Adtoy ti Kordero ti Dios, ni Walter Rane

Disiembre 21–27

Paskua

“Umayto Ditoy Lubong a Mangsubbot kadagiti Taona”

Ti panawen ti Paskua ti maysa a tiempo tapno ipakita ken yebkas ti panagyaman para iti pannakaipasngay ti Mangisalakantayo, ni Jesucristo. Bayat ti panangbasam ken panangutobmo itoy a lawas maipapan iti pannakayanak ken biagna, ibilangmo no kasano a napatibker ti pammaneknekmo nga Isu ti Mangisalakan iti lubong babaen ti panagadalmo iti Libro ni Mormon. Isuratmo dagiti impresion nga umay kenka.

Isuratmo dagiti Impresionmo

Manipud iti Nephi agingga iti Moroni, tunggal propeta ti Libro ni Mormon ket nagkumit iti nasagraduan a panggep a nagupgop iti paulo a panid ti libro: “Ti panangallukoy iti [amin a tao] a ni Jesus ti Cristo.” Nakita Isuna ti maysa a propeta kas maysa nga espiritu sakbay daytoy a biag, ken nakita ti dadduma ti pannakayanakna ken panagserbina iti maysa a parmata. Maysa ti nagtakder iti rabaw ti pader tapno ipakdaar dagiti pagilasinan ti pannakayanakna ken ti ipapatayna, ken maysa pay ti nagparintumeng iti sanguanan ti nagungar a bagina, a mangap-apros kadagiti sugat dagiti ima, saka, ken sikiganna. Ammoda amin daytoy napateg a kinapudno: “Awan ti sabali a pamuspusan wenno wagas a pakaisalakanan ti tao, iti laeng pangsubbot a dara ni Jesucristo, nga … umayto a mangsubbot iti lubong” (Helaman 5:9).

Isu nga iti daytoy a panawen ti Paskua, kabayatan ti panangrambak dagiti mamatpati iti intero a lubong iti kinaimbag ken ayat ti Dios a nangyeg iti Anakna, utobem no kasano a napatibker ti Libro ni Mormon ti pammatim ken ni Cristo. Bayat ti panangpanunotmo maipapan iti pannakayanakna, utobem no apay immay Isuna ken no kasano a nangbalbaliw iti biagmo ti yaayna. Kalpasanna mapadasam ti pudno a rag-o ti Paskua—ti sagut nga ited ni Jesucristo kenka.

Dagiti Kapanunotan para iti Bukod a Panagadal iti Nasantuan a Kasuratan

1 Nephi 11:13–36; Mosiah 3:5–10; Helaman 14:1–13; 3 Nephi 1:4–22

Immay ni Jesucristo ditoy lubong tapno agbalin a Mangisalakanko.

Kannawidan ti panagbasa iti pakasaritaan ti pannakayanak ti Mangisalakan iti Baro a Tulag iti panawen ti Paskua, ngem masarakam pay dagiti nabiag a padto iti daytoy nasagraduan a pasamak iti Libro ni Mormon. Kas pagarigan, masarakan dagiti padto ti pannakayanak ken panagserbi ti Mangisalakan iti 1 Nephi 11:13–36; Mosiah 3:5–10; Helaman 14:1–13; 3 Nephi 1:4–22. Ania dagiti impresion maipapan ken ni Jesucristo nga umay kenka bayat ti panagbasam kadagitoy a binatog ken mangutob kadagiti mabalin a kaipapanan dagiti pagilasinan ti pannakayanakna? Kasano a patibkeren dagiti pammaneknek dagitoy a propeta iti nagkauna nga Amerika ti pammaneknekmo ken ni Cristo ken ti misionna?

Kitaen met iti Mateo 1:18–25; 2; Lucas 2.

2 Nephi 2:6; Alma 7:7–13; 11:40; Helaman 5:9; 14:16–17

Ni Jesucristo ti Mannubbot iti amin a sangkataw-an.

Awan ti pakaigapuan ti panangrambaktayo iti pannakayanak ni Jesucristo no saan a gapu iti pangsubbot a sakripisiona, a babaen itoy Isalakannatayo manipud iti basol ken ipapatay, liwliwaennatayo iti rigrigat, ken tulongannatayo nga “agbalin a naan-anay Kenkuana” (Moroni 10:32). Ania ti nasursurom manipud iti Libro ni Mormon iti daytoy a tawen maipapan iti bileg ti Mangisalakan a mangsubbot kenka? Adda kadi dagiti ania man nga estoria wenno pannursuro a napateg kenka? Ibilang no ania ti isuro kenka dagiti sumaganad a pagarigan maipapan iti pangsubbot a mision ti Mangisalakan: 2 Nephi 2:6; Alma 7:7–13; 11:40; Helaman 5:9; 14:16–17. Ania ti mariknam a makaparegta nga aramidem a mangipakita Kenkuana iti kinamanagyamanmo ? (Christmas.ComeUntoChrist.org ket addaan iti sumagmamano a kapanunotan a pangrugiam.)

1 Nephi 6:4; 19:18; 2 Nephi 25:23, 26; 33:4, 10

Paneknekan ti Libro ni Mormon maipapan ken ni Jesucristo.

Ti “Mainayon a Pammaneknek ken ni Jesucristo” ket ad-adda pay ngem iti sub-titulo ti Libro ni Mormon; maysa daytoy a palawag iti nasantuan a panggepna. Utobem no ania ti masursurom manipud kadagiti sumaganad a nasantuan a kasuratan maipapan iti mision ti Libro ni Mormon nga agpaneknek ken ni Cristo: 1 Nephi 6:4; 19:18; ken 2 Nephi 25:23, 26; 33:4, 10.

Ibilang ti panangisurat iti journal no kasano a nayas-asidegnaka ken ni Cristo ti panagadal iti Libro ni Mormon itoy a tawen. Makatulong kenka ti sumaganad a pannignay:

• “Maysa a baro a banag a nasursurok maipanggep iti Mangisalakan itoy a tawen ket …”

• “Ti panangbasa kadagiti [bersikulo maipapan iti Mangisalakan] ket nangballbaliw iti wagasko a …”

• “Ti paboritok a tao [wenno estoria] iti Libro ni Mormon ket insuronak a ti Mangisalakan …”

Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening

Bayat ti panagbasayo a sangapamiliaan kadagiti nasantuan a kasuratan, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a kapanunotan.

1 Nephi 11:13–23; Mosiah 3:5–10; Helaman 14:1–13; 3 Nephi 1:4–22

Mabalin a magustuan dagiti ubbing ti agdrowing kadagiti ladawan no ania ti mangngegda bayat ti panangbasam kadagiti estoria ti pannakayanak ken panagserbi ni Cristo iti 1 Nephi 11:13–23; Mosiah 3:5–10; Helaman 14:1–13; ken 3 Nephi 1:4–22. Kalpasanna mabalin nga uliten nga isalaysay dagiti ubbing dagiti estoria nga usarenda dagiti ladawan nga indrowingda.

“Isu ti Sagut”

Tapno matulongam ti pamiliam nga agpokus iti sagut nga inted ti Nailangitan nga Ama kadatayo babaen ti panangibaonna iti Anakna, mabalinmo a bungonen ti ladawan ni Jesucristo kas maysa a sagut iti Paskua. Mabalin a pagsasaritaan dagiti miembro ti pamilia maipapan kadagiti paborito a sagut iti Paskua a naawatda wenno namnamaenda nga awaten. Kalpasanna mabalinda nga ikkaten ti bungon ti ladawan ni Cristo ket ilawlawag no kasano anagbalin nga Isu ket maysa a napateg a sagut para kadatayo. Ti video nga “He Is the Gift” (ChurchofJesusChrist.org) ket matulongannaka a mangilawlawag no kasano a mabalinmo a matakuatan, maarakup, ken maibinglay ti sagut ti Mangisalakan kas pamilia itoy a Paskua.

Mabalin pay a mairanud ti pamiliam manipud iti panangpanunot maipapan iti maysa a “sagut” a kayatda nga ited iti Mangisalakan, kas iti panagkagumaan nga agbalin a naas-asi kadagiti dadduma wenno panagkagumaan a mangparmek iti maysa a dakes nga ugali. Ibilang ti panangawis kadagiti miembro ti pamilia nga agsurat kadagiti kapanunotanda, bungonen dagitoy a kas maysa a sagut, ket ipan dagiti sagutda iti lawlaw ti ladawan ti Mangisalakan.

Ti Espiritu ti Paskua

Mabalin a naragsak ti agplano kadagiti aktibidad a mabalin nga aramiden kadagiti aldaw nga umadanin ti Paskua tapno marikna ti Espiritu ni Cristo, kas iti panagserbi iti maysa a tao wenno panangkanta kadagiti himno. (Para kadagiti kapanunotan, kitaen iti christmas.ComeUntoChrist.org).

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Panangpadur-as iti Panangisurotayo

Surnadan dagiti awis nga agtignay. “No surnadam ti maysa nga awis nga agtignay, ipakitam [kadagiti miembro ti pamiliam] nga adda panangisakitmo kadakuada ken no kasano a pinaraburan ti ebanghelio dagiti biagda. Itedmo pay kadakuada dagiti gundaway a mangibinglay kadagiti padasda, a mangpapigsa iti panagkumitda ken mangpalugod kadakuada a mangsuporta iti maysa iti panagbiag iti ebanghelio” (Panangisuro iti Wagas ti Mangisalakan, 35).

Ti Parmata ni Nephi maipapan ken ni Birhen Maria, ni Judith A. Mehr