o le la o loo susulu mai i ao

20–26 Setema

Mataupu Faavae ma Feagaiga 106–108

“E Tatala Mai Ai le Lagi”

Manatunatu i mea e te iloa e uiga i tamaiti o loo e aoaoina. O a ni gaoioiga o le a aumaia atili ai i latou i le Faaola? Manatua o gaoioiga mo tamaiti laiti i lenei otootoga e mafai ona fetuunai mo tamaiti matutua, ma faapena ai lava.

Tusi Faamaumau Ou Lagona Uunai

aikona o le faasoa

Valaaulia le Fefaasoaai

Faaali atu i tamaiti ata o taitai o le Ekalesia, e pei o le perofeta, Au Aposetolo, Au Peresitene Aoao o le Peraimeri, ma isi Pulega Aoao ma Ofisa o le Ekalesia. Valaaulia tamaiti e talanoa e uiga i mea e faia e nei taitai ma pe aisea latou te faafetai ai mo i latou.

aikona o le aoao atu

Aoao atu le Aoaoga Faavae: Tamaiti Laiti

Mataupu Faavae ma Feagaiga 107:18–20, 42–56

Ua faamanuiaina au ona o le perisitua.

E mafai e fanau uma a le Tama Faalelagi ona maua faamanuiaga e maua mai i le perisitua. Mafaufau i auala e mafai ai ona e fesoasoani i tamaiti o loo e aoaoina ia lagona le agaga faafetai mo na faamanuiaga.

Gaoioiga e Mafai Ona Fai

• Tusi i luga o le laupapa se ata e suitulaga i le “[ua] tatalaina le lagi mo i [tatou]” (Mataupu Faavae ma Feagaiga 107:19) ona o le perisitua (e pei o ave o le malamalama o loo susulu atu i se ao). Tuu atu i tamaiti ni ata e fai ma sui o faamanuiaga e maua mai i le perisitua, e pei o le papatisoga, o le faamanatuga, ma le malumalu. Valaaulia i latou e faasoa mai pe aisea latou te faafetai ai mo le faamanuiaga o loo i a latou ata, ma tuu atu ia i latou e tuu a latou ata i ave o le malamalama i luga o le laupapa. Tuuina atu lau molimau e mafai ona tatou mauaina nei faamanuiaga aua na toefuatai mai e le Tama Faalelagi le perisitua.

• Fai se auala i luga o le fola, ma tuu atu i tamaiti ata o sauniga o le perisitua o le a latou manaomia ina ia mafai ai ona latou mulimuli i le ala e toe foi atu ai i le Tama Faalelagi (tagai Tusi Ata o le Talalelei, nu. 103--8, 119--20). Fesoasoani i tamaiti e tuu sauniga i le faasologa i luga o le ala.

• Faaali atu se ata o Atamu ma Eva ma lo la aiga (tagai i le itulau o gaoioiga o lenei vaiaso po o le Tusi Ata o le Talalelei, nu. 5). A o tilotilo tamaiti i le ata, fai atu ia i latou pe faapeī lagona o Atamu ma Eva e uiga i lo latou aiga. Faaaoga le Mataupu Faavae ma Feagaiga 107:53-56 e faasoa atu ai i tamaiti mea na faia e Atamu e faaalia ai lona alofa i lona aiga. Tuuina atu lau molimau e uiga i auala na avea ai le perisitua ma se faamanuiaga ia te oe ma lou aiga.

• Taʻu igoa o tagata o le aiga na faauuina e Atamu i le perisitua, e tusa ai ma le Mataupu Faavae ma Feagaiga 107:42-50, ma fai i tamaiti e faitau pe fia tagata na ia faauuina. Fesoasoani ia latou malamalama pe aisea e manao ai Atamu i tagata uma o lona aiga ia maua le perisitua. Valaaulia tamaiti e talanoa e uiga i taimi na latou mauaina ai o latou faamanuiaga e ala i le perisitua.

Mataupu Faavae ma Feagaiga 108:7

E mafai ona ou faamalosia isi.

E oo lava i tamaiti laiti e mafai ona mulimuli i le fautuaga e faamalolosia ai isi “i au talanoaga uma, i au tatalo uma, … ma i au mea uma e fai.”

Gaoioiga e Mafai Ona Fai

• Tusi se ata i luga o le laupapa, ma fai atu i tamaiti e faalau mai ni mea e mafai ona fai e le tagata ina ia malosi atili ai faaletino. (Atonu e te tusia ni maso lapopoa i le tagata ao faalau mai e tamaiti ia mea). Faitau le Mataupu Faavae ma Feagaiga 108:7, ma fai atu i tamaiti e faalogologo mo auala e mafai ai ona tatou “faamalosia [o tatou] uso [ma tuafafine].” Faamalamalama soo se upu atonu e faigata.

• Fesoasoani i tamaiti e mafaufau i tagata latou te iloa atonu o loo manaomia le faamalosiau. O le a sa tatou tala po o se mea e mafai ona tatou faia mo i latou? Galulue faatasi e fai ni kata mo nei tagata, pe faamalosia tamaiti e manatua i latou ia latou tatalo patino ma faaleaiga.

aikona o le aoao atu

Aoao atu le Aoaoga Faavae: Tamaiti Matutua

Mataupu Faavae ma Feagaiga 107:1–8, 13–14, 18–20

O le a fesoasoani le perisitua ia te au e toe foi atu i le Tama Faalelagi.

Na toefuataiina le Perisitua Mekisateko ma le Perisitua Arona e fesoasoani e toe aumai ai le fanau a le Atua ia te Ia. Fesoasoani i tamaiti o loo e aoaoina ia malamalama i tiute eseese o le perisitua ma le auala latou te fesoasoani ai ia i tatou e toe foi atu i le Atua.

Gaoioiga e Mafai Ona Fai

• Valaaulia tamaiti e saili le Mosaea 107:1–8, 13–14, 18–20 mo upu ma fuaitau taua lea e aoao atu ia i latou e uiga i le perisitua. O a tiutetauave a i latou e umia le perisitua? E faapefea ona fesoasoani le perisitua ia i tatou e toe foi atu i le Tama Faalelagi?

• Tusi fesili e mafai ona taliina i le Mataupu Faavae ma Feagaiga 107:1–8, 13–14, 18–20, e pei o le, “O le a le isi igoa o le Perisitua Mekisateko?” Tuu atu i tamaiti ni nai minute e saili ai tali i totonu o fuaiupu i le tele o fesili latou te mafaia. Faasoa ma tamaiti nisi o faamanuiaga ua e maua e ala i le perisitua.

• Faitau ma tamaiti e uiga ia Mekisateko i le Bible Dictionary po o le Taiala i Tusitusiga Paia (scriptures.ChurchofJesusChrist.org). O a ni mea e mafai ona tatou aoao mai i lona olaga e uiga i le faaaogaina o le pule o le perisitua?

Mataupu Faavae ma Feagaiga 107:21–26, 33–35, 65–66

O auauna filifilia a le Alii e taitaia Lana Ekalesia.

O a ni aafiaga ua faamalosia ai lau molimau i taitai o le Ekalesia? E mafai faapefea ona tatou fesoasoani i tamaiti e fausia a latou lava molimau?

Peresitene ma Sister Nelson ma se tamaitiiti

Ua aoaoina i tatou e le perofeta i mea e finagalo le Atua ia tatou iloa.

Gaoioiga e Mafai Ona Fai

• Faaali se ata i luga o le laupapa o le Au Pulega Aoao ma Ofisa mai se lomiga aupito lata mai o le konafesi aoao o le Ensign po o le Liahona. Ao faitau e tamaiti le Mataupu Faavae ma Feagaiga 107:21–26, 33–35, 65–66, valaaulia i latou e tusi i luga o le laupapa mea na latou aoaoina e uiga i tiutetauave a nisi o nei taitai. Aisea tatou te loto faafetai ai mo le latou taitaiga? Faasoa i le tasi ma le isi le auala na e mauaina ai se molimau o perofeta ma aposetolo.

• Tusi upu mautonu, faatuatua, ma le tatalo i luga o le laupapa. Fesili atu i tamaiti pe faapefea ona tatou lagolagoina le Au Pulega Aoao o le Ekalesia e ala i lo tatou mautonu, faatuatua, ma le tatalo (tagai i le Mataupu Faavae ma Feagaiga 107:22). Aisea e taua ai le lagolago o auauna filifilia a le Alii?

Mataupu Faavae ma Feagaiga 108:3

O le ola ai ma le faaeteete i a’u feagaiga e aumaia ai faamanuiaga.

E faʻapefea ona e fesoasoani i tamaiti o loʻo e aoaoina “e faaeteete atili … i le tausia o [a latou] folafolaga,” po o feagaiga. O le a faapefea ona faamanuiaina i latou i le taimi nei ma i le lumanai?

Gaoioiga e Mafai Ona Fai

• Valaaulia tamaiti e fai se mea e manaomia ai le taulai ma le faaeteete ina ia manuia, e pei o le faatumuina o se ipu i le vai e aunoa ma le masaa. O le a le mea e tupu pe a tatou le faaeteete? Valaaulia i latou e faitau le Mataupu Faavae ma Feagaiga 108:3 ma vaai mo le mea na talosagaina Lyman Sherman e fai ma le faaeteete. Lisi faatasi ma tamaiti folafolaga latou te faia ma le Tama Faalelagi pe a papatisoina i latou ma tagofia le faamanatuga. Fesoasoani ia i latou e mafaufau i ni auala e mafai ai ona latou faaeteete i le tausia o nei folafolaga.

• Usu faatasi ma tamaiti se pese e faatatau i le tausia o folafolaga, e pei o le “O Le a Ou Lototoa” (Tusipese a Tamaiti, 85). Fesoasoani ia i latou e fai se pepa o tusi ai i luga se fuaitau mai le pese e faamanatu ai ia i latou e tausi a latou feagaiga, ma uunaia i latou e tuu a latou pepa i se mea e iloa ai i le fale.

• Tuu atu i tamaiti ni vaega o le lauga a Sister Becky Craven “Faaeteete i le Faasamasamanoa” (Ensign po o le Liahona, Me 2019, 9–11), ma fai atu ia i latou e faasoa mai se mea e musuia ai i latou e faaeteete atili i le ola ai i a latou feagaiga.

aikona o le aoaoina

Uunaia le Aoaoina i le Aiga

Fai ma faafesootai matua o tamaiti o loo e aoaoina e faamalosiau i latou i a latou taumafaiga e aoao le talalelei i le aiga. Atonu e te tau atu ia i latou e uiga i se mea na faasoa e a latou fanau i le Peraimeri na latou aoaoina i le fale.

Faaleleia o Lo Tatou Aoao Atu

Fetuunai ia gaoioiga ina ia fetaui ma manaoga. Aua e te vaai i nei otootoga o ni faatonuga e tatau ona e mulimuli ai. Nai lo lena, ia faʻaaogaina e avea o se punavai o manatu e faʻaalia ai au lava musumusuga aʻo e mafaufau loloto i manaoga o tamaiti o loʻo e aoaoina. I nisi tulaga, atonu e te lagona le musuia e fetuunai se gaoioiga mo tamaiti laiti e aoao atu i tamaiti matutua, pe fesuiai.

itulau o gaoioiga: o le perisitua e faamanuia ai lo’u olaga