Ipakita ti Amin a Banag nga Adda Dios (Da Alma ken Korihor), ni Walter Rane

Hulio 6–12

Alma 30–31

“Ti Saguday ti Balikas ti Dios”

Adalem ti Mateo 30–31 a pampanunotem dagiti ubbing. Bayat ti panangutobmo kadagiti bileg ken kasapulanda, tulongannakanto ti Espiritu Santo a mangammo no kasano ti panangisurom kadakuada.

Isuratmo Dagiti Impresionmo

Yawis ti Panagbibinninglay

Awisem dagiti ubbing a mangibinglay kadagiti sungbat dagiti saludsod a kas iti sumaganad: Kaano ti panagkararagtayo? Ania ti ibagatayo no agkararagtayo? Asino kadakayo ti mabalin a mangibinglay maipapan no kasano a nagkararag dagiti Zoramite wenno no kasano a nagkararag ni Alma?

Isuro ti Doktrina: In-inaudi nga Ubbing

Alma 30:44

Paneknekan ti amin a banag maipapan iti Dios.

Intudo ni Alma dagiti banag nga adda iti tangatang ken iti daga a mangipaneknek a sibibiag ti Dios ken iturongna ti uniberso. Ania dagiti banag a mabalin a pakatulongam a makita dagiti ubbing ti lawlawda a mangipaneknek maipapan iti Dios?

Dagiti Mabalin nga Aktibidad

• Ibaasam ti Alma 30:44 kadagiti ubbing, ket kiddawem kadakuada a dumngeg kadagiti banag nga imbaga ni Alma a makatulong kadatayo a mangammo a pudno ti Dios. I-display dagiti sumagmamano kadagitoy a banag, ket kiddawem kadagiti ubbing nga itudoda dagiti ladawan no mabasam ti maipapan kadakuada iti bersikulo. Awisem dagiti ubbing a mangidrowing kadagiti banag a makatulong kadakuada a mammati iti Dios.

• No mabalin, makipagna kadagiti ubbing iti ruar wenno kiddawem kadakuada a tumakder iti maysa a ridaw bayat ti panangbasam iti Alma 30:44. Kiddawem kadakuada nga itudoda dagiti banag a makitada a makatulong a maammuanda a pudno ti Dios. Makatulong met ti panid ti aktibidad itoy a lawas.

• Kiddawem kadagiti ubbing nga agtugaw iti sirkulo ken aggigiddan nga agkansion iti maysa a kanta maipapan kadagiti pinarsua ti Dios, kas iti “My Heavenly Father Loves Me” (Children’s Songbook, 228–29). Kabayatan iti panagkanta dagiti ubbing, awisem ida a mangipasa ti maysa a banag a kas iti bola. No agsardeng ti musika, kiddawem iti ubing a mangig-iggem iti banag a mangibinglay iti maysa a banag a pinarsua ti Nailangitan nga Ama a pagyamyamananna.

Alma 31:5

Nabileg ti sao ti Dios.

No panunoten dagiti ubbing ti bileg, mabalin a panunotenda dagiti banag a kas kadagiti bannuar, reyna, wenno ari. Matulongam ida a makaawat a ti balikas ti Dios ket nabilbileg ngem iti “ania man a banag” (Alma 31:5).

Dagiti Mabalin nga Aktibidad

• Mangidrowing iti maysa nga espada iti pisarra. Ibasam ti Alma 31:5 kadagiti ubbing, ket kiddawem kadakuada a dumngeg no ania ti ibaga ni Alma a nabilbileg ngem iti espada. Ibinglay ti maysa a padas idi adda nabileg nga impluensia kenka ti balikas ti Dios.

• Aggigiddan nga agkansion ti maysa a kanta maipapan iti nasantuan a kasuratan, a kas iti “Scripture Power” (music.ChurchofJesusChrist.org),ken kiddawen kadagiti ubbing a dumngegda iti no kasano a makatulong kadatayo dagiti nasantuan a kasuratan. Ulitem ti ragup dagiti balikas a “Ti balikas ti Dios ket nabilbileg ngem …” iti sumagmamano a daras, ket kiddawem kadagiti ubbing a mangtulong kenka a mangileppas iti ragup dagiti balikas.

Alma 31:8–35

Denggen ti Nailangitan nga Ama dagiti kararagko.

Nalidayan ni Alma idi nakitana no kasano a nagkararag dagiti Zoramite (kitaen iti Alma 31:24)—saanda a namati ken ni Jesucristo ken kanayonda nga uliten ti isu met laeng a kararag iti maysa a lugar a makita ida ti tunggal maysa (Alma 31:13–14). Ngem ti kararag ni Alma ket napakumbaba ken nangipakita iti pammati ken ni Cristo.

Dagiti Mabalin nga Aktibidad

• Gupgopen iti apagbiit ti estoria ni Alma ken dagiti Zoramite para kadagiti ubbing babaen iti panangusar kadagiti bersikulo manipud iti Alma 31:8–35. Mabalinmo met nga usaren ti “Kapitulo 28: Dagiti Zoramite ken ti Rameumptom” (Dagiti Estoria iti Libro ni Mormon 78–80, wenno ti maitutop a video iti ChurchofJesusChrist.org). Ilawlawag dagiti paggidiatan ti kararag dagiti Zoramite ken ti kararag ni Alma. Awisem dagiti ubbing nga iladawan iti panunotda a nasabatda ti maysa kadagiti ubbing a Zoramite. Ania koma ti ibagada a mangisuro kenkuana no kasano ti agkararag?

• Tulongam dagiti ubbing a mangilasin kadagiti banag nga imbaga dagiti Zoramite iti kararagda (kitaen iti Alma 31:15–18) bayat ti panangtulongda kenka a mangipatakder iti torre ti Rameumptom babaen kadagiti bloke wenno bato. Ilawlawag a saan a kastoy ti rumbeng a panagkararagtayo. Saludsodem kadagiti ubbing no kasano ti rumbeng a panagkararagtayo, ken paikkatmo kadakuada ti maysa a bloke wenno bato para iti tunggal banag a dakamatenda.

Isuro ti Doktrina: In-inauna nga Ubbing

Alma 30

Ballaagannak ii Libro ni Mormon a maibusor kadagiti ulbod a pannursuro.

Mailadawan dagiti ulbod a pannursuro ni Korihor iti Libro ni Mormon a makatulong kadatayo a mangilasin wenno mangilaksid kadagiti isu met laeng a pannursuro iti aldawtayo.

Dagiti Mabalin nga Aktibidad

• I-display dagiti sumagmamano a banag (kas iti kuarta wenno taraon) ken dagiti ay-ayam a kapada dagitoy a banag. Ania ti kaykayat dagiti ubbing? Tulongam dagiti ubbing a mangsukisok iti Alma 30:12–18 kadagiti ulbod ken palso a pannursuro nga insuro ni Korihor maipapan iti Dios.

• Tulongam dagiti ubbing a mangilasin kadagiti ulbod a insuro ni Korihor ken isuratda dagitoy iti maysa a papel a maikabil iti pisarra (kitaen iti Alma 30:12–18, 24). Awisem dagiti ubbing a mangsukisok iti Mateo 30:32-35, nga agsapsapul kadagiti wagas nga insungbat ni Alma kadagiti inuulbod nga imbaga ni Korihor. Saludsodem kadagiti ubbing no kasano a maammuanda a pudno dagiti banag nga insuro ni Alma.

  

  Sanguen ni Korihor ni Alma, ni Robert T. Barrett

Alma 31:5

Nabilbileg ti sao ti Dios ngem iti ania man a banag.

Kaano a nariknam ti bileg ti balikas ti Dios? Panunotem no kasano a mangparegta dagiti padasmo kadagiti ubbing a sursuruam.

Dagiti Mabalin nga Aktibidad

• Awisem dagiti ubbing a mangpanunot iti maysa a banag wenno maysa a nabileg a tao, wenno mangipakita iti sumagmamano a nabileg a banag. Ania ti mangpabileg kadagitoy a banag? Aggigiddan a basaenyo ti Alma 31:5 ken saludsodem kadagiti ubbing no ania iti panagkunada ti kaipapanan daytoy a bersikulo. Kasano a nabilbileg ti sao ti Dios ngem iti espada? Ania ti adda a bilegna a mangaramid?

• Kasaritam a nasapasapa dagiti sumagmamano nga ubbing, ken kiddawem kadakuada a mangpanunot iti maysa a padas nga ibinglay iti klase idi nakatulong kadakuada nga agaramid iti maysa a nasayaat a banag dagiti nasantuan a kasuratan wenno maysa a mensahe manipud iti maysa a lider ti Simbaan. Apay a maayatanda nga agaramid kadagiti nasayaat a banag ti balikas ti Dios?

• Makipagkanta kadagiti ubbing maipapan iti balikas ti Dios, kas iti “Search, Ponder, and Pray” wenno “Follow the Prophet” (Children’s Songbook, 109, 110–11). Mabalinda met a kantaen ti “Scripture Power” (music.ChurchofJesusChrist.org).

Alma 31:8–35

Makapagpakumbabaak.

Iti amin a biddut nga inaramid dagiti Zoramite, ti kinapannakkelda ti kasla namaglladingit unay ken ni Alma. Mabalin a daytoy ti gundaway a mangisuro kadagiti ubbing iti kinapateg iti panagpakumbaba.

Dagiti Mabalin nga Aktibidad

• Tulongam dagiti ubbing a makaawat iti pagdumaan ti panagpannakkel ken panagpakumbaba (kitaen ti “Panagpannakkel” ken “Pakumbaba, Kinapakumbaba” iti Pangiwanwan iti Nasantuan a Kasuratan). Kiddawem kadagiti ubbing nga agsisinnublatda a mangbasa iti Moroni 31:24-28. Wenno aggigiddan a basaen ti “Kapitulo 28: Dagiti Zoramite ken ti Rameumptom” (Dagiti Estoria iti Libro ni Mormon 78–90). Bayat ti panagbasada, kiddawem kadakuada a mangkita no kasano a impakita dagiti Zoramite ti kinapannakkelda. Kasano nga impakita ni Alma ti kinapakumbabana? (kitaen iti Alma 31:30–33).

• Bingayem dagiti ubbing iti kada grupo, ken kiddawem iti tunggal grupo a mangikeddeng iti sungbat kadagiti saludsod a kas kadagitoy: Ania ti nakaiturongan iti puspuso dagiti Zoramite? (kitaen iti Alma 31:24, 28). Ania dagiti sumagmamano a nailubongan a banag a nangiturongan dagiti tao iti puspusoda iti agdama? Apay a maipagarup dagiti tao a nasaysaayatda ngem iti dadduma? No ibinglay ti tunggal grupo ti sungbat, bay-am ida a mangidrowing iti paset iti torre ti Rameumptom iti pisarra. Kalpasanna kiddawen kadakuada a pugasenda dagiti paset ti torre tunggal mapanunotda ti maysa a wagas a pakaipakitaanda iti kinapakumbaba.

Yallukoy ti Panagsursuro iti Pagtaengan

Awisem dagiti ubbing a mangisuro iti pamiliada iti maysa a banag a nasursuroda maipanggep iti bileg ti balikas ti Dios iti agdama.

Panangpadur-as iti Panangisurotayo

Tulongam dagiti ubbing nga agsursuro manipud kadagiti nasantuan a kasuratan. Mabalin a saan unay a kabaelan dagiti inaudi nga ubbing ti agbasa, ngem mabalinmo latta nga iraman ida nga agsursuro manipud kadagiti nasantuan a kasuratan. Kas pagarigan, mabalin a basaem ti maysa a binatog ket awisem ida nga agtakder wenno mangingato iti imada no mangngeganda ti maysa a balikas wenno ragup dagiti balikas. Kalpasanna tulongam a mangipaawat kadakuada ti balikas wenno ragup dagiti balikas. (Kitaen iti Panangisuro iti Wagas ti Mangisalakan, 20–21.)