Appendiks B

“Dagiti Nalawag ken Napateg a Kinapudno”

Naisagana ti Libro ni Mormon nga umay kabayatan dagiti maudi nga aldaw, maysa a panawen ti panagsaknap ti pannakatikaw maipapan iti doktrina, wenno ti agnanayon a kinapudno iti Dios. Paset ti nadiosan a panggep dayta a libro, kas iti naparmata ni Nephi, ti “mangpatibkerto iti kinapudno ti [Biblia],” tapno “ ipakaammodanto dagiti nalawag ken napateg a banag” a napukawen iti adu a siglo, ken “maipakaammonto kadagiti amin a kakabsat, pagsasao, ken tattao, a ti Kordero ti Dios ti Anak ti Agnanayon nga Ama, ken ti Mangisalakan iti lubong” (1 Nephi 13:40).

Ipalgak ti Libro ni Mormon dagiti agnanayon a kinapudno a napukaw idi panawen ti Ikakalilis iti Kinapudno ken mangnayon iti maikadua, a manglawlawag a saksi iti adu a kinapudno a naisuro iti Biblia. Adtoy ti sumagmamano laeng kadagita a kinapudno. Sapulem dagitoy ken dadduma pay a nalawag ken napateg a kinapudno bayat ti panagadalmo iti Libro ni Mormon.

Ti Kinadios

• Ni Nailangitan nga Ama, ni Jesucristo, ken ti Espiritu Santo ket agsisina a nabiag ngem maymaysada iti panggep (kitaen iti 3 Nephi 11:32, 36).

• Addaan iti pisikal a bagi ti nagungar a Mangisalakan (kitaen iti 3 Nephi 11:10–17).

Dagiti mainayon a nasantuan a kasuratan maipapan iti Kinadios: 2 Nephi 31:6–8; Ether 12:41

Ti Pannubbot ni Jesucristo

• Nagsagaba ni Jesucristo para kadagiti basol ken rigattayo isu nga ammona no kasano a saranayennatayo (kitaen iti Alma 7:11–13).

• Makapagbalintayo a naan-anay babaen ti parabur ni Jesucristo (kitaen iti Moroni 10:32–33).

Dagiti mainayon a nasantuan a kasuratan maipapan iti Pannubbot ti Mangisalakan: 1 Nephi 10:6; 2 Nephi 2:6–9; Jacob 4:11–12; Mosiah 3:1–19; Alma 34:8–16

Ti Plano ti Pannakaisalakan

• Ti Pannakatnag da Adan ken Eba ket napateg a paset ti plano ti Nailangitan nga Ama iti pannakaisalakan (kitaen iti 2 Nephi 2:22–27).

• Kasapulan ti pagsusupadian tapno maaramattayo ti wayawaya nga agpili (kitaen iti 2 Nephi 2:11–16).

• Maukomtayonto a maibatay kadagiti aramidtayo ken tarigagay dagiti pusotayo (kitaen iti Alma 41:3–7).

• Ti “dan-aw ti apuy ken asupre” ket mangisimbolo iti panagrigrigat dagiti saan nga agbabawi (kitaen iti 2 Nephi 9:16–19; Mosiah 3:24–27).

Dagiti mainayon a nasantuan a kasuratan maipapan iti plano ti pannakaisalakan: 2 Nephi 9:11–26; Alma 22:12–14; 34:31–35; 42:1–26

Ti Ikakalilis iti Kinapudno ken ti Pannakaisubli

• Napasamak ti Dakkel nga Ikakalilis gapu iti kinadangkes ken saan a panamati (kitaen iti Mormon 8:28, 31–41).

• Ilanad ti Libro ni Mormon dagiti kinapudno a naisuro iti Biblia (kitaen iti 1 Nephi 1:19–41; 2 Nephi 3:12).

• Nasken a maawagan iti Naganna ti Simbaan ni Cristo (kitaen iti 3 Nephi 27:3–9).

Dagiti mainayon a nasantuan a kasuratan maipapan iti Ikakalilis iti Kinapudno: 1 Nephi 13:1–9, 24–29; 2 Nephi 27–28

Dagiti mainayon a nasantuan a kasuratan maipapan iti Pannakaisubli: 1 Nephi 14:7–12; 22:7–11; 2 Nephi 3:7–24; 25:17–18

Dagiti Propeta ken Paltiing

• Paneknekan ti amin a propeta ni Jesucristo (kitaen iti Mosiah 13:33–35).

• Ti maysa a pannakaammo iti naespirituan a kinapudno ket sumangbay babaen iti Espiritu Santo (kitaen iti Alma 5:45–47).

• Saan a linaon ti Biblia ti amin a balikas ti Dios (kitaen iti 2 Nephi 29:10–13).

• Saan a nagsardeng iti aldawtayo ti paltiing manipud iti Dios (kitaen iti Mormon 9:7–9).

Dagiti mainayon a nasantuan a kasuratan maipapan kadagiti propeta: 1 Nephi 22:1–2; Mosiah 8:16–18; Helaman 13:24–33

Dagiti mainayon a nasantuan a kasuratan maipapan iti paltiing: Jacob 4:8; Alma12:9–11; 17:2–3; 10:5

Priesthood

• Naawagan dagiti priesthood holder ken naisaganada manipud iti pamuon ti lubong (kitaen iti Alma 13:1–3).

• Nasken nga awaten ti maysa a tao ti turay manipud iti Dios a mangikasaba iti ebanghelio (kitaen iti Mosiah 23:17).

Dagiti mainayon a nasantuan a kasuratan maipapan iti priesthood: Mosiah 18:17–20; Alma 13; Helaman 10:7

Dagiti Ordinansa ken Katulagan

• Kasapulan ti panagbuniag tapno umawat iti agnanayon a biag (kitaen iti 2 Nephi 31:4–13, 17–18).

• Nasken a maannong ti panagbuniag babaen ti pannakairarem (kitaen iti 3 Nephi 11:23–27).

• Saan a nasken a mabuniagan dagiti babassit nga ubbing (kitaen iti Moroni 8:8–12).

• Nasken a maannong dagiti ordinansa a mayannurot kadagiti bilin ni Cristo babaen ti maysa a tao nga addaan iti umno a turay (kitaen iti Mosiah 18:17–18; 3 Nephi 11:21–27; Moroni 4:1).

Dagiti mainayon a nasantuan a kasuratan maipapan kadagiti ordinansa: Mosiah 18:8–17; 21:33–35; Alma 13:16; 3 Nephi 18:1–11; Moroni 2–6; 8:4–26

Dagiti mainayon a nasantuan a kasuratan maipapan kadagiti katulagan: 2 Nephi 11:5; Mosiah 5:1–9; Alma 24:17–18

Kallaysa ken Pamilia

• Nasken nga aginnayat dagiti agassawa iti tunggal maysa (kitaen iti Jacob 3:5–7).

• Nasken a padakkelen dagiti nagannak dagiti annakda iti Apo (kitaen iti 1 Nephi 7:1).

Dagiti mainayon a nasantuan a kasuratan maipapan iti kallaysa ken pamilia: 1 Nephi 1:1; 2 Nephi 25:26; Jacob 2:23–28; Enos 1:1; Mosiah 4:14–15; 3 Nephi 18:21

Dagiti bilin

• Isagananto ti Apo ti maysa a wagas a pangipatungpalantayo kadagiti bilinna (kitaen iti 1 Nephi 3:7).

• Ikari ti Dios a bendisionannatayo no tungpalentayo dagiti bilinna (kitaen iti Mosiah 2:22–24).

Dagiti mainayon a nasantuan a kasuratan maipapan kadagiti bilin: 1 Nephi 17:3; 22:30–31; Alma 37:13, 35; 50:20