Disyembre 13–19

Ang Pamilya: Usa ka Pamahayag ngadto sa Kalibutan

“Ang Pamilya Mahinungdanon ngadto sa Plano sa Langitnong Amahan”

Si Presidente Dallin H. Oaks miingon: “Nagtuo ko nga ang atong kinaiya ngadto ug sa paggamit sa pamahayag sa pamilya [usa ka pagsulay] alang niini nga henerasyon. Ako nag-ampo alang sa tanang mga Santos sa Ulahing mga Adlaw sa pagbarug nga lig-on niana nga pagsulay” (“Ang Plano ug ang Pamahayag,” Liahona, Nob. 2017, 31). Pamalandunga kini nga mga pulong samtang ikaw magtuon sa pamahayag sa pamilya niini nga semana.

I-rekord ang Imong mga Pagbati

Bisan sa wala pa kita matawo, kabahin kita sa usa ka pamilya––ang pamilya sa atong Langitnong mga Ginikanan. Sa dihang miabut ang panahon sa pagbiya sa Ilang presensya, kini tingali gayud makahupay nga mahibaloan nga dinhi sa yuta, ang mga pamilya mahimo gihapon nga kabahin sa plano sa Dios. Ang sundanan dinhi sa yuta gituyo nga sundon ang hingpit nga sundanan sa langit.

Walay mga garantiya nga ang yutan-ong mga pamilya mahimong hingpit o gani mapuslanon. Apan ingon nga gitudlo ni Presidente Henry B. Eyring, ang mga pamilya “naghatag sa mga anak sa Dios sa labing maayong higayon nga moanhi sa kalibutan uban sa bugtong gugma dinhi sa yuta nga masusama sa unsay gibati nato didto sa langit—gugma sa ginikanan” (“Pagpundok sa Pamilya sa Dios,” Liahona, Mayo 2017, 20). Nahibalo nga ang mga pamilya dili hingpit ug makasinati og mga pag-atake sa kaaway, gipadala sa Dios ang Iyang Hinigugmang Anak sa pagtubos kanato ug pag-ayo sa atong mga pamilya. Ug mipadala Siya og mga propeta sa ulahing mga adlaw sa pagpanalipod ug paglig-on sa mga pamilya. Kon kita mosunod sa mga propeta ug mobutang og hugot nga pagtuo diha sa Manluluwas, bisan tuod og ang mortal nga mga pamilya kulang sa balaang kahingpit, adunay paglaum alang sa mga pamilya––dinhi sa yuta ug didto sa langit.

Mga Ideya alang sa Personal nga Pagtuon sa Kasulatan

“Ang pamilya mahinungdanon ngadto sa plano sa Tiglalang.”

“Ang Banay: Usa ka Pamahayag ngadto sa Kalibutan” tataw nga mahitungod sa mga pamilya. Apan kini managsama mahitungod sa plano sa Dios sa kaluwasan. Usa ka paagi sa pagtuon sa pamahayag mao ang pagpangita alang sa unsay gitudlo niini mahitungod sa kinabuhi nga wala pa dinhi sa yuta, sa mortal nga kinabuhi, ug sa kinabuhi human sa kamatayon. Unsay imong makat-unan kon imong tun-an ang pamahayag niini nga paagi? Sa unsa nga paagi ikaw matabangan sa pagsabut kon ngano ang kaminyoon ug ang pamilya importante sa plano sa Dios?

Tan-awa usab sa Dallin H. Oaks, “Ang Plano ug Ang Pamahayag,” Liahona, Nob. 2017, 28–31.

“Ang kalipay diha sa kinabuhi sa pamilya labaw nga makab-ot kon gipasikad diha sa mga pagtulun-an ni Ginoong Jesukristo.”

Hunahunaa ang mga parapo unom ug pito sa ang pamahayag sa pamilya isip usa ka sundanan alang sa “kalipay diha sa kinabuhi sa pamilya.” Samtang ikaw nagbasa niini nga mga parapo, ilha ang mga baruganan sa “malampuson nga mga kaminyoon ug mga pamilya.” Dayon paghunahuna mahitungod sa usa ka relasyon sa pamilya nga gusto nimo nga lig-unon. Unsa ang gibati nimong gidasig nga buhaton? Unsaon nimo sa pag-apil sa Manluluwas diha sa imong mga paningkamot?

Tan-awa usab sa Richard J. Maynes, “Pag-establisar og usa ka Kristohanon nga Panimalay,” Liahona, Mayo 2011, 37–39; ChurchofJesusChrist.org.

Ako “adunay tulubagon sa atubangan sa Dios” alang sa paagi nga akong gitagad ang akong pamilya.

Ang pamahayag sa pamilya naglakip og nindot kaayo nga mga panalangin nga gisaad sa Langitnong Amahan alang niadtong kinsa nagsunod sa Iyang tambag. Kini naglakip usab og mapintas nga mga pahimangno alang niadtong kinsa dili mosunod. Hunahunaa ang paghimo og lista sa mga panalangin ug mga pahimangno nga imong makaplagan.

Sa unsa nga paagi ikaw nagbuhat sa tambag sa Dios diha sa pamahayag? Kon ikaw nagbarug sa atubangan sa Dios karon, unsay masaligon kang makighisgot Kaniya mahitungod sa imong mga relasyon sa pamilya? Unsay kinahanglan nimong palamboon?

Tan-awa usab diha sa Alma 5:15–22; Doktrina ug mga Pakigsaad 42:22–25; 93:39–44.

Ang mga ginikanan kinahanglan nga mopatubo sa ilang mga anak diha sa gugma ug pagkamatarung.

Makadawat ba ako sa gisaad nga mga panalangin kon ang sitwasyon sa akong pamilya dili hingpit?

Si Elder D. Todd Christofferson mitudlo: “Sa pagpahayag sa sukaranang mga kamatuoran kalabut sa kaminyoon ug pamilya mao ang dili pagbaliwala o pagpaubos sa sakripisyo ug kalampusan niadtong kansang ideyal dili maoy kasamtangang kamatuoran. … Ang tanan adunay gasa; ang tanan adunay mga talento; ang tanan makatampo sa pagpadayag sa balaang plano sa matag henerasyon. Ang daghan nga maayo, daghan nga gikinahanglan—bisan usahay ang tanan nga gikinahanglan sa pagka-karon—makab-ot sa mga kahimtang nga dili ideyal. … Uban sa pagsalig kami mopamatuod nga ang Pag-ula ni Jesukristo nagpaabut ug, sa katapusan, mobayad sa tanang paghikaw ug nawala alang niadtong modangup ngadto Kaniya. Walay usa nga gitakda nang daan nga makadawat og minus pa kay sa tanan nga aduna ang Amahan alang sa Iyang mga anak” (“Nganong Kaminyoon, Nganong Pamilya,” Liahona, Mayo 2015, 52).

Mga Ideya alang sa Pamilya nga Pagtuon sa Kasulatan ug Family Home Evening

“Ang pagkalalaki ug pagkababaye usa ka mahinungdanon nga kinaiya sa tagsa-tagsa sa kinabuhi nga wala pa dinhi sa yuta, sa pagkamortal, ug sa walay katapusan nga pag-ila ug katuyoan.”Kon kini makatabang alang sa imong pamilya sa paghisgot og doktrina kalabut sa pagkalalaki ug pagkababaye ug sama nga sekso nga pagkaibug, ang mosunod nga mga kapanguhaan mahimong makatabang: Dallin H. Oaks, “Kamatuoran ug ang Plano,” Liahona, Nob. 2018, 25–28; topics.ChurchofJesusChrist.org.

“Ang mahinungdanong plano sa kalipay.”Aron pagtabang sa imong pamilya nga makakita sa importansya sa mga pamilya diha sa plano sa Langitnong Amahan, mahimo nimong isulat ang kinabuhi nga wala pa dinhi sa yuta, mortal nga kinabuhi, ug kinabuhi human sa kamatayon sa tulo ka mga bahin sa usa ka piraso nga papel. Pagdungan og siksik sa pamahayag, ug isulat diha sa papel kon unsay inyong nakat-unan mahitungod sa matag usa niini nga mga bahin sa plano sa Dios. Nganong importante kaayo ang mga pamilya ngadto sa Dios?

“Pamilya mahiusa sa kahangturan”Matan-aw nimo ang video nga “Plan of Salvation—We’re Still a Family” sa (ChurchofJesusChrist.org). Pangitaa ang pamahayag bahin sa pamilya alang sa mga kamatuoran nga nasabtan sa batan-ong lalaki niini nga video ug nakatabang kaniya nga makabaton og hugot nga pagtuo.

“Kalipay diha sa kinabuhi sa pamilya.”Sa paghisgot kon unsaon sa pag-angkon og mas daghan pa nga “kalipay diha sa [inyong] kinabuhi sa pamilya,” makakanta kamo og dungan sa usa ka awit mahitungod sa mga pamilya, sama sa “Panimalay Mahimo nga Langit sa Yuta” (Mga Himno, nu. 186). Unsa ang atong makat-unan gikan sa awit ug gikan sa ang pamahayag sa pamilya nga modala pa og daghang kalipay sa atong pamilya? Sa unsa nga paagi kita makasiguro sa atong pamilya nga “gipasikad diha sa mga pagtulun-an sa Ginoong Jesukristo”? Paghunahuna sa pagpili og usa ka pagtulun-an nga imong gusto nga buhaton niini nga semana.

“Paglig-on sa pamilya isip sukaranan nga yunit sa katilingban.”Giunsa ni Satanas pagpaninguha ang paghuyang sa mga pamilya sa kalibutan? Unsaon nato paghimo ang atong bahin sa paglig-on sa mga pamilya? Alang sa mga ideya, tan-awa ang mensahe ni Sister Bonnie L. Oscarson “Mga Tigpanalipod sa Pamahayag bahin sa Pamilya,” ( Liahona, Mayo 2015, 14–17).

Alang sa dugang nga mga ideya sa pagtudlo sa mga bata, tan-awa sa latid [outline] karon nga semana sa Dali, Sunod Kanako—Alang sa Primary.

Gisugyot nga awit: “Panimalay Mahimo nga Langit sa Yuta,” Mga Himno, nu. 186.

Pagpalambo sa Personal nga Pagtuon

Pangitaa ang gugma sa Dios. Si Presidente M. Russell Ballard mitudlo, “[Ang] ebanghelyo mao ang ebanghelyo sa gugma—gugma alang sa Dios ug gugma alang sa usag usa” (“God’s Love for His Children,” Ensign, Mayo 1988, 59). Samtang ikaw magbasa sa ang pamahayag sa pamilya, hunahunaa ang pagsulat og mugbo o sa pagmarka sa mga ebidensya sa gugma sa Dios nga ilabi ka makahuluganon nganha kanimo.