Joseph Smith nagtudlo didto sa Nauvoo

Joseph Smith didto sa Nauvoo, 1840, ni Theodore Gorka

Nobyembre 8–14

Doktrina ug mga Pakigsaad 129–132

“Kon Kita Makadawat og Bisan Unsa nga Panalangin gikan sa Dios, Kini Pinaagi sa Pagkamasulundon”

Mga seksyon 129–32 nagtudlo og daghang bililhon nga mga baruganan, pipila lamang ang gihatagan og atensyon dinhi niini nga latid. Unsa ang uban nga mga kamatuoran ang imong nakaplagan?

I-rekord ang Imong mga Pagbati

Makausa si Brigham Young misulti kabahin ni Joseph Smith, “Mahimo niya nga mapasabut ang mga butang sa kalangitan aron masabtan sa mga hinay og panabut” (sa Mga Pagtulun-an sa mga Presidente sa Simbahan: Joseph Smith, 605). Kini ilabi na ka tinuod kabahin sa mga pagtudlo sa Propeta didto sa Nauvoo sa mga 1840, mga pipila narekord diha sa Doktrina ug mga Pakigsaad 129–32. Sama sa unsa ang Manluluwas? “Siya usa ka tawo sama sa atong kaugalingon.” Sama sa unsa ang langit? “Kana nga samang panag-uban nga ania kanato dinhi maanaa kanato didto” (Doktrina ug mga Pakigsaad 130:1–2), ug ang atong labing minahal nga mga relasyon sa pamilya niini nga kalibutan, kon gibugkos pinaagi sa husto nga awtoridad, “may kapuslanan” didto sa sunod nga kalibutan (Doktrina ug mga Pakigsaad 132:19). Mga kamatuoran sama niini makahimo og pagbati nga ang langit dili layo––mahimayaon, apan makab-ut.

Apan, usahay ang Dios mahimong mosugo kanato sa pagbuhat og mga butang nga hilabihan sa kalisud nga kini ingon og dili mabuhat. Alang sa daghan nga unang mga Santos, ang dinaghang kaminyoon usa sa ingon nga sugo. Ang sugo sa pagpangasawa og dugang usa ka bug-at nga pagsulay sa hugot nga pagtuo alang ni Joseph Smith, sa iyang asawa nga si Emma, ug sa hapit tanan kinsa nakadawat niini. Aron makalampos niini nga pagsulay, gikinahanglan pa nila dili lamang ang positibo nga mga pagbati mahitungod sa gipahiuli nga ebanghelyo; ilang gikinahanglan ang hugot nga pagtuo diha sa Dios nga mas lig-on kay sa bisan unsang personal nga mga tinguha o mga impluwensya. Ang sugo wala na himoa karon, apan ang matinud-anong panig-ingnan niadtong kinsa misunod niini kini sa gihapon nagpadayon. Ug kana nga panig-ingnan nagdasig kanato kon kita suguon sa paghimo sa atong kaugalingong “mga sakripisyo diha sa pagsunod” (Doktrina ug mga Pakigsaad 132:50).

icon sa personal nga pagtuon

Mga Ideya alang sa Personal nga Pagtuon sa Kasulatan

Doktrina ug mga Pakigsaad 130–31

Mipadayag si Joseph Smith og mga kamatuoran mahitungod sa Diosnong Kapangulohan ug “sa kalibutan nga umaabut.”

Tingali imong namatikdan nga ang mga seksyon 130–31 gisulat og lahi kay sa ubang mga seksyon diha sa Doktrina ug mga Pakigsaad. Kini tungod kay ang mga seksyon 130–31 gibase diha sa mubo nga mga sulat nga gisulat ni William Clayton, usa sa mga sekretaryo ni Joseph Smith, sa mga butang nga iyang nadungog nga gitudlo sa Propeta. Agig resulta, kini nga mga seksyon mas sama og mga koleksyon sa mga kamatuoran kay sa naglambigit, gidiktar nga mga pagpadayag. Bisan pa niana, adunay mga ideya nga susama diha sa kadaghanan niini nga mga kamatuoran. Sama pananglit, mahimo nimong mabasa ang mga seksyon 130–131 uban sa mga pangutana sama niini diha sa hunahuna: Unsa ang akong nakat-unan mahitungod sa Dios? Unsa ang akong nakat-unan mahitungod sa kinabuhi human dinhi niini nga kinabuhi? Sa unsa nga paagi kini nga kahibalo nakaapekto sa akong kinabuhi?

Doktrina ug mga Pakigsaad 131:1–4; 132:7, 13–25

Ang Langitnong Amahan mihimo niining posible alang sa mga pamilya nga mahimong mahangturon.

Usa sa labing makahupay nga mga kamatuoran nga gipahiuli pinaagi ni Propeta Joseph Smith mao nga ang kaminyoon ug mga relasyon sa pamilya molungtad sa kahangturan. Pinaagi ni Joseph Smith, gipahiuli sa Ginoo ang mga ordinansa ug awtoridad nga gikinahanglan sa paghimo niini nga mga relasyon nga mahangturon (tan-awa diha sa Doktrina ug mga Pakigsaad 132:7, 18–19). Paghunahuna mahitungod og mga relasyon sa pamilya nga ikaw aduna o naglaum nga makabaton sa umaabut samtang ikaw magbasa diha sa Doktrina ug mga Pakigsaad 131:1–4; 132:7, 13–15. Sa unsa nga paagi kini nga mga bersikulo makaapekto sa paagi nga ikaw maghunahuna mahitungod niini nga mga relasyon?

Usahay, hinoon, ang baruganan sa mahangturon nga mga pamilya dili kaayo makalipay––kini mahimong magdala og kabalaka, gani kaguol, kon ang atong sitwasyon sa pamilya karon dili mohaum sa celestial nga sumbanan. Sa dihang si Presidente Henry B. Eyring naguol mahitungod sa mao nga sitwasyon diha sa iyang kaugalingong pamilya, nadawat niya kining maalamon nga tambag gikan sa usa ka miyembro sa Korum sa Napulog Duha ka mga Apostoles: “Kinahanglan lang nga magpuyo ka takus sa celestial nga gingharian, ug mas monindot pa ang han-ay sa pamilya kay sa imong mahunahuna” (sa “Usa ka Panimalay Diin ang Espiritu sa Ginoo Mopuyo,” Liahona, Mayo 2019, 25). Unsaon kaha nga ang pagsunod niini nga tambag magpanalangin kanimo diha sa imong sitwasyon karon sa pamilya?

usa ka lalaki ug babaye gawas sa Templo sa Accra Ghana

Mga relasyon sa pamilya mahimo nga mahangturon pinaagi sa mga ordinansa sa templo.

Doktrina ug mga Pakigsaad 132:1–2, 29–40

Ang dinaghan nga kaminyoon madawat lamang sa Dios kon Siya nagsugo niini.

Bisan kinsa nga nagbasa sa Daang Tugon tingali nahibulong mahitungod ni Abraham, Isaac, Jacob, Moises, ug uban nga nagminyo og dinaghang mga asawa. Kini ba nga buotang mga lalaki nanaghimo og panapaw? O ang Dios mitugot sa ilang mga buhat? Pangita og mga tubag diha sa Doktrina ug mga Pakigsaad 132:1–2, 29–40.

Ang kaminyoon tali sa usa ka lalaki ug usa ka babaye mao ang sumbanan sa Dios sa kaminyoon (tan-awa ang ulohan sa seksyon sa Opisyal nga Pahayag 1; tan-awa usab diha sa Jacob 2:27, 30). Hinoon, dihay mga yugto sa kasaysayan sa dihang ang Dios mimando sa Iyang mga anak sa pagtuman sa dinaghan nga kaminyoon.

Ang unang mga katuigan sa gipahiuli nga Simbahan mao ang usa niadtong mga yugto nga walay labut [exception]. Human madawat kini nga sugo, si Joseph Smith ug ang ubang mga Santos sa Ulahing mga Adlaw mituman sa dinaghang kaminyoon. Kon ikaw gusto nga makakat-on pa og dugang mahitungod sa dinaghang kaminyoon sa mga Santos sa Ulahing mga Adlaw, tan-awa ang “Mga Tingog sa Pagpahiuli” sa katapusan niini nga latid.(Mga Santos, 1:327–29, 493–97, 548–60, 571–4).

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Family Home Evening

Doktrina ug mga Pakigsaad 130:2, 18–19; 132:13, 19.Unsaon kaha nimo paggamit niini nga mga bersikulo sa pagtabang sa imong pamilya nga unahon ang mga butang nga molungtad sa kahangturan? Tingali makabutang ka sa usa ka maleta o backpack og mga butang nga nagrepresentar sa mga butang nga, sumala sa Doktrina ug mga Pakigsaad 130:2, 18–19; 132:19, atong madala ngadto sa sunod nga kinabuhi, sama sa mga litrato sa mga pamilya o mga kasulatan. Unsa ang gitudlo kanato sa Doktrina ug mga Pakigsaad 132:13 mahitungod sa mga butang sa kalibutan? Kini makagiya og panaghisgutan mahitungod sa paghatag og gibug-aton sa mga butang nga adunay mahangturong kahulugan.

Doktrina ug mga Pakigsaad 130:20–21.Makahimo kamo sa pag-awit mahitungod sa pasalamat, sama sa “Ipha ang Inyong Panalangin” (Mga Himno, nu. 148), ug paghimo og lista sa mga panalangin nga nadawat sa imong pamilya tungod sa pagsunod sa mga balaod sa Dios. Unsa nga mga panalangin nga kita naglaum nga madawat? Unsaon nato sa pagkadawat niadto nga mga panalangin?

Doktrina ug mga Pakigsaad 131:1–4; 132:15–19. Unsa ang gibati sa Ginoo mahitungod sa kaminyoon? Unsaon nato––minyo ka o walay bana o asawa––pagpangandam sa pagbaton og mahangturong kaminyoon?

Alang sa dugang nga mga ideya sa pagtudlo sa mga bata, tan-awa sa latid [outline] karon nga semana sa Dali, Sunod Kanako—Alang sa Primary.

Kantaha og dungan ang: “Mga Pamilya Mahimong Manag-uban sa Kahangturan,” Songbook sa mga Bata, 98.

Pagpalambo sa Personal nga Pagtuon

Pangita og mga kamatuoran sa ebanghelyo. Usahay ang mga kamatuoran sa ebanghelyo direkta nga gipahayag; ug sa ubang mga higayon kini gipasabut pinaagi sa ehemplo o istorya. Samtang magbasa ka, pangutan-a ang imong kaugalingon, “Unsa nga mahangturong kamatuoran ang gitudlo dinhi niini nga mga bersikulo?”

sealing nga lawak sa Templo sa Paris France

Ang sealing nga lawak sa Templo sa Paris France.