Beberuare 17–23

2 Nibwaai 11–25

“Ti Kimwareirei iroun Kristo”

E moanaki am katauraoi n anga reirei ngkai ko wareka 2 Nibwaai 11–25. Nakomai, Iriirai—Ibukiia Aomata n Tatabemaniia ao Utu e kona ni buokiko ni mataata ni mwakoro aikai, ao te bwai ae kakawaki aei e na anganiko iango ibukin am angareirei.

Korea am Namakin

Kaungaa te Tibwatibwa

Kakimototo n rinanona ma ataei bwaai ake a reiakin n taekan te Tia Kamaiu ao Ana Mwakuri ni Kamaiu n te wiiki ae nako. Ngkana a tibwaua te bwai are a reiakinna ma aia utu, kaungaia bwa a na maroroakina anne.

Reirei te Reirei: Ataei aika a Uarereke

2 Nibwaai 12:2–3

Te tembora bon Ana auti te Uea.

Ana taetae ni burabeti Itaia iaon “maungani mwaneaban Iehova” e kona n reke am tai n reireiniia ataei taekan te tembora ao ni buokiia bwa a na ingainga n nako ikekei n te bong teuana.

Waaki aika a Kona ni Karaoaki

• Angan te ataei bwa e na taua tamnein te tembora (bwaai aika a kakaawaki n te wiiki aei n Nakomai, Iriirai—Ibukiia Aomata n Tabemaniia ao Utu iai inanona teuana), ao tuangiia ataei bwa a na tibwauaia bwa tera ae a ataia iaon te tembora. Wareka 2 Nibwaai 12:3, ao kabwarabwaraa bwa inanon te kibu aei te burabeti ae arana Itaia e taetae ni burabeti bwa e na iai te tembora n te kabanea ni bong. Manga wareka riki te kibu aei, ao katuruturua bwa ngkana ti nakon te tembora, te Uea “e na reireinira kawaina ”ao e na buokiira “n nakonako iaon kawaina.”

• Karaoa te kawai iaon te timanti, ao n tokin te kawai, katuka tamnein te tembora ao rabuna te tamnei. Kariaia ataei bwa a na nakonako iaon te kawai, ao ngkai a karaoia, buokiia bwa a na kaokioka te kibuntaeka aei “n nakonako iaon kawaina.” Ngkana a roko n tokin te kawai ataei, anganiia bwa a na noora te tamnei. Tera nanon ae a nakonako ni kawain te Atua?

• Aneneia ma ataei kunan te tembora, n aron ae “I Love to See the Temple” (Aia Boki n Anene Ataei, 95). Buokiia bwa a na kunei taeka ao kibuntaeka n te anene are e reirei taekan te tembora ao tera are e karaoaki ikekei.

2 Nibwaai 19:6; 25:26

“Ti kimwareirei Iroun Kristo.”

Nibwaai ao Itaia iai aia koaua iroun teTia Kamaiu, ao aia kakoaua e kakukureiia. Buokiia ataei n nooria bwa ko “kimwareirei iroun Kristo.”

Waaki ni kakukurei aika a Kona ni Karaoaki

• Kaoa te ataei bwa e na taua tamnein bungiakin Iesu Kristo (n aron Te Boki n Tamnei n te Euangkerio, no. 30), ao buokiia ataei ni kunea te teei ae Iesu n te tamnei. Wareka 2 Nibwaai 19:6 ke kaota te witeo “E Bungiaki te Tia Kamaiu— Tamnein te Kiritimati” (ChurchofJesusChrist.org), ao tuangiia ataei bwa a na kotea Iesu ngkana a ongo te taeka te teei ao te nati te mwaane. Kabwarabwaraa bwa te burabeti ae Itaia, are e korei taeka inanon 2 Nibwaai 19:6, e ataa taekan bungiakin Iesu tebubua te ririki imwain ae e riki.

• Karakina taekan Iesu Kristo n uota te kimwareirei nakoia tabeman, ke kaota te witeo n aron “Iesu e Kamarurunga te Mwaane ae Mataki ngke e bungiaki” ke“ Tai Tukiia Ataei Nakoiu” (ChurchofJesusChrist.org). Kaoti taai ni kakukurei inanon te karaki ke te witeo. Wareka 2 Nibwaai 25:26 ao maroroakinna bwa bukin tera ko “kimwareirei iroun Kristo.” Tuangiia ataei bwa a na maroroakinna bwa e kanga Iesu ni uota te kimwareirei nakoia.

2 Nibwaai 21:6–9; 22

Te mereniam bon te tai n rau ao ni kukurei.

Imwiin Kauaokina, Iesu Kristo e na maeka ma Ana botanaomata inanon te rau ae aranaki bwa te Mereniam.

Waaki ni Kakukurei aika a Kona ni Karaoaki

• Kaotia nakoia ataei tamneia maan ake a taekinaki n 2 Nibwaai 21:6–7, ao tuangiia ataei bwa a na atonga aran taianman. Kabwarabwaraa bwa maan aikai a bon rangi ni kakairiribai, ma Itaia e reirei bwa imwiin manga okin Iesu Kristo, e na roko te tai n rau, are e aranaki bwa te Mereniam, are a na aki manga kaikoakiia imarenaia. Ti na kanga n iriira aia katooto maan aikai n arora nakoia raora imarenara? Kaoia ataei bwa a na korei tamneia maan aikai n ikotaki ni maeka ma te rau.

• Wareka 2 Nibwaai 22:5, ao butiia ataei bwa a na buokiko ni kakaea te kuna are e kabwarabwarai “bwaai aika a kororaoi” ake e a tia ni karaoi te Uea. Tabeua katooto a kona ni kaira “My Heavenly Father Loves Me” (Children’s Songbook, 228–29) or “How Great Thou Art” (Hymns, no. 86). Ikotaki anenea te kuna. Kabwarabwaraa bwa n te Mereniam, ni kabane a na atai “bwaai aika a kororaoi” ake e a tia ni karaoi te Uea.

Rierei te Reirei: Ataei aika a Ikawai

2 Nibwaai 12:2–3

Te tembora bon Ana auti te Uea.

Ko na kanga ni karaoi kibu aikai ni buokiia ataei n ingainga nakon te bong are a na kona iai n nakon te tembora?

Waaki ni Kakukurei aika a Kona ni Karaoaki

• Kaota tamnein te tembora (bwaai aika a kakaawaki n te wiiki aei n Nakomai, Iriirai—Ibukiia Aomata n Tatabemaniia ao Utu iai inanona). Tuanga te ataei bwa e na wareka 2 Nibwaai 12:2–3, ao kaoia ataei tabeman bwa a na kakauongo bwa bukin tera e taekinna Itaia bwa ti kainnanoi tembora. Ko kona ni kabwarabwaraa bwa Itaia e aranani tembora bwa “maungan mwaneaban Iehova.” Bukin tera te maunga bon te kanikina ae tamaroa ibukin te tembora?

• Kaoia ataei bwa a na korea tamneia ngke a nako n te tembora. Ngkana e kona, tuanga temanna te ataeinimwaane ke te ataeinnaine n te uoote bwa a na tuangiia ataei bwa aekakira karaoan te bwabetito ibukiia mate n te tembora. Te aomata ae te kairake ke temanna riki n te uoote e kona n reireiniia ataei aron kakaean araia aia bakatibu ake a kainnanoi otenanti n te tembora.

2 Nibwaai 15:20

Tatan e kataia ni kaminoai n taekan te raoiroi ao te buakaka.

Ti maeka n te aonaaba are, e taetae iai ni burabeti Itaia, aomata a arana ae raoiraoi bwa e buakaka ao ae buakaka bwa e raoiroi. Ko na kanga ni buokiia ataei bwa a na kinaa te kewe?

Waaki aika ni Kakukurei aika a Kona ni Karaoaki

• Kaota te bwai ae mao ke ae mangingi nakoia ataei, n aron te bikoo ke te remon, inanon nnen te kanre. Ikotaki wareka 2 Nibwaai 15:20, ao kabwarabwaraa bwa e kanga Tatan ni karaoi bwaai ake a buakaka bwa a na tara n raoiroi. Buokiia ataei bwa a na iangoi kawai are Tatan e karaoa iai aei. Ti na kanga n ata ana kewe?

• Kaotia n te moan miniti ao iteran te witeo “You Will Be Freed” (ChurchofJesusChrist.org). Bukin tera te tia akawa e karaba ana matau? Bukin tera Tatan e karaba te bure?

2 Nibwaai 17:14; 19:6; 25:23–26

“Ti kimwareirei iroun Kristo.”

Ataei a riai n ataia bwa ana euangkerio Iesu Kristo e kakukurei. Ko na kanga ni buokiia bwa a na “kimwareirei iroun Kristo”?

Waaki ni Kakukurei aika a Kona ni Karaoaki

• Buokiia ataei bwa a na kakaea aran Iesu Kristo n 2 Nibwaai 17:14 ao 19:6. Ko na riai ni kabwarabwaraa bwa “Emanuera” bon teuana man aara aikai, ao e nanonaki “Raora te Atua.” Tera nanon aara aikai aika a reiakiniira iroun Kristo?

• Katoka tamnein te Tia Kamaiu iaon te burakibooti, ao ikotaki wareka 2 Nibwaai 25:26. Bukin tera Nibwaai e taekina ao ni kabatiai koroboki iaon Iesu Kristo? Anganiia ataei n tatabemaniia bwa a na koroboki iaon te burakibooti, irarikin tamnein Iesu, teuana taekan te Tia Kamaiu ae e uota te kukurei nakoia.

• Tuangiia ataei bwa a na iangoa temanna are a na “anaa nanona … bwa a na kakoaua Kristo” (2 Nibwaai 25:23). Ti kanga ni kaotia nakoia tabeman te kimwareirei are e uotia te Tia Kamaiu nakon maiura? Anganiia ataei bwa a na koroboki ke a na karaoa te kaotioti iaon te bwai teuana are e na kona ni buoka te aomata are a iangoia bwa a na kakoaua Iesu Kristo.

Kaungaa te Kamatebwai n te Mweenga

Kaoia ataei bwa a na iangoa te bwai teuana are a na karaoia ni kaotia nakoia aia utu bwa a “kimwareirei iroun Iesu.”

Kanakoraoan Ara Anga reirei

Anganiia ataei bwa a na kakau iango. “Ngkai ko reireiniia ataei, anganiia bwa a na katei, korei, karani, ao ni karaoi bwaai. Bwaai aikai a nano riki nakon ae waaki ni kakukurei—a kakaawaki bwa bwaai aika a na reiakinaki” (Teaching in the Savior’s Way, 25).