aika a Ikawai
E aki toki ni kakoroa nanon Ana berita te Uea.
N ataakina bwa te Uea e kawakin Ana berita nako e kona ni buokiia ataei ni karikirakea aia onimaki Irouna ao aia koaua n ongotaeka nakon Ana tua.
Waaki ni Kakukurei aika a Kona ni Karaoaki
-
Tuangiia ataei bwa a na taekinii tabeua berita ake a tia ni karaoi, n aron te berita are a karaoia ma raoraoia ke te berita are a karaoia n aia bwabetito. Bukin tera n tabetai e kaangaanga kawakinan ara berita? Bukin tera e kakawaki kawakinan ara berita? Wareka te kibu n taeka: “Bwa E na kakoroi bukin ana berita te Uea ae te Atua ake e a tia ni karaoi nakoia natina” (2 Nibwaai 6:12). Tibwaua te katooto ae te Atua e kawakina Ana berita, e ngae ngke te kakabwaia e aki roko n te tai naba anne.
-
Kaota tamnein Iesu irarikin tamnein te ataei. Wareka 2 Nibwaai 7:1, ao kabwarabwaraa bwa ngkana ana aomata te Atua aikoa ongotaeka nakon Ana euangkerio, kanga titebo ma a ‘karaureiia” ma Ngaia. Kararoaa tamnein te ataei mai irarikin tamnein Iesu ni kaotia bwa ngkana tiaki kawakin ara berita, n aron te berita n te bwabetito, ti kararoaira mai irarikin Tamara are i Karawa ao te Tia Kamaiu. (Ni manga noora te berita n te bwabetito, taraa R&B 20:37.) E kangaa Ana Mwakuri ni Kamaiu te Tia Kamaiu n anganiira te konaa ni manga kaniira Nakoina? N am tai ni maroroakina aei, kaoiia ataei bwa a na kamwaingii tamnei ni manga ikotii.
E kamaiuai Iesu Kristo man te bure ao te mate.
Ko na kanga ni kabongana 2 Nibwaai 9:10-23 ni buokiia ataei n ataia bwa Iesu Kristo bon aia Tia Kamaiu?
Waaki ni Kakukurei aika a Kona ni Karaoaki
-
Tuangiia ataei bwa a na buokiko ni korea te kawai iaon te burakibooti, ao kaoiia bwa a na korei tabeua totoko ke tutuki iaon te kawai. Baane wareka 2 Nibwaai 9:10, ao kaoiia ataei bwa a na korei aran bwaai ake a tutuki inanon te kawai ni kabonganai taeka man te kibu aei are e kaoti bwaai ake a tuuka te kawai are e konaa n tukiira n okira te Atua. Ngkanne maroroakinna bwa e kanga Iesu Kristo n tokanikai iaon bwaai n totoko aikai ibukira (taraa 2 Nibwaai 9:21-23), ao inanon am tai ni karaoa anne, kaoiia ataei bwa a na kamaunai bwaai ake a totoko.
-
Kaota tamnein Atam ao Ewa, n aron A Kitana te Onaroka are i Eten (ChurchofJesusChrist.org). Kabwarabwaraa bwa ngke a kana uaan te kai Atam ao Ewa are e tuangiia te Atua bwa a na aki kanna n te Onaroka are i Eten, a karokoa te bure ao te mate nakon te aonaaba. Kaota tamnein Iesu Kristo. Ni buokiia ataei bwa a na mataata bwa e kanga Iesu n tokanikai iaon te bure ao te mate, karakina rongorongon te aomata are e bwaka inanon te mwanono, are e kuneaki n te moan iango n te anga reirei iaan “Ataei aika a Uarereke” n te kabwarabwara aio. Ngkanne tuangiia ataei bwa a na korea tamnein te karaki aio ke a na karaoa te kaotioti iaona. Wareka 2 Nibwaai 9:21-23, ao kaota am koaua iaon Iesu Kristo ao Ana Mwakuri ni Kamaiu.
-
Buokiia ataei n tatabemaniia ni kakaea te anene ibukin Ana Mwakuri ni Kamaiu te Tia Kamaiu tao n Boki n Anene n Taromauri ke n Aia Boki n Anene Ataei (e kona ni ibuobuoki ibukin intekiti ni booki aikai). Kaoiia ataei bwa a na kakaei ao a na tibwauai mwakoro n taeka man te anene are e kabwarabwaraa bwa tera ae e a tia ni karaoia Iesu ibukira. Tuangiia ataei bwa a na tibwaua aia iango ao aia namakin ibukin Ana Mwakuri ni Kamaiu te Tia Kamaiu, ke tibwaua am koaua.
N na kakabwaiaaki ngkana I iriira ana reirei te Atua.
Buokiia ataei ni katea aan aia onimaki ae matoatoa iroun te Atua n te aro bwa aia atatai ao aia konabwai e na rikirake, a na reitinako n onimakinna ao n irii Ana reirei.
Waaki ni Kakukurei aika a Kona ni Karaoaki
-
Kaoiia ataei bwa a na tuangko bwaai aika a rangi n ataibwai iaona, n aron te boki ae e mamate nanoia iai ke te bwai ae a tangiria ni kakaraoia. Tuanga te ataei bwa e na wareka 2 Nibwaai 9:20, ao n taekina koauana bwa te Atua “[e atai] bwaai ni kabane.” Bukin tera e kakawaki ibukira bwa ti na ataia ae te Atua e atai bwaai ni kabane?
-
Tuangiia ataei bwa aongkoa a na iangoia ae a ongo iroun temanna raoraoia ae e taku bwa tuua ke reirein te Ekaretia a nanobaba. Tera ae a na taekinna nakon raoraoia? Bukin tera e kakawaki onimakinan ana reirei te Atua e ngae ngke ti aki n rangi ni mataata iai? Kaungaia ataei bwa a na taraa 2 Nibwaai 9:20, 28-29, ao 42-43 ibukin te buoka n iangoi ao ni maroroakin titiraki aikai.
Kaungaa te Kamatebwai n te Mweenga
Buokiia ataei n iangoa te kawai are a na kona n reireiia aia utu n te bwai are a tia n reiakinna iaon Iesu Kristo ao Ana Mwakuri ni Kamaiu. Te katooto, a kona ni kabongana iteraniban te waaki n te wiiki aei ni kabwarabwaraa bwa e kanga te Tia Kamaiu ni buokiira.n tokanikai iaon te bure ao te mate.
Kanakoraoan Ara Anga reirei
Kabonganai taian iteraniba ibukin te waaki ni kakukurei. N aia tai ni mwakuri ataei iaon te iteraniba ibukin te waaki ni kakukurei, kabongana te tai aei ni buokiia bwa a na nooria bwa e kanga te waaki ni kakukurei n irekereke nakon taian reirei man te reirei ao a kanga taian reirei ni kaineti nakon mauiia.