Oktubre 4–10

Doktrina ug mga Pakigsaad 111–114

“Ako Mohan-ay sa Tanan nga mga Butang alang sa Inyong Kaayohan”

Si Sister Cheryl A. Esplin, kanhi magtatambag sa Kinatibuk-ang Kapangulohan sa Primary, nagtudlo nga kinahanglan kitang “[motabang] sa atong mga anak nga ang doktrina makasulod sa ilang mga kasingkasing nga kini … makita sa ilang mga kinaiya ug pamatasan sa tibuok nilang kinabuhi” (“Pagtudlo sa Atong mga Anak nga Makasabut,” Liahona, Mayo 2012, 10).

Irekord ang Imong mga Impresyon

Dapita ang Pagpaambit

Aron maawhag ang mga bata nga mopaambit, pagdala og pipila ka butang nga may kalabutan sa usa ka butang gikan sa miaging leksyon. Tuguti sila nga maghisgot kon unsay nakapahinumdom nila sa matag butang.

Itudlo ang Doktrina: Mas Gagmay nga mga Bata

Doktrina ug mga Pakigsaad 111:2, 10–11

Ang mga butang sa Dios mahimong usa ka bahandi ngari kanako.

Kon ang mga bata maghunahuna sa pulong nga bahandi, mahimo nilang mahunahuna ang mga butang nga lahi kay sa mga bahandi nga gipasabut diha sa Doktrina ug mga Pakigsaad 111:2, 10. Unsaon nimo pagtabang kanila nga makakat-on nga ibahandi ang mga butang sa Ginoo?

Posible nga mga Kalihokan

• Dapita ang mga bata sa pagdrowing sa unsay mosantup sa hunahuna kon madungog nila ang pulong nga bahandi. Itandi ang mga butang nga sa tan-aw sa kalibutan isip bahandi ngadto sa mga butang nga gibahandi sa Ginoo (tan-awa sa Doktrina ug mga Pakigsaad 111:2, 10–11), sama sa Iyang katawhan, kaalam ug pagkamatarung, ug paghimo og maayong mga pagpili.

• Tabangi ang mga bata sa pagkompleto sa pahina sa kalihokan niining semanaha. Unsa ang atong makat-unan mahitungod ni Jesus gikan sa mga butang nga Iyang gibahandi? Unsaon man nato aron mas mahisama Kaniya?

Doktrina ug mga Pakigsaad 112:10

Ang Ginoo moagak kanako pinaagi sa kamot ug motubag sa akong mga pag-ampo.

Ang Doktrina ug mga Pakigsaad 112:10 makatabang sa mga bata nga imong gitudloan nga makaugmad og hugot nga pagtuo nga si Jesukristo moagak ug mogiya kanila sa tibuok nilang kinabuhi.

Posible nga mga Kalihokan

• Tabangi ang mga bata sa paghunahuna og mga sitwasyon nga importante ang pagkupot sa kamot sa usa ka sakop sa pamilya, sama sa pagtabok sa dalan o paghatag og kahupayan. Tingali malingaw sila nga idrama-drama ang pipila ka ehemplo nga ilang gipaambit. Basaha ang Doktrina ug mga Pakigsaad 112:10. Nganong gusto man nato nga ang Ginoo “moagak [kanato] pinaagi sa kamot”?

• Taptapi ang mata sa usa sa mga bata, ug hangyoa siya nga molakaw tadlas sa kwarto uban sa laing bata nga moagak niya pinaagi sa kamot. Isulti ang mahitungod sa usa ka kasinatian sa dihang ikaw mibati nga ang Ginoo miagak kanimo pinaagi sa kamot.

  

  Arise and Walk [Bangon ug Lakaw], ni Simon Dewey

Doktrina ug mga Pakigsaad 112:11

Gusto ni Jesus nga higugmaon nako ang tanan.

Tabangi ang mga bata nga makahibalo nga ang Manluluwas gusto nga higugmaon nato ang tanan, bisan kadtong tingali wala motratar kanato sa mabinationg paagi.

Posible nga mga Kalihokan

• Samtang mopaambit ka sa “Kapitulo 41: Kasamok sa Kirtland” (Mga Istorya sa Doktrina ug mga Pakigsaad, 158–60), hangyoa ang mga bata nga magporma og kasingkasing gamit ang ilang mga kamot kon makadungog sila mahitungod sa usa ka tawo nga nagbuhat og butang nga husto. Tabangi sila nga makasabut nga gusto sa Ginoo nga higugmaon nato ang tanan, bisan kadtong tingali makahimo og sayop nga mga pagpili.

• Pagdrowing og magul-anon nga nawong diha sa pisara, ug pangutan-a ang mga bata kon unsaon nato pagpakita og gugma alang sa uban kinsa dili malipayon (tan-awa sa Doktrina ug mga Pakigsaad 112:11). Samtang mopaambit ang mga bata og mga ideya, drowinga pag-usab ang magul-anon nga nawong aron mahimong malipayon nga nawong. Ipaambit ang imong pagpamatuod bahin sa gahum nga moabut tungod sa paghigugma sa uban. Manganta og dungan sa usa ka awit mahitungod sa gugma, sama sa “Si Jesus Miingon Higugmaa ang Tanan” (Songbook sa mga Bata, 39).

Itudlo ang Doktrina: Mas Dagko nga mga Bata

Doktrina ug mga Pakigsaad 112:10

Mahimo kong mapainubsanon ug magtinguha sa giya sa Dios.

Gusto sa Langitnong Amahan nga magmapainubsanon kita aron makagiya Siya kanato. Tabangi ang mga bata nga makasabut kon unsaon nila pagpakita og pagkamapainubsanon sa atubangan sa Dios pinaagi sa pagbuhat og mga butang sama sa pag-ampo ngadto Kaniya ug pagdawat sa Iyang tambag.

Posible nga mga Kalihokan

• Pangutan-a ang mga bata kon unsay gipasabut sa mahimong mapainubsanon. (Mahimo silang mobasa sa “Pagkamapainubsanon” diha sa Matinud-anon sa Tinuhoan [mga pahina 142–43] kon gikinahanglan). Tabangi sila nga maghunahuna sa mga pulong o mga hugpong sa mga pulong nga may kalabutan sa “mapainubsanon,” ug dapita sila sa pagbasa sa Doktrina ug mga Pakigsaad 112:10, nga moilis sa usa niining mga pulong o mga hugpong sa mga pulong alang sa “mapainubsanon” diha sa bersikulo. Nganong gusto man sa Langitnong Amahan nga magmapainubsanon kita? Aron makakat-on og dugang, ang mga bata mahimong mobasa og dugang nga mga kasulatan nga gilista ubos sa “Mapainubsanon, Pagkamapainubsanon” diha sa Giya ngadto sa mga Kasulatan (scriptures.ChurchofJesusChrist.org).

• Isulat ang mga pulong sa Doktrina ug mga Pakigsaad 112:10 diha sa pisara, ug hangyoa ang mga bata sa pagbasa niini og kusog. Dapita ang usa ka bata sa pagbadlis sa mga panalangin alang niadtong mapainubsanon nga gihisgutan niining bersikulo. Awhaga ang mga bata sa pagpaambit og mga higayon sa dihang mapainubsanon silang nagtinguha sa tabang sa Ginoo ug giagak Niya, sama sa dihang ang ilang pag-ampo natubag.

Doktrina ug mga Pakigsaad 112:11

Gusto ni Jesus nga higugmaon nako ang tanan.

Si Jesukristo mao ang hingpit nga ehemplo sa paghigugma sa tanan, bisan niadtong dili maayong mitratar Kaniya. Si Joseph Smith milahutay usab og pagpanggukod pinaagi niadtong nahimo niyang mga higala kaniadto. Tabangi ang mga bata nga makakat-on nga mahimo natong higugmaon ang uban sama gayud sa gibuhat sa Manluluwas ug ni Joseph Smith.

Posible nga mga Kalihokan

• Dapita ang mga bata sa pagpuli-puli sa pagbasa gikan sa “Kapitulo 41: Kasamok sa Kirtland” (Mga Istorya sa Doktrina ug mga Pakigsaad, 158–60). Kinsa man diha sa istorya ang nakapasamot sa mga problema sa Kirtland? Kinsa man ang misulay aron mahimo silang mas maayo? Dapita ang mga bata sa pagbasa sa Doktrina ug mga Pakigsaad 112:11 ug hisguti kon nganong importante nga higugmaon ang tanan.

• Nganong importante man nga higugmaon ang mga tawo kinsa lahi kanato? Ngano kaha nga ang Langitnong Amahan mihatag man kanato og mga kalainan? Unsaon man nato “[paghimo sa atong] gugma nga buhong ngadto sa tanan,” bisan ngadto sa lahi kay kanato? Kantaha uban sa mga bata ang usa ka awit mahitungod sa paghigugma sa uban, sama sa “Mouban Ko Nimo” (Songbook sa mga Bata, 78–79).

• Tabangi ang mga bata sa paghunahuna og mga ehemplo sa dihang ang Manluluwas mihigugma niadtong kinsa wala mitratar og tarung Kaniya (sama pananglit, tan-awa sa Lucas 23:34).

Doktrina ug mga Pakigsaad 112:12–15, 26

Kadtong kinsa tinuod nga nakabig makaila ni Jesukristo.

Ang pagkakabig ngadto ni Jesukristo usa ka tibuok kinabuhi nga proseso, ug naglambigit kini og labaw pa kay sa “[pagpatuo] nga nasayud sa [Iyang] ngalan” (Doktrina ug mga Pakigsaad 112:26). Tabangi ang mga bata nga mas makasabut kon unsay gipasabut sa tinuod nga makaila sa Manluluwas.

Posible nga mga Kalihokan

• Ipaambit ngadto sa mga bata nga niadtong 1837, ang ubang mga Apostoles mibatok ni Propeta Joseph Smith. Nganong importante man ang pagsunod sa propeta? (tan-awa sa bersikulo 15). Tabangi ang mga bata sa paghimo og lista sa mga butang nga gisulti sa Ginoo nga buhaton ni Thomas B. Marsh, ang Presidente sa Korum sa Napulog Duha ka mga Apostoles (tan-awa sa Doktrina ug mga Pakigsaad 112:12–15). Gamita ang lista sa paghisgot kon sa unsang paagi nga mahimo kitang mas makabig ngadto ni Jesukristo.

• Pangutan-a ang mga bata kon unsa kaha ang gipasabut sa pagpatuo nga nakaila kang Jesukristo apan sa tinuod wala gayud makaila Kaniya (tan-awa sa Doktrina ug mga Pakigsaad 112:26). Unsa ang gitudlo sa bersikulo 14 ngari kanato nga atong mahimo aron mas makaila Kaniya? Tabangi ang mga bata nga makasabut kon unsay kahulugan sa “mopas-an sa [atong] krus” (Hubad ni Joseph Smith, Mateo 16:25–26 [diha sa apendiks sa Giya ngadto sa mga Kasulatan]) o sa “pagpakaon sa [Iyang] karnero.”

Awhaga ang Pagkat-on diha sa Panimalay

Dapita ang mga bata sa pag-summarize sa ilang nakat-unan sa klase karong adlawa. Tabangi sila sa paghimo og mubo nga sulat o pagdrowing og hulagway nga mopahinumdom kanila sa unsay ilang nakat-unan aron mapaambit nila kini ngadto sa ilang mga pamilya.

Pagpalambo sa Atong Pagtudlo

Ang mga bata kuryuso ug makakat-on sa daghang mga paagi. Ang mga bata malingaw sa pagkat-on pinaagi sa bag-o ug lain-lain nga mga kasinatian. Gamita ang mga kalihokan nga makatabang kanila nga molihok, mogamit sa tanan nilang mga balatian, magsusi-susi, ug mosulay og bag-ong mga butang. (Tan-awa sa Pagtudlo sumala sa Pamaagi sa Manluluwas, 25–26.)