dagiti ubbing ken mannursuro nga agkankanta

Dagiti Pangiturong para iti Oras ti Panagkanta ken Pabuya dagiti Ubbing iti Miting iti Sakramento

Patpatgenmi a Panguluen iti Primary ken Lider iti Musika,

Dagiti kanta iti Primary ket nabileg a ramit a makatulong kadagiti ubbing a masursuruan maipapan iti plano ti Nailangitan nga Ama iti kinaragsak ken dagiti pundasion iti kinapudno ti ebanghelio ni Jesucristo. Kabayatan ti panagkanta dagiti ubbing maipapan kadagiti pagbatayan ti ebanghelio, paneknekanto ti Espiritu Santo maipapan iti kinapudno dagitoy. Agtalinaedto dagiti balikas ken musika iti pampanunot ken puspuso dagiti ubbing iti unos ti panagbiagda.

Ikarigatam a gun-oden ti tulong ti Espiritu bayat ti panagsaganam a mangisuro iti ebanghelio babaen iti musika. Ibinglaymo ti pammaneknekmo maipapan kadagiti kinapudno a kantaenyo. Tulongam dagiti ubbing a mangkita no kasano a mainaig ti musika iti no ania dagiti masursuro ken mapadpadasanda iti pagtaengan ken kadagiti klase iti Primary. Maparaburanto dagiti ubbing ken dagiti pamiliada babaen kadagiti napasnek a panagkagumaam.

Ay-ayatendakayo ket agyamankami iti naanep a panagserbiyo tapno mapapigsa ken masaluadan dagiti napapateg nga annaktayo.

Ti Sapasap a Panguluen ti Primary

Dagiti Pangiwanwan [Guidelines] para iti Pabuya [Presentation] iti Miting iti Sakramento

Babaen ti panangiturong ti bishop, gagangay a maang-angay ti pabuya dagiti ubbing iti miting iti sakramento kabayatan ti maikapat a kuarter ti tawen. Kas panguluen ti Primary ken lider iti musika, makipagurnos a makimiting a nasapsapa iti tawen iti mamagbaga [counselor] iti bishopric a mangimaton iti Primary tapno rugian a pagsasaritaan dagiti plano para iti panagpabuya [presentation]. No nakumpletoyon dagiti plano, gun-odenyo ti pananganamongna para kadagitoy.

Ti pabuya [presentation] ket mangipalubos kadagiti ubbing a mangidatag wenno mangipabuya no ania dagiti nasursuroda ken ti pamiliada manipud iti Libro ni Mormon iti pagtaengan ken iti Primary, agraman dagiti kanta iti Primary a kinantada kabayatan ti tawen. Nainkararagan nga ibilangyo no ania dagiti pagbatayan ti ebanghelio ken kanta a mangsuporta no ania ti nasursuroda. Iti unos ti tawen, isuratmo dagiti bitla ken bukod a padas dagiti ubbing para iti mabalin a pangusaran iti pabuya. Awisenyo dagiti ubbing a mangibinglay kadagiti nasantuan a kasuratan, estoria, ken dagiti pammaneknekda iti pabuya. Kabayatan ti panagplanoyo iti pabuya, panunoten dagiti wagas a makatulong daytoy iti kongregasion a mangipokus iti Mangisalakan ken dagiti pannursurona.

Dagiti yunit nga addaan bassit a bilang dagiti ubbing ket mabalinda nga ibilang dagiti wagas a mabalin a makiraman dagiti miembro ti pamilia a kadua dagiti annakda. Mabalin nga igibus ti maysa a miembro ti bishopric ti miting iti ababa a panagsaritana.

Kabayatan ti panangisaganayo iti pabuya, laglagipen dagiti sumaganad a pangiwanwan:

• Nasken a saan a mangala iti saan a kasapulan nga oras dagiti panagpraktis manipud kadagiti klase ti Primary wenno pamilia.

• Saan a maitutop para iti miting iti sakramento dagiti pangtulong a ladawan [visuals], kawes [costumes], ken dagiti pabuya iti media.

Kitaen iti Handbook 2: Administering the Church 11.5.4.

Dagiti Pangiturong para iti Oras ti Panagkanta

5 minuto (panguluen iti Primary): Panglukat a kararag, nasantuan a kasuratan wenno pagannurotan ti pammati, ken maysa a bitla [talk]

20 minuto (lider iti musika): Oras ti panagkanta

Pumili ti panguluen iti Primary ken lider iti musika kadagiti kanta para iti tunggal bulan tapno mapatibker dagiti pagbatayan a sursuruen dagiti ubbing kadagiti klaseda ken iti pagtaengan. Nairaman iti daytoy a pangiwanwan ti maysa a listaan dagiti kanta a mangpatibker kadagitoy a pagbatayan. Naisingasing pay dagitoy a kanta kadagiti balabala iti Umaykayo, Sumurot Kaniak—Para iti Primary.

Bayat ti panangisurom kadagiti kanta iti ubbing, awisem ida a mangibinglay no ania ti nasursurodan maipapan kadagiti estoria ken pagbatayan iti doktrina nga isursuro ti kanta. Mabalin a kayatyo nga irebyu dagiti balabala iti Umaykayo, Sumurot Kaniak—Para iti Primary nga ad-adalen dagiti ubbing kadagiti klaseda. Daytoy ti mangtulongto kadakayo nga agbalin a mannakaammo kadagiti estoria ken pagbatayan a sursuruenda tapno maibilangyo no kasano a masuportanrayo ti panagsursuroda iti musika.

Kabayatan ti oras ti panagkanta, mabalin met nga irebyuyo dagiti kanta a nasursurodan iti kallabes ken dagiti kanta a paggugustoda a kankantaen. Kabayatan ti panangrebyuyo, awisem dagiti ubbing a mangibinglay kadagiti kapanunotan ken riknada maipapan kadagiti kinapudno a masarakan kadagiti kanta.

Ti Children’s Songbook ti pangrugian a resource para iti musika iti Primary. Dagiti himno manipud iti hymnbook ken dagiti kanta manipud iti Friend ken Liahona ket maitutop pay. Sagpaminsan a mabalin a kantaen dagiti ubbing dagiti kanta a mainaig iti kinabannuar wenno piesta opisial a mayannatup para iti Domingo ken maibagay iti tawen dagiti ubbing. Nasken nga aprobaran ti bishopric ti pannakausar ti ania man a sabali pay a musika iti Primary (kitaen iti Handbook 2: Administering the Church, 11.2.4).

dagiti ubbing nga agkankanta

Pakagupgopan ti Primary

Tunggal lawas, iraman iti Primary ti:

Oras ti panagkanta25 minuto

Transision5 minuto

Dagiti klase20 minuto

Mabalin dagiti lider ti dadakkel a Primary ti mangbingay kadagiti ubbing iti dua a grupo ket adda ti maysa a grupo iti klase ti Primary idinto nga adda ti sabali pay a grupo iti oras ti panagkanta. Kalpasanna agsinnukat dagiti dua a grupo iti lugarda. Kadagiti kasta a kasasaad, mabalin a kasapulan dagiti lider ti Primary a mangbalbaliw kadagiti oras a naipakita iti ngato tapno maibagay kadagiti kasasaadda.

Musika para iti Oras ti Panagkanta

Enero

• “Book of Mormon Stories,” Children’s Songbook, 118–19

• “Keep the Commandments,” Children’s Songbook, 146–47

• “The Iron Rod,” Hymns, no. 274

Pebrero

• “Nephi’s Courage,” Children’s Songbook, 120–21

• “I Feel My Savior’s Love,” Children’s Songbook, 74–75

• “I Love to See the Temple,” Children’s Songbook, 95

Marso

• “When I Am Baptized,” Children’s Songbook, 103

• “Dare to Do Right,” Children’s Songbook, 158

• “A Child’s Prayer,” Children’s Songbook, 12–13

Abril

• “Easter Hosanna,” Children’s Songbook, 68-69

• “When We’re Helping,” Children’s Songbook, 198

• “Love One Another,” Children’s Songbook, 136–37

Mayo

• “I Will Be Valiant,” Children’s Songbook, 162

• “Help Me, Dear Father,” Children’s Songbook, 99

• “Testimony,” Hymns, no. 137

Hunio

• “We’ll Bring the World His Truth,” Children’s Songbook, 172–73

• “Follow the Prophet,” Children’s Songbook, 110–11

• “I Want to Be a Missionary Now,” Children’s Songbook, 168

Hulio

• “My Heavenly Father Loves Me,” Children’s Songbook, 228–29

• “Faith,” Children’s Songbook, 96–97

• “As I Search the Holy Scriptures,” Hymns, no. 277

Agosto

• “Repentance,” Children’s Songbook, 98

• “The Still Small Voice,” Children’s Songbook, 106–7

• “Follow the Prophet,” Children’s Songbook, 110–11

Septiembre

• “Samuel Tells of the Baby Jesus,” Children’s Songbook, 36

• “I’m Trying to Be like Jesus,” Children’s Songbook, 78–79

• “The Wise Man and the Foolish Man,” Children’s Songbook, 281

Oktubre

• “Reverently, Quietly,” Children’s Songbook, 26

• “Families Can Be Together Forever,” Children’s Songbook, 188

• “The Church of Jesus Christ,” Children’s Songbook, 77

Nobiembre

• “Jesus Said Love Everyone,” Children’s Songbook, 61

• “Stand for the Right,” Children’s Songbook, 159

• “I Thank Thee, Dear Father,” Children’s Songbook, 7

Disiembre

• “Search, Ponder, and Pray,” Children’s Songbook, 109

• “Away in a Manger,” Children’s Songbook, 42–43

• “He Sent His Son,” Children’s Songbook, 34–35

Panangusar iti Musika a Mangisuro iti Doktrina

Nairanta ti oras iti panagkanta a mangtulong kadagiti ubbing a masursuruan kadagiti kinapudno ti ebanghelio. Mabalin a mangparegta kadakayo dagiti sumaganad a kapanunotan kabayatan ti panagplanom kadagiti wagas a pakaisuruan dagiti pagbatayan ti ebanghelio a masarakan kadagiti himno ken kanta iti Primary.

Basaen dagiti mainaig a nasantuan a kasuratan. Para iti adu a kanta iti Children’s Songbook ken iti hymnbook, nailista dagiti reperensia a mainaig kadagiti nasantuan a kasuratan. Tulongam dagiti ubbing a mangbasa iti sumagmamano kadagitoy a binatog iti nasantuan a kasuratan, ket isaritam no kasano a mainaig dagiti nasantuan a kasuratan iti kanta. Mabalin met nga ilistam iti pisarra ti sumagmamano a reperensia iti nasantuan a kasuratan ket awisem dagiti ubbing a mangiparis iti tunggal reperensia iti maysa a kanta wenno maysa a berso manipud iti kanta.

Punnuen ti blangko. Mangisurat iti maysa a berso ti kanta iti pisarra nga awan dagiti sumagmamano a kangrunaan a balikas [key words]. Kalpasanna kiddawen kadagiti ubbing nga agkansion iti maysa a kanta, a dumdumngeg kadagiti balikas a mangpunno kadagiti blangko. Bayat ti panangpunnoda iti tunggal blangko, ilawlawag no ania dagiti pagbatayan ti ebanghelio a masursuroyo manipud kadagiti awan a balikas.

Dagiti adaw manipud kadagiti lider iti Simbaan. Awisem dagiti ubbing a dumngeg iti maysa nga adaw manipud iti maysa a lider ti Simbaan a mangisuro iti isu met laeng a pagbatayan ti ebanghelio a kas iti kanta iti Primary. Awisem ida a mangingato ti imada no mangngeganda ti maysa a banag a mangtulong kadakuada a makaawat iti kinapudno a kankantaenda. Awisem ida a mangibinglay no ania ti nangngeganda.

lider ti oras ti panagkanta

Agpaneknek. Mangiburay iti ababa a pammaneknek kadagiti ubbing maipapan kadagiti kinapudno ti ebanghelio a masarakan iti kanta iti Primary. Tulongan dagiti ubbing a makaawat a ti panagkanta ket maysa a wagas a mabalin a pangiburayanda iti pammaneknek ken pakariknaanda iti Espiritu.

Panagtakder a kas maysa a saksi. Awisen dagiti ubbing nga agsisinnublatda iti panagtakder ken panangibinglay no ania ti masursuroda manipud iti kanta a kankansionenda wenno kasano a mariknada maipapan kadagiti kinapudno a naisuro iti kanta. Saludsodem kadakuada no ania ti riknada no agkantada, ken tulonganyo ida a mangilasin iti impluensia ti Espiritu Santo.

Agusar kadagiti ladawan. Kiddawen kadagiti ubbing a tulongandakayo nga agsapul wenno agaramid kadagiti ladawan a maikadua kadagiti napapateg a balikas wenno ragup dagiti balikas [phrases] iti kanta. Awisen ida a mangibinglay no kasano a mainaig dagiti ladawan iti kanta ken no ania ti isuro ti kanta. Kas pagarigan, no isursurom ti kanta a “The Iron Rod” (Hymns, no. 274), mabalinmo nga ikabil dagiti ladawan iti intero a siled a mangiladawan kadagiti napapateg a balikas manipud iti kanta (kas iti landok a pagkaptan, balikas ti Dios, mangiwanwan, sulisog, ken langit). Kiddawen kadagiti ubbing a mangummong kadagiti ladawan ken mangingato kadagitoy iti husto nga urnos bayat ti aggigiddan a panagkantayo.

Ibinglay ti maysa a banag nga adalen [object lesson]. Mabalinmo nga usaren ti maysa a banag a mangparegta iti panaglilinnawag maipapan iti maysa a kanta. Kas pagarigan, dakamaten ti kanta a “Faith” (Children’s Songbook, 96–97) ti maysa a bassit a bukel. Mabalinmo nga ipakita kadagiti ubbing ti maysa a bukel ket pagsasaritaan maipapan iti no kasano nga ipakitatayo ti pammati no imulatayo ti maysa a bukel; mabalin a mangiturong daytoy iti panaglilinnawag maipapan kadagiti wagas a pangipakitaantayo iti pammati ken ni Jesucristo, kas nailadawan iti kanta.

Yawis ti panagbibinninglay kadagiti bukod a padpadas. Tulongan dagiti ubbing a manginaig kadagiti pagbatayan a maisursuro iti kanta kadagiti padpadasda kadagita a pagbatayan. Kas pagarigan, sakbay iti panangkanta iti “I Love to See the Temple” (Children’s Songbook, 95), mabalinyo a kiddawen kadagiti ubbing a mangingato kadagiti imada no nakakitadan iti maysa a templo. Awisem ida nga agpanunot bayat ti panagkantada maipapan iti no kasano ti riknada no makitada ti maysa a templo.

Agdamag kadagiti saludsod. Adu dagiti saludsod a mabalinmo a damagen no agkansionkayo kadagiti kanta. Kas pagarigan, mabalinmo a saludsoden kadagiti ubbing no ania ti masursuroda manipud iti tunggal berso iti kanta. Mabalinmo pay a kiddawem kadakuada nga agpanunot kadagiti saludsod a sungbatan dayta sa kanta. Makaiturong daytoy iti panaglilinnawag maipapan kadagiti kinapudno a maisursuro iti kanta.

Dumngeg kadagiti sungbat. Kiddawen kadagiti ubbing a dumngegda kadagiti sungbat dagiti saludsod kas iti “asino?” “ania?” “sadino?” “kaano?” wenno “apay?” Kas pagarigan, iti kanta a “Nephi’s Courage’” (Children’s Songbook, 120–21), mabalinda a denggen no asino ti naibaon a mangala kadagiti pinanid ken no sadino, kaano, kasano, ken apay a tinungpalna ti Apo. Mabalin pay a kiddawem kadagiti ubbing a dumngegda kadagiti kangrunaan a balikas wenno bilangenda dagiti ramayda no mamin-ano a kantaenda ti maysa a balikas.

Panangtulong kadagiti Ubbing a Mangsursuro ken Maglagip kadagiti Kanta iti Primary

Masursuro dagiti ubbing ti maysa a kanta babaen ti panangdengngeg wenno panangulit-ulit a panangkanta iti daytoy. Kanayon a kantaen dagiti balikas ti maysa a baro a kanta kadagiti ubbing—saan laeng a basaen wenno isao dagitoy. Daytoy ti mangtulong kadagiti ubbing a manginaig iti ayug [melody] kadagiti balikas. Kalpasan a naisuro ti maysa a kanta, irebyu daytoy iti nadumaduma a naragsak a wagas iti unos ti makatawen. Iti baba dagiti sumagmamano a kapanunotan a pangtulong kadagiti ubbing a makasursuro ken mangrebyu kadagiti kanta.

Agpartuat kadagiti poster. Ipakitam dagiti poster nga addaan kadagiti balikas manipud iti tunggal bersikulo wenno ladawan a mangibagi kadagiti balikas. Kabayatan ti panagkanta dagiti ubbing, abbongan ti sumagmamano kadagiti balikas wenno ladawan agingga a makantada ti sibubukel a berso nga awan ti poster. Mabalinmo pay nga awisen dagiti ubbing a tumulong kenka nga agaramid kadagiti poster.

Ipakita ti tono. Tapno masursuro dagiti ubbing ti ayug ti maysa a kanta, ipuestom ti imam iti posision a paidda, ken bayat ti panagkantayo kadagiti balikas, ingatom ti imam tapno mangipakita iti nangato a tono ken ibabam ti imam tapno mangipakita iti nababa a tono.

Aweng. Awisem dagiti ubbing nga agbalin nga awengmo babaen ti panagulitda iti kantaem. Kantaam dagiti ubbing iti ababa a ragup ti balikas [phrase] wenno linia, ket kalpasanna ipakantam kadakuada daytoy kenka.

Agusar iti panagduduma. Agkansion kadagiti kanta iti agduduma a wagas, kas iti panagarasaas, panagdayyeng, panagsipat iti beat, panagbaliw iti tempo, wenno panagkanta kabayatan a nakatugaw wenno nakatakder. Mabalin met ti agaramid iti kubo [cube] manipud iti papel ken, iti tunggal suli ti kubo, isurat ti maysa a sabali a wagas iti panagkanta. Awisem ti maysa nga ubing a mangitulid iti kubo tapno maikeddeng no kasano a kantaen dagiti ubbing ti kanta.

Agkanta iti kada grupo. Ikkam ti tunggal klase wenno indibidual iti maysa a ragup ti balikas a kantaen bayat ti panagtakderda, ken kalpasanna pagsisinnukatem ida kadagiti ragup ti balikas agingga a naaddaan ti tunggal klase wenno indibidual iti batang nga agkanta iti tunggal ragup ti balikas.

Agusar kadagiti garaw ti ima. Awisem dagiti ubbing a mangpanunot kadagiti simple a garaw ti ima a mangtulong kadakuada a manglagip kadagiti balikas ken mensahe ti maysa a kanta. Kas pagarigan, no kantaenyo ti maikadua a berso ti “My Heavenly Father Loves Me” (Children’s Songbook, 228–29), mabalinmo nga awisen dagiti ubbing a mangitudo kadagiti matada, aggunay kas kadagiti kulibangbang, ken ikabil a nakalukong dagiti imada iti likud dagiti lapayagda. Kiddawem kadakuada a mangikabil iti imada iti batog ti pusoda kabayatan ti panagkantada iti “Yes, I know Heavenly Father loves me [Wen, ammok nga ay-ayatennak ti Nailangitan nga Ama].”

Agkanta dagiti ubbing a babbai, agkanta dagiti ubbing a lallaki. Mangidrowing iti ladawan ti maysa nga ubing a lalaki ken ladawan ti maysa nga ubing a babai, ket ipigket wenno i-tape dagiti ladawan iti agsina a stick. Kabayatan ti panangrebyu iti maysa a kanta, ingatom ti maysa kadagiti ladawan tapno ipakita no asino ti nasken a mangkanta iti dayta a paset ti kanta.

Panangitulid iti basket. Mangikabil kadagiti nanumeruan a basket wenno dadduma pay a container iti sango ti siled—kapada ti kaadu dagiti container dagiti berso ti maysa a kanta. Awisem ti maysa kadagiti ubbing a mangipuruak iti beanbag wenno nalukot a papel iti uneg wenno asideg ti nanumeruan a container. Pagkantaem dagiti ubbing iti berso a kapada ti nanumeruan iti container.

Iparis ti maysa a ladawan iti maysa a ragup ti balikas. Isurat ti tunggal linia ti kanta iti sabali pay a papel, ket sapulen ti ladawan a mangibagi iti tunggal linia. Ikabil dagiti ladawan iti maysa a bangir ti siled ken ikabil dagiti papel iti sabali pay a bangir. Agkansion iti maysa a kanta, ken kiddawem kadagiti ubbing a mangiparis kadagiti ladawan kadagiti balikas.

Pakaammo: Dagiti panangibasar kadagiti ward ken bishopric ket mayaplikar met kadagiti branch ken branch presidency.