“Disyembre 6–12. Ang mga Artikulo sa Hugot nga Pagtuo ug Opisyal nga mga Pahayag 1 ug 2: ‘Kami Nagtuo,’” Dali, Sunod Kanako––Alang sa mga Indibidwal ug mga Pamilya: Doktrina ug mga Pakigsaad 2021 (2020)
“Disyembre 6–12. Ang mga Artikulo sa Hugot nga Pagtuo ug Opisyal nga mga Pahayag 1 ug 2,” Dali, Sunod Kanako—Alang sa mga Indibidwal ug mga Pamilya: 2021
Ngadto sa Tanang Takus nga Miyembro nga mga Lalaki, ni Emma Allebes
Disyembre 6–12
Ang mga Artikulo sa Hugot nga Pagtuo ug Opisyal nga mga Pahayag 1 ug 2
“Kita Motuo”
Samtang ikaw magtuon sa Mga Artikulo sa Hugot nga Pagtuo ug sa Opisyal nga mga Pahayag 1 ug 2, hunahunaa ang epekto nga aduna kini diha sa Simbahan. Unsa ang nakapadani kanimo mahitungod sa mga kamatuoran nga gitudlo niini?
I-rekord ang Imong mga Pagbati
Sulod sa 200 ka mga tuig sukad sa Unang Panan-awon ni Joseph Smith, ang Dios nagpadayon sa paghatag og “pagpadayag ug dugang nga pagpadayag, kahibalo ug dugang nga kahibalo” ngadto sa mga lider sa Iyang Simbahan (Doktrina ug mga Pakigsaad 42:61). Sa ubang hitabo, kana nga pagpadayag misugo sa mga lider sa Simbahan sa paghimo og mga kalainan sa mga pagdumala ug mga kalihokan sa Simbahan, “sumala sa kabubut-on sa Ginoo, nga nagpahiangay sa iyang mga kalooy sumala sa mga kahimtang sa mga katawhan” (Doktrina ug mga Pakigsaad 46:15). Ang Opisyal nga mga Pahayag 1 ug 2 nagrepresentar niini nga matang sa pagpadayag—ang usa migiya ngadto sa katapusan sa pagsunod sa dinaghan nga kaminyoon, ug ang lain mihimo sa mga panalangin sa pagkapari, lakip ang mga panalangin sa templo, nga maanaa ngadto sa mga katawhan sa tanang mga kaliwatan. Ang mga kausaban nga sama niini mga kabahin sa unsay gipasabut sa pagbaton og usa ka “tinuod ug buhi nga simbahan” (Doktrina ug mga Pakigsaad 1:30), uban sa usa ka tinuod ug buhing propeta.
Apan usab adunay mga butang nga dili mausab––sukaranan, mahangturon nga mga kamatuoran. Ug usahay ang katuyoan sa pagpadayag mao ang pagdugang og panabut mahitungod niini nga mga kamatuoran, pagtabang kanato nga mas makasabut niini og maayo. Ang Mga Artikulo sa Hugot nga Pagtuo––kang Joseph Smith nga 13 ka mugbo nga mga pahayag sa unsay gituohan sa mga Santos sa Ulahing mga Adlaw––ingon og mitabang sa pagpatin-aw niini nga katuyoan. Ang duha ka mga matang sa pagpadayag naggiya ug nagpanalangin sa Simbahan, usa ka Simbahan nga solidong gitukod diha sa mahangturong kamatuoran gani makahimo sa pagtubo ug pag-usab ingon nga ang Ginoo nagdugang sa atong panabut aron sa pagtabang kanato sa pagtubag sa mga hagit karon. “Sa lain nga pagkasulti, “Kami nagtuo sa tanan nga gipadayag sa Dios, sa tanan nga gipadayag niya karon, ug kami nagtuo nga siya mopadayag pa og daghan nga dagko ug mahinungdanon nga mga butang kalabut sa Gingharian sa Dios” (Mga Artikulo sa Hugot nga Pagtuo 1:9).
Mga Ideya alang sa Personal nga Pagtuon sa Kasulatan
Ang Mga Artikulo sa Hugot nga Pagtuo
Ang Mga Artikulo sa Hugot nga Pagtuo naglangkub sa sukaranang mga kamatuoran sa gipahiuli nga ebanghelyo.
Usa ka paagi nga ikaw makatuon sa Mga Artikulo sa Hugot nga Pagtuo mao ang paglista sa mga kamatuoran nga makaplagan diha sa matag usa ug dayon pangita og mga kasulatan nga kalabut ngadto niini nga mga kamatuoran. Giunsa niini nga mga kasulatan sa pagpabuhong sa imong pagsabut sa mga kamatuoran diha sa Mga Artikulo sa Hugot nga Pagtuo?
Tan-awa usab ang Giya ngadto sa mga Kasulatan, “Mga Artikulo sa Hugot nga Pagtuo,” scriptures.ChurchofJesusChrist.org; L. Tom Perry, “Ang mga Doktrina ug mga Baruganan nga Anaa sa mga Artikulo sa Hugot nga Pagtuo,” Liahona, Nob. 2013, 46–48; “Kapitulo 38: Ang Wentworth Letter,” sa Mga Pagtulun-an sa mga Presidente sa Simbahan: Joseph Smith, 527–42.
Mga Artikulo sa Hugot nga Pagtuo 1:9; Opisyal nga mga Pahayag 1 ug 2
Ang Simbahan ni Jesukristo gigiyahan pinaagi sa pagpadayag.
“Kami nagtuo nga ang [Dios] mopadayag pa og daghan nga dagko ug mahinungdanon nga mga butang kalabut sa Gingharian sa Dios” (Mga Artikulo sa Hugot nga Pagtuo 1:9), bisan kon kadto nga mga butang nagpasabut og pag-usab sa mga pagdumala ug sa mga kalihokan. Naghunahuna mahitungod niini nga baruganan, ribyuha ang Opisyal nga mga Pahayag 1 ug 2, ug pangita og mga pulong ug mga hugpong sa mga pulong nga naglig-on sa imong pagtuo sa nagpadayon nga pagpadayag. Unsa ang ubang mga ehemplo sa nagpadayong pagpadayag ngadto sa propeta sa Ginoo ang imong mahunahunaan? Sa unsang paagi nakaapekto kini nga mga pagpadayag sa imong kinabuhi? Giunsa niini pagpauswag ang buhat diha sa gingharian sa Langitnong Amahan?
Tan-awa usab diha sa Amos 3:7; 2 Nephi 28:30.
Ang buhat sa Dios kinahanglan gayud nga magpadayon sa unahan.
Diha sa “Mga Kinutlo gikan sa Tulo ka mga Pakigpulong ni Presidente Wilford Woodruff kalabut sa Manipesto” (sa katapusan sa Opisyal nga Pahayag 1), unsa nga mga rason ang gihatag sa propeta sa pagtapos sa pagbuhat og dinaghan nga kaminyoon? Unsa ang gitudlo niini kanimo mahitungod sa buhat sa Dios?
Wilford Woodruff, ni H. E. Peterson
Kita makasalig diha sa Ginoo, bisan kon kita walay hingpit nga panabut.
Nagtudlo kanato ang mga kasulatan sa pagsalig diha sa Ginoo (tan-awa sa Mga Proverbio 3:5), ug kana mao ang gibuhat sa daghang mga miyembro sa Simbahan nga kagikan og Aprikano sa dihang gipugngan sa Simbahan ang pag-orden sa pagkapari ug ang mga ordinansa sa templo gikan kanila. Bisan tuod sila wala makasabut nganong anaa kini nga palakat––ug kasagaran mibati og kahiubos sa mga pagpasabut nga gitudlo niana nga higayon, nga karon wala na himoa sa Simbahan––daghang diosnong miyembro nga kaliwat og Aprikano misalig sa Ginoo ug mipabiling matinud-anon sa tibuok nilang mga kinabuhi. Samtang ikaw nagbasa diha sa Opisyal nga Pahayag 2, pamalandunga kon giunsa nimo pagkat-on og salig diha sa Ginoo bisan kon ikaw walay hingpit nga panabut.
Ang pagkat-on mahitungod sa hugot nga pagtuo sa itum nga mga miyembro sa Simbahan makadasig nganha kanimo.
-
“Jane Elizabeth Manning James” (Mga Hisgutanan sa Kasaysayan sa Simbahan)
Mga Ideya alang sa Pamilya nga Pagtuon sa Kasulatan ug Family Home Evening
-
Ang Mga Artikulo sa Hugot nga Pagtuo.Paghunahuna unsaon sa imong pamilya paghimo og “mugbo nga mga leksyon” [mini-lessons] alang sa Mga Artikulo sa Hugot nga Pagtuo. Sama pananglit, sa tibuok semana, ang matag sakop sa pamilya makapili og usa ka artikulo ug mangita og usa ka kalabut nga kasulatan, hulagway, himno, o awit sa mga bata o makigbahin og personal nga kasinatian.
O ang mga sakop sa pamilya makapuli-puli sa pagpangutana sa usag usa mahitungod sa Simbahan ug sa atong mga tinuohan ug dayon sa pagtubag niadto nga mga pangutana og artikulo sa hugot nga pagtuo.
-
Opisyal nga mga Pahayag 1 ug 2.Opisyal nga mga Pahayag 1 ug 2 nagtabang kanato sa pagsabut sa tahas sa modernong pagpadayag sa Simbahan. Samtang ang imong pamilya nagbasa niini og dungan, hunahunaa ang paghisgot kon unsaon sa propeta paggiya kanato “pinaagi sa pagdasig sa Halangdong Dios” (Opisyal nga Pahayag 1). Giunsa niining duha ka mga pahayag paglig-on sa atong pagtuo diha sa usa ka buhing Dios kinsa personal nga naggiya sa Iyang Simbahan? Sa unsa nga paagi kita makakita sa Iyang kamot diha sa buhat sa Simbahan karon? Mahimo ka nga mohukom sa pagdungan og tan-aw og mga kapanguhaan diha sa Mga Ideya alang sa Personal nga Pagtuon sa Kasulatan” sa ibabaw.
Alang sa dugang nga mga ideya sa pagtudlo sa mga bata, tan-awa sa latid [outline] karon nga semana sa Dali, Sunod Kanako—Alang sa Primary.
Gisugyot nga awit: “Sunda ang Kasugoan,” Songbook sa mga Bata, 68–69.
Pagpalambo sa Atong Pagtudlo
I-follow up ang mga pagdapit sa paglihok. “Kon imong i-follow up ang pagdapit sa paglihok, imong gipakita sa [mga sakop sa imong pamilya] nga nagpakabana ka kanila ug sa unsang paagi ang ebanghelyo nagpanalangin sa ilang mga kinabuhi. Imo usab silang gihatagan og mga oportunidad sa pagpakigbahin sa ilang mga kasinatian” (Pagtudlo sumala sa Pamaagi sa Manluluwas, 35).
