Falepuipui o Liperate

Liberty Jail Spring, saunia e Al Rounds

18–24 Oketopa

Mataupu Faavae ma Feagaiga 121–123

“Le Atua e, O Fea O I Ai Oe?”

A o e suesue i le Mataupu Faavae ma Feagaiga 121-23, mafaufau i mea ua uma ona iloa e tamaiti o lau vasega. Tatalo ina ia iloa le auala e atinae ai i luga o mea ua latou iloa.

Tusi Faamaumau Ou Lagona Uunai

aikona o le faasoa

Valaaulia le Fefaasoaai

Afai na e faʻamalosiauina tamaiti e faʻasoa se mea na latou aʻoaʻoina i le vasega i le vaiaso talu ai ma o latou aiga, tuu atu ia i latou se taimi e faʻamatala ai o latou aafiaga.

aikona o le aoao atu

Aoao atu le Aoaoga Faavae: Tamaiti Laiti

Mataupu Faavae ma Feagaiga 121:7–8; 122:7

O taimi faigata e mafai ona avea ma ō tatou lelei.

O afioga a le Alii ia Iosefa Samita i le Falepuipui i Liperate ua maua ai se avanoa e fesoasoani ai i tamaiti ia iloa o nisi taimi e faigata ai le olaga, ae e mafai e le Tama Faalelagi ma Iesu Keriso ona fesoasoani ia i tatou.

Gaoioiga e Mafai Ona Fai

• Valaaulia tamaiti e faalogo mo le upu “filemu’ ao e faasoa atu ia i latou “Mataupu 46: O losefa Samita i le Falepuipui o Liperate” (Tala o le Mataupu Faavae ma Feagaiga, 172-74) po o le Mataupu Faavae ma Feagaiga 121:7–8. Fesoasoani i tamaiti e mafaufau i ni auala e mafai ona tatou faatuatuaina ai le Alii e pei ona faia e Iosefa ina ia mafai ai ona tatou lagonaina le filemu. Faamalamalama atu e ui lava na feagai Iosefa ma mea faigata, sa faatasi le Alii ma ia.

• Ina ia fesoasoani i tamaiti ia latou iloa o o tatou tofotofoga “o le a avea mo [tatou] lelei” (Mataupu Faavae ma Feagaiga 122:7), talanoa atu ia i latou i le auala e tupu ai o tatou maso pe a tatou tauaveina se mea mamafa. Tuu atu ia i latou e faafoliga e sii i luga se mea mamafa pe fai se galuega mamafa. Faamalamalama atu o le feagai ma taimi faigata e mafai ona fesoasoani i o tatou agaga ia tuputupu ae—pe a tatou liliu atu i le Alii mo se fesoasoani. Fetufaai nisi o faataitaiga o le a fesoʻotaʻi ma tamaiti o loʻo e aoaoina. Valaaulia i latou e toe fai faatasi ma oe le fasifuaitau “O nei mea uma … e mo lo [tatou] lelei.”

Mataupu Faavae ma Feagaiga 122:8

E silafia e Iesu Keriso o’u lagona.

I le Falepuipui o Liperate, na taʻu atu e Iesu Keriso ia Iosefa Samita na afio ifo o Ia i lalo o mea uma (tagai Mataupu Faavae ma Feagaiga 122:8). O lona uiga ua Ia silafia le mea o loo feagai ma i tatou ma e mafai ona tatou liliu atu ia te Ia.

Gaoioiga e Mafai Ona Fai

• Ina ia fesoasoani i tamaiti ia latou aoao e liliu atu ia Keriso pe a latou feagai ma mea faigata, ia fai atu ia i latou e faaali atu ia te oe o latou foliga pe a latou faanoanoa pe tiga pe fefe. O ai e mafai ona fesoasoani ia i tatou pe a tatou maua nei lagona? Faitau le Mataupu Faavae ma Feagaiga 122:8, ma faamatala atu o le uiga o lenei mea o Iesu Keriso na te silafia o tatou lagona, ma e mafai ona Ia fesoasoani ia i tatou.

• Usu faatasi “Sa Tamaitiiti o Iesu” (Tusipese a Tamaiti,34), ma molimau atu e mafai e Iesu Keriso ona fesoasoani ia i tatou aua Na te silafia o tatou lagona.

  Iesu o loo i Ketesemane

  E malamalama Iesu i o tatou tiga. Aua Le Faia Lo’u Loto, a o Lou, saunia e Walter Rane.

Mataupu Faavae ma Feagaiga 123:17

E finagalo le Atua ou te faia ma le fiafia le mea ou te mafaia.

E ui lava sa i ai Iosefa Samita i le falepuipui ma na tuliesea le Au Paia mai o latou fale, ae na ia uunaia le Au Paia e “faia ma le fiafia mea uma o loo i ai i lo tatou malosi.”

Gaoioiga e Mafai Ona Fai

• Faitau atu i tamaiti le Mataupu Faavae ma Feagaiga 123:17, ma valaaulia i latou e tutu ma fiafia pe a latou faalogo i le upu “ma le fiafia.” Valaaulia i latou e faafoliga o faia ni galuega eseese o auaunaga i se auala fiafia.

• Usu faatasi se pese e faatatau i le auauna atu, e pei o le “Pe A Tatou Fesoasoani” (Tusipese a Tamaiti,108). Fesoasoani i tamaiti e mafaufau i auala e mafai ona latou auauna atu ai ma le fiafia i o latou aiga ma uo.

aikona o le aoao atu

Aoao atu le Aoaoga Faavae: Tamaiti Matutua

Mataupu Faavae ma Feagaiga 121:7–9; 122:7–9

O o’u tofotofoga e mafai ona avea ma o’u lelei.

O se tasi auala na faamafanafanaina ai e le Faaola ia Iosefa Samita ao mafatia o ia i le Falepuipui o Liperate e ala i le aoaoina o ia “o nei mea uma e te maua ai le poto masani, ma o le a avea mo ou lelei” (Mataupu Faavae ma Feagaiga 122:7). O lenei upumoni e mafai ona faamanuia ai tamaiti pe a latou feagai ma o latou lava tofotofoga.

Gaoioiga e Mafai Ona Fai

• Valaaulia tamaiti e faasoa mai mea latou te iloa e uiga i le aafiaga o Iosefa Samita i le falepuipui ma le Au Paia ua faamalosia ona o ese mai Misuri (tagai mataupu 45--47 o le Tala o le Mataupu Faavae ma Feagaiga, 167–75). Fesili atu i tamaiti pe o le a so latou lagona pe ana o i latou o Iosefa Samita po o se tasi o tagata o le Ekalesia i lena taimi. Faitau ma tamaiti le Mataupu Faavae ma Feagaiga 121:7–9; 122:7–9, ma valaaulia i latou e saili se mea na fetalai le Alii o le a aumaia ai ia i latou le filemu. E mafai faapefea e o tatou aafiaga faigata ona “avea mo lo [tatou] lelei”?

• Fai atu i ni tamaiti se toalua e uu pito o se manoa e lava le umi e oo atu i le isi itu o le potu. Fai atu i se isi tamaitiiti e i ni se pito o le manoa. Faitau le Mataupu Faavae ma Feagaiga 121:7--8, ma faamatala atu o le manoa o le faatusa lea o tausaga o le faavavau ma o le mea itiiti lea na ini e faatusa i o tatou tausaga i luga o le fogaeleele. O le a le uiga o o tatou tofotofoga i le lalolagi e mo “nao sina minute laitiiti”?

• Fesoasoani i tamaiti e vaai faalemafaufau pe faapeī le nofo ai i se nofoaga e pei o le Falepuipui o Liperate mo le fa masina. O le a le mea o le a sili ona tatou misia? O le a faapefea ona tatou faaaluina a tatou taimi? O le a le mea na aoaoina e Iosefa Samita i le Mataupu Faavae ma Feagaiga 121:7–9; 122:7–9 na fesoasoani ia te ia e gafatia ai lenei aafiaga? Uunai tamaiti e tusi se tusi i se tasi o loʻo feagai ma taimi faigata, ma fautua atu latou te faʻaaoga se mea mai le Mataupu Faavae ma Feagaiga 121:7–9; 122:7–9 i a latou tusi.

Mataupu Faavae ma Feagaiga 121:34-46

E tatau ona tatou amiotonu ina ia maua “mana o le lagi”

Fesoasoani i tamaiti o e aoaoina ia iloa e mafai ona tatou maua le mana o le Atua i o tatou olaga pe afai tatou te amiotonu.

Gaoioiga e Mafai Ona Fai

• Tusi se laina ma upu nei mana maualuga i le isi itu ma le mana maualalo i le isi itu. Tusi se ‘āū o loo faasino atu i le ogatotonu o lenei mau. Filifili nisi o upu po o fuaitau mai le Mataupu Faavae ma Feagaiga 121:34-46 o loo aoao mai i auala tatou te faaitiitia pe faateleina ai le mana faalelagi i o tatou olaga (e pei o le “ufiufi a tatou agasala,” “faamaualuga,” “agamalu,” ma le “alofa”). Valaaulia tamaiti e auauai i le pikiina o se upu, filifili pe o le upu e tau atu i se faaitiitia po o le faateleina o le mana, ma ia talafeagai le faaminoiina o le ‘āū. Talanoa ma tamaiti e uiga i tagata latou te iloa na avea ma se faatosinaga lelei i isi ona latou te mulimuli i fautuaga a le Alii i nei fuaiupu.

• Faitau le Mataupu Faavae ma Feagaiga 121:41–42, 45, ma fai atu i tamaiti e lisi uiga o loo i nei fuaiupu e finagalo le Alii tatou te mauaina. Fesoasoani ia i latou e faamatala soo se upu latou te le malamalama i ai. Tofi tamaiti taitoatasi i se uiga lelei, ma fesoasoani ia i latou e mafaufau i se auala e mafai ai ona latou faʻaalia. A uma loa ona latou fefaasoaaʻi, fai atu ia i latou e faitau le fuaiupu 45--46 ma lisi ia faamanuiaga o le a latou mauaina pe a latou atiina ae na uiga lelei.

• Faitau faatasi le laina muamua o le Mataupu Faavae ma Feagaiga 121:46. E faapefea ona avea le Agaga Paia ma a tatou “soa tumau”? Usu faatasi “Le Agaga Paia,” (Tusipese a Tamaiti,56) po o se isi pese e faatatau i le meaalofa o le Agaga Paia. O le a se mea o aoao mai e le pese ia i tatou e uiga i le mafuaaga tatou te mananao ai i le Agaga Paia e avea ma a tatou soa tumau?

aikona o le aoaoina

Uunaia le Aoaoina i le Aiga

Valaaulia tamaiti e mafaufau i se tasi o feagai ma ni taimi faigata. Fesoasoani ia i latou e faailoa mai se mea na aoaoina e Iosefa Samita i le Falepuipui i Liperate e mafai ona latou faasoa atu i lena tagata.

Faaleleia o Lo Tatou Aoao Atu

Lagolago le aoaoina i le aiga. “O matua o faiaoga aupito taua ia mo a latou fanau—e i ai ia i latou le tiutetauave autu ma le mana silisili e tosina ai a latou fanau (tagai Teuteronome 6:6–7). A o e aoao atu tamaiti i le lotu, saili ma le agaga tatalo e lagolago atu i o latou matua i la latou matafaioi taua” (Aoao Atu i le Ala a le Faaola,25).

itulau o gaoioiga: O loo silafia e Iesu Keriso mea o loo feagai ma au