“Disiembre 14–20. Moroni 10: ‘Umasidegkayo ken ni Cristo, ket Agbalinkayo a Naan-anay Kenkuana,’” Umaykayo, Sumurot Kaniak—Para kadagiti Indibidual ken Pamilia: Libro ni Mormon 2020 (2020)
“Disiembre 14–20. Moroni 10,” Umaykayo, Sumurot Kaniak—Para kadagiti Indibidual ken Pamilia: 2020
Tapno Maammmuanyo, ni Gary L. Kapp
Disiembre 14–20
Moroni 10
“Umasidegkayo ken ni Cristo, ket Agbalinkayo a Naan-anay Kenkuana”
Kabayatan ti panangileppasmo a panangbasa iti Libro ni Mormon, ibilangmo a maaddaan iti napabaro a pammaneknek manipud iti Espiritu Santo a pudno daytoy. Bayat ti panangaramidmo, isuratmo dagiti impresion a maawatmo.
Isuratmo dagiti Impresionmo
Irugi ti Libro ni Mormon iti kari ni Nephi a mangipamatmat kadatayo a “ti panangngaasi ti Apo adda kadagiti amin a pinilina, gapu iti pammatida” (1 Nephi 1:20). Igibus ti libro iti isu met la a mensahe manipud ken ni Moroni bayat ti panagsaganana nga “italimeng” dagiti kasuratan: inawisnatayo a “manglagip no kasano ti kinamanangngaasi ti Apo” (Moroni 10:2–3). Uray no panunotentayo laeng ti adu a panangngaasi a naisurat iti Libro ni Mormon, mangted daytoy kadatayo ti adu a pagpanunotan. Ania dagiti pagarigan a sumangbay iti panunotmo? Mabalin nga utobem ti naasi a wagas a panangidaulo ni Lehi iti pamiliana iti langalang ken iti ballasiw dagiti dadakkel a danum, dagiti nadungngo nga asi nga impakitana ken ni Enos idi umararaw ti kararuana iti pammakawan, wenno ti asi nga impakitana ken ni Alma, maysa a naiget a kabusor ti simbaan a nagbalin a maysa kadagiti natured a salaknibna. Wenno mabalin a maiturong dagiti pampanunotmo iti asi ti nagungar a Mangisalakan nga impakitana iti tattao idi inagasanna dagiti masaksakitda ken binendisionanna dagiti babassit nga ubbingda. Nalabit a ti kapatgan, amin dagitoy ket mangipalagip kenka no “kasano ti kinamanangngaasi kenka ti Apo” ta maysa kadagiti umuna a panggep ti Libro ni Mormon ket mangawis iti tunggal maysa kadatayo nga umawat iti asi ti Dios—maysa nga awis a gagangay a nayebkas kadagiti pammakada a balikas ni Moroni, “Umasidegkayo ken ni Cristo, ken agbalin a naan-anay kenkuana” (Moroni 10:32).
Dagiti Kapanunotan para iti Bukod a Panagadal iti Nasantuan a Kasuratan
Maammuak ti kinapudno babaen ti bileg ti Espiritu Santo.
Ti kari iti Moroni 10:3–7 ket nangbalbaliw iti biag dagiti minilion a tattao iti intero a lubong. Kasano a napagbalbaliwna ti biagmo? Ikarkarigatam man a manggun-od wenno mangpatibker ti pammaneknekmo maipapan iti Libro ni Mormon, mayaplikar kenka ti awis ni Mormon. Bayat ti panangbasam iti Moroni 10:3–7, ibilang ti naan-annad a panagbasa ngem iti napalabas. Mabalinmo nga amirisen ti tunggal ragup ti balikas, damagem iti bagim dagiti saludsod a kas kadagitoy: Ania ti kaipapanan daytoy? Kasano a maaramidko a nasaysayaat daytoy? Ania dagiti padas a napasarak iti daytoy? Kasano nga impakaammo kaniak ti Espiritu Santo ti kinapudno ti Libro ni Mormon?
Panunotem met ti maipapan iti maysa a tao nga agkasapulan a dumngeg iti pammaneknekmo iti Libro ni Mormon. Kasano a matulonganto dayta a tao a makagun-od iti bukodna a pammaneknek?
“Dimo pagtallikudan dagiti sagut ti Dios.”
Adu dagiti nadumaduma a wagas a mabalin ti maysa a tao a tallikudan … dagiti sagut ti Dios” (Moroni 10:8). Pagtallikudan ti sumagmamano a tattao nga adda dagitoy a sagut. Mabalin pay a pagtallikudan dagiti dadduma nga addaanda kadagiti naespirituan a sagut ngem mabigbigda dagitoy iti dadduma a tattao. Pagtallikudan pay laeng dagiti dadduma dagiti sagutda babaen iti panangbaybay-a kadagitoy wenno saan a panangpadur-as kadagitoy.
Bayat ti panangbasam iti Moroni 10:8–25, sapulem dagiti kinapudno a mangtulongto kenka a mangtakuat kadagiti naespirituan a sagutmo ket usarem dagitoy nga addaan iti dakdakkel a bileg a mangbendision iti bagim ken kadagiti dadduma. Ikarigatam a gun-oden dagiti nalawag a pannakaammo ken pannakaawat maipapan kadagiti sagut ti Dios nga intedna kenka wenno dagiti sagut a kayatna nga ikarigatam a gun-oden. Apay napateg a “laglagipen nga aggapu ken ni Cristo ti tunggal nasayaat a sagut”? (Moroni 10:18).
Ibilang pay daytoy a balakad manipud ken ni Elder John C. Pingree Jr.: “Kasano ngarud a maammuantayo dagiti saguttayo? Mabalintayo a pagibasaran ti bendisiontayo iti kinapatriarka, agsaludsod kadagiti makaam-ammo unay kadatayo, ket personal nga ammuen no ania ti gagangay a paglaingan ken magustuantayo. Ti kapatgan, mabalintayo ti agsaludsod iti Dios (kitaen iti Santiago 1:5; DK 112:10). Ammona dagiti saguttayo, agsipud ta intedna dagitoy kadatayo” (“I Have a Work for Thee,” Ensign wenno Liahona, Nob. 2017, 33).
Kitaen iti Pangiwanwan iti Nasantuan a Kasuratan, “Dagiti Sagut ti Espiritu,” scriptures.ChurchofJesusChrist.org.
Makapagbalinak a naan-anay wenno perpekto babaen ti parabur ni Jesucristo.
Ti patigmaan ni Moroni nga “umay ken ni Cristo” iramanna ti saan laeng nga ad-adda a panagsursuro maipapan Kenkuana wenno panangpampanunot maipapan Kenkuana a masansansan wenno uray napaspasnek a mangtungpal kadagiti bilinna, kas kapateg dagitoy a banag. Ngem ketdi, daytoy ket maysa nga awis nga umasideg ken Cristo iti kaan-anayan wenno kaperpektuan a kaipapanan no mabalin—tapno agbalin a kas Kenkuana. Bayat ti panangbasam iti Moroni 10:30–33, makitam dagiti ragup ti balikas a mangtulong kenka a makaawat no ania ti kayat a sawen ti naan-anay nga umasideg ken ni Cristo, kas iti “agtalekkayo iti aminl a nasayaat a sagut,” “tallikudanyo ti amin a saan a nadiosan,” ken, siempre, “agbalinkayo a a naan-anay kenkuana” (nainayon dagiti nagiray a balikas).
Kasano a posible daytoy? Sapulen dagiti sungbat iti Moroni 10:30–33. Ania ti ibagbaga ti Espiritu a rumbeng nga aramidem tapno ad-adda a naan-anayka nga “umasideg ken ni Cristo ken agbalin a naan-anay kenkuana”?
Kitaen iti Omni 1:26; Pangiwanwan iti Nasantuan a Kasuratan, “Naan-anay,” scriptures.ChurchofJesusChrist.org.
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
Bayat ti panagbasayo a sangapamiliaan kadagiti nasantuan a kasuratan, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a kapanunotan.
Moroni 10
Basaen nga aggigiddan daytoy a kapitulo, a mangsapsapul iti tunggal kanito nga usaren ni Moroni ti balikas nga igunamgunam. Ilista wenno markaan no ania dagiti igunamgunam ni Moronii—wenno yal-allukoyna unay—nga aramidentayo. Ania ti maaramidtayo tapno masurot dagiti ipagunamgunamna?
Moroni 10:3
Ania ti nasursurotayo maipapan iti asi ti Apo kabayatan ti panagbasatayo iti Libro ni Mormon itoy a tawen? Kasano a kinaasian ti Apo ti pamiliatayo?
Moroni 10:3–5
Kalpasan ti panangbasam kadagitoy a bersikulo, mabalinmo nga idawat kadagiti miembro ti pamilia a mangibinglay no kasano a naammuanda a pudno ti Libro ni Mormon. Ibilang ti aggigiddan a panagkansion iti maysa a kanta maipapan iti panagsapsapul iti kinapudno, kas iti “Search, Ponder, and Pray” (Children’s Songbook, 109). Mabalinmo pay nga awisen dagiti miembro ti pamilia nga isuratda dagiti pammaneknekda iti maysa a journal ti pamilia.
Moroni 10:8–18
Ti paskua ket maysa a gagangay a panawen nga agpanunot maipapan iti panangawat kadagiti sagut. Nalabit a mabalin a mangbungon kadagiti sagut dagiti miembro ti pamilia para iti tunggal maysa a mangibagi kadagiti “sagut ti Dios” a nadakamat iti Moroni 10:9–16. Ibagi pay dagitoy a sagut dagiti dadduma pay a nasayaat a sagut nga aggapu ken ni Cristo a makitada iti tunggal maysa.
Moroni 10:27–29, 34
Mabalin nga ibinglay dagiti miembro ti pamilia no ania ti kayatda nga isao ken ni Moroni no “sanguenda [isuna] iti sango ti makaay-ayo a pangukoman ti naindaklan a Jehova.”
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Panangpadur-as iti Bukod a Panagadal
Sapulem ni Jesucristo. Ti panggep ti Libro ni Mormon—ken ti amin a nasantuan a kasuratan—ket mangipaneknek maipapan ken ni Jesucristo. Ania ti masursurom maipanggep ken ni Jesucristo iti Moroni 10? Ania ti mariknam a makaparegta nga aramidem nga umasideg Kenkuana?
Ni Moroni a Mangikalkali kadagiti Pinanid, ni Jon McNaughton