Kita uban Kanila ug Sila uban Kanato, ni Caitlin Connolly

Nobyembre 1–7

Doktrina ug mga Pakigsaad 125–128

“Ang Tingog sa Kalipay alang sa mga Buhi ug sa mga Patay”

Hinumdumi ang pagrekord sa imong mga pagbati samtang ikaw magtuon diha sa Doktrina ug mga Pakigsaad 125–28 aron ikaw makahunahuna niini ug mopakigbahin niini ngadto sa uban.

I-rekord ang Imong mga Pagbati

Sa Agosto 1840, usa ka nagbangutan nga Jane Neyman naminaw ngadto ni Propeta Joseph nga namulong diha sa lubong sa iyang higala nga si Seymour Brunson. Ang kaugalingong tinedyer nga anak nga lalaki ni Jane nga si Cyrus bag-ohay lamang usab nga namatay. Nagdugang sa iyang kasubo mao ang kamatuoran nga si Cyrus wala gayud mabunyagi, ug naguol si Jane kon unsay kahulugan niini sa iyang mahangturong kalag. Nasayud si Joseph kon unsay iyang gibati; naghunahuna usab siya sa samang butang mahitungod sa iyang minahal nga igsoong lalaki nga si Alvin, kinsa namatay usab nga wala pa mabunyagi. Busa mihukom ang Propeta sa pagpakigbahin ngadto ni Jane, ug sa tanan nga diha sa lubong, kon unsay gipadayag sa Ginoo nganha kaniya mahitungod niadtong kinsa namatay nga wala makadawat sa mga ordinansa sa ebanghelyo––ug unsay atong mabuhat sa pagtabang kanila.

Ang doktrina sa bunyag alang sa patay nakapatandog sa mga Santos; nakahunahuna dayon sila sa nangamatay nga mga ginikanan, mga apohan, ug ubang mga sakop sa pamilya. Karon adunay paglaum alang kanila! Mipakigbahin si Joseph sa ilang kalipay, ug migamit siya og malipayon, madasigon nga mga pulong sa pagpahayag sa unsay gitudlo sa Ginoo kaniya mahitungod sa kaluwasan sa patay: “Himoa ang mga bukid nga mosinggit sa kalipay, ug tanan kamo nga mga walog mosinggit og kusog; ug tanan kamo nga mga dagat ug uga nga mga yuta mosulti sa mga kahibulongan sa inyong Walay Katapusan nga Hari!” (Doktrina ug mga Pakigsaad 128:23).

Tan-awa sa Mga Santos, 1:473–88; “Letters on Baptism for the Dead,” Revelations in Context, 272–76.

Mga Ideya alang sa Personal nga Pagtuon sa Kasulatan

Doktrina ug mga Pakigsaad 126

Ang Ginoo gusto kanako nga moamuma sa akong pamilya.

Human mipauli gikan sa kinaulahian sa daghang mga misyon ngadto sa Inglatera, nadawat ni Brigham Young ang lain nga importanting tawag gikan sa Ginoo—sa “pag-amuma pag-ayo sa [iyang] pamilya [banay]” (bersikulo 3), kinsa nag-antus sa panahon nga siya wala. Samtang ikaw mamalandong kon unsaon niini ug sa ubang tambag diha sa seksyon 126 paggamit nganha kanimo, hunahunaa kini nga mga pulong gikan ni Presidente Bonnie L. Oscarson, kanhiay Kinatibuk-ang Presidente sa Young Women:

“Hinumdumi nga pipila sa labing nanginahanglan tingali kadtong anaa gayud sa imong atubangan. Sugdi ang inyong pagserbisyo sa inyong kaugalingong mga panimalay ug sulod sa inyong kaugalingong mga pamilya. Mao kini ang mga relasyon nga mahimong mahangturon. Gani—ug tingali ilabi na kon—ang sitwasyon sa imong pamilya dili kaayo perpekto, makapangita ka og mga paagi sa pagserbisyo, pagbayaw, ug paglig-on. Sugdi kon asa ka karon, higugmaa sila bisan pa man, ug pangandam alang sa pamilya nga gusto nimong ikauban sa umaabut” (“Ang mga Panginahanglan nga Atong Giatubang,” Liahona, Nob. 2017, 27).

Doktrina ug mga Pakigsaad 127:2–4

Ang Ginoo nahibalo sa akong mga kalipay ug mga kaguol.

Bakak nga mga pasangil ug ang hulga nga dakpon mipugos na usab ni Joseph Smith sa pagtago kaniadtong Agosto 1842. Ug bisan pa niana ang mga pulong nga iyang gisulat ngadto sa mga Santos atol niini nga panahon (karon Doktrina ug mga Pakigsaad 127) puno sa kamalaumon ug kalipay. Unsay gitudlo sa mga bersikulo 2–4 kanimo mahitungod sa Dios? mahitungod kon unsaon nimo pag-atubang ang personal nga mga pagsulay?

Hunahunaa ang pagrekord kon giunsa sa Ginoo pagsuporta kanimo diha sa “lawom nga tubig” sa imong kinabuhi.

Doktrina ug mga Pakigsaad 127:5–8; 128:1–8

“Bisan unsa ang inyong gitala dinhi sa yuta itala didto sa langit.”

Samtang ikaw magbasa diha sa Doktrina ug mga Pakigsaad 127:5–8; 128:1–8, pangitaa ang mga rason nganong ang Ginoo mihatag ni Joseph Smith sa ingon ka piho nga mga panudlo mahitungod sa pagrekord og mga bunyag alang sa patay. Unsa ang gitudlo niini kanimo mahitungod sa Ginoo ug sa Iyang buhat?

Ang pagbuhat og serbisyo sa templo alang sa atong mga katigulangan nagbugkos sa atong mga kasingkasing ngadto kanila.

Doktrina ug mga Pakigsaad 128:5–25

Ang kaluwasan sa akong mga katigulangan importante sa akong kaluwasan.

Kini klaro gikan sa unsay gipadayag sa Dios pinaagi ni Joseph Smith ngano nga ang atong mga katigulangan kinsa wala mabunyagi niini nga kinabuhi nagkinahanglan sa atong tabang alang sa ilang kaluwasan. Apan ngano kaha nga ang kaluwasan sa atong mga katigulangan “gikinahanglan ug mahinungdanon sa atong kaluwasan”? (tan-awa sa Doktrina ug mga Pakigsaad 128:15–18;).

Bersikulo 5 nagtudlo nga ang ordinansa sa mga bunyag sa patay “giandam sa wala pa ang katukuran sa kalibutan.” Unsa ang gitudlo niini nga kamatuoran kanimo mahitungod sa Dios ug sa Iyang plano? Unsa ang gidugang sa mensahe ni Presidente Henry B. Eyring “Pagpundok sa Pamilya sa Dios” ngadto sa imong panabut? ( Liahona, Mayo 2017, 19–22).

Migamit si Joseph Smith og mga hugpong sa mga pulong sama sa “gahum sa pagbugkos,” “nagsumpay,” ug “hingpit nga pagkahiusa” kon magtudlo mahitungod sa mga ordinansa sa pagkapari ug bunyag alang sa patay. Pangitaa kini ug ang susama nga mga hugpong sa mga pulong samtang ikaw magbasa diha sa Doktrina ug mga Pakigsaad 128:5–25. Unsa ang pipila ka mga butang nga, pinaagi ni Jesukristo, mahiusa pagbugkos tungod sa mga ordinansa sa pagkapari alang sa patay? Nganong ang “walay kalisud” usa ka maayong pulong sa paghulagway sa doktrina sa kaluwasan alang sa patay? (tan-awa diha sa mga bersikulo 9–11).

Unsay nakapadani kanimo mahitungod sa mga pulong ni Joseph Smith diha sa mga bersikulo 19–25? Sa unsa nga paagi kini nga mga bersikulo miapekto sa paagi nga ikaw mibati mahitungod sa serbisyo sa templo alang sa imong mga katigulangan? mahitungod ni Jesukristo? Unsa ang gibati nimong gidasig nga buhaton?

Tan-awa usab diha sa 1 Mga Taga-Corinto 15:29; Dale G. Renlund, “Buhat sa Family History ug sa Templo: Pagsilyo ug Pagkaayo,” Liahona, Mayo 2018, 46–49.

Mga Ideya alang sa Pamilya nga Pagtuon sa Kasulatan ug Family Home Evening

Doktrina ug mga Pakigsaad 126.Ang pagbasa niining tambag ngadto ni Brigham Young mahimong makadasig sa imong pamilya sa pagsulti mahitungod sa unsaon kaha nimo sa paggahin pa og dugang nga panahon nga “moamuma pag-ayo” (bersikulo 3) sa usag usa.

Doktrina ug mga Pakigsaad 128:15–18.Unsa ang pipila ka makaluwas ug makahingpit nga mga panalangin sa buhat sa family history? Mahimo kang makakaplag og pipila ka mga ideya diha sa (ChurchofJesusChrist.org) o sa usa ka awit mahitungod sa family history sama sa “Family History––Naghimo Ako” (Songbook sa mga Bata, 100).

Doktrina ug mga Pakigsaad 128:18.Paghunahuna sa paghimo og usa ka kadena nga papel [paper chain] nga may mga ngalan sa mga sakop sa pamilya ug sa mga katigulangan diha sa kada sumpay sa pagpakita kon unsaon sa buhat sa family history ug sa templo paghimo og “sumpay” nga nagkonektar kanato ngadto sa atong mga katigulangan. Tingali makahimo ka og pipila ka pagsiksik niini nga semana aron sa pagpangita og dugang nga mga sakop sa pamilya ug sa pagtan-aw unsa ka taas ang imong kadena motubo.

Doktrina ug mga Pakigsaad 128:19–23.Tingali ang mga sakop sa pamilya makasiksik niini nga mga bersikulo alang sa mga pulong nga nagpakita sa kadasig ni Joseph Smith mahitungod sa ebanghelyo ni Jesukristo ug sa kaluwasan sa patay. Ang mga sakop sa pamilya makahimo sa pagpakigbahin og mga kasinatian nga mihimo kanila nga madasigon mahitungod usab niini nga buhat.

Alang sa dugang nga mga ideya sa pagtudlo sa mga bata, tan-awa sa latid [outline] karon nga semana sa Dali, Sunod Kanako—Alang sa Primary.

Gisugyot nga awit: “Family History—Naghimo Ako,” Songbook sa mga Bata, 100.

Mga Tingog sa Pagpahiuli

Bunyag alang sa mga Patay, “Bag-o ug Mahimayaong Hilisgutan”

Kini nga sketch nagpakita sa tubigan sa bunyag sa Templo sa Nauvoo nga nagtongtong diha sa napulog duha ka mga turo.

Phebe ug Wilford Woodruff

Si Phebe Woodruff mipuyo duol sa Nauvoo sa dihang si Joseph Smith misugod sa pagtudlo mahitungod sa bunyag alang sa patay. Misulat siya mahitungod niini ngadto sa iyang bana, si Wilford, kinsa nagserbisyo og misyon sa Inglatera:

“Si Brother Joseph … nahibalo pinaagi sa pagpadayag nga kadtong ania niini nga simbahan mahimong mabunyagan alang ni bisan kinsa sa ilang mga paryente kinsa namatay ug walay pribilehiyo sa pagkadungog niini nga ebanghelyo, bisan alang sa ilang mga anak, mga ginikanan, igsoong mga lalaki, igsoong mga babaye, mga apohan, mga uyoan, ug mga iyaan. … Human dayon sila mabunyagan alang sa ilang mga higala buhian sila gikan sa bilangoan ug sila makaangkon kanila sa pagkabanhaw ug makadala kanila ngadto sa celestial nga gingharian––kini nga doktrina mainiton nga gidawat sa simbahan ug sila nagpadayon sa dinaghan nga pundok, ang uban mabunyagan ingon ka daghan sa 16 ka beses … sa usa ka adlaw.”¹

Wala madugay si Wilford Woodruff miingon kabahin niini nga baruganan: “Sa higayon nga ako nakadungog kabahin niini ang akong kalag hilabihan sa kalipay. … Ako mipasiugda ug nabunyagan alang sa akong tanang patay nga mga paryente nga akong nahinumduman. … Gibati nako ang pag-ingon og hallelujah sa dihang ang pagpadayag miabut nga nagpahayag ngari kanato sa bunyag alang sa patay. Akong gibati nga kita adunay katungod sa pagmaya diha sa mga panalangin sa Langit.”²

Vilate Kimball

Sama ni Sister Woodruff, si Vilate Kimball nakadungog mahitungod sa bunyag alang sa patay samtang ang iyang bana, si Heber, didto sa layo nagsangyaw sa ebanghelyo. Misulat siya ngadto kaniya:

“Si Presidente Smith mipaila og bag-o ug mahimayaong hilisgutan … nga nakahimo sa daghang mga tawo sa pagbaton og hugot nga pagtuo. Kana mao, ang mabunyagan alang sa patay. Si Pablo namulong niini, diha sa unang Mga Taga-Corinto ika-15 nga kapitulo ika-29 nga bersikulo. Si Joseph nakadawat og mas hingpit nga pagpasabut kabahin niini pinaagi sa Pagpadayag. … Pribilehiyo niini nga simbahan nga mabunyagan alang sa tanan nilang kaparyentehan nga namatay sa wala pa moabut kini nga Ebanghelyo; gani balik ngadto sa ilang Apohan nga lalaki ug Apohan nga babaye sa tuhod. … Sa pagbuhat sa mao, kita naglihok isip tigtabang kanila; ug naghatag kanila sa pribilehiyo nga mobangon sa unang pagkabanhaw. Siya nag-ingon nga isangyaw ngadto kanila ang Ebanghelyo … apan walay ingon nga butang nga ang mga espiritu pagabunyagan. … Sukad kini nga lagda gisangyaw dinhi, ang katubigan sa kanunay nagkapuliki. Sa panahon sa komperensya usahay adunay gikan sa walo ngadto sa napulo ka mga Elder diha sa suba magbanos-banos sa pagbunyag. … Gusto ko nga mabunyagan alang sa akong Inahan. Akong gibanabana nga mohulat hangtud ikaw mauli, apan sa ulahing pamulong ni Joseph sa hilisgutan, mitambag siya sa tanan nga mag-abtik ug molihok, ug pagawason ang ilang mga higala gikan sa pagkabilanggo sa labing dali kon mahimo. Busa naghunahuna ako nga moadto ako niini nga semana, kay adunay daghan sa mga silingan nga moadto. Ang uban nabunyagan na og balik-balik sa daghang mga higayon. … Busa imong makita adunay higayon alang sa tanan. Dili ba mahimayaon kini nga doktrina?”³

Phebe Chase

Sa dihang nahuman na ang tubigan sa bunyag sa Templo sa Nauvoo, ang mga bunyag alang sa patay gihimo didto kay sa suba. Si Phebe Chase, usa ka lumulupyo sa Nauvoo, misulat ngadto sa iyang inahan mahitungod sa templo, naghulagway sa tubigan sa bunyag isip ang lugar diin “kita mabunyagan alang sa atong patay ug mahimong mga manunubos sa Bukid sa Zion.” Mipadayon siya sa pagpasabut nga dinhi niini nga tubigan sa bunyag, “ako nabunyagan alang sa akong mahal nga amahan ug sa tanang nahibilin sa akong patay nga mga higala. … Karon gusto akong mahibalo kon unsa ang mga ngalan sa imong amahan ug Inahan aron ako silang mapagawas, tungod kay ako nagtinguha sa paghupay sa Patay. … Ang Ginoo namulong pag-usab ug gipahiuli ang karaang kapunongan.”⁴

Sally Randall

Sa pagsulat ngadto sa iyang mga higala ug pamilya mahitungod sa bunyag alang sa patay, nahinumdom si Sally Randall sa pagkamatay sa iyang anak nga lalaki nga si George:

“O unsa nga panahon sa pagsulay kadto kanako ug kini gani ingon og ako dili makadawat nga naingon niana, apan … ang iyang amahan nabunyagan alang kaniya ug unsa ka mahimayaong butang kini nga kita nagtuo ug nagdawat sa kahingpitan sa ebanghelyo ingon nga kini gisangyaw karon ug mabunyagan alang sa tanan natong patay nga mga higala ug makaluwas kanila kutob kita makakuha og bisan unsa nga kahibalo kabahin kanila.

“Gusto ko nga kinahanglan sulatan mo ako sa mga ngalan sa tanan natong mga paryente nga patay gikan sa mga apohang mga lalaki ug apohang mga babaye sa bisan unsa. Tuyo nakong buhaton unsay akong mahimo sa pagluwas sa akong mga higala ug ako kinahanglan nga malipay gayud og maayo kon pipila kaninyo moari ug motabang kanako kay kini usa ka dakong buhat alang sa usa sa pagbuhat nga mag-inusara. … Ako nagpaabut nga ikaw maghunahuna niini nga usa ka katingalahang doktrina apan imong makaplagan kini nga tinuod.”⁵

Mubo nga mga Sulat

1. Phebe Woodruff sulat ngadto ni Wilford Woodruff, Okt. 6, 1840, Church History Library, Siyudad sa Salt Lake.

2. Wilford Woodruff, “Remarks,” Deseret News, Mayo 27, 1857, 91.

3. Sulat ni Vilate Kimball ngadto ni Heber C. Kimball, Okt. 11, 1840, Church History Library, Siyudad sa Salt Lake.

4. Sulat ni Phebe Chase, walay petsa, Church History Library, Siyudad sa Salt Lake. Sa dihang ang mga Santos unang misugod sa pagpahigayon og mga bunyag alang sa patay, ang mga indibidwal usahay mibunyag alang sa mga katigulangan sa duha ka mga sekso. Kini sa wala madugay gipadayag nga ang mga lalaki kinahanglan mabunyagan alang sa mga lalaki ug ang mga babaye alang sa mga babaye.

5. Sally Randall sulat, Abr. 21, 1844, Church History Library, Siyudad sa Salt Lake.

Ang bunyaganan sa Templo sa Ogden Utah nagtongtong sa mga buku-buko sa napulog duha ka mga turo.