Ang Pamanhonon Moabut [The Bridegroom Cometh], ni Elizabeth Gibbons

Nobyembre 15–21

Doktrina ug mga Pakigsaad 133–134

“Pag-andam Kamo alang sa Pag-anhi sa Pamanhonon”

Si Presidente Henry B. Eyring mitudlo: “Ang Pagpahiuli sa ebanghelyo gisugdan sa usa ka mapainubsanong pangutana nga gihunahuna diha sa usa ka kabus nga panimalay, ug mahimo kining magpadayon sa matag usa sa atong mga panimalay” (“Usa ka Panimalay Diin ang Espiritu sa Ginoo Mopuyo,” Liahona, Mayo 2019, 25).

I-rekord ang Imong mga Pagbati

Sa dihang ang Simbahan mao pa gyuy pagka-19 ka bulan ang gidugayon, si Propeta Joseph Smith ug ang ubang mga lider sa Simbahan mihimo og mapanganduyong mga plano sa pagtigum sa mga pagpadayag sa Dios sa ulahing mga adlaw ngadto sa usa ka bolyum ug sa pag-imprinta og 10,000 ka mga kopya––doble sa gidaghanon sa unang giimprinta nga Basahon ni Mormon. Sa ka dimalas, taas nga presyo mipugong niini nga mga plano, ug ang mga manggugubot miatake sa imprintahanan sa Simbahan samtang ang pag-imprinta nagpadayon. Gipangkatag nila ang wala pa mabugkos nga mga pahina, ug bisan ang mga maisug nga mga Santos mitipig sa pipila niini, walay kompleto nga mga kopya sa Basahon sa mga Sugo ang nahibaloan nga nahibilin.

Unsa ang atong nailhan karon isip ang seksyon 133 sa Doktrina ug mga Pakigsaad gituyo nga mahimong appendix ngadto sa Basahon sa mga Sugo, sama sa usa ka gamhanang panapos diha sa katapusan sa gimantala nga mga pagpadayag sa Ginoo. Kini nagpasidaan sa usa ka umaabut nga adlaw sa paghukom ug gibalik pag-usab ang paghangyo nga makita sa tibuok moderno nga pagpadayag: gawas gikan sa pagka-kalibutanon, ingon nga gisimbolo sa Babelon; tukora ang Zion; pangandam alang sa Ikaduhang Pag-anhi; ug isangyaw kini nga mensahe “ngadto sa matag kanasuran, ug kaliwatan, ug pinulongan, ug katawhan” (bersikulo 37). Samtang ang orihinal nga mga plano alang sa Basahon sa mga Sugo wala matuman, kini nga pagpadayag maoy usa ka pahinumdum ug usa ka saksi nga ang buhat sa Ginoo dili mapakyas, “kay siya mopakita sa iyang balaan nga bukton … , ug ang tanan nga mga katawhan makakita sa kaluwasan sa ilang Dios” (bersikulo 3).

Mga Ideya alang sa Personal nga Pagtuon sa Kasulatan

Doktrina ug mga Pakigsaad 133

Ang mga kamatuoran diha sa Doktrina ug mga Pakigsaad makaandam kanako sa paghimo sa buhat sa Dios.

Ang mga basahon usahay nagtapos sa usa ka panapos nga mopahayag pag-usab o mo-summarize sa labing mahinungdanong mga ideya. Seksyon 133 sa orihinal gituyo nga mahimong panapos sa Basahon sa mga Sugo, ug kini tingali mapuslanon nga basahon kini nga seksyon uban niana nga panan-aw. Unsa nga mga ideya ang gihatagan og gibug-aton sa Ginoo mahitungod sa Iyang buhat? Unsa ang gitudlo kanimo sa mga bersikulo 57–62 mahitungod sa tahas nga gusto sa Ginoo nga ikaw moapil sa Iyang buhat?

Doktrina ug mga Pakigsaad 133:1–19

Ang Ginoo nagsugo sa Iyang katawhan sa pagpangandam sa Iyang Ikaduhang Pag-anhi.

Ang duha ka seksyon 1, ang pasiuna sa Ginoo ngadto sa Doktrina ug mga Pakigsaad, ug seksyon 133, ang orihinal nga appendix sa basahon, nagsugod sa samang pangamuyo gikan sa Ginoo: “Patalinghug, O kamo nga mga katawhan sa akong simbahan” (Doktrina ug mga Pakigsaad 1:1; 133:1). Unsa ang gipasabut sa patalinghug? (tan-awa sa Ang Giya ngadto sa mga Kasulatan, “Patalinghug,” scriptures.ChurchofJesusChrist.org). Unsa nga mga pagdapit o mga sugo ang gusto sa Ginoo nga ikaw mopatalinghug ngadto diha sa Doktrina ug mga Pakigsaad 133:1–19? Unsa ang nakapadasig nimo sa pagbuhat aron mas maandam alang sa Iyang pag-anhi? Unsaon nimo pagtabang niadtong naglibut kanimo sa pagpangandam?

Tan-awa usab sa Mateo 25:1–13; D. Todd Christofferson, “Pagpangandam alang sa Pagbalik sa Ginoo,” Liahona, Mayo 2019, 81–84.

Doktrina ug mga Pakigsaad 133:19–56

Ang Ikaduhang Pag-anhi mahimong malipayon alang sa matarung.

Samtang ikaw magbasa diha sa Doktrina ug mga Pakigsaad 133:19–32 mahitungod sa mga hitabo nga mouban sa Ikaduhang Pag-anhi sa Manluluwas, mahimo nimong pamalandungan kon unsa ang gisugyot sa mga paghulagway niini nga mga hitabo nganha kanimo mahitungod sa Manluluwas ug sa Iyang buhat. Unsa ang posibleng espiritwal nga mga paggamit ang imong makaplagan niini nga mga paghulagway?

Samtang ikaw magbasa sa paghulagway sa pagbalik sa Manluluwas diha sa mga bersikulo 32–56, unsa ang hinungdan nga ikaw maghinamhinam nianang makahuluganon nga adlaw? Unsa nga mga hugpong sa mga pulong ang naghulagway sa gugma sa Ginoo alang sa Iyang mga katawhan? Hunahunaa ang pagrekord sa imong personal nga mga kasinatian uban “sa mahigugmaon nga kalooy sa [imong] Ginoo, ug sa tanan nga iyang nahatag diha [kanimo] sumala sa iyang kaayo” (bersikulo 52).

Doktrina ug mga Pakigsaad 134

“Ang mga panggamhanan [gobyerno] gitukod sa Dios alang sa kaayohan sa katawhan.”

Ang relasyon sa unang mga Santos sa gobyerno makuti. Sa dihang ang mga Santos gipugos sa pagbiya sa Distrito sa Jackson, Missouri, sa 1833, wala sila makadawat og suporta o bayad gikan sa lokal o nasyonal nga gobyerno bisan pa sa ilang mga panghangyo alang sa panabang. Nianang samang higayon, pipila ka mga tawo nga dili miyembro sa Simbahan mihubad sa mga pagtulun-an mahitungod sa Zion nga nagpasabut nga ang mga Santos midumili sa awtoridad sa yutan-ong mga gobyerno. Ang Doktrina ug mga Pakigsaad 134 gisulat, diha sa ubang bahin, sa pagklaro sa baruganan sa Simbahan kalabut sa gobyerno.

Sa unsa nga paagi kinahanglang mobati ang mga miyembro sa Simbahan mahitungod sa mga gobyerno? Samtang ikaw magtuon diha sa seksyon 134, hunahunaa ang paghimo og duha ka mga lista: usa ka lista sa mga baruganan nga imong nakat-unan mahitungod sa gobyerno ug lain sa mga responsibilidad sa mga tagilungsod. Sa unsa kaha nga mga paagi kini nga mga ideya nagtabang ngadto sa unang mga Santos? Sa unsa nga paagi kini magamit diin ikaw nagpuyo?

Tan-awa usab sa Mga Artikulo sa Hugot nga Pagtuo 1:11–12; topics.ChurchofJesusChrist.org.

Mga Ideya alang sa Pamilya nga Pagtuon sa Kasulatan ug Family Home Evening

Doktrina ug mga Pakigsaad 133:4–14.Ang espiritwal nga kaatbang sa Zion mao ang Babelon—usa ka karaang siyudad nga sa tibuok kasulatan nga nagsimbolo og kadautan ug espiritwal nga pagkabilanggo (tan-awa sa D. Todd Christofferson, “Dali na Diri sa Zion,” Liahona, Nob. 2008, 37; Ang Giya ngadto sa mga Kasulatan, “Babel, Babelon,” scriptures.ChurchofJesusChrist.org). Aduna ka bay bisan unsa nga kinahanglang buhaton isip usa ka pamilya nga, sa espiritwal nga pagbati, “mogawas … gikan sa Babelonia” (bersikulo 5) ug sa “[pag] panglakaw … ngadto sa … Zion”? (bersikulo 9).

Doktrina ug mga Pakigsaad 133:20–33.Samtang imong basahon kini nga mga bersikulo og dungan, ang imong pamilya maka-drowing og mga hulagway sa unsay ilang hunahuna kon sama sa unsa ang Ikaduhang Pag-anhi. Kamo makatugtog o makakanta og awit mahitungod sa Ikaduhang Pag-anhi, sama sa “Kon Siya Moanhi Pag-usab” (Songbook sa mga Bata, 46), ug sa paghisgot unsay mabuhat sa inyong pamilya sa pagpangandam alang sa Iyang Pag-anhi.

Doktrina ug mga Pakigsaad 133:37–39.Malingaw ba ang imong pamilya sa pagbasa niini nga mga bersikulo “uban sa makusog nga tingog”? (bersikulo 38). Unsa ang ipasabut sa pagpakigbahin sa ebanghelyo uban sa makusog nga tingog? Unsa nga mga kamatuoran ang atong mapakigbahin?

Doktrina ug mga Pakigsaad 134:1–2.Sa pagtabang sa imong pamilya nga makasabut sa importansya sa gobyerno, makahisgot ka og mga pangutana sama niini: Giunsa pagpanalangin ang atong pamilya pinaagi sa pagbaton og mga lagda? Sa unsa nga paagi ang atong nasud napanalanginan pinaagi sa pagbaton og mga balaod? Kamo usab makahimo o makakolor og hulagway sa bandila sa inyong nasud o memoryahon ang ikanapulog usa ug ikanapulog duha nga mga artikulo sa hugot nga pagtuo.

Alang sa dugang nga mga ideya sa pagtudlo sa mga bata, tan-awa sa latid [outline] karong semanaha diha sa Dali, Sunod Kanako—Alang sa Primary.

Gisugyot nga awit: “Dali, Tanang Anak sa Ginoo,” Mga Himno, nu. 200.

Pagpalambo sa Personal nga Pagtuon

Itudlo ang klaro ug yanong doktrina. Gihulagway sa Ginoo ang Iyang ebanghelyo uban sa mga pulong sama sa “katin-aw” ug “kayano” (Doktrina ug mga Pakigsaad 133:57). Unsa ang gisugyot niini nga mga pulong nganha kanimo mahitungod sa pagtudlo sa ebanghelyo nganha sa imong pamilya?

Si Kristo sa Iyang Pula nga Kopo [Christ in His Red Robe], ni Minerva Teichert