“Ritembwa 14–20. Moronaai 10: ‘Nakomai nakon Kristo, ma Ni Kakororaoaki Irouna,’” Nakomai, Iriirai—Ibukiia Aomata n Tatabemaniia ao Utu: Ana Boki Moomonn 2020 (2020)
“Ritembwa 14–20. Moronaai 10,” Nakomai, Iriirai—Ibukiia Aomata n Tatabemaniia ao Utu 2020
Bwa E Na Ataia, iroun Gary L. Kapp
Ritembwa 14–20
Moronaai 10
“Nakomai nakon Kristo, ma Ni Kakororaoaki Irouna”
Ngkana ko a tia ni wareka Ana Boki Moomon, iangoa kakaean temanna te tia kakoaua ae boou mairoun te Tamnei ae Raoiroi bwa e bon koaua. Ngkana ko karaoi, korei namakin aika ko karekei.
Korea Am Namakin
E moanaki ana Boki Moomon ma ana berita Nibwaai bwa e na kaotia nakoira bwa “ana nanoanga te Uea e mena i aoia ni kabane ake e a tia n rineia, ibukin aia onimaki” (1 Nibwaai 1:20). E toki te boki ma te aeka n rongorongo naba anne mairoun Moronaai ngke katauraoi ni “kaini” rongorongo: e kaoira bwa ti na “uringnga aron ana nanoanga te Uea” (Moronaai 10:2–3). Riki ngkana ti tii iangoi akoi aika a mwaiti aika a koreaki inanon Ana Boki Moomon, aio e anganiira te bwai ae mwaiti ae ti na iangoi. Tera katooto aika a roko n am iango? Ko na iangoa te kawai n akoi are e kairiia iai ana utu Riaai te Atua rinanon te rereua ao rinanon marawa aika a korakora, ana nanoanga aika a mwaiti aika E kaotii nakon Enoti ngke e korakai ibukin te kabwarabure, ke te nanoanga ae kaotia nakon Aramwa, ana kairiribai te Ekaretia are e riki bwa temanna te tia kamanoa te Ekaretia. Ke e kona am iango n rairaki nakon te nanoanga are e kaotia te Tia Kamaiu nakoia aomata ngke E kamaiua aia aoraki ao ni kakabwaia ataei aika a uarereke. Ae kakawaki riki, bwaai aikai ni kabane a kauringko bwa “e kanga ana nanoanga te Uea” nakoim, oin bukina teuan Ana Boki Moomon bwa e na kaoia ngaira n tatabemaniira nako bwa ti na karekea ana nanoanga te Atua—te kakako ae kabwarabwaraaki ni kabebeteaki n ana taeka ni kabo Moronaai, “Nakomai nakon Kristo, ma ni kakororaoaki irouna” (Moronaai 10:32).
Iango ibukin Am Kamatebwai I bon Iroum ni Koroboki Aika Tabu
I kona n ataa te koaua man mwaakan te Tamnei ae Raoiroi.
Te berita inanon Moronaai 10:3–7 e a tia ni bita maiuia mirion aomata n te aonaaba. E kanga n tia ni bita maium? Tao ko ukoukoria ni karekea ke ni kakorakora am koaua n Ana Boki Moomon, ana kakao Moronaai e kaineti nakoim. Ngkana ko wareka Moronaai 10:3–7, iangoia ni karaurau riki ni warekia nakon are mai imwaina. Ko kona n rinanoi mwakoro n taeka, ao titirakiniko titiraki n aron aikai: Tera nanon aei? N na Kanga ni kanakoraoa riki aei? Tera taneiai aika I a tia ni karekea ma te bwai aei? E kanga te Tamnei ae Raoiroi n tia ni kaota koauan Ana Boki Moomon nakoiu?
Iangoa naba temanna ae kainnanoia ni kan ongo am koaua n Ana Boki Moomon. Ko na kanga ni buoka te aomata anne ni ukoukora oin ana koaua?
“Tai karotua ana bwaintangira te Atua.”
A mwaiti kawai aika e kona te aomata n “aki kakoaua … ana bwaintituaraoi te Atua” (Moronaai 10:8). Tabeman aomata aki kakoaua ae bon iai te bwaintituaraoi aei. Tabeman a na aki kakoaua bwa iai aia bwaintituaraoi n tamnei ma a kinaia irouia aomata tabeman. Bon iai naba tabeman aika aki kakoauai aia bwaintituaraoi man ti aki tabeakiniia ke n aki tabe ni karikirakeia.
Ngkana ko wareka Moronaai 10:8–25, tarai koaua ake a na buokiko ni kunei am bwaitnituaraoi n te tamnei ao kabonganai ma te mwaaka ae korakora ni kakabwaiako ao tabeman. Ukoukori atatai aika a nano iaon te bwaintituaraoi ae e a tia n anganiko te Atua ke te bwaintituaraoi ae E tangiria bwa ko na ukoukoria. Bukin tera e rangi ni kakawaki bwa ko na “uringnga bwa bwaintituaraoi ni kabane a roko mairoun Kristo”? (Moronaai 10:18).
Iangoa naba te reirei mairoun Unimwaane John C. Pingree Jr.: “Ngaia are ti kanga n ataa ara bwaintituaraoi? Ti kona n rimwiin ara kakabwaia n te tamanuea, n titirakiniia naake a rangi ni kinaira, ao ni kinaa te bwai ae ti mwaatai iai ke n tatangiria. Ae kakawaki riki, ti kona ni butiia te Atua (taraa Iakobo 1:5; RB 112:10). E atai ara bwaintituaraoi, ngkai E bon anganiira” (“I Have a Work for Thee,” Ensign ke Riaona, Nob. 2017, 33).
Taraa te Kairi nakon Koroboki aika Tabu, “Ana Bwaintituaraoi te Tamnei,” scriptures.ChurchofJesusChrist.org.
I kona ni kakororaoaki rinanon ana nanoanga Iesu Kristo.
Ana kauring Moronaai n “nakomai nakon Kristo” e raka riki nakon reiakinan Taekana ke Iangoana n te tai ae mwaiti ke ni kekekiaki riki ni kawakin Ana tua, a kakawakin n aron bwaai aikai. Irarikin anne, aio te kakao n nakomai nakon Kristo n arona ae bwanina—n rikin ai Arona. Ngkana ko wareka Moronaai 10:30–33, tarai mwakoro n taeka aika a na buokiko ni kaotako n te bwai ae nanonaki n nakomai nakon Kristo, n aron “taui bwaai n tituaraoi ni kabane aika raraoi,” “kaakeai ma iroumi bwaai ni kabane aika tiaki aron atua,” ao, e koaua, “ni kakororaoaki irouna” (karinaki itariki).
E kanga ni kona ni karaoaki aei? Tarai ibukin kaekaaia inanon Moronaai 10:30–33. Tera te bwai ae tuangko te Tamnei bwa ko riai ni karaoa ae bati riki “nakomai nakon Kristo, ma ni kakororaoaki irouna”?
Taraa Ominai 1:26; Kairi nakon Koroboki aika Tabu, “Kororaoi,” scriptures.ChurchofJesusChrist.org.
Iango ibukin Kamatebwai ni Koroboki aika Tabu n te Utu ao ni Bootakin te Utu n te Tairiki
Inanon warekan koroboki aika tabu ma am utu, e kona ni buokiko te Tamnei n ataia bwa tera taian reirei ae a riai ni kamatataaki ao ni maroroakinaki bwa e aonga ni buoka kainnanoia am utu. Aikai tabeua iango.
Moronaai 10
Wareka te mwakoro ni bootaki, kakaea n tainako te tai are e kabonanga iai Moronaai te taeka kaungaa. Karinani ni koroi ke mwakena te bwai ae kaungako iai Moronaai—ke ni kaungaira—ni karaoia. Tera ae ti kona ni karaoia ni ira ana kaungaunga?
Moronaai 10:3
Tera ae ti a tia n reiakinna ibukin ana nanoana te Uea ngkana ti wareka Ana Boki Moomon n te ririki aei? E kanga te Uea n rangi n nanoanga nakon ara utu?
Moronaai 10:3–5
Imwiin warekan kiibu aikai, ko kona n titirakiniia kaain te utu bwa a na tibwauaia bwa a kanga n tia n ataia bwa ana Boki Moomon e koaua. Iangoia ni bane n anenea te anene ibukin ukoukoran te koaua, n aron ae “Search, Ponder, and Pray” (Aia Boki n Anene Ataei,109). Ko kona naba ni kaoiia kaain te utu bwa a na koroi aia koaua inanon te tieno n te utu.
Moronaai 10:8–18
Te Kiritimati bon te tai ae tataneiai te aba iai n iangoa reken te bwaintangira. Tao a kona kain te utu ni batian bwaintangira ibukiia ni kabane are e tei ibukin “ana bwaintangira te Atua” ae taekinaki ni Moronaai 10:9–16. A kona naba bwaintangira aikai n onei mwiin bwaintangira ake tabeua aika a raraoi aika a roko mairoun Kristo are a noori iroun temanna ma temanna.
Moronaai 10:27–29, 34
A kona kaain te utu n tibwaua te bwai ae a tangiria n taekinna nakon Moronaai ngkana a “kaitibo ma [ngaia] imwain ana kai ni motikitaeka ae kakukurei Iehova are e kakannato.”
Ibukin riki iango riki tabeua ibukin reireinaia ataei, taraa te kamataata n te wiiki aei inanon Nakomai, Iriirai—Ibukiia Kaain te Moanrinan.
Kanakoraoan Am Kamatebwai
Kakaea Iesu Kristo. Te kantaninga ibukin Ana Boki Moomon—ao koroboki aika tabu—bon kakoauaan Iesu Kristo. Tera ae ko reiakinna ibukin Iesu Kristo inanon Moronaai 10? Tera ae ko namakinna bwa ko riai ni karaoia n nakomai Nakoina?
Moronaai E Tauni Bwatua, iroun Jon McNaughton