Tingpamulak sa Bilanggoan sa Liberty, ni Al Rounds

Oktubre 18–24

Doktrina ug mga Pakigsaad 121–123

“O Dios, Hain Ba Ikaw?”

Samtang magtuon ka sa Doktrina ug mga Pakigsaad 121–23, ikonsiderar kon unsay nahibaloan na sa mga bata diha sa imong klase. Pag-ampo aron masayud unsaon pag-ugmad diha sa unsay ila nang nahibaloan.

Irekord ang Imong mga Impresyon

Dapita ang Pagpaambit

Kon imong awhagon ang mga bata sa pagpaambit og butang nga ilang nakat-unan diha sa klase sa miaging semana uban sa ilang mga pamilya, hatagi sila og panahon sa pagpaamabit sa ilang mga kasinatian.

Itudlo ang Doktrina: Mas Gagmay nga mga Bata

Doktrina ug mga Pakigsaad 121:7–8; 122:7

Ang lisud nga mga panahon mahimo nga alang sa atong kaayohan.

Ang mga pulong sa Ginoo ngadto ni Joseph Smith didto sa Bilanggoan sa Liberty naghatag og oportunidad sa pagtabang sa mga bata nga mahibalo nga usahay ang kinabuhi lisud, apan ang Langitnong Amahan ug si Jesukristo makatabang kanato.

Posible nga mga Kalihokan

• Dapita ang mga bata sa pagpaminaw sa pulong nga “kalinaw” samtang mopaambit ka ngadto nila sa “Kapitulo 46: Si Joseph Smith Sulod sa Bilanggoan sa Liberty” (Mga Istorya sa Doktrina ug mga Pakigsaad, 172–74) o sa Doktrina ug mga Pakigsaad 121:7–8. Tabangi ang mga bata sa paghunahuna og mga paagi nga kita makasalig sa Ginoo sama sa gibuhat ni Joseph aron nga kita mahimong mobati og kalinaw. Ipasabut nga bisan kon nakasinati si Joseph og lisud nga mga butang, giubanan siya sa Ginoo.

• Aron matabangan ang mga bata nga mahibalo nga ang atong mga pagsulay “alang sa [atong] kaayohan” (Doktrina ug mga Pakigsaad 122:7), istoryahi sila kon sa unsang paagi nga ang atong mga kaunoran [muscles] motubo kon magdala kita og butang nga bug-at. Magpakaaron-ingnon sila nga nag-alsa og bug-at nga butang o naghimo og lisud nga buhat. Ipasabut nga ang pag-agi sa lisud nga mga panahon makatabang sa atong mga espiritu nga molambo—kon modangup kita sa Ginoo alang sa tabang. Ipaambit ang pipila ka ehemplo nga masabtan sa mga bata nga imong gitudloan. Dapita sila sa pagsubli uban nimo sa hugpong sa mga pulong nga “Kining tanan nga mga butang … alang sa [atong] kaayohan.”

Doktrina ug mga Pakigsaad 122:8

Si Jesukristo nasayud kon unsay akong gibati.

Didto sa Bilanggoan sa Liberty, gisultihan ni Jesukristo si Joseph Smith nga mikunsad Siya ubos sa tanang butang (tan-awa sa Doktrina ug mga Pakigsaad 122:8). Nagpasabut kini nga nasayud Siya unsay atong giagian ug makadangup kita ngadto Kaniya.

Posible nga mga Kalihokan

• Aron matabangan ang mga bata nga makakat-on sa pagdangup ngadto kang Kristo kon makasinati sila og lisud nga mga butang, hangyoa sila nga ipakita nganha nimo kon unsay ilang nawong kon naguol o nasakitan o nahadlok sila. Kinsa man ang makatabang nato kon mobati kita niining paagiha? Basaha ang Doktrina ug mga Pakigsaad 122:8, ug ipasabut nga nangahulugan kini nga si Jesukristo nasayud kon unsay atong gibati, ug makatabang Siya kanato.

• Kantaha og dungan ang “Sa Bata pa si Jesus” (Songbook sa mga Bata, 34), ug ipamatuod nga si Jesukristo makatabang kanato tungod kay nasayud Siya kon unsay atong gibati.

  

  Si Jesus nakasabut sa atong giantus. Dili Sumala sa Akong Pagbuot Kondili sa Imo, ni Walter Rane.

Doktrina ug mga Pakigsaad 123:17

Gusto sa Dios nga magmalipayon ko nga mobuhat sa unsay akong mahimo.

Bisan tuod nga anaa sa bilanggoan si Joseph Smith ug ang mga Santos gipapahawa sa ilang mga panimalay, iyang giawhag ang mga Santos nga “magmalipayon sa pagbuhat sa tanan nga mga butang nga ubos sa atong gahum.”

Posible nga mga Kalihokan

• Basaha ang Doktrina ug mga Pakigsaad 123:17, ug dapita sila nga mobarug ug maglipay kon makadungog sila sa pulong nga “magmalipayon.” Dapita sila nga magpakaaron-ingnon nga maghimo og lain-laing mga buhat sa pagserbisyo sa malipayong paagi.

• Manganta og dungan sa usa ka awit mahitungod sa malipayong pagserbisyo sama sa “Kon Kita Motabang” (Songbook sa mga Bata, 108). Tabangi ang mga bata sa paghunahuna og mga paagi nga malipayon silang makaserbisyo sa ilang pamilya ug sa mga higala.

Itudlo ang Doktrina: Mas Dagko nga mga Bata

Doktrina ug mga Pakigsaad 121:7–9; 122:7–9

Ang akong mga pagsulay mahimo nga alang sa akong kaayohan.

Usa ka paagi nga gihupay sa Manluluwas si Joseph Smith samtang nag-antus siya sa Bilanggoan sa Liberty mao ang pagtudlo kaniya nga “kining tanan nga mga butang makahatag kanimo og kasinatian, ug alang sa imong kaayohan” (Doktrina ug mga Pakigsaad 122:7). Kini nga kamatuoran makapanalangin sa mga bata kon mag-atubang sila sa kaugalingon nilang mga pagsulay.

Posible nga mga Kalihokan

• Dapita ang mga bata sa pagpaambit sa unsay ilang nahibaloan mahitungod sa kasinatian ni Joseph Smith didto sa prisohan ug sa pagpugos og papahawa sa mga Santos gikan sa Missouri (tan-awa sa mga kapitulo 45–47 sa Mga Istorya sa Doktrina ug mga Pakigsaad, 167–75). Pangutan-a ang mga bata kon unsay ilang bation kon sila mao si Joseph Smith o usa sa mga Santos nianang higayuna. Basaha uban sa mga bata ang Doktrina ug mga Pakigsaad 121:7–9; 122:7–9, ug dapita sila sa pagpangita og butang nga gisulti sa Ginoo nga makahatag unta kanila og kalinaw. Sa unsang paagi nga ang atong lisud nga mga kasinatian “alang sa [atong] kaayohan”?

• Hangyoa ang duha ka bata sa pagkupot sa mga tumoy sa usa ka lambo nga igo ang gitas-on nga motabok sa kwarto. Hangyoa ang laing bata sa pagkupot pinaagi sa iyang tudlo sa usa ka punto sa lambo. Basaha ang Doktrina ug mga Pakigsaad 121:7–8, ug ipasabut nga ang lambo nagrepresentar sa katuigan sa kahangturan ug nga ang gamay nga punto nga gikuptan sa tudlo susama sa atong katuigan dinhi sa yuta. Unsay gipasabut nga ang atong mga pagsulay dinhi sa yuta “mubo nga higayon”?

• Tabangi ang mga bata sa paghunahuna unsa kaha ang mahitabo kon maggahin og upat ka bulan sa usa ka dapit sama sa Bilanggoan sa Liberty. Unsa gayud kaha ang mawala kanato? Unsaon man nato paggahin ang atong panahon? Unsa ang nakat-unan ni Joseph Smith diha sa Doktrina ug mga Pakigsaad 121:7–9; 122:7–9 nga nakatabang kaniya aron makalahutay niining kasinatian? Awhaga ang mga bata nga mosulat ngadto sa tawo nga nagkalisud, ug isugyot nga mogamit sila og usa ka butang gikan sa Doktrina ug mga Pakigsaad 121:7–9; 122:7–9 diha sa ilang sulat.

Doktrina ug mga Pakigsaad 121:34–46

Kinahanglan gayud nga kita magmatarung aron makabaton sa “mga gahum sa langit.”

Tabangi ang mga bata nga imong gitudloan nga mahibalo nga makabaton lamang kita sa gahum sa Dios diha sa atong kinabuhi kon kita matarung.

Posible nga mga Kalihokan

• Pagdrowing og usa ka linya nga adunay mga pulong nga taas nga gahum sa usa ka tumoy ug ubos nga gahum sa lain. Pagdrowing og arrow nga anaa sa tunga sa linya. Pagpili og pipila ka pulong o mga hugpong sa mga pulong gikan sa Doktrina ug mga Pakigsaad 121:34–46 nga nagtudlo kon unsaon pagpaminos o pagpasaka sa langitnong gahum sa atong kinabuhi (sama sa “pagtabon sa atong mga sala,” “garbo,” “kalumo,” ug “gugma”). Dapita ang mga bata nga magpuli-puli sa pagpili og usa ka pulong, mohukom kon ang pulong moresulta sa pagminos o pagsaka sa gahum, ug sa pagbalhin sa arrow sa tukmang dapit. Istoryahi ang mga bata mahitungod sa mga tawo nga ilang nailhan nga nahimong maayong impluwensya sa uban tungod kay ilang gisunod ang tambag sa Ginoo niining mga bersikulo.

• Basaha ang Doktrina ug mga Pakigsaad 121: 41–42, 45, ug hangyoa ang mga bata sa paglista sa mga hiyas nga anaa niining mga bersikulo nga gusto sa Ginoo nga atong mabatunan. Tabangi sila sa pagtino sa bisan unsang mga pulong nga wala nila masabti. Sanguni ang matag bata og usa ka hiyas, ug tabangi sila sa paghunahuna og usa ka paagi nga ila kining mapakita. Sa higayon nga makapaambit na silang tanan, hangyoa sila sa pagbasa sa mga bersikulo 45–46 ug sa paglista sa mga panalangin nga ilang madawat kon ilang mapalambo kining mga hiyas.

• Basaha og dungan ang unang linya sa Doktrina ug mga Pakigsaad 121:46. Sa unsang paagi nga ang Espiritu Santo mahimo natong “kauban sa kanunay”? Kantaha og dungan ang “Ang Espiritu Santo” (Songbook sa mga Bata, 56) o laing awit mahitungod sa gasa sa Espiritu Santo. Unsa ang gitudlo sa awit kanato kon nganong gusto nato nga ang Espiritu Santo makauban nato sa kanunay?

Awhaga ang Pagkat-on diha sa Panimalay

Dapita ang mga bata sa paghunahuna og usa ka tawo kinsa nagkalisud. Tabangi sila sa pagtino og butang nga nakat-unan ni Joseph Smith sa Bilanggoan sa Liberty nga ilang mapaambit nianang tawhana.

Pagpalambo sa Atong Pagtudlo

Suportahi ang pagkat-on diha sa panimalay. “Ang mga ginikanan maoy labing importanting mga magtutudlo sa ebanghelyo alang sa ilang mga anak—anaa kanila ang labing dako nga responsibilidad ug ang labing dako nga gahum sa pag-impluwensya sa ilang mga anak (tan-awa sa Deuteronomio 6:6–7). Samtang magtudlo ka sa mga bata diha sa simbahan, pagmainampuon nga motinguha og mga paagi sa pagsuporta sa ilang mga ginikanan sa ilang mahinungdanong tahas” (Pagtudlo sumala sa Pamaagi sa Manluluwas, 25).