O se vasega a le Peraimeri o loo faia se taaloga

Faaaogaina o le Sau, Mulimuli Mai ia te Au—Mo le Peraimeri

Sauniuni e Faiaoga i le Peraimeri

O suesuega patino ma faaleaiga i le aiga e tatau ona avea ma nofoaga autu o le aoaoina o le talalelei. E moni lenei mea mo oe ma mo tamaiti e te faiaoga ai. A o e tapenapena e aoao atu, amata i le maua o lou lava poto masani i tusitusiga paia. O lau tapenaga aupito taua lava o le a tupu a o e sailia tusitusiga paia ma musumusuga a le Agaga Paia.

Sau, Mulimuli Mai ia te Au—Mo Tagata Taitoatasi ma Aiga o se vaega taua foi o au suesuega faaletagata lava ia ma au sauniuniga e aoao atu. O le a fesoasoani e maua ai sou malamalama loloto i mataupu faaleaoaoga faavae o loo maua i tusitusiga paia.

I le taimi o au tapenapenaga, o le a oo mai mafaufauga ma uunaiga ia te oe e uiga i tamaiti e te faiaoga ai. O le a e mauaina ni malamalamaga e uiga i auala o le a faamanuiaina ai o latou olaga i mataupu faavae o loo i totonu o tusitusiga paia. O le a taialaina oe e musuia i latou e sue na mataupu faavae a’o latou aoao mai mau mo i latou lava ma o latou aiga. Manatua ia e nofouta i tamaiti o e atonu o latou aiga e le lagolagoina le suesueina e le aunoa o tusitusiga paia ma afiafi faaleaiga.

Manatu e Aoao Atu Ai

A o e saunia e aoao, e te ono faatupuina lagona musuia faaopoopo e ala i le faaalia atu o aoaoga otooto o i lenei punaoa. Aua e te mafaufau i nei manatu faapea o ni faatonuga o lea sitepu ma lea sitepu, ae o ni fautuaga e faaosofia ai ou lava musumusuga. E te iloa nei tamaiti-ma o le a sili atu lou iloa ia i latou aʻo e fegalegaleai ma i latou i le vasega. E silafia foi e le Alii i latou, ma o le a Ia musuia oe i auala sili e aoao ma faamanuia ai i latou.

E tele isi au punaoa o loo maua a’o e tapenapena, e aofia ai manatu o i le Sau, Mulimuli Mai ia te Au—Mo Tagata Taitoatasi ma Aiga ma mekasini a le Ekalesia. Mo nisi faamatalaga e uiga i nei punaoa, tagai “Punaoa Faaopoopo mo le Aoaoina o Tamaiti” i le punaoa lenei.

O Ni Nai Mea e Mafaufau i Ai

• Ua i ai i matua le tiutetauave autu e aoao a latou fanau. I le avea ai o se faiaoga, ua ia te oe se tiutetauave taua e lagolago, faamalosiau, ma fausia i luga o le aoaoina o le talalelei i le fale. Ia nofouta i tamaiti e le aoaoina e o latou matua le talalelei i le fale. Ia faaaofia tamaiti uma i talanoaga o le talalelei tusa lava po o a tulaga o o latou aiga.

• E lelei le fai faafia. E sili ona lelei le aoaoina e tamaiti o upumoni o le talalelei pe a aoao atu nei upumoni i le fai faafia o ni gaoioiga eseese. A e iloa se gaoioiga e aoao mai ai e lelei i tamaiti, fuafua e toe fai ma toe fai, aemaise pe a o e faiaoga i tamaiti laiti ifo. E mafai foi ona e toe iloiloina se gaoioiga mai se lesona talu ai.

• E finagalo le Tama Faalelagi ia faamanuiaina oe o se faiaoga. Ua Ia saunia le mau punaoa e fesoasoani ai ia e manuia, e aofia ai ma fonotaga faaleaufono a faiaoga. I nei fonotaga e mafai ai e oe ona fefautuaai ma isi faiaoga e uiga i soo se luitau atonu e feagai ma oe. E mafai foi ona e talanoaina ma faata’ita’i ia mataupu faavae o le aoao atu e faapei o Keriso.

• Afai o e faiaoga i tamaiti laiti ifo ma e manaonia se fesoasoani faaopoopo, tagai i le “Taulimaina o Manaoga o Tamaiti Laiti Ifo”” i le punaoa lenei.

• O lenei punaoa ua aofia ai otootoga mo vaiaso taitasi o le tausaga sei vagana ai Aso Sa e lua e fai ai konafesi aoao. I Aso Sa e le faia ai le Peraimeri ona o loo fai ia konafesi faalesiteki po o nisi mafuaaga, e mafai e aiga ona faaauau le faitauga o le Tusi a Mamona i le fale e fua i le faasologa ua otooto atu. Ina ia tausisia le faasologa o lau vasega Peraimeri, e mafai ona e filifili e faamisi se lesona pe tuufaatasi ni lesona se lua. Ina ia aloese mai le fenumiai, e mafai e peresitene o le Peraimeri ona vave fautuaina faiaoga e uiga i nei fetuunaiga.

o le aiga o loo suesue faaaoga ai le komepiuta feaveai