Pija in Kraist ippān armej in Nipai ro jān Andrew Bosley

Oktoba 12–18

3 Nipai 20–26

“Kom̧ij Ajri ro Jān Bujen eo”

Ilo am̧ riit 3 Nipai 20–26, “etale men kein ilo niknik” (3 Nephi 23:1) n̄an pukot m̧ool ko me kwoj en̄jake reim̧we n̄an kwaļo̧ke n̄an ajri ro n̄an kūlaaj eo am̧.

Je En̄jake ko Rej Im̧we Eok

Kajjitōk bwe ren Kwaļo̧k

Leto-letak juon pija in Rilo̧mo̧o̧r ipeļaakin kūlaaj eo. N̄e kajjojo ajri rej jibwe pija eo, kajjitōk ippāer n̄an kwaļo̧k jet men me Jisōs eaar katakin ak kar kōm̧m̧ane ke Eaar loļo̧k armej ro ilo Bok in Mormon. Remaron̄ kwaļo̧k jet men raar ekkatak ilo m̧weeo ak ilo Būraimere.

Katakin Katak ko: Ajri ro Reddikļo̧k

3 Nipai 20:1

Imaron̄ jar ilo būruwō.

Eļan̄n̄e kūlaaj eo am̧ eaar ekkatak kōn jar wiik eo ļo̧k, kwomaron̄ kōm̧m̧an bwe katak eo en ippān lo̧k juon iaan m̧akūtkūt kein.

Makūtkūt ko Maron̄ Kōm̧m̧ani

• Kajjitōk ippān ajri ro n̄an kwaļo̧k n̄an eok ta eo rej kōm̧m̧ane n̄e rej jar. Ta eo rej kōm̧m̧an kōn peier? bōraer? mejeer? Kōmeļeļeik bwe jet iien jej kōņaan kōnono ippān Jemedwōj Ilan̄, ak jeban bukwelōlō ak kiil mejed. Ta eo jemaron̄ Kōm̧m̧ane? Riit n̄an ajri ro jān 3 Nipai 20:1: “[Jisōs] eaar kakien er bwe en jab bōjrak aer jar ilo būruweer.” Ba n̄an ajri ro ewi wāween am̧ jar ilo būruwōm̧.

• Jin̄aik juon lon̄i im juon bōro ilo boot eo. Kajjitōk ippān ajri ro n̄an jitōn̄ ļo̧k lon̄i eo im kwaļo̧k n̄an eok jet men ko rej ba n̄e rej jar. Innām kajjitōk ippāer n̄an jitōn̄ ļo̧k bōro eo, im kōmeļeļeik bwe jemaron̄ ba ejja men ko wōt ilo būruwōd. Kam̧ool bwe Jemedwōj Ilan̄ ejeļā en̄jake im ļōmņak ko ad.

3 Nipai 24:8–12

Kōļļā juon m̧ōttan jon̄oul ej bōktok jeraam̧m̧an ko.

Ajri ro rejjan̄in peptaij rejjab aikuj kōļļā juon m̧ōttan jon̄oul. Ijoke, ejjab m̧ōkaj n̄an katakin er kōn pedped ko im kōjeraam̧m̧an ko rej ekeijeļo̧k ippān kien in.

Makūtkūt ko Maron̄ Kōm̧m̧ani

• Eļan̄n̄e kūlaajruum̧ eo am̧ ewōr wintō in, kajjitōk ippān ajri ro n̄an kalimjōke. Ta eo ej itok n̄an ruum̧ eo n̄e wintō eo epeļļo̧k? Riiti 3 Nipai 24:10, im kōmeļeļeik bwe n̄e jej kōļļā juon m̧ōttan jon̄oul, “wintō ko an lan̄” repeļļo̧k, im kōjeraam̧m̧an ko remaron̄ itok n̄an mour ko ad.

• Kwaļo̧k n̄an ajri ro 10 jāān ko (ak kein katak ko jet) Kajjitōk ippāer bwe ren bwine jāān ko ippam̧. Kam̧ool bwe aolep men ewōr ippād ej juon kōjeraam̧m̧an jān Jemedwōj Ilan̄. Kōjenoļo̧k juon jāān, im kōmeļeļeik bwe n̄e jej kōļļā juon m̧ōttan jon̄oul, jej leļo̧k n̄an Jemedwōj Ilan̄ juon m̧ōttan in ta eo jaar bōke. Kōjeno̧ļo̧k pija ko me rej pinej jenkwan ekōjkan an juon m̧ōttan jon̄oul jerbal n̄an kōjeraam̧m̧an Kabun̄ eo an Irooj (āinwōt kalōk tampeļ ko, jaketo-jaketak gospel eo, im ko jet; lale Gospel Art Book, nos. 109–10, 118–19).

• Al ippān doon juon al kōn juon m̧ōttan jon̄oul, āinwōt “I want to Give the Lord My Tenth” (Children’s Songbook,150). Kalikkar naan ko me rej kwaļok unin ad kōļļā juon m̧ōttan jon̄oul.

3 Nipai 25:5–6

Jemedwōj Ilan̄ ekōņaan bwe in katak kōn ro jibu im jim̧m̧aō.

Āinwōt kar kanaan ilo eoon kein, Elija ekar kōjepļaaktok kii ko an liāp bwe jen maron̄ pād ippān baam̧le ko ad indeeo.

Makūtkūt ko Maron̄ Kōm̧m̧ani

• Riiti 3 Nipai 25:6, im kajjitōk ippān ajri ro n̄an likūt peier ioon bōraer aolep iien n̄e rej ron̄ naan eo “bōro.” Kōmeļeļeik bwe Jemedwōj Ilan̄ ekōņaan “bwe ajri ro” im kōj aolep-ren jeļā kake im en̄jake iakwe eo n̄an “ro jemed”—ro jined im jemed, ro jibwiid im jim̧m̧ad, im jibwin im jim̧m̧ad jined im jemed.

• Kajjitōk ippān ro jinen ak jemen juon iaan ajri ro bween kwaļo̧k kōn ro jibwieer im jim̧m̧aer. Ak kwaļo̧k n̄an ajri ro juon bwebwenato kōn juon iaan ro jibum̧ im jim̧m̧am̧; kwaļo̧k pijaier n̄e ekkar. Kam̧ool bwe Jemedwōj Ilan̄ ekōņaan bwe jen pād ippān baam̧le ko ad indeeo, im en̄in ej unin An letok n̄an kōj tampeļ ko. Al ippān doon “Families Can Be Together Forever” (Children’s Songbook,188).

Katakin Katak ko: Ajri ro Rerūttoļo̧k

3 Nipai 23:1, 5

Imaron̄ tiljek ilo lin̄ūri jeje ko rekwojarjar .

Rilo̧mo̧o̧r eaar jiron̄ jarlepju eo n̄an pukot jeje ko rekwojarjar, im Eaar lukkuun kōņaan bwe ren je naan ko an rikanaan ro (lale 3 Nipai 23:1, 5–13; 26:2).

Makūtkūt ko Maron̄ Kōm̧m̧ani

• Kajjitōk ippān ajri ro n̄an riiti 3 Nipai 23 1,5 im pukot naan eo ej ālij jilu alen. Ta meļeļein n̄an pukot naan ko an rikanaan ro? Ewi wāween an kappukot oktak jān baj riit? Ba n̄an ajri ro ewi wāween am̧ pukot jeje ko rekwojarjar im ta eo kwoj loe.

• Leļo̧k n̄an ajri ro juon kaat jidikdik ak jidik peba, im kajjitōk ippāer n̄an je eoon eo an juon eoon em̧m̧antata ippaer. (Jipan̄ er eļan̄n̄e emenin aikuj.) Kōm̧m̧an bwe ren bōk kūņaer nooje kaat eo aer ilo ruum̧ eo ilo an ajri ro jet pinej mejeer. Kajjitōk ippān ajri ro n̄an pukot eoon in, im n̄e reloe, riit ippān doon. Ta eo jej loe ilo eoon in me eaorōk n̄an kōj?

3 Nipai 24:8–12

Kōļļā juon m̧ōttan jon̄oul ej kōppeļļo̧k wintō ko Ilan̄

N̄e kwoj katakin ajri ro kōn juon m̧ōttan jon̄oul, kwoj kepooj er n̄an bōk “juon kōjeraam̧m̧an me enaaj jabwen ruum̧ n̄an bōke” (3 Nipai 24:10).

Makūtkūt ko Maron̄ Kōm̧m̧ani

• Je ioon boot eo Eļan̄n̄e ij kōļļā juon m̧ōttan jon̄oul, Irooj enaaj . Kajjitōk ippān ajri ro n̄an riiti 3 Nipai 24:8–12, im jipan̄ er pukot naan ko n̄an kadedeļo̧k jentōj eo. Kwaļo̧k juon en̄jake eo me kwaar jeraam̧m̧an kōn am̧ kōļļā juon m̧ōttan jon̄oul.

• Je jet oran jāān ioon bo̧o̧t eo, im jipan̄ ajri ro bwine jete juon m̧ōttan jon̄oul (10 bōjjāān) jej aikuj leļo̧k n̄an kajjojo oran jāān. Kwaļo̧k n̄an er kilen kanne peba in kōļļā juon m̧ōttan jon̄oul eo.

• Jipan̄ ajri ro kōlaajrake ilo bo̧o̧t eo jet iaan wāween ko juon m̧ōttan jon̄oul ko rej jerbal n̄ani n̄an kōjeraam̧m̧an Kabun̄ eo an Irooj (n̄an kalōk tampeļ ko, kwaļo̧k gospel eo, je jeje ko rekwojarjar, im ko jet). Kajjitōk ippān ajri ro n̄an jin̄aik pija ko (ak pukot pija ko ilo māākjin ko an Kabun̄ in) kōn wāween an juon m̧ōttan jon̄oul ko kōjeraam̧m̧an Kabun̄ in

3 Nipai 25:5–6

Jemedwōj Ilan̄ ekōņaan bwe in katak kōn ro jibu im jim̧m̧aō.

Ļōmņkae wāween eo kwnaaj im̧we ajri ro n̄an pukot ro jibwier im jim̧m̧aer bwe n̄e rerūtto im etal n̄an tampeļ, ren maron̄ kōm̧m̧ani kain̄i ko ilo etan ro jibwier im jim̧m̧aer.

M̧akūtkūt ko Maron̄ Kōm̧m̧ani

• Ba n̄an ajri ro bwe 3 Nipai 25:5–6 epād ie kanaan ko kōn juon iien me ekar waļo̧k ilo raan kein āliktata. Kajjitōk ippāer n̄an riiti eoon kein im pukot kar ta eo. Kam̧ool bwe kanaan in ekar kūrm̧ool, im kajjitōk ippān ajri ro n̄an riit kake ilo Katak im Bujen ko 110:13–16 (bar lale Gospel Art Book, no. 95). Kōmeļeļeik bwe n̄e jej ekkatak kōn ro jibwiid im jim̧m̧ad im kōm̧m̧ane jerbal in tampeļ eo n̄an er, būruweer enaaj oktakļo̧k n̄an ro jemeed.

• Ba n̄an ajri ro kōn juon iaan ro jibum̧ im jim̧m̧am̧ me rekar mej ilo aer kar jab peptaij. Kwaļo̧k juon pija n̄e ekkar. Kwaļo̧k am̧ naan in kam̧ool bwe Jemedwōj Ilan̄ ej iakwe armej in, kōn menin Eaar kepooj juon iaļ n̄an e n̄an peptaij kōn jerbal ko rej dedeļo̧k ilo tampeļ ko. Kajjitōk ippān ajri ro n̄an pukot juon naan ilo 3 Nipai 25:6 me emaron̄ kwaļo̧k ekōjkan am̧ en̄jake kōn ro jibum̧ im jim̧m̧am̧.

• Jipan̄ ajri ro kanne peba in menmenbwij an baam̧le kōn ro jineer im jemeer im jibwieer im jim̧m̧aer. Rōjan̄ er n̄an kajjitōk ippān jineer im jemeer n̄an jipan̄ er kanne āt ko.

Kōketak Ekkatak ilo M̧weo

Kajjitōk ippān ajri ro n̄an kajjitōk ippān jineer im jemeer n̄an jipan̄ n̄an kwaļo̧k n̄an er bwebwenato ko kōn ro jibwieer im jim̧m̧aer.

Kōkm̧anm̧anļo̧k Ad Katakin

Ajri ro rej ekkatak ilo elōn̄ kain wāween ko. Ajri ro rej m̧ōņōņō ilo aer ekkatak jān en̄jake ko reokkotaktak. Kōjerbal makūtkūt ko me rej jipan̄ er itok limoer, kōjerbal aolep en̄jake ko, im kajjieon̄ kōjerbal men ko rekāāl. (Lale Teaching in the Savior’s Way,25