Ni Alma a mangbumbuniag kadagiti tao iti Dandanum ti Mormon

Minerva Teichert (1888–1976), Mamuniag ni Alma iti Dandanum ti Mormon, 1949–1951, oil on masonite, 35⅞ x 48 inches. Brigham Young University Museum of Art, 1969

Nobiembre 30–Disiembre 6

Moroni 1–6

“Tapno Maiturongda iti Umno a Dalan”

Sakbay a mangrugika nga agplano kadagiti aktibidad iti panagsursuro para kadagiti ubbing, sikakararag nga adalem ti Moroni 1–6, nga agsapsapul kadagiti pagbatayan ken bersikulo a mariknam a kasapulan a maawatanda.

Isuratmo Dagiti Impresionmo

icon iti panagbibinninglay

Yawis ti Panagbibinninglay

Awisem dagiti ubbing a mangibinglay no ania ti nasursurodan maipapan ken ni Moroni. Mabalinmo nga usaren ti “Kapitulo 53: Ni Moroni ken dagiti Pannursurona” (Dagiti Estoria iti Libro ni Mormon, 154–55, wenno ti maitutop a video iti ChurchofJesusChrist.org) tapno matulongan ida a manglaglagip.

icon iti panangisuro

Isuro ti Doktrina: In-inaudi nga Ubbing

Moroni 4–5

Awatek ti sakramento tapno mangipakita a kanayonto a laglagipek ni Jesus.

Mabalin a maysa a sagrado a naespirtuan a padas ti sakramento—uray pay kadagiti babassit nga ubbing. Kasano a matulongam dagiti ubbing a sursuruam a mangusar iti oras a panangpanunot ken ni Jesus kabayatan ti sakramento?

Dagiti Mabalin nga Aktibidad

• Ipakitam ti ladawan dagiti tao a makiranranud iti sakramento (kitaen ti Libro ti Arte ti Ebanghelio, num. 108). Awisem dagiti ubbing a mangibaga kenka no ania ti mapaspasamak kabayatan iti sakramento. Ania ti nasken nga aramidentayo kabayatan ti sakramento?

• Awisem ti dua a miembro ti ward nga umay iti klase a mangbasa iti Moroni 4:3 ken 5:2 kadagiti ubbing ken mangibinglay no apay a makiranudda iti sakramento iti tunggal lawas. Kiddawem kadakuada a mangisingasing kadagiti banag a mabalin nga aramiden dagiti ubbing a makatulong kadakuada a mangpanunot ken ni Jesus kabayatan iti sakramento ken kanayon a manglaglagip Kenkuana.

• Aggigiddan nga agkansion iti maysa a kanta a makatulong kadagiti ubbing a mangpanunot ken ni Jesus, kas iti “Reverently, Quietly” (Children’s Songbook, 26). Awisem dagiti ubbing a sanayenda ti agtugaw a siuulimek kas iti ar-aramidenda kabayatan ti sakramento.

Moroni 6:1–3

Makapagsaganaak a mabuniagan.

Ti panangiladawan ni Moroni kadagiti tao a nabuniagan iti panawenna ket makatulong kadagiti ubbing nga agsagana nga umawat iti napateg nga ordinansa ita.

Dagiti Mabalin nga Aktibidad

• Basaen dagiti ragup ti balikas manipud iti Moroni 6:1–3 a mangisuro no asino ti mabalin a mabuniagan. Ilawlawag kadagiti ubbing dagiti balikas a saanda a maawatan. Kas pagarigan, ti maysa a kaipapanan ti “nasneban a puso ken napnuan babawi nga espiritu” ket panagbabawi kadagiti basoltayo (Moroni 6:2). Isaritam no kasano a nagsaganaka a mabuniagan, wenno saludsodem iti maysa a tao a nabiit pay a nabuniagan a mangilawlawag no kasano a nagsagana isuna. Tulongam dagiti ubbing a mangpanunot kadagiti wagas a makapagsaganada a mabuniagan iti maysa nga aldaw.

• I-display dagiti ladawan ti tattao a mabunbuniagan (kitaen iti Libro ti Arte ti Ebanghelio, num. 103, 104), ken, pagsaritaem dagiti ubbing maipapan iti no ania ti makitada kadagiti ladawan. Tulongam ida a mangilasin kadagiti detalye, kas iti danum ken puraw a lupot. Saludsodem no apay a mabuniagantayo, ken ilawlawagmo no apay a pinilim ti mabuniagan.

Moroni 6:4–6, 9

Mabendisionannak no mapanak iti simbaan.

Maawatan kadi dagiti ubbing a sursuruam no apay a mapmapantayo iti simbaan iti tunggal lawas? Mangted ti Moroni 6 iti sumagmamano a napapateg a rason.

Dagiti Mabalin nga Aktibidad

• Saludsodem kadagiti ubbing no apay a kayatda ti mapan iti simbaan, ken tulongam ida a manginagan iti sumagmamano a banag nga ar-aramidentayo iti simbaan. Ibasam kadakuada ti sumagmamano kadagitoy a banag manipud iti Moroni 6:4–6, 9, ket awisem ida a mangyakem wenno mangidrowing kadagiti ladawan ti bagbagida nga agar-aramid iti sumagmamano kadagitoy a banag (kas iti panagkararag, panagikasaba, panagkanta, ken pannakiranud iti sakramento).

• Tulongam dagiti ubbing a mangkansion iti maysa a kanta maipapan iti idadar-ay iti simbaan, kas iti “When I Go to Church” (Children’s Songbook, 157). Isaritam kadagiti ubbing no apay a kayatmo ti mapan iti simbaan ken no kasano a nangbendision daytoy kenka.

icon iti panangisuro

Isuro ti Doktrina: In-inauna nga Ubbing

Moroni 2–6

Maysa a sagrado a sagut ti Espiritu Santo.

Nadakamat ti Espiritu Santo iti sumagmamano a daras iti Moroni 2–6. Kasano a mausarmo dagitoy a kapitulo tapno matulongam dagiti ubbing a maawatanda no kasano a nakatulong kadakuada ti Espiritu Santo?

Dagiti Mabalin nga Aktibidad

• Kiddawen kadagiti ubbing a mangsapul iti tunggal bersikulo iti Moroni 2–6 a mangdakamat iti Espiritu Santo wenno ti Espiritu. Aggigiddan a basaenyo ti tunggal maysa kadagitoy a bersikulo, ket kiddawen kadagiti ubbing nga ilista iti pisarra dagiti banag a nasursuroda maipapan iti Espiritu Santo. Kasano a makatulong ti Espiritu Santo kadatayo?

• Isaritam kadagiti ubbing maipapan iti panawen a nariknam ti impluensia ti Espiritu Santo, iti simbaan wenno iti dadduma pay a lugar. Ilawlawag no kasano a naammuam a daytoy ti Espiritu Santo ken no kasano a natulongannaka . Awisem dagiti ubbing a mangibinglay kadagiti ania man a padasda iti Espiritu Santo, ken allukoyem ida a manggun-od iti impluensiana.

  agtutubo a babai nga umaw-awat iti bendision

  Maited ti sagut ti Espiritu Santo babaen iti panangipatay kadagiti ima.

Moroni 4–5

Awatek ti sakramento tapno mangipakita a kanayonto a laglagipek ni Jesus.

No maawatan dagiti ubbing ti kinasagrado ti sakramento, ad-adda a tratuenda daytoy iti panagraem ken mariknada nga asidegda iti Dios kabayatan daytoy nga ordinansa.

Dagiti Mabalin nga Aktibidad

• Isurat dagiti ragup dagiti balikas manipud iti Moroni 4:3 ken 5:2 iti nagsisina a babassit a papel, ket kiddawem kadagiti ubbing a mangikabil kadagiti ragup dagiti balikas iti husto nga urnos. Segun kadagitoy a bersikulo, apay a napateg ti sakramento?

• Awisem dagiti ubbing a mangipapan nga umay ti maysa a gayyem iti miting ti sakramento iti umuna a gundaway. Kasano nga ilawlawagda iti gayyemda no ania ti sakramento ken no apay a makiranudtayo iti daytoy? Allukoyem ida a mangusar iti Moroni 4:3 ken 5:2 iti panangilawlawagda.

• Awisem dagiti ubbing a mangibinglay kadagiti banag nga aramiden dagiti pamiliada kabayatan ti sakramento tapno nadaydayawda ken pampanunotenda ti maipapan ken ni Jesucristo. Ania dagiti dadduma pay a kapanunotan nga adda kadakuada? Awisem ida a mangpili iti maysa kadagitoy a kapanunotan ken mangitudingda iti panggep a tun-oyen a mangbsbos iti ad-adu pay a kanito a mangpanonot iti Mangisalakan kabayatan ti sakramento.

Moroni 6:4–6, 9

Mapantayo iti simbaan tapno makiranud iti sakramento ken mangsuporta iti tunggal maysa.

Mabalin a makatulong kadagiti ubbing a sursuruam dagiti balikas ni Moroni a mangkita iti dakdakkel a panggep iti ipapanda iti simbaan tunggal lawas.

Dagiti Mabalin nga Aktibidad

• Isurat ti Apay a mapmapantayo iti simbaan? Iti pisarra, ket kiddawem kadagiti ubbing a mangisurat kadagiti mabalin a sungbat. Awisem ida a mangsapul kadagiti nayon pay a sungbat iti Moroni 6:4–6, 9 ket inayon dagitoy iti listaanda iti pisarra. Awisem dagiti ubbing a mangibinglay no kasano a nabendisionanda gapu iti ipapanda iti simbaan. Payakem kadakuada nga ilawlawagda iti maysa a gayyem a sabali ti pammatina no apay nga agyamyamanda gapu ta nagkamengda iti Simbaan.

• Ipakitam dagiti ladawan wenno pagarigan dagiti nasustansia a taraon. Apay a napateg a taraonantayo ti bagbagitayo? Aggigiddan a basaen ti Moroni 6:4, ken kiddawen kadagiti ubbing no ania iti panagkunada a kaipapanan ti ragup dagiti balikas a “mataraonanda kadagiti nasayaat a balikas ti Dios.” Kasano a mataraonannatayo iti balikas ti Dios?

• Awisem ti maysa kadagiti ubbing a mangbasa iti sumaganad nga adaw manipud ken ni Elder Jeffrey R. Holland, ken ilawlawag no ania ti isuro daytoy maipapan iti no kasano a mataraonantayo ti tunggal maysa: “Kaaduan a tattao ti saan a mapan iti simbaan tapno agsapul laeng iti sumagmamano a baro a kinapudno ti ebanghelio wenno mangkita kadagiti nabayagen a gayyem, nupay napateg amin dagitoy. Umayda nga agsapsapul iti naespirituan a padas. Agtarigagayda iti kapia. Agtarigagayda a mapapigsa ti pammatida ken mapabaro ti namnamada. Tarigagayanda, iti ababa a pannao, a mataraonan iti nasayaat a balikas ti Dios, tapno mapapigsa babaen dagiti bileg ti langit” (“A Teacher Come from God,” Ensign, Mayo 1998, 26). Kasano a matulongantayo ti tunggal maysa a mataraonanda a naespirituan iti simbaan?

icon iti panagsursuro

Yallukoy ti Panagsursuro iti Pagtaengan

Allukoyem dagiti ubbing a makisarita iti pamiliada maipapan kadagiti rason no apay a kayatda ti mapan iti simbaan iti tunggal lawas.

Panangpadur-as iti Panangisurotayo

Mangsuportar kadagiti nagannak. Sikakararag a mangsapul kadagiti wagas a mangsuporta kadagiti nagannak dagiti ubbing a sursuruam. Kasano a masuportaram dagiti panagkagumaanda a mangisuro iti ebanghelio kadagiti annakda? Kas pagarigan, mabalinmo a kasarita dagiti nagannak maipapan kadagiti kasapulan ken paggugusto dagiti annakda wenno mabalinmo nga ibinglay kadakuada no ania ti nasursuro dagiti annakda iti klase (kitaen iti Panangisuro iti Wagas ti Mangisalakan, 25.), 25).

panid ti aktibidad: makiranudak iti sakramento a manglaglagip ken ni Jesucristo