“Ritembwa 14–20. Moronaai 10: ‘Nakomai nakon Kristo, ma ni Kakororaoaki Irouna,’” Nakomai, Iriirai—Ibukin te Moanrinan: Ana Boki Moomon 2020 (2020)
“Ritembwa 14–20. Moronaai 10,” Nakomai, Iriirai—Ibukin te Moanrinan: 2020
Bwa Kam Aonga n Ataia, iroun Gary L. Kapp
Ritembwa 14–20
Moronaai 10
“Nakomai nakon Kristo, ma ni Kakororaoaki Irouna”
Tabeman ataei n am kiraati e rangi n uaana aia kamatebwai man ana Boki Moomon n te mweenga. Ko na kanga ni kabonganai aia kamatebwai aika a uaana akanne ni kaungaia ni kabane ataei bwa a na wawareki koroboki aika tabu n te mweenga?
Korei Am Namakin
Kaoa te Tibwatibwa
Kabuta teuana ana Boki Moomon. N te tai are e taua iai te boki te ataei, tuanga bwa e na tibwaua teuana te bwai ae e tatangiria man ana Boki Moomon—n aron te karaki ae e tatangiria, te koaua, ke te bwai ae e a tia n reiakinna man ana kamatebwai n te mweenga ke n te ekaretia.
Reirei te Reirei: Ataei aika a Uarereke
I kona n ataia i bon irou bwa e koaua Ana Boki Moomon.
Kakaei kawai ake e na buokiia ataei bwa a na karaoa nanon ana kakao Moronaai n titirakina te Atua ngkana arona bwa e koaua Ana Boki Moomon.
Waaki ni Kakukurei aika a Kona ni Karaoaki
-
Kaota tamnein Moronaai ngke e tauni bwaatua koora (taraa kabwarabwara n te wiiki aei inanon te boki ae Nakomai, Iriirai ibukiia Aomata n Tatabemania ao Utu), ao tuangiia ataei bwa a na kabwarabwara bwa tera ae a nooria. Kaoiia bwa a na kotea tamnein bwaatua, ao kabwarabwara bwa iaon bwaatua aikai ao a koreaki iai taeka ake ti kona ngkai ni wareki n Ana Boki Moomon. Tuangiia ataei bwa a na riki bwa aongkoa ngaia Moronaai ngke e koroboki iaon bwaatu man tauni. Bootaki anenea te kuna ae “The Golden Plates” (Aia Boki n Anene Ataei 86).
-
Kaota Ana Boki Moomon, ao wareka Moronaai 10:4. Kabwarabwara bwa ti kona n titirakina te Atua ngkana e koaua Ana Boki Moomon, ao E na karokoa te Tamnei ae Raoiroi ni kaota koauana nakoira. Ko kona naba ni kabonga “Mwakoro 54: Te Berita iaon Ana Boki Moomon” (Karaki man Ana Boki Moomon, 156, ke te witeo are e irekereke ma ngaia iaon ChurchofJesusChrist.org). Tibwauaia bwa e kanga te Tamnei ae Raoiroi ni buokiko ni karekea am koaua n Ana Boki Moomon. Buokiia ataei bwa a na matata bwa e kanga aron namakinan ana kakoaua te Tamnei ae Raoiroi. Anenea tekorana te kuna ae boboto iaon kakaean te koaua, n aron “Search, Ponder, and Pray” (Aia Boki n Anene Ataei, 109).
Tamara are i Karawa e anganai bwaintangira n tamnei.
Moronaai e kabwarabwarai bwaintangira are e anga te Atua nakoia natina n te tai are iai aia onimaki Irouna. Ko kona ni buokia ataei bwa e na iai irouia te onimaki bwa te Atua e na anganiia bwaintangira n Tamnei.
Waaki ni Kakukurei aika a Kona ni Karaoaki
-
Korea nambwa 9 nakon nambwa 16 iaon beeba aika a kakaokoro, ao imwina batiia beeba akanne n aron te bwaintangira. Anganiia ataei te tai bwa a na kauki bwaintangira akanne. N te tai are a karaoa aei, bootaki ni wareka Moronaai 10:9–16 are e irekereke ma te nambwa, ao buokiia ataei bwa a kinai bwaintangira n tamnei ni kabane. Kabwarabwara bwa aikai bwaintangira aika e anga Tamara are i Karawa nakoia natina bwa ti aonga ni ibuobuoki imarenara ao ni karaoa Ana mwakuri.
-
Anga te tai nakoia ataei bwa a na marooro n te tai ae uarereke iaon bwaintangira aika maten nanoia aika a tia ni karekea. Tuangiia ataei bwaintanira n tamnei ake ko nooria bwa e a tia n anganiia Tamara are i Karawa, n aron te bwaintangira n te onimaki, te wanawana, te koaua, te akoi, ao te kona ni kamatebwai.
Iesu Kristo e tangirai bwa N na nakoina.
Iangoia raoi bwa ko na kanga ni buokiia ataei bwa a na matata bwa tera ae nanonaki n “nakomai nakon Kristo.”
Waaki ni Kakukurei aika a Kona ni Karaoaki
-
Wareka Moronaai 10:32, nakoia ataei, “Nakomai nakon Kristo, ma ni kakororaoaki irouna,” ao kaoiia ataei bwa a na manga iriko n taekina te mwakoro n taeka anne. Tuangiia bwa a na kamaki mataia ao katekea tamnein Iesu inanon te ruu. Ngkanne tuangiia bwa a na kaurei mataia, ao ni kakaea te tamnei, ao ni bootaki n te tabo are e mena iai te tamnei. Maroroakinna ma ataei bwa tera taian kawai ake ti kona iai n nakomai nakon Kristo (taraa, ibukin te katoto, Taekan te Onimaki 1:3–4). Manga karaoa riki te mwakuri ni kauring aei, anganiia ngkanne ataei bwa a na katekea te tamnei n te ruu.
-
Buokiia ataei ni karaoi taian baati ae tein te aati ae korobokiaki n ae kangai “I tangira te Atua ma korakorau, au iango, ao marurungiu” (taraa Moronaai 10:32). N te aro raa ae ti kaotia iai nakon te Atua bwa ti tangiria?
Reirei te Reirei: Ataei aika a Ikawai Riki
I kona n ataa te koaua man mwaakan te Tamnei ae Raoiroi.
Te Atua e tangirira ngaira ni kabane bwa ti na ataia bwa e koaua Ana Boki Moomon. Buokiia ataei bwa a na matata n ana berita te Atua ni “kaota te koaua nakoiu ni mwaakan te Tamnei ae Raoiroi.”
Waaki ni Kakukurei aika a Kona ni Karaoaki
-
Korei taeka aikai iaon te burakibooti Warekia, Uringnga, Iangoia raoi, ao Titiraki. Kaoiia ataei bwa a na kakaei taeka aikai ni Moronaai 10:3–4. Tera ae ti riai ni warekia, n uringnga, n iangoia raoi, ao n titiraki bwa ti aonga ni karekea ke ni kamatoatoa ara koaua n Ana Boki Moomon? Tuangiia ataei bwa a na tarai koaua aika titebo imarenan kibu aikai ao te anene “Search, Ponder, and Pray” (Aia Boki n Anene Ataei, 109).
-
Buokiia ataei bwa a na kauringi tabeua baika a riki nakoim man kamatebwaian Ana Boki Moomon. Tibwa am namakin ibukin ana Boki Moomon, n ikotaki ma arom ni karekea, ke ni kakorakora am koaua bwa e bon koaua. Kaoiia ataei bwa a na tibwaua aia namakin ao aia koaua.
-
Karakina te tai ngke te Tamnei ae Raoiroi e kaota koauan te bwai teuana nakoim. Kabwarabwara bwa tera ae ko namakinna ao ko kanga n ataia bwa bon te Tamnei ae Raoiroi. Buokia ataei bwa a na reiakinna bwa e kanga te Tamnei ae Raoiroi n taetae nakoira man kibu aikai: Ioane 14:26–27; Reirei ao Berita aika Tabu 6:15, 23; 8:2–3; 9:7–9; 11:12–14.
Tamara are i Karawa e anganai bwaintangira n tamnei.
E mwaiti aomata ake a “kakeaa … ana bwaintangira te Atua” (Moronaai 10:8). Buokiia ataei bwa a na ataia bwa bon iai naba ngkai bwaintangira aikai.
Waaki ni Kakukurei aika a Kona ni Karaoaki
-
Korei bwaintangira ake a mwaneweaki ni Moronaai 10:9–16 iaon mwakoro ni beeba, ao karini inanon nnen te bwaintangira. Korea nambwa 9 nakon namba 16 iaon te burakibooti, ao kaoiia ataei bwa a na anaa aia beeba man nnen te bwaintangira ao ni katoaa ma nambwan te kibu are iaon te burakibooti. Tera ae ti reiakinna ibukin bwaintangira aikai man kibu 8 ao 17–18?
-
Tibwaua karakinan rokon Ana Boki Moomon (taraa “Mwakoro 3: Te Anera Moronaai ao Bwatuua Koora,” Karaki man Reirei ao Berita aika Tabu, 13–17). Buokiia ataei ni kinai bwaintangira ake a mwaneweaki ni Moronaai 10:9–16 ake e anga te Atua nakon Iotebwa Timiti bwa e aonga ni karokoa ana Boki Moomon. Bukin tera e tangirira Tamara are i Karawa bwa ti na kakoauai bwaintangira n tamnei ni boong aikai?
Iesu Kristo e tangirai bwa N na Nakoina.
Ko na kanga ni kaoiia ataei bwa a na “Nakomai nakon Kristo, ma ni kakororaoaki Irouna””?
Waaki ni Kakukurei aika a Kona ni Karaoaki
-
Korea te titiraki ae aekakin aei iaon te burakibooti Tera ae nanonaki bwa ti na nakon Kristo? Buokiia ataei bwa a na ukera Moronaai 10:32–33 ni kakaei kaeka. Bootaki ni mwakuri ni korei baike e tangiri Kristo bwa ti na karaoi ao baike E berita bwa e na karaoi ibukira.
-
Tibwaua te kibu ke te karaki man Ana Boki Moomon ae e mamate nanom iai ae e a tia ni buokiko bwa ko na nakomai nakon Kristo, ao kaoiia ataei bwa a na karaoa naba anne. Bootaki ma ataei n taraa riki ana taeka Iotebwa Timiti are n te kabwarabwara nakon Ana Boki Moomon: “E na kaania riki te Atua te aomata ngkana e iri nanon taian reirei ake a taekinaki inanona [ana Boki Moomon] nakon taian boki riki tabeua.” Kaota am koaua bwa e a tia n riki naba aei inanon maium.
Kaungaa te Kamatebwai n te Mweenga
Kaoiia ataei bwa a na tataro bwa e na kakorakoraki aia koaua n Ana Boki Moomon ao bwa a aonga n tibwa aia koaua ma kaain aia utu ke raoraoia.
Kanakoraoan Ara Anga reirei
Kaungaa te tibwatibwa. Ataei n angiin te tai iai aia nonori aika a kakawaki ibukin te euangkerio. Tibwauaan aia iango e buoka katauraoakia ni marooro ma raoraoia iaon taekan te euangkerio (taraa Reirei n Ana Kawai te Tia Kamaiu 30.)