Adtoy ti Kordero ti Dios, ni Walter Rane

Disiembre 21–27

Paskua

“Ket Umayto ditoy Lubong a Mangsubbot kadagiti Taona”

Masansan a magagaran dagiti ubbing nga agsarita maipapan iti no kasano a rambakanda ti Paskua. Utobem no ania ti mabalinmo nga aramiden tapno makatulong kadakuada a mangipamaysa ken ni Jesucristo ken ti panagyamanda iti pannakayanakna.

Isuratmo Dagiti Impresionmo

Yawis ti Panagbibinninglay

Awisem dagiti ubbing nga agsarita wenno agdrowing iti ladawan ti maysa a banag nga ar-aramiden ti pamiliada no panawen ti Paskua tapno matulonganda a manglagip ken ni Jesucristo.

Isuro ti Doktrina: In-inaudi nga Ubbing

1 Nephi 11:13–22; Mosiah 3:5–8; Alma 7:9–13; Helaman 14:1–6; 3 Nephi 1:15, 19–21

Nayanak ni Jesucristo tapno agbalin a Mangisalakanko.

Ammo kadi dagiti ubbing a sursuruam no apay a ramrambakantayo ti Paskua? Kasano a matulongam ida a makaawatan no apay a ti pannakayanak ni Jesucristo ti maysa a gapu para iti parambak?

Dagiti Mabalin nga Aktibidad

• Isalaysaymo ti maipapan iti pannakayanak ni Jesus, a mangi-display kadagiti ladawan bayat ti panagaramidmo daytoy, (kas iti Libro ti Arte ti Ebanghelio, num. 28, 29, 30, 31). Awisem dagiti ubbing a mangibinglay no ania ti ammoda. Usarem ti aktibidad itoy a lawas a mangisuro kadagiti ubbing nga ammo dagiti tao a nagbibiag iti panawen ti Libro ni Mormon maipapan iti pannakayanak ni Jesus.

• Basaem ti ragup dagiti balikas manipud iti Alma 7:11–12 nga isuro kadagiti ubbing no ania ti inaramid ni Jesucristo para kadatayo. Ibinglaymo no apay nga agyamyamanka a nayanak ni Jesucristo, ken yebkasmo ti riknam maipapan iti pangsubbot a sakripisiona.

• Ipakitam dagiti ladawan a mangiladawan ti pangsubbot a sakripisio ti Mangisalakan—kas iti panagsagabana iti Getsemani, ken Panagungar (kitaen iti Libro ti Arte ti Ebanghelio, num. 56, 57, 58, 59). Kiddawem kadagiti ubbing a mangibaga kenka no ania ti makitada iti ladawan. Tulongam ida a makaawat nga imbaon ti Nailangitan nga Ama ni Jesucristo iti daga tapno agsagaba para iti amin a basbasoltayo, matay para kadatayo, ken agungarto tapno makasublitayo a makipagnaed Kenkuana.

• Makipagkansion kadagiti ubbing ti maysa a kanta a maipapan iti pannakayanak ni Jesucristo, kas iti “He Sent His Son” wenno “Away in a Manger” (Children’s Songbook, 34–35, 42–43). Ilawlawag kadagiti ubbing ti ragup dagiti balikas iti kanta a mangiladawan kadagiti bendision nga adda kadatayo gapu iti pannakayanak ni Jesus.

2 Nephi 25:23, 26

Paneknekan ti Libro ni Mormon ni Jesucristo.

Bayat ti panangigibusmo iti panagadalmo iti Libro ni Mormon ita a tawen, ipalagipmo kadagiti ubbing a daytoy a libro ket “Mainayon a Pammaneknek ken ni Jesucristo,” a naisurat tapno makatulong kadatayo nga umasideg Kenkuana.

Dagiti Mabalin nga Aktibidad

• Ingatom ti maysa a kopia ti Libro ni Mormon tapno makita dagiti ubbing. Basaem ti paulo ken itudom ti balikas a “Mainayon a Pammaneknek ken ni Jesucristo.” Pagsisinnublatem dagiti ubbing a mangiggem ti libro, ken tulongam ida a mangsapul iti nagan ti Mangisalakan iti akkubna. Ibagam kadagiti ubbing no kasano ti mariknam maipapan iti Libro ni Mormon ken no kasano a nakatulong kenka a masursuruan maipapan ken ni Jesucristo.

• Ikkam ti tunggal ubing iti maysa a ladawan ni Jesus, wenno pagdrowingem ida iti bukodda a ladawanna. Awisem ida a mangiggem kadagiti ladawanda tunggal mangngegda ti nagan ni Cristo bayat ti panangbasam iti 2 Nephi 25:23, 26. Peneknekam a naisurat ti Libro ni Mormon tapno makatulong kadatayo a “mamati ken ni Cristo” (2 Nephi 25:23).

• Ibinglay kadagiti ubbing ti maysa kadagiti paggugustom a binatog wenno estoria manipud iti Libro ni Mormon a makatulong kenka a makasursuro maipapan ken ni Jesucristo. Saludsodem kadagiti ubbing ti maipapan kadagiti paggugustoda nga estoria iti Libro ni Mormon, ken tulongam ida a mangkita no kasano a makatulong dagitoy nga estoria kadatayo a makasursuro maipapan iti Mangisalakan ken umas-asideg Kenkuana. Ti panangkita iti sumagmamano a ladawan iti Dagiti Estoria iti Libro ni Mormon ket makatulong kadakuada a manglagip kadagiti estoria.

Isuro ti Doktrina: In-inauna nga Ubbing

1 Nephi 11:13–22; Mosiah 3:5–8; Alma 7:10–13; Helaman 14:1–6; 3 Nephi 1:15, 19–21

Nayanak ni Jesucristo tapno agbalin a Mangisalakanko.

Ibilang no kasano a kasayaatan a matulongan dagiti ubbing a makaawat iti kinapateg ti pannakayanak ni Cristo ken no ania ti kaipapanan daytoy kadakuada.

Dagiti Mabalin nga Aktibidad

• Ikkam ti tunggal ubing ti maysa kadagiti reperensia ti nasantuan a kasuratan a masarakan iti panid ti aktibidad itoy a lawas. Awisem ti tunggal maysa kadakuada nga agbasa iti nasantuan a kasuratanda, bigbigenda no asino ti propeta ti agsarsarita, ken isarita ti maysa a banag nga ammo daytoy a propeta maipapan ken ni Jesucristo. Tulongam ida wenno pagaramidem ida a sangkamaysa no kasapulan.

• Ilistam iti pisarra dagiti sumagmamano a pasamak iti pannakayanak ni Jesus, kas iti nailadawan iti Lucas 2:4–14; Mateo 2:1–2; ken 3 Nephi 1:15, 19–21. Tulongam dagiti ubbing a mangsukisok kadagitoy a nasantuan a kasuratan a mangikeddeng no naaramid dagiti pasamak iti Bethlehem, kadagiti America, wenno agpada. Apay nga agyamantayo nga adda kadatayo ti Libro ni Mormon kas maikadua a saksi ti pannakayanak ni Jesucristo ken ti misionna kas Mangisalakan?

• Basaen ti Alma 7:10–13 kadagiti ubbing. Ania ti masursurotayo manipud kadagitoy a bersikulo maipanggep ti pannakayanak ni Jesus? maipapan iti kinadiosanna? maipapan iti misionna iti daga? Awisem dagiti ubbing a mangibinglay iti no apay nga agyamanda ken ni Jesucristo, ken ibinglaymo ti pamaneknekmo maipapan Kenkuana.

2 Nephi 25:23, 26; 33:4, 10

Paneknekan ti Libro ni Mormon ni Jesucristo.

Iti panagsaona maipapan iti Libro ni Mormon, kinuna ni Propeta Joseph Smith nga “as-asidegto ti tao iti Dios babaen ti panangsurotna kadagiti linaonna, ngem iti sabali a libro” (pakauna iti Libro ni Mormon). Kasano a matulongam dagiti ubbing a makaawat iti daytoy a kari?

Dagiti Mabalin nga Aktibidad

• Ikkam ti tunggal ubing iti maysa kadagiti sumaganad a bersikulo: 2 Nephi 25:23, 26; 33:4, 10. Awisem dagiti ubbing a mangbasa iti bersikuloda ken mangbigbig no ania ti kayat ti propeta ti Libro ni Mormon a ni Nephi a maammuantayo. Paisurat kadakuada no ania ti makitada iti pisarra. Ilawlawag nga iladawan dagitoy a banag ti maysa a napateg a panggep ti Libro ni Mormon. Payakem kadagiti ubbing iti tunggal maysa no kasano nga ilawlawagda iti maysa a gayyem ti maysa a napateg a panggep ti Libro ni Mormon.

• Ibinglay kadagiti ubbing ti maysa kadagiti paggugustom a binatog wenno estoria manipud iti Libro ni Mormon a makatulong kenka a makasursuro maipapan ken ni Jesucristo. Saludsodem kadagiti ubbing ti maipapan kadagiti paggugustoda nga estoria iti Libro ni Mormon, ken tulongam ida a mangkita no kasano a makatulong dagitoy nga estoria kadatayo a makasursuro maipapan iti Mangisalakan ken umas-asideg Kenkuana. Ibinglay kadagiti ubbing no kasano a nakatulong kenka ti Libro ni Mormon a maammuan a ni Jesus ti Cristo. Allukoyem dagiti ubbing nga agpanunot iti maysa a bersikulo wenno estoria manipud iti Libro ni Mormon a mangpapigsa iti pammatida ken ni Jesucristo. Kiddawen kadakuada a mangibinglay iti daytoy iti maysa a gayyem wenno miembro ti pamilia nga awan ti ammona maipapan iti Libro ni Mormon.

Yallukoy ti Panagsursuro iti Pagtaengan

Awisem dagiti ubbing a mangibinglay iti pamiliada no kasano a nakatulong kadakuada ti Libro ni Mormon nga agsursuro iti ad-adu pay maipapan ken ni Cristo. Allukoyem ida a mangibinglay iti maysa a bersikulo wenno estoria manipud iti Libro ni Mormon kas paset iti pamaneknekda.

Panangpadur-as iti Panangisurotayo

Magustuan dagiti ubbing dagiti estoria. Ti estoria ket maysa kadagiti kapintasan a wagas a pakatulongan kadagiti ubbing nga agsursuro ken manglagip kadagiti kinapudno. Bayat iti panangibinglaymo iti estoria maipapan iti pannakayanak ni Jesus, ibilangmo met ti panangisaritam kadagiti estoria manipud iti biagmo a nakatulong kenka a nangpapigsa iti pammatim iti Mangisalakan.