“Disiembre 7–13. Moroni 7–9: ‘Bitibitennaka Koma ni Cristo,’” Umaykayo, Sumurot Kaniak—Para kadagiti Indibidual ken Pamilia: Libro ni Mormon 2020 (2020)
“Disiembre 7–13. Moroni 7–9,” Umaykayo, Sumurot Kaniak—Para kadagiti Indibidual ken Pamilia: 2020
Minerva Teichert (1888–1976), Moroni: Ti Maudi a Nephite, 1949–1951, oil on masonite, 34¾ x 47 inches. Brigham Young University Museum of Art, 1969
Disiembre 7–13
Moroni 7–9
“Bitbitennaka Koma ni Cristo”
Bayat ti panangadalmo iti Moroni 7–9, ikasom dagiti parikna ti Espiritu Santo, ket isuratmo dagiti mensahena kenka. Maisurona kenka nga agpadpada no ania ti nasken nga ammuem ken no ania ti nasken nga aramidem.
Isuratmo dagiti Impresionmo
Sakbay nga inleppas ni Moroni ti kasuratan nga ammotayo iti agdama kas ti Libro ni Mormon kadagiti bukodna a maudi a balikas, imbinglayna dagiti tallo a mensahe manipud iti amana, ni Mormon: maysa a surat kadagiti “natalna a paspasurot ni Cristo” (Moroni 7:3) ken dua a surat nga insurat ni Mormon para ken ni Moroni. Nalabit nga inraman ni Moroni dagitoy a mensahe iti Libro ni Mormon gapu ta nasirmatana dagiti pagpapadaan ti nagbaetan dagiti pagpeggadan iti panawenna ken iti panawentayo. Idi naisurat dagitoy a balikas, kas sapasap alisto a natnag dagiti tao a Nephite iti ikakalilis iti kinapudno. Adu kadakuada ti “nakapukawda ti ayatda iti tunggal maysa” ket naayatda iti “amin a banag malaksid iti nasayaat” (Moroni 9:5, 19). Ket uray iti kasta, adda latta nasarakanan ni Mormon a namnama—nga isurona kadatayo a ti namnama ket saanna a kayat a sawen ti saan a panangikankano wenno saan a pannakaseknan kadagiti problema ti lubong; kayatna a sawen ti kaadda iti pammati iti Nailangitan nga Ama ken ni Jesucristo, a ti pannakabalinda ket nabilbileg ken agnanayon ngem dagita a problema. Kaipapananna ti “panagtalek iti tunggal nasayaat a banag” (Moroni 7:19). Kaipapananna ti panangpalugod iti Pannubbot ni Jesucristo “ken ti namnama iti dayagna ken iti biag nga agnanayon, ket agtalinaed koma iti kapanunotam” (Moroni 9:25). Ken agingga iti nadayag nga aldaw ti Maikadua a Yaay ni Cristo, kaipapananna ti saan kaano man a panangisardeng iti “trabaho [a masapultayo] nga iwakas’ … [tapno] maparmektayo ti kabusor ti amin a kinalinteg” (Moroni 9:6).
Dagiti Kapanunotan para iti Bukod a Panagadal iti Nasantuan a Kasuratan
Tulongannak ti silaw ni Cristo a mangeddeng iti nasayaat ken dakes.
Napno ti lubong iti agdama kadagiti makaimpluensia a mensahe; kasano a maibagatayo no ania ti umno ken ania ti biddut? Dagiti balikas ni Mormon iti Moroni 7 ket mangted kadatayo iti sumagmamano a pagbatayan a maaramattayo a mangliklik ti “agbiddut a [panang]ngeddeng” (Moroni 7:18). Bayat ti panagadalmo iti Moroni 7:12–20, agsapul kadagiti kinapudno a makatulong kadakayo a mangammo no anianto ti mangyasideg kadakayo iti Dios ken anianto ti saan. Nalabit nga aramatem dagitoy a kinapudno a mangtulong kenka a mangamiris kadagiti mensahe a mapasangbaymo ken dagiti padasmo iti daytoy a lawas ket ikeddengmo no awisen ken allukoyendaka wenno saan nga agaramid iti nasayaat (kitaen iti Moroni 7:13).
Kitaen met iti “Judging Others,” Gospel Topics, topics.ChurchofJesusChrist.org; Bible Dictionary, “Light of Christ.”
Babaen ti pammati ken ni Cristo, mabalinko ti “agtalek iti tunggal nasayaat a banag.”
Kalpasan ti panangisurona maipapan iti no kasano ti mangilasin iti paggidiatan ti nasayaat ken dakes, dinamag ni Mormon ti maysa a saludsod a kasla adda pakainaiganna iti agdama: “Kasano a mabalin ti agtalek iti tunggal nasayaat a banag?”—nangnangruna no makaguyugoy dagiti pannulisog ti kabusor (Moroni 7:20). Masarakan ti sungbat ni Mormon iti unos nabati pay iti kapitulo 7. Bayat ti panangbasam kadagiti bersikulo 20–48, sapulem dagiti kinapudno a mangtulong kenka a mangbigbig iti “tunggal nasayaat a banag” nga adda kenka gapu ken ni Jesucristo. Kasano a ti kaadda iti pammati Kenkuana ket makatulong kenka a mangsapul kadagiti banag a nasayaat? Kasano a “makapagtalek[kayo]” iti ad-adu pay a nasayaat a banag?
Kitaen met iti Pagannurotan ti Pammati 1:13.
“Ti asi ti nadalus nga ayat ni Cristo.”
Napaliiw ni Presidente Dallin H. Oaks: “Ti gapu no apay a di mapaay ti asi ken ti gapu no apay a nain-indaklan ti asi ngem iti uray dagiti kapatgan nga aramid ti kinaimbag … ket dayta asi, ‘ti nadalus nga ayat ni Cristo’ (Moro. 7:47), ket saan a maysa a tignay ngem maysa a kondision wenno kasasaad ti kinatao. … Ti asi ket maysa a banag a pagbalinan ti maysa a tao” (“The Challenge to Become,” Ensign, Nob. 2000, 34). Bayat ti panagbasam iti Moroni 7:44–48, ibilangmo ti panangiladawan ni Mormon iti asi, ket dumngeg kadagiti parikna manipud iti Espiritu Santo: matulongannaka a mangsapul kadagiti wagas a pakapagdur-asam. Apay a kasapulantayo ti pammati ken namnama nga umawat iti sagut ti asi?
Mapukaw kadi kaniak ti asi ken sagudayko?
Ti panangiladawan ni Mormon kadagiti nakaam-ames a basol dagiti Nephite ket nangiturong iti sumagmamano iti biddut a kapanunotan a dagiti biktima ti panagrames wenno panagabuso ket nilabsingda iti linteg ti kinadalus ti dayaw. Nupay kasta, inlawlawag ni Richard G. Scott a saan a kastoy ti kasasaad. Insurona, “Sipapasnekak a mangipaneknek a no nadangrankayo iti napalalo kadagiti aramid ti sabali a tao a panagranggas, panagbarusngi, wenno pannakipagseks iti kabsat wenno ama, a maisupiat iti pagayatanyo, saankayo a responsable ken nasken a diyo riknaen a nakabasolkayo” (“Healing the Tragic Scars of Abuse,” Ensign, Mayo 1992, 32).
Maaddaanak iti namnama ken ni Cristo ania man dagiti kasasaadko.
Kalpasan ti panangailadawanna iti kinadangkes a nakitana, imbaga ni Mormon iti anakna a saan nga agladingit. Ania ti makaawis kenka maipapan iti mensahe ti namnama ni Mormon? Ania ti kayat na a sawen kenka ti “bitibiten[naka]” ni Cristo? Ania dagiti kababalin ni Cristo ken dagiti pagbatayan ti ebangheliona nga “agtalinaed koma iti kapanunotam” ken mangted kenka iti namnama? (Moroni 9:25).
Kitaen met iti Dieter F. Uchtdorf, “The Hope of God’s Light,” Ensign wenno Liahona, Mayo 2013 , 2013, 70, 75–77.
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
Bayat ti panagbasayo a sangapamiliaan kadagiti nasantuan a kasuratan, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a kapanunotan.
Moroni 10:5–11
Segun iti Moroni 7:5–11, apay a nasken nga aramiden dagiti umno a banag para kadagiti umno a gapu? Kasano a maammuantayo no agkarkararag ken agtungtungpaltayo kadagiti bilin ti Dios iti “naimpusuan a panggep”? (bersikulo 6).
Moroni 7:12–19
Kasano a makatulong kadatayo ti balakad ni Mormon nga agaramid kadagiti nasayaat a pili maipapan no kasano a bubosentayo ti orastayo ken no asino ti pangbubosantayo iti daytoy? Mabalinmo nga awisen dagiti miembro ti pamilia a mangsukisok iti pagtaenganyo ket “agtalekkayo” (Moroni 7:19), wenno agtalinaedkayo, kadagiti banag a mangawis kadakuada “nga agaramid iti nasayaat, ken agayat iti Dios, ken agserbi Kenkuana” (Moroni 7:13). Dayawem ida kadagiti naimbag a banag a masarakanda.
Moroni 7:29
Kalpasan ti panangbasam iti daytoy a bersikulo, mabalin a pagsasaritaan dagiti miembro ti pamilia maipapan kadagiti milagro a nasaksianda wenno dadduma pay a wagas a nakakitaanda iti ima ti Dios iti biagda.
Moroni 8:5–26
Ania ti saan a naawatan dagiti Nephite a nangbumbuniag kadagiti ubbing maipapan iti Pannubbot ni Jesucristo? Ania ti masursurotayo maipapan iti Pannubbot manipud kadagiti pannursuro ni Mormon?
Moroni 8:16–17
Ania ti kaipapanan ti maaddaan iti “naan-anay nga ayat”? Kasano a tulongannatayo daytoy a mangparmek iti buteng? Kasano a tulongannatayo daytoy a mangisuro a situtured iti kinapudno? Kasano a padur-asentayo daytoy?
Para iti ad-adu pay a kapanunotan para iti panagisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Panangpadur-as iti Panangisurotayo
Agusar iti musika a mangawis ti Espiritu ken mangisuro iti doktrina. “Addaan ti musika kadagiti awan pagpatinggaanna a bileg a mangtignay [kadatayo] nga agturong iti dakdakkel nga espiritualidad” (“First Presidency Preface,”,” Hymns, x). Maysa a kanta maipapan iti ayat, a kas iti “Love One Another” (Hymns, no. 308), ti mabalin a mangpapintas iti panaglilinnawag iti pamilia maipapan iti asi iti Moroni 7:44–48.
Ladawan ni Cristo ti Mangisalakan, ni Heinrich Hofmann