Ang Nindot nga Nauvoo, ni Larry Winborg

Oktubre 25–31

Doktrina ug mga Pakigsaad 124–125

“Usa ka Balay ngadto sa Akong Ngalan”

Samtang ikaw nagbasa diha sa Doktrina ug mga Pakigsaad 124–25, pamalandonga ang mga panalangin nga ang Ginoo midapit sa mga Santos sa Nauvoo sa pagdawat ug ang mga panalangin nga Siya nagtanyag kanimo.

I-rekord ang Imong mga Pagbati

Ingon kalisud ang katapusang unom ka mga tuig alang sa mga Santos, ang mga butang misugod sa pagkamaayo diha sa tingpamulak sa 1839: Ang mga lalin [refugee] nga mga Santos nakakaplag og kalooy taliwala sa mga lumulupyo sa Quincy, Illinois. Ang mga gwardya mitugot ni Propeta Joseph Smith sa pag-eskapo sa pagkabinihag sa Missouri. Ug ang Simbahan bag-ohay lamang nga nakapalit og yuta sa Illinois diin ang mga Santos makapundok pag-usab. Bisan tuod, kini lapukon, lamokon nga yuta, apan kon itandi ngadto sa mga hagit nga naatubang na sa mga Santos, kini tingali ingon og madumala. Busa ilang gipauga ang lapok ug misulat og usa ka titulo sa katukuran alang sa usa ka bag-ong siyudad, nga ilang ginganlan og Nauvoo. Kini nagpasabut og “nindot” sa Hebreo, bisan og kini mas usa ka pahayag sa hugot nga pagtuo kay sa tukma nga paghulagway, sa una lamang. Sa maong panahon, ang Ginoo naghatag sa Iyang Propeta og pagbati sa paglihok nga walay paglangan. Siya adunay daghang mga kamatuoran ug mga ordinansa nga ipahiuli, ug nagkinahanglan Siya og usa ka balaang templo diin ang mga Santos makadawat niini. Sa daghang mga paagi, kining sama nga mga pagbati sa hugot nga pagtuo ug pagkadinalian mga importante diha sa buhat sa Ginoo karon.

Samtang ang Nauvoo nahimong usa ka nindot nga siyudad nga adunay nindot nga templo, sa kadugayan ang duha gibiyaan. Apan ang tinuod nga nindot nga buhat sa Ginoo, sa tanang panahon, mao sa kanunay nga “mokorona kaninyo sa dungog, sa walay kamatayon, ug kinabuhi nga dayon” (Doktrina ug mga Pakigsaad 124:55), ug kana nga buhat dili gayud matapos.

Tan-awa sa Saints, 1:399–427; “Organizing the Church in Nauvoo,” Revelations in Context, 264–71.

Mga Ideya alang sa Personal nga Pagtuon sa Kasulatan

Doktrina ug mga Pakigsaad 124:12–21

Ako mahimong usa ka disipulo kinsa kasaligan sa Ginoo.

Bisan og daghang inila nga mga lider ang mibiya sa Simbahan sa hinapos sa 1830, ang labing daghan sa mga miyembro mipabilin nga matinud-anon. Kining matinud-anong mga Santos naglakip niadtong kinsa milahutay sa mga pagsulay sa Missouri ingon man niadtong kinsa bag-ohay nga mipasakop sa Simbahan. Diha sa Doktrina ug mga Pakigsaad 124:12–21, ang Ginoo maayo kaayo og mga pulong sa pipila kanila. Unsa nga mga panabut mahitungod sa pagkadisipulo ang imong nakaplagan diha sa Iyang mga pulong? Aduna bay usa ka butang mahitungod niining matinud-anon nga mga Santos nga nagdasig Kanimo nga magpakasama kanila? Mahimo usab tingali nga mamalandong ka kon giunsa sa Ginoo pagpahayag ang Iyang gugma alang kanimo.

Doktrina ug mga Pakigsaad 124:22–24, 60–61

Gusto sa Ginoo kanako nga moabiabi ug modawat sa uban.

Naghunahuna unsay bag-ohay lamang nga giantus sa mga Santos sa Missouri, tingali sila unta matintal sa pagbulag sa ilang mga kaugalingon ug sa pagpugong og mga bisita sa Nauvoo. Ibutang kana sa imong hunahuna samtang ikaw nagbasa diha sa Doktrina ug mga Pakigsaad 124:22-24, 60–61. Unsa ang nakapadani kanimo mahitungod sa mga panudlo sa Ginoo sa pagtukod og usa ka “balay nga sak-anan”? (bersikulo 23). Unsa ang gitudlo sa Iyang mga pulong kanimo mahitungod sa misyon sa Iyang Simbahan? Pamalandonga kon giunsa niini nga mga panudlo paghimong magamit nganha kanimo ug sa imong panimalay.

Doktrina ug mga Pakigsaad 124:25–45, 55

Ang Ginoo nagsugo kanato sa pagtukod og mga templo aron makadawat kita og sagradong mga ordinansa.

Sa tinuod kini miabut nga dili sorpresa sa mga Santos sa Ulahing mga Adlaw nga sa makausa nanimuyo sa Nauvoo, ang Ginoo mihatag kanila og mga panudlo mahitungod sa pagtukod og usa ka templo––ingon usab nga Siya aduna didto sa Ohio ug Missouri. Unsa ang imong nakaplagan diha sa Doktrina ug mga Pakigsaad 124:25–45, 55 nga nagtabang kanimo sa pagsabut kon ngano ang Ginoo miingon, “Ang Akong mga katawhan gisugo sa kanunay sa pagtukod [mga templo] ngadto sa akong balaan nga ngalan”? (bersikulo 39).

Sukad ang Templo sa Nauvoo natukod, labaw sa 200 ka mga templo ang natukod o naanunsyo. Si Presidente Russell M. Nelson mitudlo: “Nahibalo kita nga ang atong panahon diha sa templo importante kaayo sa atong kaluwasan ug kahimayaan ug ngadto sa atong mga pamilya. … Ang mga pagpang-atake sa kaaway paspas kaayo, sa gikusgon ug sa matang. Ang atong panginahanglan nga maanaa sa templo kanunay wala pa sukad nga mas labaw nga gikinahanglan” (“Ang Mahimong Labing Dalaygon nga mga Santos sa Ulahing mga Adlaw,” Liahona, Nob. 2018, 113–114). Giunsa sa templo pagtabang kanimo sa pagsagubang sa “mga pagpang-atake sa kaaway”? Unsa ang imong gibati nga nadani sa paghimo aron sa pagsunod sa tambag ni Presidente Nelson?

Joseph Smith sa Templo sa Nauvoo, ni Gary E. Smith

Doktrina ug mga Pakigsaad 124:84–118

Ang Ginoo nagtinguha sa paghatag kanako og piho nga tambag alang sa akong kinabuhi.

Mga bersikulo 84–118 napuno sa tambag alang sa piho nga mga indibidwal, ug ang pipila niini tingali dili magamit sa imong kinabuhi. Apan makakaplag ka usab ug usa ka butang nga kinahanglan imong paminawon. Hunahunaa ang pagpangutana sa Ginoo unsay mensahe Niya kanimo niini nga mga bersikulo, ug paninguhaa ang paggiya sa Espiritu sa papangita niini. Dayon hukmi kon unsay imong buhaton aron sa paglihok niini. Sama pananglit, unsaon kaha nga ang mas magpaubos makatabang kanimo sa pagdawat sa Espiritu? (tan-awa sa bersikulo 97).

Mahimo usab ikaw nga mamalandong sa ubang tambag nga gihatag sa Ginoo kanimo. Giunsa nimo kana paglihok?

Mga Ideya alang sa Pamilya nga Pagtuon sa Kasulatan ug Family Home Evening

Doktrina ug mga Pakigsaad 124:2–11.Kon ang Ginoo misulti sa imong pamilya “sa paghimo og usa ka maligdong nga pamahayag sa akong ebanghelyo” ngadto “sa mga hari sa kalibutan” (mga bersikulo 2–3), unsay isulti sa imong pamahayag? Paghunahuna sa paghimo og usa nga magdungan, ug dapita ang mga sakop sa pamilya sa pagsugyot og mga kamatuoran sa ebanghelyo nga gusto nilang i-apil.

Doktrina ug mga Pakigsaad 124:15.Unsay buot ipasabut sa pagbaton og kaligdong? Ngano nga bililhon sa Ginoo ang kaligdong? Unsa nga mga ehemplo sa kaligdong ang nakita sa inyong pamilya? (Tan-awa usab sa Alang sa Kalig-on sa mga Kabatan-onan, 19.)

Doktrina ug mga Pakigsaad 124:28–29, 40–41, 55.Unsa ang atong makat-unan gikan niini nga mga bersikulo mahitungod kon nganong gisugo kita sa Ginoo sa pagtukod og mga templo? Ang imong pamilya tingali gustong magdrowing og usa ka hulagway sa templo o magtukod og usa gikan sa mga block o ubang mga materyal. Samtang kamo nagbuhat, makahisgot ka kon nganong ikaw mapasalamaton nga kita adunay mga templo karon ug nganong kita kinahanglang mosimba niini sa kanunay.

Doktrina ug mga Pakigsaad 124:91–92.Ang imong pamilya ba makabenipisyo gikan sa usa ka paghisgot mahitungod sa patriyarkal nga mga panalangin? Ang mga sakop sa pamilya kinsa nakadawat sa ilang patriyarkal nga panalangin mahimong makigbahin kon sama sa unsa ang pagdawat niini ug sa unsa nga paagi kini mipanalangin kanila.

Alang sa dugang nga mga ideya sa pagtudlo sa mga bata, tan-awa sa latid [outline] karon nga semana sa Dali, Sunod Kanako—Alang sa Primary.

Gisugyot nga awit: “Gusto ko nga Makita ang Templo,” Songbook sa mga Bata, 99.

Mga Tingog sa Pagpahiuli

Ang Relief Society

Dibuho sa Relief Society nga organisasyon ni Paul Mann

Kaniadtong 1842, human na-organisar ang Relief Society didto sa Nauvoo, Illinois, si Propeta Joseph Smith miingon, “Ang Simbahan wala gayud ma-organisar sa hingpit hangtud ang mga kababayen-an na-organisar.”¹ Sama usab, usa ka pagtuon sa Pagpahiuli sa Simbahan sa Ginoo ug sa Iyang pagkapari (tan-awa sa Doktrina ug mga Pakigsaad 107) dili kompleto hangtud kini naglakip sa usa ka pagtuon sa Relief Society, nga sa kaugalingon “usa ka pagpahiuli sa karaang sumbanan” sa babaye nga mga disipulo ni Jesukristo.²

Si Eliza R. Snow may importante nga tahas diha niana nga pagpahiuli. Diha siya sa panahon nga ang Relief Society unang na-organisar ug, isip ang sekretarya sa kapunongan, naghimo og mugbo nga mga sulat atol sa mga miting. Siya nakasaksi gayud nga ang Relief Society na-organisar “subay sa sumbanan sa pagkapari.”³ Sa ubos mao ang iyang mga pulong, gisulat samtang siya nagserbisyo isip ang Kinatibuk-ang Presidente sa Relief Society, sa pagtabang sa iyang mga sister sa pagsabut sa balaang buhat nga gisalig ngadto sa anak nga mga babaye sa pakigsaad sa Dios.

Aron makakat-on pa mahitungod kon giunsa pag-organisar ang Relief Society, tan-awa sa Anak nga mga Babaye sa Akong Gingharian: Ang Kasaysayan ug Buhat sa Relief Society (2017), 3–28.

Eliza R. Snow

“Bisan og ang ngalan [Relief Society] tingali moderno, ang institusyon naggikan sa karaan. Gisultihan kami ni [Joseph Smith], nga ang sama nga organisasyon diha sa simbahan sa karaan, mga palakbit ngadto sa mga gihimo diha sa pipila ka mga sulat [epistles] nga girekord diha sa Bag-ong Tugon, naggamit sa ulohan, ‘pinili nga senyora’ [tan-awa sa 2 Juan 1:1; Doktrina ug mga Pakigsaad 25:3].

“Kini usa ka organisasyon nga dili matukod kon wala ang Pagkapari, tungod sa kamatuoran nga kini nagdawat sa tanan niining awtoridad ug impluwensya gikan niana nga tinubdan. Sa dihang ang Pagkapari gidala ngadto sa langit, kini nga institusyon ingon man sa tanang sumpay sa tinuod nga kapunongan sa simbahan ni Jesukristo dinhi sa yuta, nahimong nawala. …

“Ingon nga nakatambong sa pag-organisar sa ‘Kababayen-an nga Relief Society sa Nauvoo,’ … ug usab nakabaton og igo nga kasinatian niana nga kapunongan, tingali ako makahatag og pipila ka mga ideya nga motabang sa mga anak nga babaye sa Zion sa pagpasakop niining importante kaayong posisyon, nga puno sa bag-o ug daghang mga responsibilidad. Kon adunay anak nga mga babaye ug mga inahan sa Israel nga mibati nga dili maka-impluwensya diha sa ilang sitwasyon karon, sila karon makakita og dagkong mga oportunidad sa paggamit sa mga kasarang nga sila adunay daghan niini. …

Na-organisar ang Relief Society sa taas nga lawak sa Red Brick nga Tindahan.

“Kon adunay mangutana, sa bisan unsa, Unsa ang tumong sa Relief Society sa mga Babaye? Akong tubagon––aron sa paghimo og kaayohan–sa pagdala nga magamit ang matag kapasidad nga kita aduna alang sa pagbuhat og maayo, dili lamang sa paghupay sa kabus apan sa pagluwas og mga kalag. Ang nagkahiusang paningkamot makatuman og labaw sa dili makalkulo nga matuman pinaagi sa labing epektibo nga indibidwal nga mga paningkamot. …

“Sa pagdumala sa kabus, ang Relief Society sa mga Babaye adunay ubang mga katungdanan nga buhaton kay sa paghupay lamang sa mga panginahanglan sa pisikal nga lawas. Ang kakabus sa hunahuna ug ang sakit sa kasingkasing, usab nagkinahanglan og pagtagad; ug sa daghang mga higayon usa ka matang sa pagpahayag––og pipila ka mga pulong sa pagtambag, o gani mainiton ug mabinationg lamano mohimo og dako kaayo nga kaayohan ug mas mapasalamatan kay sa puntil sa bulawan. …

“Kon ang mga Santos magpundok sa lagyong mga dapit, estranghero ngadto sa tanan, ug may purohan nga mahisalaag pinaagi niadtong kinsa naghulat sa paglingla, ang [Relief] Society kinahanglan nga abtik sa pagbantay [kanila], ug ipailaila sila ngadto sa kapunongan nga mopalambo ug mobayaw, ug labaw sa tanan molig-on kanila diha sa hugot nga pagtuo sa Ebanghelyo, ug sa pagbuhat sa mao, mahimong himan sa pagluwas og daghan.

“Kini nagkinahanglan og daghang mga basahon nga motin-aw sa mga katungdanan, mga pribilehiyo ug mga responsibilidad nga kauban sa mga responsibilidad sa Society. … Buhata ang buluhaton (ubos sa direksyon sa imong bishop) sa paagi nga malinawon, tinuyo, maabtik, panaghiusa ug mainampuon, ug ang Dios mopanalangin sa imong mga kahago og kalampusan.”⁴

Mubo nga mga Sulat

1. Mga Pagtulun-an sa mga Presidente sa Simbahan: Joseph Smith (2007), 546.

2. Anak nga mga Babaye sa Akong Gingharian: Ang Kasaysayan ug Buhat sa Relief Society (2017), 3.

3. Joseph Smith, sa Sarah M. Kimball, “Auto-biography,” Woman’s Exponent, Sept. 1, 1883, 51.

4. “Female Relief Society,” Deseret News, Abr. 22, 1868, 81.

Ang Templo sa Nauvoo ni George D. Durrant