Tapno Maammuanyo, ni Gary L. Kapp

Disiembre 14–20

Moroni 10

“Umasidegkayo ken ni Cristo, ket Agbalinkayo a Naan-anay Kenkuana”

Sumagmamano kadagiti ubbing ti mabalin nga addaan iti napapateg a padas iti panangsursuro manipud iti Libro ni Mormon iti pagtaengan. Kasano a mausarmo dagita a padas tapno maparegtam ti amin nga ubbing nga agbasa kadagiti nasantuan a kasuratan iti pagtaengan?

Isuratmo Dagiti Impresionmo

Yawis ti Panagbibinninglay

Ipasam ti maysa a kopia ti Libro ni Mormon. No maiggaman ti tunggal ubing ti libro, kiddawem kenkuana nga ibinglayna ti maysa a banag nga ipatpategna maipapan iti Libro ni Mormon—maysa a paggugustona nga estoria, maysa a pammaneknek, wenno maysa a padas a nasursurom iti daytoy iti pagtaengan wenno iti simbaan.

Isuro ti Doktrina: In-inaudi nga Ubbing

Moroni 10:3–5

Maammuak para iti bagik a pudno ti Libro ni Mormon.

Mangsapul kadagiti wagas a pakatulongam kadagiti ubbing nga umawat iti awis ni Moroni nga agsaludsod iti Dios no pudno ti Libro ni Mormon.

Dagiti Mabalin nga Aktibidad

• Ipakita ti ladawan ni Moroni a mangikalkali iti balitok a pinanid (kitaen ti balabala itoy a lawas iti Umaykayo, Sumurot Kaniak—Para kadagiti Indibidual ken Pamilia), ket kiddawen kadagiti ubbing a mangiladawan no ania ti makitada. Awisem ida a mangitudo kadagiti pinanid, ken mangilawlawag a naisurat kadagitoy a pinanid dagiti balikas a mabasatayo ita iti Libro ni Mormon. Pagpammarangem dagiti ubbing nga isuda ni Moroni nga agsursurat kadagiti pinanid ken mangikalkali kadagitoy. Aggigiddan a kantaen ti “The Golden Plates” (Children’s Songbook, 86).

• Ipakitam ti Libro ni Mormon, ken basaem ti Moroni 10:4. Inyunay-unay a mabalintayo a saludsoden ti Dios no pudno ti Libro ni Mormon, ken ibaonnanto ti Espiritu Santo a mangipaneknek kadatayo. Mabalin met nga usarem ti “Kapitulo 54: Ti Kari ti Libro ni Mormon” (Dagiti Estoria iti Libro ni Mormon, 156, wenno ti maitutop a video iti ChurchofJesusChrist.org). Ibinglaymo no kasano a tinulongannaka ti Espiritu Santo a manggun-od iti pammaneknekmo maipapan iti Libro ni Mormon. Tulongam dagiti ubbing a makaawat no ania ti rikna ti maysa a saksi manipud iti Espiritu. Agkansion iti maysa a kanta maipapan iti panagsapul ti kinapudno, kas iti “Search, Ponder, and Pray” (Children’s Songbook, 109).

Moroni 10:8–20

Mangted kaniak ti Nailangitan nga Ama kadagiti naespirituan a sagut.

Inlawlawag ni Moroni dagiti sagut nga ited ti Dios kadagiti annakna no adda pammatida Kenkuana. Mabalinmo a tulongan dagiti ubbing a maaddaan iti pammati nga ikkanto ti Dios ida kadagiti naespirituan a sagut.

Dagiti Mabalin nga Aktibidad

• Isurat dagiti numero 9 agingga iti16 iti nagsisina a papel, ket bungonem ti tunggal papel a kas maysa a sagut. Pagsisinnublatem dagiti ubbing a manglukat kadagiti sagut. Bayat ti panangaramidda, aggigiddan a mangbasa iti Moroni 10:9–16 a maitutop kadagiti numero, ket tulongam dagiti ubbing a mangbigbig iti tunggal naespirituan a sagut. Ilawlawag a sagsagut dagitoy nga ited ti Nailangitan nga Ama kadagiti annakna tapno makapagtitinnulong ti tunggal maysa kadatayo ken mangaramid iti aramidna.

• Pagsaritaem dagiti ubbing iti nabiit maipapan kadagiti paggugustoda a sagut a naawatda. Isaritam kadagiti ubbing maipapan kadagiti naespirituan a sagut a nadlawmo nga inted kadakuada ti Nailangitan nga Ama, kas kadagiti sagut ti pammati, sirib, pammaneknek, kinasayaat, ken ti kabaelan nga agsursuro.

Moroni 10:32

Kayat ni Jesucristo nga umasidegak Kenkuana.

Ibilangmo no kasano a matulongam dagiti ubbing a makaawat no ania ti kayat a sawen ti “umasidegkayo ken ni Cristo.”

Dagiti Mabalin nga Aktibidad

• Ibasam kadagiti ubbing manipud iti Moroni 10:32, “Umasidegkayo ken ni Cristo, ket agbalinkayo a naan-anay kenkuana,” ken awisem dagiti ubbing a mangulit kenka ti ragup dagiti balikas. Kiddawem kadagiti ubbing nga agkidem bayat ti pannangikabilmo iti ladawan ni Cristo iti maysa a lugar iti siled. Kalpasanna pagmulagatem ida, sapulenda ti ladawan, ken aguummongda iti lawlaw daytoy. Ilawlawagmo kadagiti ubbing dagiti wagas a makaasidegtayo ken ni Cristo (kitaen, kas pagarigan, iti, Pagannurotan ti Pammati 1:3–4). Ulitem daytoy nga aktibidad, paikabilmo kadagiti ubbing ti ladawan iti maysa a lugar iti siled.

• Tulongam dagiti ubbing nga mangarkos kadagiti sinan-puso a tsapa nga agkuna iti “Ay-ayatek ti Dios iti amin a kabaelak, panunotko, ken pigsak” (kitaen iti Moroni 10:32). Kasano nga ipakitatayo nga ay-ayatentayo Isuna?

Isuro ti Doktrina: In-inauna nga Ubbing

Moroni 10:3–5

Maammuak ti kinapudno babaen ti bileg ti Espiritu Santo.

Kayat ti Dios a maammuam ti tunggal maysa kadatayo a pudno ti Libro ni Mormon. Tulongam dagiti ubing a makaawat iti kari ti Dios nga “iparangarangna ti kinapudnona kadakayo, babaen ti pannakabalin ti Espiritu Santo.”

Dagiti Mabalin nga Aktibidad

• Isurat iti pisarra dagitoy a balikas basaen, laglagipen, Utoben, ken Kiddawen. Awisem dagiti ubbing a sapulen kadagitoy a balikas iti Moroni 10:3–4. Ania ti basaen, laglagipen, utoben, ken kiddawentayo tapno magun-od wenno mapapigsa dagiti pammaneknektayo maipapan iti Libro ni Mormon? Kiddawem kadagiti ubbing a mangsapul kadagiti pagpapadaan dagitoy a bersikulo ken ti kanta a “Search, Ponder, and Pray” (Children’s Songbook, 109).

• Tulongam dagiti ubbing a manglagip iti sumagmamano a padas a napasaranyo a sangkamaysa iti panagsursuro manipud iti Libro ni Mormon. Ibinglaymo dagiti riknam maipapan iti Libro ni Mormon, agraman no kasano a nagun-odmo wenno napapigsam ti pammaneknekmo a pudno daytoy. Awisem dagiti ubbing a mangibinglay kadagiti rikna ken pammaneknekda.

• Isaritam ti maysa a panawen idi nagpaneknek ti Espiritu Santo kenka maipapan iti maysa a banag. Ilawlawagmo no kasano ti riknam ken no kasano a naammuan a daytoy ti Espiritu Santo. Tulongam dagiti ubbing a makasursuro manipud iti: Juan 14:26–27; Doktrina ken Katulagan 6:15, 23; 8:2–3; 9:7–9; 11:12–14.

Moroni 10:8–19

Mangted kaniak ti Nailangitan nga Ama kadagiti naespirituan a sagut.

Adu iti aldawtayo ti “[mang]tallikud … kadagiti sagut ti Dios” (Moroni 10:8). Tulongam dagiti ubbing a makakita nga adda pay laeng ita dagitoy a sagut.

Dagiti Mabalin nga Aktibidad

• Isuratmo dagiti sagut a nadakamat iti Moroni 10:9–16 kadagiti akikid a papel, ket ikabil dagitoy iti maysa a kahon ti sagut. Isurat dagiti numero 9 agingga iti16 iti pisarra, ken awisem dagiti ubbing nga agsisinublat a mangpidut iti papel manipud iti kahon ket iparis dagitoy iti numero ti bersikulo iti pisarra. Ania ti masursurotayo maipapan kadagitoy a sagut manipud iti bersikulo 8 ken 17–18?

• Isaritam ti estoria maipapan iti idadateng ti Libro ni Mormon (kitaen iti “Kapitulo 3: Ni Anghel Moroni ken dagiti Balitok a Pinanid,” Doktrina ken Katulagan, 13–17). Tulongam dagiti ubbing a mangbigbig kadagiti sagut a nadakamat iti Moroni 10:9–16 nga inted ti Dios ken ni Joseph Smith tapno maisangbayna ti Libro ni Mormon. Apay a kayat ti Nailangatan nga Ama a mamatitayo kadagiti naespirituan a sagut iti agdama?

Moroni 10:32–33

Kayat ni Jesucristo nga umasidegak Kenkuana.

Kasano nga awisen dagiti ubbing nga “umasidegkayo ken ni Cristo, ket agbalinkayo a naan-anay kenkuana”?

Dagiti Mabalin nga Aktibidad

• Isurat iti pisarra dagiti saludsod a kas iti Ania ti kayat a sawen ti umasideg ken ni Cristo? Tulongam dagiti ubbing a mangsukisok iti Mosiah 10:32–33 tapno maammuan dagiti mabalin a sungbat. Agtitinnulong a mangilista no ania ti kayat ni Cristo nga aramidentayo ken no ania ti ikarina nga aramiden para kadatayo.

• Ibinglaymo ti paggugustom a binatog wenno estoria manipud iti Libro ni Mormon a nakatulong kenka nga umasideg ken ni Cristo, ken awisem dagiti ubbing nga aramidenda met ti kastoy. Irebyum kadagiti ubbing dagiti balikas ni Propeta Joseph Smith manipud iti Pakauna iti Libro ni Mormon “Umas-asideg ti tao iti Dios babaen ti panagtungpal kadagiti linaon [ti Libro ni Mormon], ngem iti ania man a sabali a libro.” Paneknekam no kasano a napasamak daytoy iti biagmo.

Yallukoy ti Panagsursuro iti Pagtaengan

Awisem dagiti ubbing nga agkararag para iti napigpigsa a pammaneknek maipapan iti Libro ni Mormon ken kalpasanna ibinglayda ti pammaneknekda iti maysa a miembro ti pamilia wenno maysa a gayyem.

Panangpadur-as iti Panangisurotayo

Yallukoy ti panagbibinglay. Masansan nga addaan dagiti ubbing kadagiti napapateg a nauneg a pannakaammo ken pannakaawat maipapan iti ebanghelio. Makatulong ti pannangibinglayda kadagiti kapanunotanda a mangisagana kadakuada iti pannakisaritada kadagiti gagayyemda maipapan iti ebanghelio (kitaen iti Panangisuro iti Wagas ti Mangisalakan, 30.)