Far West

Layong Kasadpan [Far West], ni Al Rounds

Oktubre 11–17

Doktrina ug mga Pakigsaad 115–120

“Ang Iyang Pagsakripisyo Mahimo nga Labaw Pa nga Sagrado ngari Kanako Kay sa Iyang Paglambo”

Ang Dios gusto nga makigsulti kanimo. Samtang ikaw magtuon sa mga kasulatan, pag-ampo ug hangyoa Siya sa pagtabang kanimo og diskubre sa Iyang mensahe alang kanimo.

I-rekord ang Imong mga Pagbati

Adunay rason nga ang mga Santos mobati nga malaumon mahitungod sa ilang bag-ong pundokanang lugar, ang Far West, Missouri, kaniadtong Hulyo 1838. Kusog ang pagtubo sa siyudad, ang yuta ingon og tambok, ug kini gipadayag nga dili layo nga distansya ngadto sa amihan anaa ang Adam-ondi-Ahman, usa ka lugar nga may importanting espiritwal nga kahulugan (tan-awa diha sa Doktrina ug mga Pakigsaad 107:53–56; 116). Sa gihapon, kini tingali malisud alang sa mga Santos sa dili paghunahuna mahitungod sa unsay ilang nawala. Sila giabug gikan sa Independence, ang gitudlo nga pundokanang lugar sa Zion, ug ang mga higayon sa pagbalik bisan kanus-a dayon tingali maingon og gamay. Agi og dugang, ang mga Santos kinahanglan nga molayas sa Kirtland, Ohio, magbiya sa ilang minahal nga templo nga duha pa lamang ka tuig sukad kini mahuman. Ug niini nga panahon dili lamang mga kaaway sa gawas sa Simbahan ang naghimo og kasamok—daghan nga inilang mga miyembro nakigbatok ni Joseph Smith, lakip ang Tulo ka mga Saksi sa Basahon ni Mormon ug upat sa mga miyembro sa Napulog Duha. Ang uban tingali nakapangutana, Ang gingharian ba sa Dios tinuod nga nagkalig-on, o kini nagkaluya?

Apan ang matinud-anon wala motugot sa mga pangutana nga sama niini nga mopahunong kanila. Hinoon, misugod sila sa pagtukod og usa ka bag-ong balaan nga lugar, niini nga higayon didto sa Far West. Mihimo sila og mga plano alang sa usa ka bag-ong templo. Upat ka bag-ong mga Apostoles gitawag, lakip ang duha––John Taylor ug Wilford Woodruff––kinsa sa wala madugay nahimong mga Presidente sa Simbahan (tan-awa diha sa Doktrina ug mga Pakigsaad 118:6). Nakat-unan sa mga Santos nga ang paghimo sa buhat sa Dios wala magpasabut nga ikaw dili gayud mahagbong; kini nagpasabut nga ikaw “mobangon pag-usab.” Ug bisan tuod imong talikdan ang ubang mga butang, kadto nga mga sakripisyo mahimo nga sagrado ngadto sa Dios, gani “mas sagrado pa … kay sa [imong] paglambo” (Doktrina ug mga pakigsaad 117:13).

Tan-awa sa Mga Santos, 1:334–37; “Far West ug Adam-ondi-Ahman,”.

icon sa personal nga pagtuon

Mga Ideya alang sa Personal nga Pagtuon sa Kasulatan

Doktrina ug mga Pakigsaad 115:4–6

Ang ngalan sa Simbahan hinatag sa Ginoo.

Miingon si Presidente Russell M. Nelson nga ang ngalan sa Simbahan “usa ka butang nga importante kaayo” (“Ang Sakto nga Ngalan sa Simbahan,” Liahona, Nob. 2018, 87). Paghunahuna mahitungod kon nganong kini tinuod samtang ikaw magbasa diha sa Doktrina ug mga Pakigsaad 115:4–6. Unsay labut sa ngalan sa Simbahan sa mga buhat ug misyon niini?

Tan-awa usab sa 3 Nephi 27:1–11.

Doktrina ug mga Pakigsaad 115:5–6

Ang Zion ug ang mga stake niini nagtanyag og “dangpanan gikan sa unos.”

Bisan pa sa mga kalisdanan nga giatubang sa mga Santos kaniadtong 1838, ang Ginoo sa gihapon adunay taas nga mga gipaabut diha kanila. Pangita og mga pulong diha sa Doktrina ug mga Pakigsaad 115:5–6 nga naghatag og gibug-aton sa tahas nga gusto sa Ginoo sa Iyang Simbahan ug sa mga miyembro niini nga tumanon dinhi sa kalibutan. Sama pananglit, unsa ang imong gibati nga kinahanglan nimong buhaton aron sa “[pag]tindog ug [i]pakita ang kahayag”? (bersikulo 5). Unsa nga espiritwal nga mga unos ang imong namatikdang libut kanimo, ug sa unsang paagi kita makakaplag og “dangpanan” pinaagi sa panagpundok? (bersikulo 6).

Tan-awa usab diha sa 3 Nephi 18:24.

Doktrina ug mga Pakigsaad 117

Ang akong mga sakripisyo sagrado ngadto sa Ginoo.

Ang pagbiya sa Kirtland tingali nahimong ilabi na kalisud alang sa mga tawo sama ni Newel K. Whitney, kinsa nakatukod og mauswagong kinabuhi alang sa iyang pamilya didto. Unsa ang imong nakaplagan diha sa Doktrina ug mga Pakigsaad 117:1–11 nga tingali nakatabang unta kanila sa paghimo niini nga sakripisyo? Sa unsa nga paagi kini nga mga bersikulo nag-usab sa imong panan-aw kabahin sa unsa gyud ang importante?

Ang sakripisyo nga gipangayo ngadto ni Oliver Granger lahi: ang Ginoo misugo kaniya sa pagpabilin sa Kirtland ug sa paghusay sa mga panalapi sa Simbahan. Usa kini ka malisud nga buluhaton, ug samtang nagrepresentar siya sa Simbahan uban ang integridad, siya sa katapusan wala makakuhag balik og daghang kwarta. Hunahunaa kon unsaon nga ang mga pulong sa Ginoo diha sa mga bersikulo 12–15 mahimong magamit ngadto sa mga butang nga gihangyo sa Ginoo kanimo.

Tan-awa usab diha sa Mateo 6:25–33; Boyd K. Packer, “Ang Labing Gamay Niini,” Liahona, Nob. 2004, 86–88; “Far West ug Adam-ondi-Ahman”.

Adan-ondi-Ahman sa Daviess Country, Missouri

Si Newel K. Whitney gimandoan sa pagbalhin ngadto sa Adam-ondi-Ahman, gipakita dinhi.

Doktrina ug mga Pakigsaad 119–20

Pinaagi sa pagbayad og ikapulo, nagtabang ako nga itukod ug “ibalaan ang yuta sa Zion.”

Ang mga panudlo diha sa mga seksyon 119 ug 120 ingon og susama sa paagi nga ang buhat sa Ginoo gigastuhan sa atong panahon. Karon, ang mga Santos mobayad sa “ikanapulo sa ilang tanan nga mga tubo [karon nasabtan isip kinitaan] sa matag tuig” (Doktrina ug mga Pakigsaad 119:4), ug kini nga mga pundo gidumala sa usa ka konseho nga naglangkub sa Unang Kapangulohan, Korum sa Napulog Duha ug sa Tigdumalang Bishopric. Hunahunaa ang mosunod nga mga pangutana samtang ikaw nagtuon niini nga mga seksyon:

• Unsaon sa pagsunod sa balaod sa ikapulo nga “ibalaan ang yuta sa Zion”? Unsaon niini nga balaod pagtabang sa lugar diin ikaw nagpuyo nga “usa ka yuta sa Zion nganha kanimo”? (Doktrina ug mga Pakigsaad 119:6).

• Unsay kahulugan nganha kanimo mahitungod sa “pinaagi sa akong kaugalingon nga tingog ngadto kanila” diha sa Doktrina ug mga Pakigsaad 120?

Tan-awa usab sa Malaquias 3:8–12; David A. Bednar, “Ang mga Tamboanan sa Langit,” Liahona, Nob. 2013, 17–20; “The Tithing of My People,” Revelations in Context, 250–55.

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Family Home Evening

Doktrina ug mga Pakigsaad 115:4–6.Moangay ba kini sa imong pamilya nga magbasa niini nga mga bersikulo samtang nagtan-aw sa pagsidlak sa adlaw? Mahimo kining motabang kanimo sa paghisgot unsay kahulugan niining “tindog ug pakita sa kahayag” (bersikulo 5). O mahimo usab ka nga maghisgot kon sama kini sa unsa ang pagpangita og dangpanan atol sa unos. Unsaon niana nga kasinatian nga mahisama sa pagpangita og “dangpanan” diha sa Simbahan? (bersikulo 6). Ikaw niana dayon makasulti mahitungod sa mga paagi ang imong pamilya makatabang sa uban sa pagpahimulos sa dangpanan nga gihatag sa Simbahan.

Doktrina ug mga Pakigsaad 117:1–11.Makatandi ang imong pamilya sa usa ka “tu-lo” ngadto sa usa ka butang nga mas “mahinungdanon” (bersikulo 8), sama sa usa ka pitsel nga tubig. Kini makagiya ngadto sa usa ka panaghisgutan mahitungod sa minos ka importante nga mga butang sa atong mga kinabuhi nga mahimong mopugong kanato gikan sa pagdawat sa daghang mga panalangin sa Dios.

Doktrina ug mga Pakigsaad 119.Mahimo mong manganta og awit sama sa “Mohatag G’yud Ko og Tithing” (Liahona, Oktubre 2006, H13). Unsay gitudlo sa kanta ug sa seksyon 119 mahitungod kon nganong kita mobayad og ikapulo? Ang gagmay nga mga bata mahatagan usab og kaayohan sa leksyon nga naggamit og butang: mahatagan nimo sila og gagmay nga mga butang, tabangan og bana-bana sa ikanapulo, ug sultihan sila nganong ikaw nagbayad og ikapulo. (Tan-awa usab sa Matinud-anon sa Tinuhoan, 54–55.)

Alang sa dugang nga mga ideya sa pagtudlo sa mga bata, tan-awa sa latid [outline] karon nga semana sa Dali, Sunod Kanako—Alang sa Primary.

Gisugyot nga awit: “Mohatag G’yud Ko og Tithing,” Liahona, Oktubre 2006, H13.

Pagpalambo sa Atong Pagtudlo

Pag-awhag og Paningkamot sa Kaugalingon. “Kon ang mga [sakop sa panimalay] adunay mga pangutana, usahay mas maayo pa nga tudloan sila unsaon sa pagpangita og mga tubag sa ilang mga kaugalingon kay sa tubagon ang mga pangutana dihadiha dayon” (Pagtudlo sumala sa Pamaagi sa Manluluwas, 28).

mga gamitan sa ikapulo

Ang paghatag sa atong 10 porsyento ngadto sa Ginoo isip ikapulo nagtabang sa pagpauswag pa sa Iyang makaluwas nga buhat.