“Ritembwa 7–13. Moronaai 7–9: ‘Ma E na Tabekiko Rake Kristo’” Nakomai, Iriirai—Ibukin te Moanrinan: Ana Boki Moomon 2020 (2020)
“Ritembwa 7–13. Moronaai 7–9,” Nakomai, Iriirai—Ibukin te Moanrinan: 2020
Minerva Teichert (1888–1976), Moronaai: Te Kabanea n Nibwaite, 1949–1951, te oera iaon te mitinaaiti, 34¾ x 47 te inti. Brigham Young University Museum of Art, 1969
Ritembwa 7–13
Moronaai 7–9
“Ma E na Tabekiko Rake Kristo”
Kamatebwaian Moronaai 7–9 ma te tataro e na kaoa te Tamnei ae Raoiroi. E na buokiko n ataa kainnanoia ataei ake n am kiraati.
Korei Am Namakin
Kaoa te Tibwatibwa
Kauringiia ataei teuana te bwai ae ko kaoiia bwa a na karaoia imwin te reirei n te wiiki ae nako ke te bwai ae a tia n reiakinna n aia utu n te wiiki aei. Tuangiia bwa a na tibwai baike a reiakin.
Reirei te Reirei: Ataei aika a Uarereke
Ngkana iai au onimaki, I kona ni karaoi bwaai nako ake e kainnanoai te Atua bwa N na karaoi.
Ataei aika iai aia onimaki iroun Iesu Kristo ao aia koaua ni mwaakana a kona ni karaoi bwaai aika a korakora n aia tai ni beku Ibukina.
Mwakuri ni Kauring aika a kona ni Karaoaki
-
Wareka Moronaai 7:33, ao kaoiia ataei bwa a na teirake ngkana a ongo te taeka ae “onimaki.” Kabwarabwara bwa ti kaota ara onimaki iroun Iesu Kristo ngkana ti kawakin Ana tua nako. Buokiia ataei bwa a na koroboki iaon te burakibooti ni korei tabeua bwaai ake e tangiria Iesu bwa a na karaoi, n aron te ongotaeka nakoia aia karo ke te kokoaua. Kaota am koaua bwa ara onimaki iroun Iesu Kristo e na kona ni buokira bwa ti na kawakin tua nako.
-
Kaoti tabeua tamnei ake a kaota temanna man ana Boki Moomon (ke ni booki aika a tabu ake tabeua) ae kakoroa nanon te bwai ae kakawaki ibukina bwa iai ana onimaki iroun Iesu Kristo (taraa, te katoto, Bokin Tamnein te Euangkerio, nambwa. 19, 70, 78, 81). Buokiia ataei bwa a na karakina te karaki are e kaotaki n te tamnei. Tuangiia bwa ibukina bwa iai aia onimaki aomata aikai iroun Iesu Kristo, a anganaki te mwaaka bwa a na karaoi baike E kainnanoia bwa a na karaoi.
Kakoauan Iesu Kristo e kona n anganai te kantaninga.
E mwaiti aomata n te aonaaba aika a namakinna bwa akea aia kantaninga. Ko na kanga ni buokiia ataei ake ko reireinia bwa a na kunea te kantaninga iroun Iesu Kristo?
Mwakuri ni Kauring aika a Kona ni Karaoaki
-
Wareka ao kabwarabwara Moronaai 7:41 nakoia ataei, ao tuangiia bwa a na katei baia ngkana a ongo ana taeka Moomon bwa e riai n iai iroura te kantaninga. Tuangiia ataei taekan te kantaninga are ko namakinna ibukina bwa iai Iesu Kristo.
-
Tuangiia ataei bwa a na iangoa temanna ae a kinaa ae iai ana kaangaanga ma te bwai teuana. Kaoiia ataei bwa a na korea te tamnei ibukin te aomata anne are e kona ni kauringa bwa e na karekea te kaantaninga iroun Iesu Kristo.
“Te tangira ae kororaoi bon ana tangira Kristo ae itiaki.”
Tera baika a riki ni maium aika a kona ni buokiia ataei n reiakina te akoi nakoia tabeman ao karaoi mwakuri nakoia ma te tangira?
Waaki ni Kakukurei aika a Kona ni Karaoaki
-
Tuangiia ataei bwa a na kaokioka te mwakoro n taeka ae: “Te tangira ae kororaoi bon ana tangira Kristo ae itiaki” (Moronaai 7:47). Buokiia ataei n iangoi kawai ake e kaota te tangira Iesu Kristo nakoia tabeman (tamnei a kona n ibuobuoki, n aron Bokin Tamnein te Euangkerio, nambwa. 55, 83, 84). E kanga Ngaia ni kaota te tangira nakoira? Antai ae ti kona ni kaota ara tangira nakoina n aron are e karaoia Iesu? Ibukin te katoto, kaota te witeo ae “My Brother Hyrum” (ChurchofJesusChrist.org).
-
Kaoiia ataei bwa a na korei tamneia ike a kaota iai te tangira nakon temanna. Tuangiia bwa a katekea aia tamnei n te tabo are e na kauringiia bwa a na tangiriia tabeman n aron are e karaoia Iesu.
Reirei te Reirei: Ataei aika a Ikawai
I kakabwaiaki ngkana I onimakina Iesu Kristo.
Moomon e tangiriia aomata bwa a na ataia bwa a aki toki taian kakai ngke e toki ana mwakuri te Tia Kamaiu iaon te aba. Ti ngkana iai ara onimaki iroun Iesu Kristo, ti kona, man Ana ibuobuoki, ni karaoi bwaai nako ake E kainnanoira bwa ti na karaoi—n ikotaki ma baika a kakai.
Waaki ni Kakukurei aika a Kona ni Karaoaki
-
Buokiia atae ni korei iaon te burakibooti tabeua “[bwaai] aika raoiroi” aika ti kona ni karekei rinanon ana euangkerio Iesu Kristo n aron karekean te utu ae akea tokina, te oki rikaaki nakon Tamara are i Karawa, ao kabwaraakin ara bure. Imwina kaoiia ataei bwa a na wareka Moronaai 7:21–22 ao 25, ni kakaea bwa ti na kanga ni karekei ni kabane bwaai aika raoiroi. Ti na kanga ni kaota ara onimaki iroun Iesu Kristo ao Ana berita nako?
-
Wareka Moronaai 7:33 nakoia ataei ao tuangiia bwa a na kakauongo bwa tera ae ti kona ni karaoia ngkana iai ara onimaki iroun Iesu Kristo. N riaina, tibwauai baika ko a tia n rinanoi ngke te onimaki e buokiko ni karaoa are e tangiriko te Atua bwa ko na karaoia. Buokiia ataei n iangoi man tibwauai katoto man maiuia. E kanga te onimaki iroun Kristo ni karaoa te bitaki ni katoto aikai?
I kona ni karekea te kantaninga inanon Iesu Kristo, n taai naba aika kaangaanga.
Moomon ao Moronaai a kaitara ma waaki aika a kabwaranano, ma a karekea te kantaning iroun te Tia Kamaiu Iesu Kristo. Ko na kanga ni buokiia ataei ni karekea te kantaninga iroun Kristo ngkana a bwarannano?
Waaki ni Kakukurei aika a Kona ni Karaoaki
-
Buokiia ataei ni korei tabeua kaangaanga aika a kona ni karikia aomata nakon namakinan te bwarannano ke te akea ni kantaninga. Kaoiia ataei bwa a na wareka Moronaai 7:40–41 ao 9:25–26, ni kakaea te bwai ae a kona ni buoka temanna ae namakina te bwarannano. Tuangiia bwa e kanga Iesu Kristo ao Ana euangkerio n tia ni buokiko inanon taai ni kaangaanga.
-
Kaoiia ataei bwa a na korea te rongorongo nakon temanna ae namakina te bwarannano ni buokiia ni kakaea te kantaninga iroun Kristo, n aron are e karaoia Moomon ibukin natina te mwaane ni Moronaai 9:25–26. Kaungaia ataei bwa a na kabonganai taeka ao mwakoro n taeka man kiibu aikai n aia rongorongo.
-
Kaona te konteina n te ran, ao karini uoua bwaai inanona—teuana ae beti ao teuana ae iinako. Kabotaua te bwai are e beti nakon te aomata are iai ana kantaninga iroun Kristo. Bootaki ni wareka Moronaai 9:25. E kanga Kristo n “[tabekira] rake” n te tai are ti kaitara iai ma kakatai aika kaangaanga? Buokiia ataei n iangoi kawai ake ti kona ni kawakina te Tia Kamaiu ao Ana reirei aika kaunganano “n [aia] iango n aki toki.”
“Te tangira ae kororaoi bon ana tangira Kristo ae itiaki.”
Karikirakean te bwaintangira are te tangira ae kororaoi bon te kouru ibukin te maiu. Ko na kanga ni kaungaia ataei n ukora ana tangira Kristo ae itiaki?
Waaki ni Kakukurei aika a Kona ni Karaoaki
-
Kaoiia ataei bwa a na tibwauaia bwa tera irouia nanon te taeka ae te “tangira ae kororaoi”. Imwina ao kaoa temanna te ataei bwa e na wareka Moronaai 7:45. (Ngkana iai tabeua taeka n te kibu aei ae kaangaanga te oota iai, buokiia ataei bwa a na kakaei nanoia n te rikitinare.) Tuangiia ataei bwa a na maroroakinia aomata aika a kinaia ake banna aika raoiroi ibukin te tangira ae kororaoi. Bukin tera te tangira ae kororaoi e aranaki bwa “ana tangira Kristo ae itiaki”? (Moronaai 7:47). Tera ae e reireiniira te kibu 48 bwa ti na kanga n onrake n te tangira ae kororaoi? Kaungaia ataei ni kabane bwa a na tataro ibukin te tangira ae kororaoi n te wiiki aei ao ni kakaei kawai ni kaota te tangira ae kororaoi nakoia tabeman.
-
Buokiia ataei bwa a na iangoi kawai ake Iesu e kaota iai te tangira ae kororaoi (taraa, katoto aika, Ruka 23:34; Ioane 8:1–11; Ita 12:33–34). Ti na kanga ni kona ni ira Ana katoto?
-
Tuangiia ataei bwa a na korei araia aomata aika a kinaia iaon mwakoro ni beeba ao ni katikui inanon te baeki ae uarereke ke te kaonteina. Kaoiia bwa a na uota aia kaonteina nakon mweengaia, n rinea te ara mai iai ni katoa bong, ao ni karaoa te bwai ae e kaota iai te tangira ibukin te aomata anne. N te kiraati are imwiina, kaoiia bwa a na tibwauai baike a rinanona n aia beku ibukia aomata aikai.
Kaungaa te Kamatebwai n te Mweenga
Kaungaia ataei bwa a na iangoa temanna ae tao e uokoukora te onimaki ae korakora riki ke te kantaninga iroun Iesu Kristo. Kaioia ataei bwa a na tibwauaia nakon te aomata anne baike a reiakin n te kiraati n te bong aio.
Kanakoraoan Ara Anga reirei
Kaungaa te Karinerine. Mwakoron te karinerine ae kakawaki bon iangoan Tamara are i Karawa ao Iesu Kristo. Ko kona ni kauringia ataei bwa a na karinerine rinanon aia anene n aki kaberoro ke ni katanga i wiia een te kuna ke kaotan tamnein Iesu.