Ngadto sa Tanang Takus nga Lalaki nga mga Miyembro, ni Emma Allebes

Disyembre 6–12

Ang Mga Artikulo sa Hugot nga Pagtuo ug Mga Opisyal nga Pahayag 1 ug 2

“Kami Nagtuo”

Samtang magtuon ka niining semanaha ug maghimo og plano sa pagtudlo, ikonsiderar kon unsaon nimo pagtabang sa mga bata diha sa imong klase nga mapalig-on ang ilang pagtuo sa sukaranang mga kamatuoran sa ebanghelyo.

Irekord ang Imong mga Impresyon

Dapita ang Pagpaambit

Pag-itsa og bola ngadto sa usa ka bata, ug hangyoa ang bata sa pagpaambit kon unsay iyang gituohan mahitungod ni Jesukristo o sa Langitnong Amahan. Balika kini hangtud nga ang matag bata adunay oportunidad sa pagpaambit.

Itudlo ang Doktrina: Mas Gagmay nga mga Bata

Ang Mga Artikulo sa Hugot nga Pagtuo

Mituo ko sa ebanghelyo ni Jesukristo.

Mahimo nimong gamiton ang Mga Artikulo sa Hugot nga Pagtuo sa pagribyu ngadto sa mga bata sa pipila ka sukaranang mga gituohan sa Simbahan ni Jesukristo. Nganong importante man nga ang mga bata nga imong gitudloan motuo niining yano nga mga kamatuoran?

Posible nga mga Kalihokan

• Pagpili og pipila ka artikulo sa hugot nga pagtuo nga gibati nimo nga importante gayud alang sa mga bata nga imong gitudloan. Alang sa matag artikulo sa hugot nga pagtuo, ipaambit ang usa ka hulagway (tan-awa ang pahina sa kalihokan niining semanaha) o usa ka istorya (gikan sa mga kasulatan o sa imong kinabuhi) nga naghulagway o nagklaro sa usa ka kamatuoran nga gitudlo diha sa artikulo. Sultihi ang mga bata nganong kana nga kamatuoran importante kanimo, ug tuguti sila nga mopaambit kon nganong importante kini ngadto kanila.

• Pangita og mga himno o mga awit sa mga bata nga makatabang sa mga bata nga makasabut og usa o dugang pa nga mga artikulo sa hugot nga pagtuo. Siguro ang mga bata makatabang nimo sa pagpili. Kantaha og dungan ang mga awit, ug tabangi ang mga bata nga makita kon sa unsang paagi nga ang mga awit adunay kalabutan sa mga artikulo sa hugot nga pagtuo.

Mga Artikulo sa Hugot nga Pagtuo 1:9; Mga Opisyal nga Pahayag 1 ug 2

Ang Ginoo naggiya sa Iyang Simbahan pinaagi sa Iyang propeta.

Samtang ang mga miyembro sa Simbahan nagsagubang og nagkadaiyang mga hagit, makakita kita og kalinaw sa pagkasayud nga ang Langitnong Amahan andam nga mohatag og pagpadayag aron mogiya kanato. Tabangi ang mga bata nga imong gitudloan sa pagpalig-on sa ilang pagtuo nga ang Dios mogiya sa Simbahan pinaagi sa buhi nga propeta.

Ang Langitnong Amahan naggiya kanato pinaagi sa mga propeta.

Posible nga mga Kalihokan

• Ipakita ang usa ka hugpong sa mga kasulatan ug usa ka litrato sa buhi nga propeta (o pinakabag-ong isyu sa komperensya sa Liahona). Tabangi ang mga bata sa pagtino kon unsa nga aytem ang may kalabutan sa hugpong sa mga pulong nga “sa tanan nga gipadayag sa Dios” ug unsa nga aytem ang may kalabutan sa hugpong sa mga pulong nga “sa tanan nga gipadayag Niya karon” (Mga Artikulo sa Hugot nga Pagtuo 1:9).

• Palunga ang mga suga, ug ibutang ang hulagway ni Jesukristo diha sa pisara. Pasigaa ang ispat diha sa imahe aron pagpakita kon sa unsang paagi nga ang propeta, sama sa ispat, makatabang kanato nga mas klarong makita ang Manluluwas.

• Pangita og yano nga mga direksyon sa paghimo og usa ka butang, sama sa pagkaon o dulaan. Sunda ang mga instruksyon uban sa mga bata, ug ipasabut nga pinaagi sa propeta, ang Langitnong Amahan mohatag kanato og mga instruksyon aron pagtabang kanato nga makabalik sa pagpuyo uban Kaniya. Unsa ang pipila ka butang nga gitudlo kanato sa propeta aron makabalik kita ngadto sa Dios?

Itudlo ang Doktrina: Mas Dagko nga mga Bata

Ang Mga Artikulo sa Hugot nga Pagtuo

Ang Mga Artikulo sa Hugot nga Pagtuo nagtudlo og yano nga mga kamatuoran sa ebanghelyo.

Usahay ang ebanghelyo morag dako ra ug komplikado, ilabi na ngadto sa mga bata. Ang Mga Artikulo sa Hugot nga Pagtuo makatabang sa mga bata nga makasabut, sa yano nga paagi, sa pipila ka sukaranang mga kamatuoran nga atong gituohan isip mga Santos sa Ulahing mga Adlaw.

Posible nga mga Kalihokan

• Dapita ang matag bata sa pagpili og mahinungdanong pulong o hugpong sa mga pulong gikan sa usa ka artikulo sa hugot nga pagtuo ug ipaambit kini ngadto sa klase. Dayon ipatag-an (o ipapangita) sa ubang mga bata kon unsa nga artikulo sa hugot nga pagtuo naggikan kana nga pulong o hugpong sa mga pulong. Hangyoa ang mga bata sa pagpaambit kon nganong ang pulong o hugpong sa mga pulong nga ilang gipili importante.

• Pipila ka adlaw sa wala pa kini, hangyoa ang pipila ka bata sa pag-andam nga mopaambit diha sa klase og usa ka mubo nga mensahe mahitungod sa ilang paborito nga artikulo sa hugot nga pagtuo. Ang ilang mensahe mahimong maglakip og usa ka litrato, usa ka awit, usa ka istorya o kasinatian, o ubang mga kasulatan. Dapita ang mga bata sa pagpaambit kon nganong gusto nila ang artikulo sa hugot nga pagtuo nga ilang gipili.

• Isulat diha sa pisara ang pipila ka pangutana sa mga tawo mahitungod sa atong mga gituohan nga matubag sa usa sa mga artikulo sa hugot nga pagtuo. Hangyoa ang mga bata sa pagpili og usa ka pangutana ug sa pagpangita og artikulo sa hugot nga pagtuo nga motubag niini. Tuguti sila nga magpraktis sa pagtubag sa pangutana gamit ang artikulo sa hugot nga pagtuo.

Mga Opisyal nga Pahayag 1 ug 2

Ang mga propeta motabang kanato nga masayud sa kabubut-on sa Langitnong Amahan.

Ang Mga Opisyal nga Pahayag 1 ug 2 nindot kaayo nga mga ehemplo kon sa unsang paagi nga ang mga propeta makadawat ug molihok sa pagpadayag gikan sa Dios. Unsaon nimo pagtabang ang mga bata nga mapalambo ang ilang pagtuo nga ang Dios naggiya sa Iyang Simbahan pinaagi sa pagpadayag?

Posible nga mga Kalihokan

• Hangyoa ang mga bata sa pagpangita og usa ka artikulo sa hugot nga pagtuo nga nagtudlo mahitungod sa mga propeta o pagpadayag. Dapita sila sa pagpaambit kon nganong mapasalamaton sila nga kita adunay buhi nga propeta. Ipaambit ang pipila ka ehemplo kon giunsa paggiya sa Dios ang Simbahan pinaagi sa pagpadayag, lakip na ang mga ehemplo nga gihulagway diha sa Mga Opisyal nga Pahayag 1 ug 2, ug tuguti ang mga bata nga mopaambit og mga ehemplo nga pamilyar sila (sama sa bisan unsa nga bag-ong kausaban sa mga programa o mga polisiya sa Simbahan).

• Hatagi ang mga bata sa mosunod nga mga pakisayran sa kasulatan: 2 Nephi 26:33; Jacob 2:27. Dapita sila sa pagtino kon unsa nga kasulatan ang may kalabutan sa Opisyal nga Pahayag 1 (nga miresulta sa pagtapos sa dinaghan nga kaminyoon) ug unsa ang may kalabutan sa Opisyal nga Pahayag 2 (nga mihimo sa mga panalangin sa pagkapari ug sa templo nga madawat sa mga tawo sa tanang kaliwatan). Hatag sa imong pagpamatuod nga ang Ginoo mipadayag sa Iyang kabubut-on ngadto sa karaan ug moderno nga mga propeta.

• Isulat ang mosunod gikan sa Opisyal nga Pahayag 1 diha sa pisara: “Kamo ang mohukom sa inyong kaugalingon.” Unsay buot ipasabut sa mohukom sa atong kaugalingon kon ang propeta makadawat og pagpadayag? Aron matabangan sila sa pagtubag niining pangutana, mahimo nimong ipaambit kining pamahayag gikan ni Presidente Russell M. Nelson: “Mahimo kamong masayud sa inyong kaugalingon kon unsay tinuod ug unsay dili pinaagi sa pagkat-on sa pag-ila sa mga paghunghong sa Espiritu” (“The Love and Laws of God” [debosyonal sa Brigham Young University, Sept. 17, 2019], 4, speeches.byu.edu).

• Pagdrowing o ipakita ang usa ka hulagway sa kalibutan diha sa pisara. Dapita ang usa sa mga bata sa pagbasa og kusog sa katapusang duha ka parapo [paragraph] sa sulat sa Unang Kapangulohan nga gipetsahan og Hunyo 8, 1978 nga gikutlo diha sa Opisyal nga Pahayag 2 (magsugod sa “Siya nakadungog sa atong mga pag-ampo …”). Hangyoa ang mga bata sa pag-ihap kon kapila makita ang mga pulong nga “panalangin” ug “mga panalangin.” Unsa nga mga panalangin ang nagagikan sa ebanghelyo? Dapita ang mga bata sa paglista niini diha sa pisara palibut sa drowing o hulagway sa yuta. Hatag sa imong pagpamatuod nga ang Dios nahigugma sa Iyang tanang anak sa tibuok kalibutan ug gusto nga mopanalangin kanila pinaagi sa Iyang ebanghelyo.

Awhaga ang Pagkat-on diha sa Panimalay

Tabangi ang mga bata sa pagpili og usa ka artikulo sa hugot nga pagtuo nga gusto nilang sag-ulohon, ug tabangi sila sa paghimo og usa ka plano sa pagbuhat niana.

Pagpalambo sa Atong Pagtudlo

Ang mga bata ganahan nga mopaambit sa unsay ilang nakat-unan. Bisan og gagmay pa sila, ang mga bata makapalig-on sa pagtuo sa mga sakop sa ilang pamilya. Awhaga sila sa pagpaambit ngadto sa ilang mga pamilya og usa ka butang nga ilang nakat-unan sa Primary. (Tan-awa sa Pagtudlo sumala sa Pamaagi sa Manluluwas, 30.)