Jar eo an Kraist, jān Derek Hegsted

Oktoba 19–25

3 Nipai 27–4 Nipai

“Eaar Ejjeļo̧k Bar Armej Rem̧ōņōņōļo̧k”

Ilo am̧ riiti 3 Nipai 27–4 Nipai, ļōmņake en̄jake ko, kōļmenļo̧kjeņ ko, jeje ko rekwojarjar, im bwebwnato ko me remaron̄ jipan̄ ajri ro meļeļe katak ko ilo jebta kein.

Je En̄jake ko Rej Im̧we Eok

Kajjitōk bwe ren Kwaļo̧k

Jipan̄ ajr ro keememej ta eo raar ekkatak wiik ko remootļo̧k kōn ta eo Jisōs eaar katakin armej eo ilo āneen Bountiful. Kōmeļeļe bwe Bok in Mormon ej jiron̄ kōj kōn armej ro raar jeraam̧m̧an ke raar pokake ta eo Jisōs eaar katakin er.

Katakin Katak ko: Ajri ro Reddikļo̧k

3 Nipai 27:1–22

Ij uwaan Kabun̄ eo an Jisōs Kraist.

Ewi wāween an naan ko an Rilo̧mo̧o̧r n̄an Rijilōk ro An jipan̄ ajri ro meļeļe aorōk eo n̄an pād ilo Kabun̄ eo an Jisōs Kraist.

M̧akūtkūt ko Maron̄ Kōm̧m̧ani

• Kajjitōk ippān kajjojo ajri bwe ren ba etaer. Etke eaorōk āt ko etad? Ba n̄an er bwe rijilōk eo an Jisōs rekar kōņaan jeļā āt ta eo ren ba etan Kabun̄ eo an Kraist. Riit n̄an er uwaak eo an Rilo̧mo̧o̧r ilo 3 Nipai 27:7. Wōn eo Jisōs ekar ba Kabun̄ eo An en ņaetan?

• Kōm̧m̧ane juon pāāj me ej ba “Ij Pād ilo Kabun̄ eo an Jisōs Kraist im Armej ro Rekwojarjar ilo Raan-ko Āliktata” n̄an kajjojo ajri bwe ren kōņak ļo̧k n̄an m̧weeo. Kōm̧m̧an bwe ajri ro ren kōļare pāāj ko aer. Al “The Church of Jesus Christ” (Children’s Songbook,77) āinwōt juon kūlaaj. Ba n̄an er etke kwoj m̧ōņōņō in pād ilo Kabun̄ in, im kajjitōk ippān ajri ro etke rej m̧ōņōņō kōn Kabun̄ in.

• Jipan̄ ajri ro likūt bajōļ ko ippān doon ilo peij in m̧akūtkūt eo an wiik in. Kōmeļeļeik bwe Jisōs ekōņaan bwe Kabun̄ eo An en ekkāļ ioon gospel eo An, im kōjebal peij in m̧akūtkūt eo im̧ kōnono n̄an ajri ro kōn ta meļeļein.

4 Nipai 1:2–3, 15–17

Mour kake gospel in ebōktok m̧ōņōn̄ō.

Lem̧ōņōņō eo an armej ewaļo̧k ilo 4 Nipai emaron̄ jipan̄ ajri ro ekkatak kōn m̧ōņōņō eo me ej itok jen mour kake gospel in.

M̧akūtkūt ko Maron̄ Kōm̧m̧ani

• Kajjitōk ippān ajri ro n̄an kwaļo̧k ta eo ekōm̧m̧an bwe ren m̧ōņōņō. Ba n̄an ajri ro kōn m̧ōņōņō eo an armej ro ilo 4 Nipai, riiti naan ko raorōk jān eoon 2–3 im 15–17. Kwomaron̄ bar etal n̄an “Chapter 48: Peace in America” (Book of Mormon Stories, 136–37, ak pija in alooj eo ilo ChurchofJesusChrist.org). Kwaļo̧k bwe armej ro raar m̧ōņōņō kōnke raar oktakļo̧k n̄an Irooj, raar mour kōn kien ko, im raar iakwe doon.

• Kwaļo̧k pija in armej ro relem̧ōņōņō. Kōmeļeļeik bw armej ro ilo 4 Nipai raar m̧ōņōņō ium̧win 200 iiō ko kōnke raar aolep kajjieon̄ ijo em̧m̧antata ilo er n̄an mour kake gospel in. Jipan̄ ajri ro ļōmņake jet kien ko me remaron̄ pokake. N̄an waanjon̄ok, kwomaron̄ riiti ilo 4 Nipai 1:15 n̄an kwaļo̧k bwe armej ro jab m̧an doon ļo̧k wōt n̄an jidik. Kajjitōk ippān ajri ro n̄an pokake kien eo rej ļōmņke. Al ippān doon juon al kōn m̧ōņōņō eo me ej itok jān mour kake gospel in, āinwōt “When We’re Helping” (Children’s Songbook,198).

• Riiti eoon ko jen 4 Nipai 1:24–29, 34–35, im 43 me ej kōmeļeļeik ta eo waļo̧k ke jet iaan Rinipai ro raar bōjrak aer pokake kien ko. Ilo am̧ kōm̧m̧ane, kajjitōk ippān ajri ro n̄an kōm̧m̧ane juon mej ebūrom̧ōj n̄e rej ron̄ juon men eo ejjab lem̧ōņōņō. Kam̧ool bwe kōjparok kien ko ej tōl ļo̧k n̄an m̧ōņōņō.

Katakin Katak ko: Ajri ro Rerūttoļo̧k

3 Nipai 27:3–8

Ij uwaan Kabun̄ eo an Jisōs Kraist.

Ļōmņake wāwen am̧ naaj jipan̄ ajri ro kwoj katakin kile kōjeraam̧m̧an ko reļap me rej itok jen erom̧ juon membōr in Kabun̄ eo an Jisōs Kraist.

M̧akūtkūt ko Maron̄ Kōm̧m̧ani

• Jipan̄ ajri ro riiti 3 Nipai 27:3, pukote kajjitōk eo rijilōk eo an Jisōs raar kajjitōk Ippān. Innām kajjitōk ippāer n̄an lale ilo 3 Nipai 27:5–8 n̄an uwaake. Ekkar n̄an eoon kein, etke etan Kabun̄ in eaorōk?

• Jipan̄ ajri ro ļōmņake kurup ko reinjuon rej pād ie, āinwōt juon baam̧le ak juon Būraimere kūlaaj. Kajjitōk ippāer n̄an ba n̄an eok ta eo em̧m̧an ippāer n̄an pād ilo kajjojo kurup kein. Kajjitōk ippān ajri ro n̄an jipan̄ eok je kajjojo naan ko ilo etan Kabun̄ in ilo juon peba jidikdik ejeno̧ļo̧k. Innām kajjeplōklōki peba ko, im kajjitōk ippān ajri ro n̄an karōki naan ko ippān doon. Ta kōjeraam̧m̧an ko jej būki kōnke jej membōr in Kabun̄ eo an Jisōs Kraist im Armej ro Rekwojarjar ilo Raan-ko Āliktata.

3 Nipai 27:13–22

Kabun̄ eo an Jisōs Kraist ej ekkāl ioon gospel eo.

Rilo̧mo̧o̧r eaar kōmeļeļeik gospel eo An ilo 3 Nipai 27. Ewi wāween An in naan jipan̄ ajri ro meļeļe ta in gospel?

M̧akūtkūt ko Maron̄ Kōm̧m̧ani

• Kōmeļeļeik ajri ro bwe naan in gospel meļeļein “nuuj eo em̧m̧an” (lale Bible Dictionary, “Gospels”). Jipan̄ ajri ro kappukote 3 Nipai 27:13–15 jet men rem̧m̧an n̄an er āinwōt nuuj eo em̧m̧an. Etke jej kam̧m̧oolol n̄an jeļā kōn gospel eo an Jisōs Kraist?

• Je ioon bo̧o̧t eo pedped in gospel eo āinwōt tōmak, ukweļo̧k, peptaij, Jetōb Kwojarjar, im niknik n̄an jem̧ļo̧kin. Kajjitōk ippān ajri ro n̄an kappukote 3 Nipai 27:19–21, pukot naan kein ak naan ko me Jisōs ej kōmeļeļeik gospel eo An.

• Kajjitōk ippān ajri ro n̄an antoone ewōr juon m̧ōttaer eo ej kajjitōk ippāer ta eo rej tōmake āinwōt juon membōr in Kabun̄ in. Jipan̄ er pukot m̧ool ko ilo 3 Nipai 27:13–21 me remaron̄ kwaļo̧k n̄an kōmeļeļeik ta jej tōmake.

• Kajjitōk ippān ajri ro n̄an kālet juon iaan m̧ool ko ilo gospel in me Rilo̧mo̧o̧r eaar katakin ilo 3 Nipai 27:13–21 me rekōņaan jeļā eļapļo̧k. Jipan̄ er kōjerbal footnotes, Topical Guide, ak Guide n̄an Jeje ko Rekwojarja n̄an pukot juon eoon ak ruo m̧ool rej iokļo̧k. Kajjitōk ippāer n̄an kwaļo̧k jeje ko aer rekwojarjar n̄an doon im ta eo raar ekkatak. Etke jej kam̧m̧oolol n̄an jeļā kōn gospel eo an Jisōs Kraist?

4 Nipai

Mour kake gospel in ebōktok m̧ōņōn̄ō.

Kōnke raar oktak tok n̄an Jisōs Kraist im gospel eo An, kar kōmeļeļeik armej ro ilo 4 Nipai rekar maron̄ in kajutak juon jukjukin pād eo eaenōm̧m̧an ilo juon wōt. Ta eo ajri ro remaron̄ ekkatak jān er?

M̧akūtkūt ko Maron̄ Kōm̧m̧ani

• Kepooj peba ippān ļo̧k naan ko jān 4 Nipai 1:2–3, 5, im 15–17 me ej kōmeļeļeik kōjeraam̧m̧an ko armej ro raar būki (āinwōt “eaar ejjeļo̧k jum̧ae ilo āne eo”). Likūt peba ko ilo juon nine, im kōm̧m̧an bwe kajjojo ajri ren bōk juon im riiti. Rōjan̄ ajri ro n̄an pukot naan ilo eoon kein jān 4 Nipai. Ta eo jej katak jān naan kein? Ta ko rej juon wōt jej loi kōtaan eoon kein im meļeļeom Zaion ilo Moses 7:18?

• N̄an jipan̄ ajri ro kōjerbal ta eo eaar waļo̧k ilo 4 Nipai 1:15–16, kwaļo̧k n̄an er jekjek ko ijo armej ro raar illu ippān doon. Kajjitōk ippāer n̄an kōnono kōn ta jekjek ko remaron̄ āinļo̧k wōt n̄e rej kajjieon̄ in mour ilo “ ejeļo̧k jum̧ae.” Etke epidodo n̄an bōbrae jum̧ae n̄e ewōr ad “iakwe n̄an Anij” ilo būruwōd.

• Riit ippān ajri ro eoon kein ilaļ, im kajjitōk ippāer n̄an pukot un ko Rinipai im Rileman ro raar jab bar aenōm̧m̧an im m̧ōņōņō: 4 Nipai :20, 24–29, 34–35, im 43. Elmen ad bōbrae kauwōtata kein? Jipan̄ ajri ro lo wāween ko jemaron̄ bōbrae utiej bōro ilo etale Teachings of Presidents of the Church: Ezra Taft Benson (2014), 238–39.

Kōketak Ekkatak ilo Mweo

Rōjan̄ ajri ro n̄an kālet juon men renaaj kōm̧m̧an n̄an bōktok aenōm̧m̧an im m̧ōņōņō n̄an m̧weeo im̧weer im kwaļo̧ke n̄an baam̧le ko aer.

Kōkōm̧anm̧anļo̧k Ad Katakin

Jipan̄ ro jinen im jemen ajri ro. “Ro jinen im jemān rej rūkaki ro raorōktata ilo gospel eo n̄an ajri ro nejier—ewōr ippād jim̧or eddo im kajoor eo eļaptata n̄an ukōt ajri ro nejier (lale Deuteronomi 6:6–7 Ilo am̧ katakin ajri ro ilo mōnjar eo, jar im kappukōt wāween ko n̄an rie ro jineer im jemāer” (Teaching in the Savior’s Way, 25