Minerva Teichert (1888–1976), E Karaoa te Bwabetito Aramwa inanon Nein Moomon, 1949–1951, te oera iaon te mitionaite, 35⅞ x 48 intiti. Brigham Young University Museum of Art, 1969

Nobembwa 30–Ritembwa 6

Moronaai 1–6

“Bwa A na Waaki n te Kawai ae Eti”

Moronaai e koroi bwaai aika e kantaningaia bwa “a na boongana … n taai aika imwaira” (Moronaai 1:4). Tera ae ko kunea n Moronaai 1–6 ae boongana nakoim? Korei mwiin bwaai aika ko kunei, ao iangoia n tibwaua ma tabeman aomata ae a na kunea naba bwa e uaana.

Korei Am Namakin

Imwiin katiaan ana rekooti ana karo ibukiia Nibwaite ao ni korei ni kauarerekei aia rekooti Iaretaite, Moronaai n ana iango n te moantai bwa e a tia ana mwakuri ni koroi rekooti (taraa Moronaai 1:1). Tera riki ae e na taekinaki ibukiia aaba aika uoua ake a bane n urubekebeke? Ma Moomon e a tia n noora ara tai (taraa Moomon 8:35), ao e kaungaaki bwa e na “koroi bwaai tabeua, ake a na boongana … inanon taai aika imwaira” (Moronaai 1:4). E ataia bwa kitanan te koaua e a roko, are e uota te nanououa iaon otenanti n te nakoanibonga ao n te aro ni kabutaa. Anne bukina ngkai e anga te kamataata aika bwarabwara raoi iaon te toa, te bwabetito, anganako ana bwaintituaraoi te Tamnei ae Raoiroi, ao kakabwaia n ikotaki ma taan onimaki ni “kawakiniira [imarenara] n te kawai ae eti, … onimakina ana mwakuri aika a raraoi Kristo, are bon te tia karika ao te tia karokoa n te toki [aia] onimaki” (Moronaai 6:4). Iango aika a kakawaki n aron aikai e anganiira bukina bwa ti na kakaitau bwa e a tia te Uea ni kawakina maiun Moronaai bwa e aonga “ni koroi bwaai riki tabeua” (Moronaai 1:4).

Iango ibukin Am Kamatebwai I Bon Iroum ni Koroboki Aika Tabu

Moronaai 1

A teimatoa ana reirei Iesu Kristo n onimaki n aki tabe ma taian kakaitara.

Ibukiia aomata tabeman, e bebete riki bwa ko na onimaki n taai ni bebete ao ni mwengaraoi. Ma ngkai ngaira ana reirei Iesu Kristo, ti riai n teimatoa n onimaki e ngae ngke iai katakira ao kaitarakira. Ngkana ko wareka Moronaai 1, tera ae kaungako n ana kakaonimaki Moronaai nakon te Uea ao nakon ana wewete? Ko na kanga ni irii ana banna ni katooto?

Moronaai 2:6

A riai otenanti n te nakoanibonga n tararuaaki nakon ana kairiiri te Uea.

N tain ana mwakuri n te maiu aei, te Tia Kamaiu e karekei ao e tararuai otenanti aika tabu, n aron te bwabetito (taraa Mataio 3:13–17; Ana Rairairi Iotebwa Timiti, Ioane 4:1–3 [n ana abentekiti te Baibara]), otenanti n te nakoanibonga (taraa Mareko 3:13–19), ao te toa (taraa Mataio 26:26–28). E ngae n anne, ibukin Kitanan te koaua ae Korakora, a mwaiti aomata ni boong aikai aika aikoa koaua bwa a na kanga ni karaoaki otenanti—ao ngkana a bon teimatoa ni kainnanoaki. Inanon Moronaai 2–6, Moronaai e katauraoi kamataata aika a kakawaki iaon tabeua otenanti n te nakoanibonga are a kona ni buoka kaotaan tabeua aki mataata aikanne. Tera namakin aika roko iroum ngkai ko kamatebwai otenanti inanon mwakoro aikai? Aikai tabeua titiraki aika ko kona n titiraki iaoia bwa e na buokiko n atai:

Te Kamatoa (Moronaai 2; 6:4).Tera ana kaetieti te Uea n Moronaai 2:2 ae reireiniko taekan te otenanti n te kamatoa? Tera n am iango nanon ae ko na “rootaki ni mwaakan te Tamnei ae Raoiroi”? (Moronaai 6:4).

Te katabu n te Nakoanibonga (Moronaai 3).Tera ae ko kunea n te mwakoro aei are e na kona ni buoka temanna bwa e na katabuaki nakon te nakoanibonga? Tera ae ko kunea ae e na buoka temanna ni karaoa te katabu?

Te toa (Moronaai 4–5; 6:6).Tarai berita inanon te tataro n toa (taraa Moronaai 4:3; 5:2), ao iangoa te bwai ae ko karaoia bwa ko na kawakin am berita. Tera ae ko kona ni karaoia bwa ko na karekea ana kairoro te Tamnei n ae korakora riki ngkana ko ira te toa?

Bwabetito (Moronaai 6:1–3).Tera ae ko kona ni karaoia bwa ko na reitanako te reirei ibukin te bwabetito aika reke man kiibu aikai, riki imwiin are ko bwabetitoaki? Tera ae a tuangko kiibu aikai iaon nanon te riki bwa kaain ana Ekaretia Iesu Kristo?

Ni boboto iaon te bwai are ko a tia n reiakinna, ko na kanga ni bitii arom ake ko iangoi, ni ibuobuoki iai, ke ni katauraoia tabeman ibukin otenanti aikai? Bukin tera bwa e kakawaki “tararuakin otenanti aikai … ni kaineti ma ana tua te Atua”? (Moronaai 4:1).

Taraa naba “Otenanti,” Atuun Rongorongo n te Euangkerio, topics.ChurchofJesusChrist.org.

Iesu e reirei aron karaoan otenanti.

Moronaai 6:4–9

Ana reirei Iesu Kristo a tararuai maurin tamneia n tatabemaniia.

Ngkai e bon koaua bwa ti bane “ni mwakuriia [oin] kamaiuara” (Moomon 9:27), Moronaai e reirei naba bwa “te uaia ni bota[ki] n tainako” ma raoia n onimaki e kona ni buokiira ni kateimatoaira “n te kawai ae eti” (Moronaai 6:4–5). Ngkana ko wareka Moronaai 6:4–9, iangoa te kakabwaia are e roko man “warekakiia ibuakoia aomatan ana ekaretia Kristo” (Moronaai 6:4). Ko na kanga n ibuobuoki ni karaoa te atatai ae ko a tia ngkoe ao tabeman ni karekea n te ekaretia n aron ae a tia ni kabwarabwara Moronaai, e ngae ngke ngkoe te tia kairiiri ke kaain te bootaki?

Iango ibukin Kamatebwai ni Koroboki aika Tabu n te Utu ao Bootakin te Utu n te Tairiki

Inanon warekan koroboki aika tabu ma am utu, e kona ni buokiko te Tamnei n ataia bwa tera taian reirei aika a riai ni kamatataaki ao ni maroroakin bwa e aonga ni buoka kainnanoia am utu. Aikai tabeua iango.

Moronaai 1; Moronaai 6:3

Tera ae nanonaki bwa ko na “kakea te Kristo”? (Moronaai 1:2–3). Ti na kanga ni kona ni kaota nanora ae “korakora ni kan beku Ibukina ni karokoa te toki”? (Moronaai 6:3). Tibwaua te katooto irouia aomata aika ko kinaia aika iai irouia te nano ni kan nako ni beku Ibukina.

Moronaai 4:3; Moronaai 5:2

Ni kaineti ma te tataro n te toa n te utu e kona ni kairiia nakon maroroakinan karaoan te toa ma te karinerine. Tao a kona kaain te utu ni maroroakin taekan mwakoro n taeka aikai man tataro aikai a uaana nakoia. A kona naba ni koroi aia iango ibukin mwakoro n taeka aikai ke ni korea te tamnei are e na buokiia n iangoa te Tia Kamaiu. A kona ni uota te bwai ae a koroia ke ae a korotamneia nakon te bootaki n tao ni buokiia ni kabanea aia iango Nakoina. Tuangiia kaain am utu aron am namakin ibukin te toa aoa ana anga karea te Tia Kamaiu.

Moronaai 6:1–4

Tera ae nanonaki ni karekean “te nano ae uruaki ao te tamnei ae raraoma”? (Moronaai 6:2). E kanga ni buokiira aei ni katauraoira ibukin te bwabetito? E na kanga ni buokiira imwiin are ti bwabetitoaki?

Moronaai 6:4–9

Ni kaineti ma kiibu aikai, tera tabeua kakabwaia aika a roko man “warekara ibuakoia aomatan ana ekaretia Kristo”? (Moronaai 6:4). Bukin Tera Ti Kainnanoa te Ekaretia?

Moronaai 6:8

Tera te kibu aei ae reirei taekan te rairannano? Tera ae nanonaki n ukoukora te kakabwarabure ma te “nano ni koaua”? (Moronaai 6:8). Iangoia n anenea te anene iaon taekan te kabwarabure, n aron “Help Me, Dear Father” (Aia Boki n Anene Ataei, 99).

Ibukin iango riki ibukin reireinaia ataei, taraa te kamataata n te wiiki aei n Nakomai, Iriirai—Ibukiia Moanrinan.

Kanakoraoan Am Kamatebwai

Kakaai Koaua n Ana Tangira te Atua. E reirei Beretitenti M. Russell Ballard, “[Te] euangkerio bon te euangkerio n tangira—te tangira ibukin te Atua ao te tangira i bon ibukira n tatabemaniira nako” (“Ana Tangira te Atua ibukiia Natina,” Ensign, Meei 1988, 59). Ngkana ko wareki koroboki aika tabu, iangoia ni korei ke ni mwaken kakoauaan ana tangira te Atua ibukim ao Ana ataei.

Moronaai iinanon te Nangananga ni Bwaa, iroun Jorge Cocco