Kita uban Kanila ug Sila uban Kanato, ni Caitlin Connolly

Nobyembre 1–7

Doktrina ug mga Pakigsaad 125–128

“Ang Tingog sa Kalipay alang sa mga Buhi ug sa mga Patay”

Kon nagtudlo ka sa mas gagmay nga mga bata ug nagkinahanglan og dugang nga tabang, tan-awa ang “Pagtubag sa mga Panginahanglan sa Mas Gagmay nga mga Bata” sa sinugdanan niini nga kapanguhaan.

Irekord ang Imong mga Impresyon

Dapita ang Pagpaambit

Tabangi ang mga bata sa paghunahuna og butang nga ilang nakat-unan niining semanaha diha sa panimalay o sa Primary. Hatagi sila og pipila ka minuto sa pagdrowing og hulagway sa unsay ilang gihunahuna ug ipaambit kini ngadto sa klase.

Itudlo ang Doktrina: Mas Gagmay nga mga Bata

Doktrina ug mga Pakigsaad 126:3

Akong gimahal ang akong pamilya.

Human makapauli si Brigham Young gikan sa pagsangyaw sa ebanghelyo, gisultihan siya sa Ginoo nga tutukan niya ang pag-atiman sa iyang pamilya.

Posible nga mga Kalihokan

• Ipaambit ngadto sa mga bata ang impormasyon mahitungod ni Brigham Young diha sa “Kapitulo 49: Ang Mga Santos sa Nauvoo” (Mga Istorya sa Doktrina ug mga Pakigsaad, 184), o i-summarize ang Doktrina ug mga Pakigsaad 126 sa kaugalingon nimong mga pulong. Dayon basaha ang Doktrina ug mga Pakigsaad 126:3 ngadto sa mga bata, nga maghatag og gibug-aton sa hugpong sa mga pulong nga “moamuma pag-ayo sa imong banay.” Unsa ang gipasabut sa pag-amuma sa atong mga pamilya? Tabangi ang mga bata sa paghunahuna og mga paagi nga makapakita sila og gugma ngadto sa mga sakop sa ilang pamilya.

• Sa dili pa magklase, dapita ang mga bata sa pagdala og litrato sa ilang pamilya (o hangyoa sila sa pagdrowing og mga hulagway). Dayon hangyoa sila sa pagpaambit og butang nga ilang ganahan mahitungod sa ilang pamilya. Ipaambit ang usa ka litrato sa imong pamilya, ug buhata ang samang butang. Ipasabut nganong gusto sa Langitnong Amahan nga atong atimanon ang mga sakop sa atong pamilya. Kantaha ang usa ka awit nga nagtudlo niining kamatuoran, sama sa “Kon Kita Motabang” (Songbok sa mga Bata, 108).

Doktrina ug mga Pakigsaad 128:5, 12

Ang tanang anak sa Dios nagkinahanglan sa kahigayunan nga mabunyagan.

Agig dugang sa pagtabang sa mga bata sa pag-andam sa paghimo sa kaugalingon nilang mga pakigsaad sa bunyag, tudloi sila nga makatabang kita niadtong namatay na nga wala mabunyagi aron makadawat sa samang mga panalangin.

Posible nga mga Kalihokan

• Pagpakita og hulagway ni Jesukristo nga gibunyagan (tan-awa sa Libro sa mga Hulagway sa Ebanghelyo, nu. 35), o ipasalida ang video nga “The Baptism of Jesus” (ChurchofJesusChrist.org). Pangutan-a ang mga bata kon nakakita na ba sila og usa ka tawo nga gibunyagan. Unsay ilang nahinumduman mahitungod niini? Gamita ang hulagway o video sa pagpakita sa mga bata nga kon bunyagan kita, modiretso kita sa ilawom sa tubig ug dayon mohaw-as og balik, sama sa gibuhat ni Jesus. Abliha sa Doktrina ug mga Pakigsaad 128:12, ug ipasabut nga si Joseph Smith nagtudlo nga ang pagpabunyag magpahinumdom kanato sa Pagkabanhaw.

• Sultihi ang mga bata mahitungod sa usa ka tawo nga imong kaila (sama sa usa ka katigulangan) kinsa namatay nga wala mabunyagi. Basaha ang Doktrina ug mga Pakigsaad 128:5 ug papuli-puliha sila sa pagkupot sa usa ka litrato sa bunyaganan sa templo (tan-awa sa outline niining semanaha sa Dali, Sunod Kanako—Alang sa mga Indibidwal ug mga Pamilya). Ipamatuod nga gitugutan kita sa Langitnong Amahan nga mabunyagan dinhi sa yuta alang sa mga tawo nga namatay na. Niining paagiha ang tanang anak sa Dios mabunyagan ug makahimo og mga pakigsaad ngadto Kaniya.

Doktrina ug mga Pakigsaad 128:18

Gusto sa Langitnong Amahan nga makat-on ko mahitungod sa akong family history.

Adunay yano nga mga paagi diin ang gagmay nga mga bata makaapil sa buhat sa family history. Tabangi sila nga mobati sa gugma alang sa mga tawo diha sa ilang family tree.

Posible nga mga Kalihokan

• Paghimo og kadena nga hinimo sa papel nga adunay mga ngalan sa mga tawo sa imong pamilya (tan-awa ang pahina sa kalihokan niining semanaha), ug dad-a kini aron ipakita ngadto sa klase. Sulti og pipila ka butang mahitungod sa mga tawo diha sa imong kadena. Basaha ngadto sa mga bata gikan sa Doktrina ug mga Pakigsaad 128:18, ug ipasabut nga si Joseph Smith nagtudlo nga “adunay nagsumpay … tali sa mga amahan ug sa mga anak.” Tabangi ang mga bata sa paghimo sa kaugalingon nilang mga kadena sa pamilya, ug dapita sila sa pagdala sa mga kadena ngadto sa balay ug magpatabang sila sa ilang mga ginikanan sa pagdugang og mga ngalan sa mga katigulangan.

• Hangyoa ang mga bata sa pagpaambit og butang mahitungod sa ilang mga apohan. Isulti ang usa sa imong paboritong mga istorya mahitungod sa imong mga ginikanan o mga apohan. Pagpakita og mga litrato kon mahimo. Awhaga ang mga bata nga magkat-on pa og dugang mahitungod sa ilang mga apohan ug ubang mga katigulangan.

Itudlo ang Doktrina: Mas Dagko nga mga Bata

Doktrina ug mga Pakigsaad 126

Makatabang ko sa pag-atiman sa akong pamilya.

Unsaon nimo pagtabang ang mga bata nga imong gitudloan nga makaserbisyo sa mga sakop sa ilang pamilya sa makahuluganong paagi?

Posible nga mga Kalihokan

• Basaha og dungan ang Doktrina ug mga Pakigsaad 126:3. Ngano kaha nga gihangyo man sa Langitnong Amahan si Brigham Young nga “moamuma pag-ayo sa [iyang] banay”? Unsaon nato pagbuhat sa samang butang alang sa atong mga pamilya? Paghimo og lista sa mga butang nga atong mahimo karon aron makaserbisyo sa atong mga pamilya. Sa unsang paagi nga ang pagbuhat niining mga butanga makatabang kanato nga mas mahisama sa Langitnong Amahan?

• Ipaambit ngadto sa mga bata ang istorya ni Sister Carole M. Stephens mahitungod sa iyang apo nga lalaki nga si Porter (tan-awa sa “Kita Adunay Dako nga Rason nga Maglipay,” Liahona, Nob. 2013, 115). Unsay gibuhat ni Porter sa pag-atiman sa iyang pamilya? Unsaon nato sa pagsunod ang iyang ehemplo?

Doktrina ug mga Pakigsaad 128:1, 15–18

Ang bunyag alang sa mga patay nakamugna og “sumpay” tali kanako ug sa akong mga katigulangan.

Si Joseph Smith nagtudlo nga ang bunyag alang sa mga patay nagbugkos kanato ngadto sa atong mga katigulangan sama sa mga nagsumpay-sumpay sa kadena. Unsaon nimo pagtabang ang mga bata nga mobati og hingpit nga kalipay nga nagagikan sa pagkahibalo mahitungod sa atong mga katigulangan ug pagsiguro nga ang buhat sa templo gihimo alang kanila?

Posible nga mga Kalihokan

• Bahina ang klase ngadto sa duha ka grupo, ug hangyoa ang unang grupo sa pagbasa sa Doktrina ug mga Pakigsaad 128:1 aron mahibaloan kon unsa nga hilisgutan ang anaa sa hunahuna ni Joseph Smith. Hangyoa ang laing grupo sa pagbasa sa bersikulo 17 ug mahibalo kon unsa nga hilisgutan ang iyang gikonsiderar “nga labing mahimayaon.” Tuguti sila nga mopaambit sa unsay ilang nahibaloan, ug maghisgot kon nganong kini nga hilisgutan mahimayaon man kaayo. Kon mahimo, dapita ang usa ka batan-on kinsa nakahimo og mga bunyag alang sa mga patay sa pagpaambit sa iyang kasinatian ug mopasabut nganong atong gihimo kini nga buhat.

• Ikonsiderar ang paggamit sa leksyon gamit ang usa ka butang [object lesson] sa pagpakita nga kinahanglan kitang motabang sa atong mga katigulangan kinsa wala mabunyagi. Sama pananglit, ipakita ang usa ka gasa o makaon, apan ibutang kini nga dili makab-ot sa usa sa mga bata. Sultihi ang mga bata nga maangkon niya ang butang apan dili mahimong mobalhin gikan sa iyang lingkuranan. Pangutan-a ang ubang mga bata kon unsay ilang mabuhat aron matabangan ang bata nga madawat kini. Basaha og dungan ang Doktrina ug mga Pakigsaad 128:15, ug hisguti kon sa unsang paagi kini adunay kalabutan ngadto sa leksyon gamit ang usa ka butang.

• Dapita ang mga bata sa paghimo og kadena nga hinimo sa papel nga adunay mga ngalan sa ilang mga ginikanan, mga apohan, mga apohan sa tuhod, ug uban pa (tan-awa sa pahina sa kalihokan alang niini nga leksyon). Kon ang mga bata wala makaila sa mga ngalan sa ilang mga katigulangan, awhaga sila nga mahibalo sa mga ngalan ug isulat kini sa kadena diha sa panimalay. Basaha og dungan ang Doktrina ug mga Pakigsaad 128:18 aron mahibalo kon unsa ang “sumpay” nga naghimo sa atong family history nga “tibuok ug walay kulang.” Isulti ang istorya mahitungod sa usa ka katigulangan nga nakatabang kanimo nga mobati nga konektado ngadto kaniya. O ipasalida ang video nga “Courage: I Think I Get It from Him” (ChurchofJesusChrist.org).

• Ipakita sa mga bata ang usa ka rekomend sa templo, ug sultihi sila kon unsaon nimo aron makabaton niini. Tabangi sila nga magpaabut nga makakuha sa kaugalingon nilang mga rekomend sa templo aron makaadto sila sa templo ug magpabunyag alang sa kaugalingon nilang mga katigulangan.

  

  Makakita kita sa mga ngalan sa atong mga katigulangan ug makapahigayon sa mga ordinansa sa templo alang kanila.

Awhaga ang Pagkat-on diha sa Panimalay

Dapita ang mga bata sa paghangyo og usa ka tawo sa panimalay nga motabang kanila nga makakat-on og dugang mahitungod sa ilang family history. Mahimo silang mohangyo nga maminaw og mga istorya mahitungod sa usa ka katigulangan o mogamit sa FamilySearch.org aron makakita sa mga ngalan sa mga katigulangan nga wala pa mabunyagi.

Pagpalambo sa Atong Pagtudlo

Tabangi ang mga bata nga mopahayag sa ilang pagkamamugnaon. Kon ang mga bata magbuhat, magdrowing, o magkolor og usa ka butang nga may kalabutan sa istorya o baruganan nga ilang gikat-unan, kasagaran mas mahinumduman nila kini. Mahimo usab silang mogamit sa unsay ilang namugna aron sa pagtudlo sa uban. (Tan-awa sa Pagtudlo Sumala sa Pamaagi sa Manluluwas, 25.)