Joseph Smith nagsangyaw

Oktubre 4–10

Doktrina ug mga Pakigsaad 111–114

“Ako Mohan-ay sa Tanan nga mga Butang alang sa Inyong Kaayoha”

Pangayo sa mainampuong paagi alang sa paggiya sa Espiritu samtang ikaw magbasa sa Doktrina ug mga Pakigsaad 111–14, ug i-rekord ang imong mga pagbati. Dayon hunahunaa ang mga paagi nga ikaw makalihok niadto nga mga pagbati.

I-rekord ang Imong mga Pagbati

Ikaw ba sukad dihay espiritwal nga kasinatian nga mihimo kanimo sa pagbati nga masaligon ug sigurado sa imong hugot nga pagtuo––apan niana ang mga kasakit sa kinabuhi misulay sa imong hugot nga pagtuo, ug nakaplagan nimo ang imong kaugalingon nga nanglimbasug sa pagbawi sa kalinaw nga imong gibati kaniadto? Usa ka butang nga susama nahitabo ngadto sa mga Santos sa Kirtland. Walay usa ka tuig human sa espiritwal nga mga pagbu-bu nga konektado sa pagpahinungod sa Templo sa Kirtland, mga kasamok mitungha. Usa ka pinansyal nga krisis, panagbangi diha sa Korum sa Napulog Duha, ug ubang mga pagsulay nakahimo sa uban sa pagduhaduha sa ilang hugot nga pagtuo.

Dili kita makalikay og mga pagsulay, busa unsaon nato pagpugong niini gikan sa paghulga sa atong hugot nga pagtuo ug pagpamatuod? Tingali bahin sa tubag makaplagan diha sa tambag sa Ginoo diha sa Doktrina ug mga Pakigsaad 112, nga gihatag samtang ang kalisdanan sa Kirtland nagtubo. Ang Ginoo miingon, “Limpyoha ang inyong mga kasingkasing diha sa akong atubangan” (bersikulo 28), “Ayaw pagsukol” (bersikulo 15), “Baksi ang inyong mga bat-ang alang sa buhat” (bersikulo 7), ug “Magpaubos ka” (bersikulo 10). Samtang kita nagsunod niini nga tambag, ang Ginoo “moagak [kanato] pinaagi sa kamot” sa tibuok kalisdanan ug ngadto sa pagkaalim ug kalinaw (tan-awa sa mga bersikulo 10, 13).

icon sa personal nga pagtuon

Mga Ideya alang sa Personal nga Pagtuon sa Kasulatan

Doktrina ug mga Pakigsaad 111

Ang Ginoo “mohan-ay sa tanan nga mga butang alang sa [akong] kaayohan.”

Sa pagka-1836, ang Simbahan nakapundok og dagko nga mga utang sa paghago sa buhat sa Ginoo. Samtang si Joseph Smith ug ang uban naguol mahitungod sa mga utang ug naghunahuna og mga paagi sa pagbayad niini, mibiyahe sila ngadto sa Salem, Massachusetts, tingali tungod kay kini gihungihong nga ang ubang mga kwarta gibiyaan sa usa ka balay didto (tan-awa ang ulohan diha sa Doktrina ug mga Pakigsaad 111). Human sila miabut sa Salem, mipahayag ang Ginoo, “Adunay labaw pa sa usa nga mga bahandi alang kaninyo dinhi niini nga siyudad” (bersikulo 10)—mga bahandi nga nag-apil sa mga katawhan kinsa Siya “mopundok diha sa tukma nga higayon alang sa kaayohan sa Zion” (bersikulo 2; tan-awa usab diha sa Exodo 19:5). Bisan og walay kwarta nga nakaplagan didto sa Salem, ang mga kinabig nga miabut gikan sa nagsunod nga mga kahago sa misyonaryo didto mga bahin sa katumanan sa saad sa Ginoo.

Samtang ikaw nagbasa sa seksyon 111, paghunahuna mahitungod sa mga butang nga imong gikagul-an. Hunahunaa kon sa unsa nga paagi ang mga pulong sa Ginoo ngadto ni Joseph mahimong magamit nganha kanimo. Giunsa sa Ginoo pagtabang kanimo sa pagkakaplag sa wala paabuta nga mga “bahandi”? (bersikulo 10). Paghunahuna mahitungod sa unsay Iyang nahimo nga “mohan-ay sa tanan nga mga butang alang sa imong kaayohan” (bersikulo 11). Unsa ang hugpong sa mga pulong “kutob sa inyong mahimo sa pagdawat kanila” nagtudlo kanimo mahitungod sa Langitnong Amahan?

Tan-awa usab diha sa Mateo 6:19–21, 33; “More Treasures Than One,” Revelations in Context, 229–34.

Doktrina ug mga Pakigsaad 112:3–15

Mogiya ang Ginoo niadtong kinsa mapainubsanon nga naningkamot sa Iyang kabubut-on.

Ang panaghiusa diha sa Korum sa Napulog Duha nagkahuyang sa ting-init sa 1837. Dihay mga panagbangi mahitungod sa mga responsibilidad, ug pipila sa mga sakop nagsulti og mga butang batok ni Propeta Joseph Smith. Si Thomas B. Marsh, kaniadto ang Presidente sa Korum sa Napulog Duha, nabalaka, ug gikan siya sa Missouri miadto sa Ohio, nagtinguha sa tambag gikan sa Propeta. Nadawat kini ni Brother Marsh pinaagi sa pagpadayag diha sa seksyon 112. Sa unsa nga paagi ang tambag sa Ginoo nagtabang kaniya ug sa iyang korum? Unsa nga mga leksyon ang imong nakuha samtang ikaw naningkamot sa pagbuntog sa panagbingkil ug kaligutgot nga mga pagbati?

Sa piho, mahimo kang mamalandong sa bersikulo 10. Unsa ang gipasabut nga ang Ginoo moagak kanimo “pinaagi sa kamot”? Ngano nga ang pagpaubos gikinahanglan alang niini nga paggiya?

Tan-awa usab sa Ulisses Soares, “Magmaaghup ug Magmapaubsanon sa Kasingkasing,” Liahona, Nob. 2013, 9–11; “The Faith and Fall of Thomas Marsh,” Revelations in Context, 54–60.

duha ka mga tawo nag-ampo

Kon kita mapainubsanon, ang Ginoo mogiya kanato ug motubag sa atong mga pag-ampo.

Doktrina ug mga Pakigsaad 113

Si Joseph Smith “usa ka sulugoon diha sa mga kamot ni Kristo.”

Gipasabut ni Isaias ang usa sa mga kagikanan ni Jese isip usa ka “sungkod” ug usa ka “gamut” (Isaias 11:1, 10). Sa seksyon 113, nagpasabut ang Ginoo nga kining kagikanan, usa ka sulugoon ni Kristo, mahimong himan sa pagpundok sa mga katawhan sa Ginoo sa katapusang mga Adlaw (tan-awa sa Doktrina ug mga Pakigsaad 113:4, 6)—usa ka panagna nga naghulagway og maayo ni Propeta Joseph Smith. Unsaon kaha niini ug sa ubang mga kamatuoran diha sa seksyon 113 pag-awhag sa mga Santos atol sa kalisud nga ilang gisinati didto sa Kirtland? Unsay imong nakit-an niini nga pagpadayag nga makapadasig kanimo sa pag-apil sa buhat sa Ginoo karon?

Tan-awa usab sa Giya ngadto sa mga Kasulatan, “Jesse,” scriptures.ChurchofJesusChrist.org; 2 Nephi 21:10–12; Joseph Smith—Kasaysayan 1:40.

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Family Home Evening

Doktrina ug mga Pakigsaad 111:2, 9–11.Kini nga mga bersikulo makapaawhag og usa ka panaghisgutan mahitungod sa unsay mga bililhon sa inyong pamilya isip mahangturong mga “bahandi.” Makahimo ka og usa ka pagpangita sa bahandi [treasure hunt] pinaagi sa pagtago og mga butang sulod sa balay nga nagrepresentar sa mga butang nga gimahal o bililhon sa Ginoo. Kon makaplagan sa imong pamilya ang matag butang, paghisgot unsay inyong mabuhat sa pagpakita nga bililhon kini kaninyo.

Doktrina ug mga Pakigsaad 112:10.Si Elder Ulisses Soares mihulagway sa mapainubsanon nga mga tawo niini nga paagi: “Ang mapainubsanon matudloan, moangkon nga nagsalig gayud sila sa Dios ug nagtinguha nga mopaubos sa Iyang kabubut-on. Ang mapainubsanon malumo ug makaimpluwensya sa uban sa paghimo sa ingon” (“Magmaaghup ug Magmapainubsanon sa Kasingkasing,” Liahona, Nob. 2013, 10). Paghunahuna og mga paagi sa pagtabang sa imong pamilya sa pagsabut unsay kahulugan sa magpaubos. Mahimo kamong manganta og usa ka awit mahitungod sa pagpaubos, sama sa “Magmapainubsanon Ka” (Mga Himno, nu. 76), samtang usa ka sakop sa pamilya mogunit sa uban “pinaagi sa kamot” mogiya kanila libut sa inyong panimalay. O pakigbahin og mga kasinatian sa dihang ang Ginoo naggiya sa mga sakop sa imong pamilya “pinaagi sa kamot” ug naghatag og “tubag sa [ilang] mga pag-ampo.”

Doktrina ug mga Pakigsaad 112:11–14, 26.Unsa ang kalainan tali sa nakahibalo sa ngalan sa usa ka tawo ug nakaila kanila? Unsa ang atong makat-unan gikan sa mga bersikulo 11–14 mahitungod sa unsay gipasabut nga makaila sa Ginoo?

Doktrina ug mga Pakigsaad 112:15.Unsa ang gipasabut sa “pagsukol” batok sa propeta? Unsa ang atong makaplagan niini nga bersikulo nga nagtabang kanato sa pagpaluyo sa propeta?

Doktrina ug mga Pakigsaad 113:7–8.Unsa ang atong makat-unan gikan sa bersikulo 8 nga motabang kanato sa “pagdala og balik sa Zion” ug sa pagtubos sa Israel?

Alang sa dugang nga mga ideya sa pagtudlo sa mga bata, tan-awa sa latid [outline] karon nga semana sa Dali, Sunod Kanako—Alang sa Primary.

Gisugyot nga awit: “Magmapainubsanon Ka,” Mga Himno, nu. 76.

Pagpalambo sa Atong Pagtudlo

Puy-i ang imong pagpamatuod. “‘Imong gitudlo kon unsa ka,’ si Elder Neal A. Maxwell mitudlo. ‘Ang imong mga kinaiya mas mahinumduman … kay sa usa ka piho nga kamatuoran sa usa ka partikular nga leksyon’” (Pagtudlo sumala sa Pamaagi sa Manluluwas, 13).

Thomas B. Marsh ug Joseph Smith

Girekord ni Thomas B. Marsh ang pagpadayag nga gihatag nganha kaniya pinaagi ni Joseph Smith. Magpaubos Ka, ni Julie Rogers.