Appendiks A

Kasano nga Ipaneknek ti Espiritu Kaniak a Pudno ti Libro ni Mormon?

Mabalin a nangngegmo maipapan ti kari ni Moroni kadagiti amin nga agbasa iti Libro ni Mormon: “Ket no naimpusuan ti idadawatyo, ken addaan iti pudno a panggep, ken addaan iti pammati ken ni Cristo, iparangarangna ti kinapudnona [ti Libro ni Mormon] kadakayo, babaen ti pannakabalin ti Espiritu Santo” (Moroni 10:4). Ngem ania ti kayat a sawen ti mangammo iti kinapudno “babaen ti bileg ti Espiritu Santo”? Kasano ti pannakaammom no makisarsarita kenka ti Espiritu Santo?

Makatulong no lagipen a ti Espiritu Santo ket makisarita kadatayo kadagiti wagas a naidumduma unay manipud iti sigud a pannakisarsaritatayo iti tunggal maysa. Ngem kayat ti Nailangitan nga Amam a tulongannaka a mangsursuro a mangbigbig iti Espiritu. Intedna kenka ti Libro ni Mormon, a nangilawlawagan dagiti sumagmamano a napudno nga agserserbi kadagiti padasda iti timek ti Apo.

Kas pagarigan, imbaga ni Nephi kadagiti kakabsatna a lallaki nakisarita ti Apo kadakuada “iti naalumamay a timek,” numan pay saan a nasken a timek a mangngeg dagiti lapayagda. Kinaagpaysuanna, imbaga ni Nephi kadagiti kakabsatna nga “awan riknada” ken saanda a “marikna dagiti balikasna” (1 Nephi 17:45, nainayon dagiti nagiray a balikas). Inladawan ni Enos ti sungbat dagiti kararagna kas “ti timek ti Apo” a sumangsangbay “iti panunot[na]” (Enos 1:10). Ken ibilang dagitoy a balikas a mangiladawan ti timek a naggapu idiay langit idi nagpakita ti nagungar a Mangisalakan iti daga ti Bountiful: “Saan a nagubsang a timek daytoy, saan met a napigsa a timek; nupay kasta, … sinamayna ti kaunggan ti kararuada, ken napabarana ti pusoda” (Nephi 11:3).

Mabalin nga addaankan kadagiti padas a maipada kadagitoy, wenno mabalin a maigiddiat dagiti padasmo.. Makisarita ti Espiritu Santo iti nadumaduma a wagas, ken umay nga aggigiddiat ti paltiing iti tunggal maysa kadatayo. Ket no adda ti Espiritu iti biagtayo, makitatayonto ti impluensiana kadatayo iti adu a wagas. Insao ni Apostol Pablo maipapan, “ti bunga ti Espiritu”—dagiti rikna ti “ayat, rag-o, talna, naunday a panagitured, kinaanus, kinalaing, kinamanagtalek, ken kinaemma, kinamanagteppel,” maibilang iti adu a dadduma pay (Taga Galacia 5:22–23).

Adtoy ti sumagmamano a dadduma pay a pannursuro ken pagwadan manipud iti Libro ni Mormon maipapan iti Espiritu Santo. Bayat iti panangbasam kadagitoy, mariknam ti Espiritu Santo a makisarsarita kenka nga ad-adda pay ngem iti pannakaammom, nga agpampaneknek kenka a ti Libro ni Mormon ket pudno a balikas ti Dios.

Kinamanagyaman ken rag-o

Maluktan ti Libro ni Mormon babaen ken ni propeta Lehi a kumitkita iti datdatlag a parmata. Itoy a parmata, naited kenkuana ti maysa a libro ket naawis a mangbasa. “Idi basaenna,” kuna ti kasuratan “napno iti Espiritu ti Apo.” Daytoy a padas ti nangiturong ken ni Lehi nga agdayaw iti Dios para iti “pannakabalin, ken kinaimbag, ken kinamanangngaasi[na],” ta “nagrag-o ti kararuana, ket napno ti pusona” (1 Nephi 1:12, 14–15).

Naaddaanka kadin iti isu met la a padas? Ti kadi panagbasbasam iti Libro ni Mormon ket nangpunno iti pusom iti panagyaman iti kinaimbag ken kinamanangngaasi ti Dios? Nangparag-o kadi iti kararuam dagiti binatog iti Libro ni Mormon? Dagitoy a marikrikna ket impluensia ti Espiritu, mangpampaneknek kenka a dagiti balikas a basbasaem ket naggapu iti Dios ken mangisuro iti kinapudnona.

Maysa a Nagbalbaliw iti Puso

Kalpasan ti panangasabana iti naisangsangayan a sermon maipapan iti Pannubbot ni Jesucristo, (kitaen iti Mosiah 2–4), tinarigagayan ni Ari Benjamin a maammuan kadagiti taona no “mamatida kadagiti balikas nga imbagana kadakuada.” Insungbatda a namatida iti mensahena. Apay? “Gapu iti Espiritu ti Apo a Mannakabalin amin, a nangipaay iti naindaklan a panagbalbaliw kadakami, wenno iti puspusomi, nga awanen kadakami ti agtarigagay nga agaramid iti kinadakes, ngem ti ketdi agtultuloy a panagaramid iti kinaimbag” (Mosiah 5:1–2).

Nalabit a nadlawmo ti maysa a banag a maipada nga adda iti pusom bayat ti panangbasam ti Libro ni Mormon. Kas pagarigan, mabalin a naparegta a riknam nga agbalin a nasaysayaat a tao, a mangliklik iti basol, wenno agaramid iti maysa a banag a nasayaat para iti maysa a tao. Daytoy ti naespirituan a pammaneknek a sapsapulem a dayta a libro ket pinaregta ti Dios. Gapu ta insuro ni Mormon, “Pagayatan ti Dios ti amin a banag a mangawis ken mangay-ayo nga agaramid iti nasayaat, ken agayat iti Dios, ken agserbi kenkuana” (Moroni 7:13; kitaen met iti 2 Nephi 33:4, 10; Alma 19:33; Ether 4:11–12).

Maysa a Nalawagan a Panunot

Idi tinarigagayan ni Alma a mangtulong kadagiti Zoramite a “padasen[da]dagiti balikas[na] ken ammuenda iti bagbagida no pudno ti pammaneknekna, inyarigna ti balikas ti Dios iti maysa a bukel: “No ikkanyo ti bukel, iti lugar a pakaimulaanna iti pusoyo,” inlawlawagna, “adtoy mangrugi nga agtubo iti barukongyo; ket no mariknayo daytoy a mangrugi a dumakkel, rugianyo a kunaen iti bagiyo—Mabalin a nasayaat daytoy a bukel, wenno naimbag ti balikas, gapu ta rugiannan ti mangpadakkel iti kararuak; wen, rugiannan ti mangsilaw iti panunotko, wen, mangrugin a nananam kaniak”(Alma 32:27–28).

Sika ti “mangted iti lugar” dita pusom para kadagiti balikas ti Libro ni Mormon no palubosam ida a mangimpluensia iti biagmo ken mangtarabay kadagiti pilim. Ken no kasanonto a dagitoy a balikas ti “mangpadakkel iti kararua[yo]” ken “mangsilaw iti panunot[yo]”? Mabalin a mariknam nga agbalinkan a natibtibker a naespirituan. Mabalin a mariknam nga ad-adda a managayatka ken nakasaganaka kadagiti dadduma. Mabalin a madlawmo pay a nasaysayaat ti pannakaawatmo kadagiti bambanag, nangnangruna kadagiti bambanag a naespirituan—a dumani kasla adda maysa a silaw a rumimrimat iti panunotmo. Ken mabalin nga umanamongka a ti naisuro a doktrina iti Libro ni Mormon ket “nananam.” Dagiti kasta a rikna ti makatulong kenka tapno maawatam a pudno nga immawatka iti naespirituan a pammaneknek iti kinapudno, a kas impakdaar ni Alma:”O kalpasanna, saan kadi nga agpayso daytoy? Kunak kadakayo, Wen, agsipud ta silaw daytoy; ket nasayaat ti uray ania a silaw, agsipud ta mailasin, ngarud, masapul nga ammuenyo a nasayaat daytoy” (Alma 32:35).

Diyo Nasken nga Agsiddaaw

Dagitoy ti sumagmamano laeng kadagiti wagas a pakapagkumunikasionan ti Espiritu. Adu dagiti dadduma pay. Pagtalinaeden ti panagsapul kadagiti gundaway a dumngeg iti timek ti Espiritu, ket umawatkanto iti ti agtultuloy, mangpatpatalged a panangpasingkedna ti pammaneknek iti kinapudno ti Libro ni Mormon.

Inkari ni Presidente Russell M. Nelson: “Diyo nasken ti agsiddaaw maipapan iti no ania ti pudno. Diyo nasken ti agsiddaaw no siasino ti natalged a pagtalkanyo. Babaen iti bukod a paltiing, maawatyo ti bukody a pammaneknek a ti Libro ni Mormon ti balikas ti Dios, a maysa a propeta ni Joseph Smith , ken daytoy ti Simbaan ti Apo. Iti baet ti no ania ti maisao wenno maramid dagiti dadduma, awan ti asino man a makaala iti pammaneknek a rimmusing iti puso ken panunotyo maipapan iti no ania ti pudno” (“Revelation for the Church, Revelation for Our Lives,” Ensign wenno Liahona, Mayo 2018, 95).