Ladawan ni Cristo iti a panagparangna kadagiti Nephite ni Andrew Bosley

Oktubre 12–18

3 Nephi 20–26

“Annaknakayo iti Katulagan”

Bayat ti panangbasam iti 3 Nephi 20–26, “amirisenyo dagitoy a banag” (3 Nephi 23:1) tapno maammuan dagiti kinapudno a mariknayo a naparegtakayo a mangibinglay kadagiti ubbing iti klasem.

Isuratmo Dagiti Impresionmo

Yawis ti Panagbibinninglay

Ipasa ti maysa a ladawan ti Mangisalakan iti klase. No iggaman ti tunggal ubing ti ladawan, awisem isuna a mangibinglay iti maysa a banag a insuro ni Jesus wenno inaramidna idi sinarungkaranna dagiti tao iti Libro ni Mormon. Mabalinda nga ibinglay ti maysa a banag a nasursuroda iti pagtaengan wenno iti Primary.

Isuro ti Doktrina: In-inaudi nga Ubbing

3 Nephi 20:1

Makapagkararagak iti pusok.

No nasursuro iti klasem maipapan iti kararag iti napalabas a lawas, mapadur-asmo iti dayta nga adalen iti maysa kadagitoy nga aktibidad.

Dagiti Mabalin nga Aktibidad

• Kiddawen kadagiti ubbing nga ipakita kenka no ania ti aramidenda no agkararagda. Ania ti aramidenda kadagiti imada? kadagiti uloda? kadagagiti matada? Ilawlawag a no dadduma kayattayo a makisarita iti Nailangitan nga Ama, ngem saantayo a makaparintumeng wenno makapagkidem. Ania ti mabalintayo nga aramiden? Ibasam kadagiti ubbing ti 3 Nephi 20:1: “inbilin ni [Jesus] kadakuada a saanda nga isardeng ti agkararag iti puspusoda.” Isaritam kadagiti ubbing no kasano nga agkararagka iti pusom.

• Mangidrowing iti maysa a ngiwat ken maysa a puso iti pisarra. Kiddawen kadagiti ubbing nga itudoda ti ngiwat ket ibagada kenka dagiti sumagmamano a banag nga isaoda no agkararagda. Kalpasanna kiddawem kadakuada nga itudoda ti puso, ket ilawlawagmo a mabalintayo nga ibaga dagita kasta met laeng a banag iti puspusotayo. Paneknekam nga ammo ti Nailangitan nga Ama dagiti rikna ken panunottayo.

3 Nephi 24:8–12

Mangyeg kadagiti bendision ti panagbayad iti apagkapullo.

Saan a namnamaen nga agbayad iti apagkapullo dagiti ubbing a saan pay a nabuniagan. Nupay kasta, saan a nasapa unay nga isuro kadakuada dagiti pagbatayan ken bendision a mainaig iti daytoy a linteg.

Dagiti Mabalin nga Aktibidad

• No adda tawa iti klasem, awisem dagiti ubbing a mangkita iti daytoy. Ania ti mabalin a sumrek iti siled no nakalukat ti tawa? Basaen ti 3 Nephi 24:10, ket ilawlawag a no agbayadtayo iti apagkapullo, aglukat ti “tawa ti langit”, ket sumangbay dagiti bendision iti biagtayo.

• Ipakita kadagiti ubbing ti 10 a sensilio (wenno dagiti dadduma a banag). Awisem ida a mangbilang kadagiti sensilio kenka. Paneknekan a maysa a bendision ti amin a banag nga adda kadatayo manipud iti Nailangitan ng Ama. Ilasinmo ti maysa a sensilio, ket ilawlawagmo a no agbayadtayo ti apagkapullo, itedtayo iti Nailangitan nga Ama ti maysa nga apagkapullo ti matgedantayo. Ipakita dagiti ladawan a mangibagi iti no kasano a mausar ti apagkapullo a mangbendision iti Simbaan ti Apo (kas iti panagpatakder kadagiti templo, panangiwaras iti ebanghelio, ken dadduma pay; kitaen iti Libro ti Arte ti Ebanghelio, num. 109–10, 118–19).

• Aggigiddan nga agkansion iti maysa a kanta maipapan iti apagkapullo, kas iti “I Want to Give the Lord My Tenth” (Children’s Songbook, 150). Ilawlawag dagiti ragup dagiti balikas a mangisuro no apay nga agbayadtayo iti apagkapullo.

3 Nephi 25:5–6

Kayat ti Nailangitan nga Ama nga agsursuroak maipapan kadagiti kapuonanak.

Kas napaltiing kadagitoy a bersikulo, insubli ni Elias dagiti tulbek ti bileg a mamaglantip kadagiti pamiliatayo para iti kinaagnanayon.

Dagiti Mabalin nga Aktibidad

• Basaem ti 3 Nephi 25:6, ken awisem dagiti ubbing a magikabili ti imada iti pusoda tunggal kanito a mangngegda ti balikas a “puso.” Ilawlawag a kayat ti Nailangitan nga Ama a masursuruan ken marikna “dagiti ubbing”—datayo amin— ti ayat para kadagiti “amma”—dagiti nagannaktayo, lelang ken lelongtayo, ken lelang ken lelongtayo iti tumeng.

• Awisem ti maysa a nagannak dagiti ubbing nga agsarita maipapan kadagiti kapuonanda. Wenno isaritam kadagiti ubbing ti maysa nga estoria maipapan iti maysa kadagiti kapuonam; no mabalin ipakitam dagiti ladawan. Paneknekam a kayat ti Nailangitan nga Ama a kadennatayo dagiti pamiliatayo iti agnanayon, ken daytoy ti gapuna no apay nga inikkannatayo kadagiti templo. Aggigiddan a kantaen ti “Families Can Be Together Forever,”” (Children’s Songbook, 188.)

Isuro ti Doktrina: In-inauna nga Ubbing

3 Nephi 23:1, 5

Sipapasnek a masukisokko dagiti nasantuan a kasuratan.

Imbaga ti Mangisalakan iti ummong a mangsukisok kadagiti nasantuan a kasuratan, ket kayatna a siguraduen nga insuratda dagiti balikas dagiti propeta (kitaen iti 3 Nephi 23:1, 5–13; 26:2).

Dagiti Mabalin nga Aktibidad

• Awisem dagiti ubbing a mangbasa iti 3 Nephi 23:1, 5 ken mangsapul iti maysa a balikas a maulit iti mamitlo. Ania ti kayat a sawen ti mangsukisok kadagiti balikas dagiti propeta? Kasano a maigiddiat ti agsuksukisok iti agbasbasa laeng? Isaritam kadagiti ubbing no kasano ti panagsukisokmo kadagiti nasantuan a kasurtan ken no ania ti masarakan idiay.

• Ikkam ti tunggal ubing iti bassit a kard wenno papel, ken awisem ida a mangisurat iti reperensia iti maysa a paggugusto a nasantuan a kasuratan. (Ikkam ida kadagiti singasing no kasapulan.) Pagsisinnublatem ida a mangilemmeng iti kardda iti siled bayat ti panangabbong dagiti dadduma pay nga ubbing iti matmatada. Kiddawen kadagiti ubbing a mangsukisok iti nasantuan a kasuratan, ket no makitada daytoy, aggigiddan a basaenda daytoy. Ania ti makitatayo iti daytoy a nasantuan a kasuratan a napateg kadatayo?

3 Nephi 24:8–12

Ti panagbayad iti apagkapullo ket manglukat kadagiti tawa ti langit.

No sursuruam dagiti ubbing maipapan iti apagkapullo, isaganam ida nga umawat “iti parabur nga awanto ti umdas a siled a manglaon” (3 Nephi 24:10).

Dagiti Mabalin nga Aktibidad

• Isurat iti pisarra ti: No agbayadak iti apagkapullo, ti Apo ket . Awisem dagiti ubbing a mangbasa iti 3 Nephi 24:8–12, ken tulongam ida a mangsapul kadagiti ragup dagiti balikas a mangkompleto iti daytoy a binatog. Ibinglaymo ti maysa a padas a nakabendisionam gapu ta nagbayadka iti apagkapullo.

• Isuratmo ti sumagmamano a gatad ti kuarta iti pisarra, ken tulongam dagiti ubbing a mangpattapatta no mano ti apagkapullo (10 porsiento) a nasken nga itedtayo iti tunggal gatad. Ipakitam kadakuada no kasano a suratan ti donation slip.

• Tulongam dagiti ubbing a mangilista kadagiti sumagmamano a wagas a pakausaran iti apagkapullo tapno mabendisionan ti Simbaan ti Apo (a mangpatakder kadagiti templo, mangiwaras ti ebanghelio, mangipablaak kadagiti nasantuan a kasuratan, ken dadduma pay). Kiddawen kadagiti ubbing a mangidrowing kadagiti ladawan (wenno mangsarak kadagiti ladawan iti magasin ti Simbaan) kadagiti wagas a pakabendisionan ti apagkapullo ti Simbaan.

3 Nephi 25:5–6

Kayat ti Nailangitan nga Ama nga agsursuroak maipapan kadagiti kapuonanak.

Ibilangmo no kasano a maparegtamto dagiti ubbing a mangsukisok kadagiti kapuonanda tapno inton umdasen ti tawenda a mapan iti templo, mabalindanto nga annongen dagiti ordinansa a maipaay kadagita a kapuonan.

Dagiti Mabalin nga Aktibidad

• Ibagam kadagiti ubbing nga aglaon ti 3 Nephi 25:5–6 iti maysa a padto maipapan iti banag a mapasamakto kadagiti ud-udina nga aldaw. Awisem ida a mangbas kadagitoy a bersikulo tapno maammuan no ania daytoy. Paneknekam a naipatungpalen daytoy a padto, ken awisem dagiti ubbing a mangbasa ti maipapan iti daytoy iti Doktrina ken Katulagan 110:13–16 (kitaen met iti Libro ti Arte ti Ebanghelio, num. 95). Ilawlawag a no sursuruentayo maipapan kadagiti kapuonantayo ken aramidentayo ti aramid iti templo para kadakuada, maiturong ti puspusotayo kadagiti ammatayo.

• Ibagam kadagiti ubbing ti maipapan iti maysa kadagiti kapuonam a natayen nga awanan iti gundaway a mabuniagan. Mangipakita iti maysa a ladawan no mabalin. Paneknekam nga ay-ayaten ti Nailangitan nga Ama daytoy a tao, isu nga insaganana ti maysa awagas a pakaawatanna iti pannakabuniag babaen iti aramid a maar-aramid iti templo. Kiddawen kadagiti ubbing a mangsapul iti ragup dagiti balikas iti 3 Nephi 25:6 a mabalin a mangiladawan iti no kasano ti riknam maipapan iti kapuonam.

• Tulongam dagiti ubbing a mangpunno iti simple a family tree nga addaan kadagiti nagan dagiti nagannak ken lelong ken lelangda. Allukoyem ida a mangkiddaw kadagiti nagannakda a mangtulong kadakuada a mangnayon ti ad-adu pay a nagnagan.

Yallukoy ti Panagsursuro iti Pagtaengan

Awisem dagiti ubbing a mangkiddawka dagiti nagannak wenno lelong ken lelangda nga agestoria maipapan kadagiti kapuonanda.

Panangpadur-as iti Panangisurotayo

Masursuro dagiti ubbing iti adu a wagas. Maragsakan dagiti ubbing nga agsursuro babaen dagiti baro ken nadumaduma a padas. Usarem dagiti aktibidad a mangpalugod kadakuada nga aggunay, mangusar iti amin a panagriknada, ken mangpadas kadagiti baro a banag. (Kitaen iti Panangisuro iti Wagas ti Mangisalakan, 25.)