gawas nga dagway sa Bilanggoan sa Carthage

Bilanggoan sa Carthage

Nobyembre 22–28

Doktrina ug mga Pakigsaad 135–136

Siya “Nakasilyo sa Iyang Misyon ug sa Iyang mga Buhat uban sa Iyang Kaugalingon nga Dugo”

Samtang ikaw nagtuon diha sa Doktrina ug mga Pakigsaad 135–36, ang Ginoo mahimong moaghat kanimo og mga panabut aron sa pagtabang kanimo sa paggamit unsay imong nabasa. Kon kana mahitabo, isulat unsay Iyang gitudlo kanimo.

I-rekord ang Imong mga Pagbati

Sa hapon sa Hunyo 27, 1844, nakita si Joseph ug Hyrum Smith nga nasulod na usab sa bilanggoan, kauban ni John Taylor ug Willard Richards. Sila nagtuo nga sila walay sala sa bisan unsa nga krimen, apan sila miuyon nga dakpon, naglaum nga mapugnan ang kagubot batok sa mga Santos sa Nauvoo. Kini dili ang unang higayon nga ang mga kaaway sa Simbahan nagpabilanggo ni Propeta Joseph, apan niini nga panahon siya ingon og nakahibalo nga siya dili makapauli nga buhi. Siya ug ang iyang mga higala naninguha sa paghupay sa usag usa pinaagi sa pagbasa gikan sa Basahon ni Mormon ug nag-awit og mga himno. Mga buto sa pusil nadungog, ug sulod sa pipila ka mga minuto ang mortal nga mga kinabuhi ni Joseph Smith ug iyang igsoon nga si Hyrum natapos.

Ug gani kini dili ang katapusan sa balaang kawsa nga ilang gidawat. Ug kini dili ang katapusan sa Pagpahiuli sa ebanghelyo ni Jesukristo. Aduna pay daghang buhat nga pagahimoon ug dugang pa nga pagpadayag nga mogiya sa Simbahan nga magpadayon. Ang pagpatay sa Propeta dili makapatay sa buhat sa Dios.

Tan-awa sa Mga Santos, 1:592–626.

icon sa personal nga pagtuon

Mga Ideya alang sa Personal nga Pagtuon sa Kasulatan

Doktrina ug mga Pakigsaad 135; 136:37–39

Gisilyohan ni Joseph ug Hyrum Smith ang ilang mga pagpamatuod uban sa ilang dugo.

Hunahunaa unsa kaha ang imong bation kon ikaw nagpuyo pa sa Nauvoo sa dihang si Joseph ug Hyrum Smith gipatay (tan-awa sa Mga Santos, 1:629–30). Unsaon kaha nimo pagsulay sa pagpangita og kahulugan kabahin niining makalilisang nga hitabo? Ang Doktrina ug mga Pakigsaad 135, orihinal nga namantala wala pay tulo ka bulan human sa pagkamartir [martyrdom], tingali unta makatabang. Mahimo nimong markahan ang mga pulong ug mga hugpong sa mga pulong nga unta mohatag kanimo og pagsabut ug kahupayan. Unsa ang imong isulti ngadto sa usa ka tawo kinsa mangutana, “Ngano nga mitugot ang Dios nga patyon ang Iyang Propeta?”

Tan-awa usab diha sa Doktrina ug mga Pakigsaad 5:21–22; 6:29–30; Mga Pagtulun-an sa mga Presidente sa Simbahan: Joseph Smith, 633–34, 641–653.

Doktrina ug mga Pakigsaad 135:3

Si Joseph Smith nakahimo og daghan pa alang sa kaluwasan kay ni bisan kinsa gawas ni Jesukristo.

Paghunahuna mahitungod sa mga panalangin nga miabut diha kanimo isip miyembro sa Simbahan ni Jesukristo. Pila niini mga resulta sa misyon nga natuman ni Propeta Joseph Smith? Doktrina ug mga Pakigsaad 135:3 naghingalan sa pipila ka dagkong mga butang nga natuman ni Joseph Smith sa 24 ka mga tuig human sa Unang Panan-awon. Sa unsa nga paagi kini nga mga butang nakaapekto kanimo ug sa imong relasyon ngadto sa Langitnong Amahan ug ni Jesukristo? Hunahunaa ang pagrekord sa imong pagpamatuod kabahin ni Propeta Joseph Smith. Kinsa kaha ang nagkinahanglang makadungog sa imong pagpamatuod?

Doktrina ug mga Pakigsaad 136

Ang Ginoo mihatag kanako og tambag alang sa akong “mga pagpanaw” sa kinabuhi.

Human gipugos sa pagbiya gikan sa Nauvoo, giatubang sa mga Santos ang layo nga panaw ngadto sa Walog sa Salt Lake, ug ang unang pipila ka mga kilometro hinay ug makalolooy. Si Brigham Young, kinsa karon naggiya sa Simbahan isip Presidente sa Korum sa Napulog Duha ka mga Apostoles, naguol mahitungod kon unsaon sa mga Santos nga molungtad sa gidugayon sa panaw. Mipahimutang siya og temporaryong pamuy-anan nga gitawag og Winter Quarters ug nangamuyo alang sa paggiya. Agi og tubag, mihatag kaniya ang Ginoo og usa ka pagpadayag, karon ang seksyon 136. Dugang sa ubang mga butang, kini nga pagpadayag nagpahinumdom sa mga Santos “nga ang ilang kinaiya diha sa panaw importante sama sa ilang padulngan” ug “nagtabang sa pag-usab sa kasadpang paglangyaw gikan sa makaluluoy nga panginahanglan ngadto sa importanting pakigbahin sa espiritwal nga kasinatian”.

Ibutang kining kinatibuk-ang kahulugan [context] diha sa hunahuna samtang ikaw magtuon sa seksyon 136. Unsa nga tambag ang imong makaplagan nga makatabang sa pag-usab sa usa ka malisud nga pagsulay diha sa imong kinabuhi “ngadto sa usa ka importanting … espiritwal nga kasinatian”? Mahimo usab ikaw nga magpamalandong kon giunsa sa tambag pagtabang kanimo sa pagtuman sa kabubut-on sa Ginoo diha sa imong kinabuhi, ingon nga kini mitabang sa unang mga Santos sa malisud nga panaw ngadto sa Kasadpan.

Winter Quarters

Winter Quarters, ni Greg Olsen

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Family Home Evening

Doktrina ug mga Pakigsaad 135:1, 3.Sa pagtabang sa mga sakop sa pamilya pagsabut unsay kahulugan nga si Joseph Smith “misilyo sa iyang misyon ug sa iyang mga buhat uban sa iyang kaugalingon nga dugo,” ang imong pamilya makatan-aw sa video “Pagpamatuod sa Basahon ni Mormon” (ChurchofJesusChrist.org; tan-awa usab sa Jeffrey R. Holland, “Kasiguroan alang sa Kalag,” Liahona, Nob. 2009, 88–90). Unsa ang nakapadani kanato mahitungod niini nga mga bersikulo? Unsaon pa nato nga mas matinud-anon sa atong mga pagpamatuod, bisan og kita wala hangyoa sa paghatag sa atong mga kinabuhi alang kanila?

Doktrina ug mga Pakigsaad 135:3.Sa paghisgot unsay kahulugan sa pahayag nga si Joseph Smith nakahimo og “daghan pa, gawas lamang kang Jesus, alang sa kaluwasan sa mga tawo niini nga kalibutan, kay ni bisan kinsa nga tawo,” hunahunaa ang pagribyu unsay nakat-unan sa inyong pamilya mahitungod ni Joseph Smith niini nga tuig. Makagamit ka og mga hulagway gikan niini nga mga kapanguhaan sa pagtabang kanila sa paghinumdom unsay ilang nakat-unan ug dapita sila sa pagpakigbahin og paborito nga mga istorya o mga pagtulun-an. Nganong kita mapasalamaton alang ni Propeta Joseph Smith ug alang sa unsay natuman sa Ginoo pinaagi kaniya? Makatan-aw ka usab sa video “Joseph Smith: Ang Propeta sa Pagpahiuli” (ChurchofJesusChrist.org).

Doktrina ug mga Pakigsaad 136.Sa dihang ang Ginoo mipadayag sa seksyon 136, ang mga Santos dihay layo, lisud nga panaw nga ilang giatubang, ubos sa pagpangulo ni Brigham Young. Samtang kamo magbasa sa seksyon 136 og dungan, paghunahuna mahitungod sa lisud nga mga butang nga mahimong atubangon sa imong pamilya. Unsa nga tambag ang atong makita dinhi niini nga pagpadayag nga makatabang kanato sa pagbaton sa tabang ug gahum sa Ginoo?

Doktrina ug mga Pakigsaad 136:4.Unsay kahulugan sa “kita maglakaw diha sa tanan nga mga ordinansa sa Ginoo”? Sa unsang paagi nga ang mga ordinansa nga atong nadawat nakaapekto sa atong mga kinabuhi?

Alang sa dugang nga mga ideya sa pagtudlo sa mga bata, tan-awa sa latid [outline] karon nga semana sa Dali, Sunod Kanako—Alang sa Primary.

Gisugyot nga awit: “Pagdayeg sa Tawo,” Mga Himno, nu. 180.

Pagpalambo sa Personal nga Pagtuon

Pangitaa ang gugma sa Dios. Si Presidente M. Russell Ballard mitudlo, “[Ang] ebanghelyo mao ang ebanghelyo sa gugma—gugma alang sa Dios ug gugma alang sa usag usa” (“God’s Love for His Children,” Ensign, Mayo 1988, 59). Samtang ikaw magbasa sa mga kasulatan, hunahunaa ang paghinumdom o pagmarka sa mga ebidensya sa gugma sa Dios.

manggugubot sa Bilanggoan sa Carthage nag-atake ni Joseph Smith ug sa uban

Walay Bisan Kinsa nga may Gugma nga Labaw pa Niini [Greater Love Hath No Man], ni Casey Childs