Nativity in Copper and Umber, ni J. Kirk Richards

Disyembre 20–26

Pasko

Ang Dili Katupngan nga Gasa sa Balaan nga Anak sa Dios

Ang Pasko usa ka makapahinam nga panahon alang sa daghang bata. Ikonsiderar kon unsaon nimo sila pagtabang nga makakonektar sa hingpit nga kalipay atol sa panahon sa Pasko ngadto sa hingpit nga kalipay sa ebanghelyo sa Manluluwas.

Irekord ang Imong mga Impresyon

Dapita ang Pagpaambit

Dapita ang mga bata sa pagpaambit kon unsay ilang gibuhat sa miaging semana sa pagsaulog sa pagkatawo sa Manluluwas.

Itudlo ang Doktrina: Mas Gagmay nga mga Bata

Makahimo ko sa “paghalad sa [akong] pagpamatuod” sa pagsaulog sa pagkatawo ni Jesus.

Sa “Ang Buhi nga Kristo” (ChurchofJesusChrist.org), ang Unang Kapangulohan ug ang Korum sa Napulog Duha ka mga Apostoles mihatag sa ilang pagpamatuod bahin ni Jesukristo sa “pagsaulog sa pagkatawo ni Jesukristo.” Ikonsiderar kon unsaon nimo pag-awhag ang mga bata nga mopaambit sa ilang mga pagpamatuod ngadto sa uban.

Posible nga mga Kalihokan

• Ipakita ngadto sa mga bata ang kopya sa “Ang Buhi nga Kristo” (tan-awa sa outline karong semanaha sa Dali, Sunod Kanako—Alang sa mga Indibidwal ug mga Pamilya). Itudlo ang pulong nga Kristo diha sa ulohan, ug ipatudlo usab sa mga bata ngadto sa pulong. Itudlo usab ang mga pirma diha sa ubos sa pahina, ug sultihi ang mga bata nga niadtong 2000, ang Unang Kapangulohan misulat sa ilang pagpamatuod bahin ni Jesukristo, mipirma sa ilang mga ngalan ngadto niini, ug mipaambit niini sa kalibutan.

• Ipakita ang usa ka hulagway ni Jesukristo, ug dapita ang matag bata sa pagbarug ug sa pagpaambit og usa ka butang nga iyang nahibaloan mahitungod Kaniya. Kon magkinahanglan sila og tabang, isugyot ang mga kamatuoran gikan sa “Ang Buhi nga Kristo.” Pahinumdumi ang mga bata nga kon mosulti sila sa uban mahitungod ni Jesus, nagpaambit sila sa ilang pagpamatuod.

• Sultihi ang mga bata kon giunsa nimo pagbaton sa imong pagpamatuod bahin ni Jesukristo ug unsay imong gihimo sa pagpabilin sa imong pagpamatuod nga lig-on. Tabangi sila sa paghunahuna og mga paagi nga ilang mapalig-on ang ilang mga pagpamatuod bahin ni Jesukristo, ug dapita sila sa pagpili og usa ka butang nga ilang himoon.

Ang Langitnong Amahan mipadala sa Iyang Anak isip usa ka gasa ngari kanato.

Ang paghatag ug pagdawat og mga gasa usa ka tradisyonal nga bahin sa Pasko alang sa daghang tawo. Kini nga tradisyon kinahanglang motabang sa pagpahinumdom kanato sa “dili katupngan nga gasa sa Iyang balaan nga Anak” (“Ang Buhi nga Kristo”).

Posible nga mga Kalihokan

• Hangyoa ang mga bata sa pagsulti mahitungod sa mga gasa nga ilang nahatag o nadawat. Basaha ngadto kanila ang katapusang kapahayag [sentence] sa “Ang Buhi nga Kristo,” ug dapita sila sa pagpaminaw alang sa gasa nga gihatag kanato sa Dios. (Kon gikinahanglan, tabangi sila nga makasabut nga ang “dili katupngan” nagpasabut og “mas maayo pa kay ni bisan kinsa.”) Nganong ang Anak sa Dios, si Jesukristo, mao man ang labing maayo nga gasa?

• Manganta og dungan sa usa ka awit mahitungod ni Jesukristo, sama sa “Mipadala sa Bugtong Anak” (Songbook sa mga Bata, 20). Tabangi ang mga bata sa pagpili og usa ka hugpong sa mga pulong gikan sa awit nga gusto nilang idrowing (sama sa “bag-ong natawo nga bata” o “nakigpanglakaw uban sa mga tawo”). Samtang magdrowing sila, hangyoa ang mga bata sa pagsulti kanimo kon unsa ang ilang gibati sa unsay gibuhat ni Jesus alang kanila. Ipaambit usab ang imong mga pagbati.

Si Jesukristo nagdapit kanako sa pagsunod sa Iyang ehemplo.

Kabahin sa “mahinungdanon nga … impluwensya” sa Manluluwas ngadto sa kalibutan mao ang iyang hingpit nga ehemplo. Unsaon nimo pagdasig ang mga bata nga mosunod Kaniya?

Posible nga mga Kalihokan

• Gikan sa ikaduhang parapo [paragraph] sa “Ang Buhi nga Kristo,” basaha ngadto sa mga bata ang pipila ka butang nga gihimo ni Jesus. Ipakita ang mga hulagway gikan sa Iyang kinabuhi (tan-awa ang pahina sa kalihokan niining semanaha), ug dapita ang mga bata sa paghisgot mahitungod sa gihimo sa Manluluwas diha sa mga hulagway. Tabangi sila sa paghunahuna og mga paagi nga makasunod sila sa Iyang ehemplo.

• Pagpili og “Light the World” nga video (ComeuntoChrist.org) nga ipasalida ngadto sa mga bata, o isulti ang mahitungod sa usa ka higayon sa dihang napanalanginan ka tungod sa Kristohanong serbisyo sa usa ka tawo. Dapita ang usa ka bata nga i-drama ang usa ka yano nga buhat sa pagserbisyo, ug hangyoa ang ubang mga bata sa pagtag-an kon unsay iyang gibuhat. Pasulaya ang matag bata. Tabangi ang mga bata sa paghunahuna og butang nga ilang mahimo aron makaserbisyo sa usa ka tawo diha sa ilang pamilya.

Itudlo ang Doktrina: Mas Dagko nga mga Bata

“Kita mohalad sa atong pagpamatuod.”

Ang ehemplo sa mga propeta ug mga apostoles kinsa misulat sa “Ang Buhi nga Kristo” makapadasig sa mga bata sa pagpaambit sa ilang mga pagpamatuod bahin ni Jesukristo.

Posible nga mga Kalihokan

• Isulat diha sa pisara ang Nasayud ko nga si Jesukristo … ug dapita ang mga bata sa pagpaambit og mga paagi sa ilang pagkompleto sa sentence. Isugyot nga mangita sila diha sa “Ang Buhi nga Kristo” alang sa mga ideya. Unsa ang atong mahimo aron sa paglig-on sa atong mga pagpamatuod bahin ni Jesukristo? Sa unsang paagi nga ang uban mapanalanginan kon mopaambit kita sa atong mga pagpamatuod?

• Ipasabut og maayo nga “Ang Buhi nga Kristo” gipirmahan sa Unang Kapangulohan ug sa Napulog Duha ka mga Apostoles. Basaha og dungan ang Doktrina ug mga Pakigsaad 107:23. Unsa ang nakapalahi sa mga Apostoles “sa ubang mga opisyales sa simbahan”? Pagpili og usa sa “Special Witnesses of Christ” nga mga video nga ipaambit ngadto sa mga bata (ChurchofJesusChrist.org). Nganong mapasalamaton man kita nga makabaton og linain nga mga saksi ni Kristo sa atong panahon?

“Walay lain nga adunay labaw ka mahinungdanon nga impluwensya.”

Sa “Ang Buhi nga Kristo,” ang mga propeta ug mga apostoles namahayag nga walay tawo nga adunay mas labaw pa nga impluwensya sa mga anak sa Dios kay ni Jesukristo. Pamalandungi kon unsaon nimo pagtabang ang mga bata nga makakat-on mahitungod sa mahinungdanon nga impluwensya sa Manluluwas ngari natong tanan.

Posible nga mga Kalihokan

• Hatagi ang matag grupo og usa ka hugpong sa mga pulong o sentence gikan sa “Ang Buhi nga Kristo,” ug hangyoa sila sa pagdrowing og hulagway bahin niana nga hugpong sa mga pulong o sentence. Samtang magpakita ang matag bata ngadto sa klase sa iyang hulagway, hangyoa ang ubang mga bata sa pagtag-an kon unsay gipakita sa hulagway ug sa pagpangita sa mohaum nga sentence diha sa “Ang Buhi nga Kristo.” Sa unsang paagi kita napanalanginan tungod sa kinabuhi ug misyon ni Jesukristo?

• Tabangi ang mga bata nga makakita og lain-laing mga ngalan o tawag ni Jesukristo diha sa “Ang Buhi nga Kristo” ug linyahi kini, kon mahimo (ang ubang mga ehemplo naglakip sa Mesiyas, Unang Natawo, ang sinugdanan ug katapusan, manlalaban, ug ang ulohang bato sa pamag-ang). Hisguti kon unsay gitudlo kanato sa matag usa niining mga tawag mahitungod Kaniya. (Ang uban niining mga tawag gitino diha sa Giya ngadto sa mga Kasulatan.)

“Siya mao ang kahayag, ang kinabuhi, ug ang paglaum sa kalibutan.”

Ang Pasko ingon ka sadya nga panahon tungod sa paglaum nga gidala ni Jesukristo sa kalibutan pinaagi sa Iyang mga pagtulun-an, ehemplo, ug maulaong sakripisyo.

Kahayag sa Kalibutan, ni Howard Lyon

Posible nga mga Kalihokan

• Dapita ang matag bata sa pagdrowing og Christmas tree, o sa pagdrowing niini diha sa pisara. Dapita ang mga bata sa pag-adorno sa kahoy gamit ang mga pulong o mga hugpong sa mga pulong gikan sa “Ang Buhi nga Kristo” nga naghulagway sa usa ka gasa nga gihatag sa Manluluwas ngari kanato (sama sa “kahayag,” “kinabuhi,” ug “paglaum”). Tuguti sila sa paghisgot kon nganong ilang gipili kadto nga mga pulong o mga hugpong sa mga pulong.

• Tabangi ang mga bata sa pagpangita og mga himno sa Pasko nga naghisgot bahin sa kahayag, kinabuhi, ug paglaum nga dala sa pagkatawo sa Manluluwas nganhi sa kalibutan—sama pananglit, “Gamay nga Lungsod sa Bethlehem” o “Ang Anghel Paminawa! ” (Mga Himno, nu. 126–28). Manganta og dungan sa mga himno, ug tuguti ang mga bata sa pagpaambit kon giunsa pagdala ni Jesus ang kahayag, kinabuhi, ug paglaum ngadto sa ilang kinabuhi.

• Hangyoa ang pipila sa mga bata sa pagbasa mahitungod sa mga magbalantay sa mga karnero diha sa Lucas 2:8–20. Hangyoa ang uban sa pagbasa mahitungod ni Simeon diha sa Lucas 2:25–33. Dapita sila sa pagpaambit sa usag usa kon unsay gibati sa mga magbalantay sa mga karnero ug ni Simeon mahitungod sa pagkahibalo nga natawo na si Jesus. Nganong mibati man sila og ingon niini? Ngano nga ang Iyang pagkatawo makahatag man kanato og “dakong kalipay”?

Awhaga ang Pagkat-on diha sa Panimalay

Dapita ang mga bata sa paghunahuna og usa ka tawo diha sa ilang pamilya nga mahimo nilang mapaambitan sa ilang pagpamatuod bahin ni Jesukristo. Tabangi sila sa pagkonsiderar kon unsa kaha ang ilang isulti aron sa paglig-on sa pagtuo nianang tawhana diha Kaniya.

Pagpalambo sa Atong Pagtudlo

Pangandam pinaagi sa pagtuon sa mga kasulatan. “Ang mainampoong pagtuon sa pulong sa Dios nagpahimutang kanato nga mahiangay sa Espiritu Santo. Dayon siya makadasig kanato nga magamit ang atong natun-an samtang kita motudlo ug mobayaw sa uban” (Pagtudlo sumala sa Pamaagi sa Manluluwas, 12).