Bilanggoan sa Carthage

Nobyembre 22–28

Doktrina ug mga Pakigsaad 135–136

Siya “Misilyo sa Iyang Misyon ug sa Iyang mga Buhat pinaagi sa Iyang Kaugalingon nga Dugo”

Samtang mangandam ka sa pagtudlo sa Doktrina ug mga Pakigsaad 135–36, pangita og mga baruganan nga nakaimpluwensya sa imong kinabuhi. Ikonsiderar kon sa unsang paagi nga ang mga ideya niini nga outline mahimong makatabang sa mga bata nga makakat-on ug makagamit niining mga baruganan.

Irekord ang Imong mga Impresyon

Dapita ang Pagpaambit

Dapita ang mga bata sa pagpaambit og butang nga ilang nahinumduman nga nakat-unan karong tuiga mahitungod ni Joseph Smith ug unsay iyang nahimo. Ipakita ang mga hulagway gikan sa karong tuiga nga Dali, Sunod Kanako—Alang sa mga Indibidwal ug mga Pamilya o gikan sa miaging mga pahina sa mga kalihokan aron sa pagtabang kanila.

Itudlo ang Doktrina: Mas Gagmay nga mga Bata

Doktrina ug mga Pakigsaad 135:1–2

Sila si Joseph Smith ug Hyrum Smith mihatag sa ilang kinabuhi alang sa ebanghelyo ni Jesukristo.

Ang asoy bahin sa pagmartir nila ni Joseph ug Hyrum Smith makatabang sa mga bata nga mobati og pasalamat alang sa mga pagpamatuod ug mga sakripisyo niining bantugang mga tawo.

Posible nga mga Kalihokan

• Gamita ang “Kapitulo 56: Ang Propeta Gipatay” (Mga Istorya sa Doktrina ug mga Pakigsaad, 201–5) sa pagsulti sa mga bata kon sa unsang paagi namatay si Propeta Joseph Smith ug ang iyang igsoon nga si Hyrum Smith. O tuguti ang usa sa mga bata nga mosaysay sa istorya. Hatag og pamatuod nga si Joseph Smith usa ka tinuod nga propeta ug nga siya mihatag sa iyang kinabuhi alang sa Ginoo ug sa Iyang ebanghelyo.

• Ipaambit ngadto sa mga bata ang pipila ka mga hugpong sa mga pulong gikan sa bersikulo sa Basahon ni Mormon nga gibasa ni Hyrum Smith sa wala pa sila moadto sa Bilanggoan sa Carthage, nga girekord diha sa Doktrina ug mga Pakigsaad 135:5. Hisguti kon sa unsang paagi nga kining bersikulo tingali nakahupay kang Hyrum. Ipaambit ang mga kasulatan nga nagdala nimo og kahupayan kon ikaw nabalaka o naguol.

Doktrina ug mga Pakigsaad 135:3

Si Joseph Smith usa ka Propeta sa Dios.

Sa tibuok tuig, ang mga bata nakakat-on kon unsay gipadayag sa Ginoo pinaagi ni Propeta Joseph Smith. Makatabang ka nila nga makahinumdom ug makadayeg kon sa unsang paagi nga ang buhat ni Joseph nakapanalangin sa ilang kinabuhi.

Posible nga mga Kalihokan

• Ipakita ang mga butang nga nagrepresentar sa buhat ni Propeta Joseph Smith, sama sa Basahon ni Mormon, sa Doktrina ug mga Pakigsaad, o usa ka litrato sa mga misyonaryo o usa ka templo. Gamit ang mga hugpong sa mga pulong gikan sa Doktrina ug mga Pakigsaad 135:3, ipaambit ngadto sa mga bata ang pipila ka butang nga gibuhat sa Ginoo pinaagi ni Joseph Smith alang sa atong kaluwasan. Dapita ang mga bata sa pagpili og usa niining mga butang ug ipaambit kon nganong mapasalamaton sila alang niini.

• Samtang magkolor ang mga bata sa pahina sa kalihokan niining semanaha, panganta o pagpatukar og mga awit mahitungod ni Joseph Smith, sama sa “Pagdayeg sa Tawo” (Mga Himno, nu.19). Ipaambit ang imong mga pagbati mahitungod sa Propeta.

  

  Ang Amerikanhong Propeta, ni Del Parson

Doktrina ug mga Pakigsaad 136

Ang Dios naghatag kanato og mga sugo aron sa pagtabang kanato.

Ang mga Santos nagsagubang og daghang pagsulay sa katuigan human sa kamatayon ni Joseph Smith. Sa unsang paagi nga ang tambag nga gihatag sa Ginoo ngadto sa mga Santos makatabang sa mga bata nga imong gitudloan?

Posible nga mga Kalihokan

• Ipaambit ngadto sa mga bata ang pipila ka hagit nga gisagubang sa mga Santos sa ilang pagbiya sa Nauvoo ug nagpundok didto sa Winter Quarters (tan-awa sa mga kapitulo 60 ug 62 sa Mga Istorya sa Doktrina ug mga Pakigsaad, 211–16, 222–24). Pagbutang og usa ka hulagway sa Templo sa Nauvoo sa usa ka kilid sa kwarto, ug paghimo og yano nga kapasilungan diha sa pikas kilid—tingali adunay habol ug pipila ka lingkuranan o usa ka lamesa. Dapita ang mga bata nga magpundok duol sa hulagway, ug sultihi sila nga usa ka tuig ug tunga human namatay si Joseph Smith, ang mga Santos gipugos sa pagpapahawa aron biyaan ang Nauvoo. Dapita ang mga bata sa paglakaw palayo sa templo ug magpundok sa kapasilungan nga nagrepresentar sa biyahe ngadto sa Winter Quarters.

• Ipasabut nga ang Ginoo mihatag og pagpadayag ngadto ni Brigham Young, nga makita diha sa Doktrina ug mga Pakigsaad 136, aron matabangan ang mga Santos samtang nagbiyahe sila paingon sa Walog sa Salt Lake. Basaha ang pipila ka hugpong sa mga pulong gikan sa seksyon 136 nga naglangkob sa tambag nga masabtan sa gagmay nga mga bata, ug dapita sila sa pagdrama-drama o pagdrowing kon unsay gihangyo sa Ginoo nga buhaton sa mga Santos samtang magbiyahe sila. Sama pananglit, mahimong drowingon sa mga bata ang ilang kaugalingon nga miuli og butang nga ilang gihulaman sa usa ka higala, o mahimo silang mokanta og usa ka awit sa Primary samtang manayaw sila libut sa morag usa ka campfire (tan-awa sa mga bersikulo 25, 28).

Itudlo ang Doktrina: Mas Dagko nga mga Bata

Doktrina ug mga Pakigsaad 135

Sila si Joseph Smith ug Hyrum Smith mihatag sa ilang kinabuhi alang sa ebanghelyo ni Jesukristo.

Ang pagkadungog mahitungod sa mga sakripisyo nila ni Joseph Smith ug Hyrum Smith makapalig-on sa pagtuo sa mga bata ug sa ilang tinguha nga magmatinuoron sa ilang mga pagpamatuod.

Posible nga mga Kalihokan

• Hangyoa ang mga bata sa pagpaambit sa unsay ilang nahibaloan kon sa unsang paagi gipatay sila si Joseph ug Hyrum Smith. Kon magkinahanglan sila og tabang, ipabasa nila ang Doktrina ug mga Pakigsaad 135:1 o “Kapitulo 56: Ang Propeta Gipatay” (Mga Istorya sa Doktrina ug mga Pakigsaad, 201–5). Dapita ang mga bata sa paghunahuna nga nagpuyo sila didto sa Nauvoo sa dihang namatay ang Propeta. Hangyoa sila sa pagpaambit kon unsa kaha ang ilang gibati. Hatag sa imong pagpamatuod bahin ni Joseph Smith, ug dapita ang mga bata sa pagbuhat sa ingon.

• Ipakita ang mga hulagway sa mga propeta (tan-awa sa Libro sa mga Hulagway sa Ebanghelyo, nu. 14, 18, 67). Unsa ang pipila ka butang nga gipabuhat sa Dios sa mga propeta? Ipasabut nga ang Ginoo misaad sa pagpanalangin sa Iyang mga propeta tungod sa mga sakripisyo nga ilang gihimo sa pagserbisyo Kaniya (tan-awa sa Mateo 10:39).

Doktrina ug mga Pakigsaad 135:3

Si Joseph Smith usa ka Propeta sa Dios.

Sama sa tanang propeta, si Joseph Smith mipamatuod bahin ni Jesukristo ug nagtudlo kanato kon unsaon nato pagduol Kaniya. Tabangi ang mga bata nga makakita kon giunsa pagtuman ni Joseph Smith ang iyang misyon.

Posible nga mga Kalihokan

• Basaha og dungan ang Doktrina ug mga Pakigsaad 135:3, ug hangyoa ang mga bata sa pag-ila sa unsay nahimo ni Joseph Smith. Isulat diha sa pisara ang unsay ilang makit-an. Dapita ang mga bata sa pagpili og usa niining mga butang ug ipaambit kon nganong mapasalamaton sila alang niini.

• Awhaga ang mga bata nga ang matag usa maghunahuna og higala o minahal sa kinabuhi nga wala kaayo masayud mahitungod ni Joseph Smith. Unsay ilang isulti kon kana nga tawo mangutana, “Nganong importante man kaayo kaninyo si Joseph Smith?” Dapita ang mga bata sa pagpraktis kon unsay ilang isulti ngadto niining tawhana.

Doktrina ug mga Pakigsaad 136:4, 10–11, 18–30

Ang Ginoo makapanalangin kanako kon nanglimbasug ko.

Human gipatay si Joseph Smith, ang mga Santos gipapahawa sa Nauvoo. Si Brigham Young nangulo kanila paingon sa Winter Quarters, diin nangandam sila alang sa mas taas pa gani nga pagbaktas ngadto sa Walog sa Salt Lake.

Posible nga mga Kalihokan

• I-summarize ang mga kasinatian sa mga Santos human gipatay si Propeta Joseph Smith (tan-awa sa mga kapitulo 58, 60, ug 62 sa Mga Istorya sa Doktrina ug mga Pakigsaad, mga pahina 206–8, 211–16, 222–24). Dapita ang mga bata sa paghunahuna kon unsa kaha ang ilang bation kon kinahanglan silang mobiya sa ilang mga panimalay ug mangita og bag-ong dapit nga kapuy-an didto sa kamingawan. Ipasabut nga diha sa Doktrina ug mga Pakigsaad 136, ang Ginoo mihatag og tambag aron tabangan ang mga Santos diha sa ilang biyahe. I-assign ang matag bata og pipila ka mga bersikulo gikan niining pinadayag, sama sa mga bersikulo 4, 10–11, 18–30, ug hangyoa ang mga bata nga ang matag usa mangita og butang nga makatabang kanila sa ilang mga kabalaka o mga kahadlok.

• Tabangi ang mga bata sa paghunahuna og mga pagsulay nga gisagubang sa mga tawo karon. Dapita sila sa pagpangita og usa ka butang diha sa seksyon 136 nga mahimo nilang mapaambit aron pag-awhag sa usa ka tawo nga nagsagubang sa maong pagsulay. Ang mga bata mahimo usab nga mangita og makapaawhag nga mga mensahe diha sa “Mga Santos Dali Na” (Mga Himno, nu. 23), usa ka himno nga gikanta sa mga Santos diha sa ilang biyahe.

Awhaga ang Pagkat-on diha sa Panimalay

Dapita ang mga bata sa pagpaambit ngadto sa ilang pamilya o usa ka higala nganong mapasalamaton sila kang Propeta Joseph Smith.

Pagpalambo sa Atong Pagtudlo

Ang mga bata aktibo. Usahay imong bation nga ang enerhiya sa mga bata makabalda sa pagkat-on. Apan magamit nimo ang ilang aktibo nga mga kinaiya pinaagi sa pagdapit kanila sa pagdrowing, sa pagkanta, o sa pagdrama-drama og usa ka baruganan sa ebanghelyo (tan-awa sa Pagtudlo sumala sa Pamaagi sa Manluluwas, 25–26).