Nativity in Copper and Umber, [Pasko sa Pagkatawo nga Tumbaga ug Dagtumon nga Dalag] ni J. Kirk Richards

Disyembre 20–26

Pasko

Ang Dili Katupngan nga Gasa sa Balaang Anak sa Dios

Usa ka paagi sa pagpunting sa imong mga hunahuna diha sa Manluluwas niini nga Pasko mao ang pagtuon sa “Ang Buhi ng Kristo: Ang Pagpamatuod sa mga Apostoles.” Kini nga latid nagsugyot og mga paagi nga ikaw makahimo niining propetikanhon nga pagpamatuod nga kabahin sa imong personal ug pamilya nga pagtuon sa ebanghelyo.

I-rekord ang Imong mga Pagbati

Kaniadtong 1838, mipahayag si Propeta Joseph Smith, “Ang sukaranan nga mga baruganan sa atong relihiyon mao ang pagpamatuod sa mga Apostoles ug sa mga Propeta, mahitungod ni Jesukristo, nga Siya namatay, gilubong, ug mibangon sa ikatulong adlaw, ug mikayab ngadto sa langit; ug ang ubang mga butang nga may kalabutan sa atong relihiyon sumpay lamang niini” (Mga Pagtulun-an sa mga Presidente sa Simbahan: Joseph Smith, 58). Pila ka tuig ang milabay, si Presidente Russell M. Nelson nakamatikud nga “kini mao gayud nga pamahayag sa Propeta ang nagdasig sa 15 ka mga propeta, mga manalagna, ug mga tigpadayag sa pag-isyu ug pagpirma sa ilang pagpamatuod sa pagsaulog sa ika-2,000 nga anibersaryo sa pagkatawo sa Ginoo. Kana nga makasaysayanong pagpamatuod giulohan og ‘Ang Buhi nga Kristo.’ Daghang miyembro ang nakasag-ulo sa mga kamatuoran niini. Ang uban walay nahibaloan bahin niini. Samtang nagtinguha kamo nga mas makakat-on pa mahitungod ni Jesukristo, moawhag ako kaninyo sa pagtuon sa ‘Ang Buhi nga Kristo’” (“Pagdawat sa Gahum ni Jesukristo diha sa atong mga Kinabuhi,” Liahona, Mayo 2017, 40).

Isip mga Santos sa Ulahing mga Adlaw, nagmaya kita diha sa panalangin sa nagpadayong pagpadayag pinaagi sa moderno nga mga propeta ug mga apostoles. Mapasalamaton kita sa ilang dinasig nga mga pulong sa pagtambag, pasidaan, ug pag-awhag. Apan labaw sa tanan, napanalanginan kita pinaagi sa ilang gamhanang mga pagpamatuod kabahin ni Jesukristo––sa panahon sa Pasko ug sa tibuok tuig. Kini labaw pa kay sa makapadasig lamang nga mga pulong sa hanas nga mga manunulat o mamumulong sa publiko o mga panabut gikan sa mga batid sa kasulatan. Mga pulong kini sa pinili sa Dios, gitawag, ug may pagtugot nga “talagsaon nga mga saksi sa ngalan ni Kristo sa tibuok kalibutan” (Doktrina ug mga Pakigsaad 107:23).

Mga Ideya alang sa Personal nga Pagtuon sa Kasulatan

“Walay lain sukad nga adunay hilabihan ka dili matugkad nga impluwensya.”

Unsa nga mga hunahuna ang miabut kanimo samtang ikaw nagbasa diha sa Lucas 2:10–11 uban sa unang parapo sa “Ang Buhi nga Kristo”? Unsa ang imong isulti agi og suporta sa pahayag nga “walay lain sukad nga adunay hilabihan ka dili matugkad nga impluwensya [sama ni Jesukristo] diha sa tanan kinsa nakapuyo ug mopuyo pa ibabaw sa yuta”? Pangita og mga kamatuoran diha sa “Ang Buhi nga Kristo” nga naghulagway sa dili matugkad nga impluwensya sa Manluluwas. Giunsa Niya pag-impluwensya kanimo ug pagdala kanimo og “dakong kalipay”? (Lucas 2:10).

“Siya mibangon gikan sa lubnganan.”

Diha sa “Ang Buhi nga Kristo,” mipamatuod ang mga Apostoles kabahin sa Pagkabanhaw sa Manluluwas, naghisgot og tulo ka mga pagpakita sa nabanhaw nga Ginoo (tan-awa sa ikalima nga parapo). Hunahunaa ang pagbasa mahitungod niini nga mga pagduaw diha sa Juan 20–21; 3 Nephi 11–26; ug Joseph Smith—Kasaysayan 1:14–20. Unsa ang imong nakat-unan mahitungod sa Manluluwas gikan sa Iyang mga pulong ug mga lihok atol niini nga mga pagpakita?

“Ang Iyang pagkapari ug ang Iyang Simbahan gipahiuli.”

Sa panahon sa imong pagtuon sa Doktrina ug mga Pakigsaad niini nga tuig, ikaw dihay oportunidad sa pagkat-on pa mahitungod sa unsa nga paagi “gipahiuli ang pagkapari ug Simbahan” sa Manluluwas.” Hain nga gipahiuling mga kamatuoran o mga baruganan ilabi ka makahuluganon kanimo? Hunahunaa ang pagribyu sa pipila sa mosunod nga mga kasulatan nga nagtudlo mahitungod sa Pagpahiuli: Doktrina ug mga Pakigsaad 1:17–23; 13; 20:1–12; 65; 110; 112:30–32; 124:39–42; 128:19–21. Pamalandonga kon giunsa sa mga kamatuoran sa gipahiuli nga ebanghelyo pagtabang kanimo nga makahibalo ug makasimba ni Jesukristo (tan-awa sa Doktrina ug mga Pakigsaad 93:19).

“Siya mobalik pila ka adlaw nganhi sa yuta.”

Ang Pasko panahon sa pagbalik og tan-aw sa adlaw nga si Jesukristo natawo ug sa pagtan-aw sa umaabut nga adlaw nga Siya moanhi pag-usab. Unsa ang imong nakat-unan mahitungod sa Iyang pagbalik gikan sa ikaduha ngadto sa katapusan nga parapo sa “Ang Buhi nga Kristo”? Kini mahimo usab nga makapaikag sa pagbasa, pagkanta, o pagpaminaw og mga himno sa Pasko nga nagtudlo mahitungod sa Ikaduhang Pag-anhi, sama sa “Kalipay sa Kalibutan” o “Miabut Nianang Hayag nga Tungang Gabii” (Mga Himno, nus. 120, 125).

“Siya mao ang kahayag, ang kinabuhi, ug ang paglaum sa kalibutan.”

Sa katapusan nga parapo sa “Ang Buhi nga Kristo,” timan-i ang mga hiyas nga gihatag alang sa Manluluwas. Ang mosunod nga mga kasulatan makatabang kanimo sa pagpamalandong kon sa unsa nga paagi si Jesukristo mao “ang kahayag, ang kinabuhi, ug ang paglaum sa kalibutan”: Lucas 2:25–32; 1 Mga Taga-Corinto 15:19–23; Moroni 7:41; Doktrina ug mga Pakigsaad 50:24; 84:44–46; 93:7–10. Sa unsa nga paagi Siya ang imong kahayag, kinabuhi, ug paglaum? Unsa ang ubang mga hiyas o ngalan sa Manluluwas nga labing makahuluganon nganha kanimo?

Sa unsa nga paagi nga ang pagtuon sa “Ang Buhi nga Kristo” nakaapekto sa imong hugot nga pagtuo ug gugma alang sa Manluluwas?

Kahayag sa Kalibutan, ni Howard Lyon

Mga Ideya alang sa Pamilya nga Pagtuon sa Kasulatan ug Family Home Evening

“Ang Buhi nga Kristo.”Aron sa pagtabang sa imong pamilya nga makasabut sa mga kamatuorang gitudlo mahitungod sa Manluluwas diha sa “Ang Buhi nga Kristo,” mahimo kang mopili og pipila ka importanting mga hugpong sa mga pulong ug magdungan sa pagpangita o pagdrowing og mga hulagway nga naghulagway niadto nga mga hugpong sa mga pulong. Kamo dayon makatigum niadto nga mga hulagway ug mga hugpong sa mga pulong ngadto sa usa ka basahon.

“Kami naghatag sa among pagpamatuod.”Unsay atong nakat-unan gikan sa “Ang Buhi nga Kristo” mahitungod sa unsay gipasabut sa pagpamatuod? Mahimo nga gusto nimong i-rekord ang imong mga pagpamatuod ni Kristo sa pagsaulog sa pagkatawo sa Manluluwas.

“Siya naglibut sa paghimo og mga kaayohan.”Sa unsang paagi kaha masunod sa imong pamilya ang panig-ingnan sa Manluluwas sa pagserbisyo niini nga Pasko? Unsaon nimo pagsangyaw og “kalinaw ug panagdait” sa inyong pamilya ug komunidad? Unsaon nimo nga makatabang sa pagdala og “pagkaayo [ngadto] sa masakiton”? Mahimo nga makakita ka og mga ideya diha sa pipila ka mga video sa Pasko [Usa ka Manluluwas Natawo] diha sa Gospel Media app o Gospel Media library (medialibrary.ChurchofJesusChrist.org).

“Pasalamat ngadto sa Dios sa dili katupngan nga gasa sa Iyang balaan nga Anak.”Unsa nga mga gasa ang atong nadawat tungod ni Jesukristo? Tingali ang mga sakop sa pamilya makakaplag sa mga tubag diha sa “Ang Buhi nga Kristo” ug dayon pagputos og mga regalo nga nagrepresentar niadto nga mga gasa gikan sa Manluluwas. Mahimong ablihon ang mga regalo sa adlaw sa Pasko o sa tibuok semana ug magbasa og mga kasulatan nga kalabut sa matag usa. Ania ang posibleng mga kasulatan, bisan og ang imong pamilya makakaplag og uban: Lucas 2:10–14; 1 Pedro 2:21; Mosiah 3:8; Alma 11:42–43; Doktrina ug mga Pakigsaad 18:10–12. Mahimo usab nga kamo manganta og usa ka awit mahitungod sa Manluluwas, sama sa “Mipadala sa Bugtong Anak” (Songbook sa mga Bata, 20), aron makakaplag og ubang mga gasa nga gikan Kaniya.

Alang sa dugang nga mga ideya sa pagtudlo sa mga bata, tan-awa sa latid [outline] karon nga semana sa Dali, Sunod Kanako—Alang sa Primary.

Gisugyot nga awit: “Ang Anghel! Paminawa,” Mga Himno, nu. 128.

Pagpalambo sa Personal nga Pagtuon

Tutok diha sa Manluluwas. “Ang mainampuong pagbasa sa ‘Ang Buhi nga Kristo’ sama ra sa pagbasa sa mga pagpamatuod nila ni Mateo, Marcos, Lucas, Juan, ug sa mga propeta sa Basahon ni Mormon. Mopalambo kini sa inyong hugot nga pagtuo sa Manluluwas ug motabang kaninyo nga magpabiling nakatutok diha Kaniya” (M. Russell Ballard, “Mobalik ug Modawat,” Liahona, Mayo 2017, 65).