I Alii Agavaa Uma o le Ekalesia, saunia e Emma Allebes

Tesema 6–12

O Mataupu Faavae o le Faatuatua ma le Folafolaga Aloaia 1 ma le 2

“Matou te Talitonu”

Ao e suesue i lenei vaiaso ma faia se fuafuaga e aoao atu, mafaufau pe mafai faapefea ona e fesoasoani i tamaiti o lau vasega e faamalosia lo latou talitonuga i upumoni faavae o le talalelei.

Tusi Faamaumau Ou Lagona Uunai

Valaaulia le Fefaasoaai

Togi se polo i se tamaitiiti, ma fai atu i le tamaitiiti e faasoa mai se mea na ia talitonu i ai e uiga ia Iesu Keriso po o le Tama Faalelagi. Toe fai seia tofu maua e tamaiti taitoatasi se avanoa e faasoa mai ai.

Aoao atu le Aoaoga Faavae: Tamaiti Laiti

O Mataupu Faavae o le Faatuatua

Ou te talitonu i le talalelei a Iesu Keriso.

E mafai ona e faaaogaina le Mataupu Faavae o le Faatuatua e toe iloilo faatasi ai ma tamaiti nisi o talitonuga faavae o le Ekalesia a Iesu Keriso. Aisea e taua ai le talitonu o tamaiti o loo e aoaoina i nei upumoni faigofie?

Gaoioiga e Mafai Ona Fai

• Filifili ni nai mataupu faavae o le faatuatua e te lagona e sili ona taua mo tamaiti o loo e aoaoina. Mo mataupu faavae taitasi o le faatuatua, faasoa atu se ata (tagai i le itulau o gaoioiga o lenei vaiaso) po o se tala (mai tusitusiga paia po o lou olaga) e faapupula pe faamanino ai se upumoni o loo aoaoina i lena tusiga. Tau atu i tamaiti pe aisea e taua ai lena mea moni ia te oe, ma tuu atu ia i latou e faasoa pe aisea e taua ai ia i latou.

• Saili viiga po o pese a tamaiti e mafai ona fesoasoani i tamaiti ia malamalama i se tasi pe sili atu foi o mataupu o le faatuatua. Atonu o tamaiti e mafai ona fesoasoani ia te oe e filifili. Usu faatasi pese, ma fesoasoani i tamaiti e iloa pe faapefea ona fesootai pese i mataupu faavae o le faatuatua.

Mataupu Faavae o le Faatuatua 1:9; Folafolaga Aloaia 1 ma le 2

E taitai e le Alii Lana Ekalesia e ala mai i Lana perofeta.

A o feagai tagata o le Ekalesia ma luitau eseese, e mafai ona tatou maua le toafilemu i le iloaina e naunau le Tama Faalelagi e tuuina mai faaaliga e taiala ai i tatou. Fesoasoani i tamaiti o loo e aoaoina e faamalosia lo latou faatuatua e taitaiina e le Atua le Ekalesia e ala i se perofeta soifua.

E taialaina i tatou e le Tama Faalelagi e ala i perofeta.

Gaoioiga e Mafai Ona Fai

• Faaali atu se seti o tusitusiga paia ma se ata o le perofeta soifua (po o se lomiga talu ai nei o konafesi Ensign po o le Liahona). Fesoasoani i tamaiti e fuafua po o le fea aitema e faatatau i le fuaitau “i mea uma na faaali mai e le Atua” ma po o le a le mea e faasino i ai le fuaitau “mea uma ua ia faaali mai nei” (Mataupu Faavae o le Faatuatua 1:9).

• Tape moli, ma tuu se ata o Iesu Keriso i luga o le laupapa. Faasusulu se moliuila i luga o le ata e faamatala ai le ala e fesoasoani ai le perofeta, e pei o le moliuila, ia tatou iloa atili ai le Faaola.

• Saili ni auala faigofie e fai ai se mea, e pei o se meaai poʻo se meataalo. Mulimuli i faatonuga ma tamaiti, ma faamatala atu e ala mai i le perofeta, ua tuuina mai ai e le Tama Faalelagi faatonuga ia i tatou e toe foi atu ai e mau faatasi ma Ia. O a nisi o mea na aoaoina ai i tatou e le perofeta ina ia mafai ai ona tatou toe foi atu i le Atua?

Aoao atu le Aoaoga Faavae: Tamaiti Matutua

O Mataupu Faavae o le Faatuatua

O Mataupu Faavae o le Faatuatua e aoao mai ia i tatou upumoni faigofie o le talalelei.

O nisi taimi o le talalelei e foliga mai e tele ma faigata, ae maise lava i tamaiti. O Mataupu Faavae o le Faatuatua e mafai ona fesoasoani i tamaiti ia malamalama, i se auala faigofie, i nisi o upumoni faavae tatou te talitonu i ai o ni Au Paia o Aso e Gata Ai.

Gaoioiga e Mafai Ona Fai

• Valaaulia tamaiti taitoatasi e filifili se upu autu po o se fasifuaitau mai se tasi o mataupu faavae o le faatuatua ma faasoa atu i le vasega. Ona tuu atu lea i isi tamaiti e mate (pe sue) po o le fea mataupu faavae o le faatuatua e maua mai i le upu poo le fuaitau. Fai atu i tamaiti e faasoa mai pe aisea e taua ai le upu poo le fuaitau na latou filifilia.

• I ni nai aso muamua atu, fai atu i ni nai tamaiti e sauniuni e faasoa atu i le vasega se savali puupuu e uiga i le mataupu faavae o le faatuatua latou te fiafia i ai. O le latou feau e mafai ona aofia ai se ata, o se pese, o se tala po o se aafiaga, po o isi tusitusiga paia. Valaaulia nei tamaiti e faasoa mai pe aisea latou te fiafia ai i le mataupu faavae o le faatuatua na latou filifilia.

• Tusi i luga o le laupapa ni fesili e ono i ai i tagata e uiga i o tatou talitonuga e mafai ona taliina i se tasi o mataupu faavae o le faatuatua. Fai i tamaiti e fai se fesili ma saili se mataupu faavae o le faatuatua e taliina. Tuu atu ia i latou e faataitai le taliina o le fesili e faaaoga ai le mataupu faavae o le faatuatua.

Folafolaga Aloaia 1 ma le 2

E fesoasoani perofeta ia i tatou ia iloa le finagalo o le Tama Faalelagi.

O leFolafolaga Aloaia 1 ma le 2 o ni faataitaiga sili ona lelei o auala e maua ai e perofeta ma galulue ai i faaaliga mai le Atua. E mafai faapefea ona e fesoasoani i tamaiti ia faateleina lo latou faatuatua e taitaiina e le Atua Lana Ekalesia e ala i faaaliga?

Gaoioiga e Mafai Ona Fai

• Fai i tamaiti e sue se mataupu faavae o le faatuatua o loo aoao mai e uiga i perofeta po o faaaliga. Valaaulia i latou e faasoa mai pe aisea latou te faafetai ai ua i ai so tatou perofeta soifua. Faasoa atu ni faataitaiga o auala na taialaina ai e le Atua le Ekalesia e ala i faaaliga, e aofia ai faataitaiga o loo faamatalaina i totonu o le Folafolaga Aloaia 1 ma le 2, ma tuu atu i tamaiti e fetufaai mai ni faataitaiga latou te masani ai (e pei o suiga lata mai i polokalama a le Ekalesia po o aiaiga).

• Tuu atu i tamaiti mau nei: 2 Nifae 26:33; Iakopo 2:27. Valaaulia i latou e faamautinoa po o le fea le mau e talafeagai ma le Folafolaga Aloaia 1 (lea na mafua ai ona taofia le faaipoipoga i avā e toatele) ma le mau e fesootai ma le Folafolaga Aloaia 2 (lea na mafai ai ona maua faamanuiaga o le perisitua ma le malumalu e tagata o ituaiga uma). Tuu atu lau molimau e faaali mai e le Alii Lona finagalo i perofeta anamua ma aso nei.

• Tusi le faamatalaga lenei mai le Folafolaga Aloaia 1 i luga o le laupapa: “E tatau ona e faamasino mo oe lava.” O le a le uiga o le faʻamasino mo i tatou lava pe a maua e le perofeta faaaliga? Ina ia fesoasoani ia i latou e tali lenei fesili, e mafai ona e faasoa atu lenei faamatalaga mai ia Peresitene Russell M. Nelson: “E mafai ona e iloa mo oe lava le mea moni ma le mea e le moni e iloatino ai musumusuga a le Agaga” (“The Love and Laws of God” [Brigham Young University devotional, Sept. 17, 2019], 4, speeches.byu.edu).

• Tusi pe faaali se ata o le lalolagi i luga o le laupapa. Valaaulia se tasi o tamaiti e faitau parakalafa mulimuli e lua o le tusi a le Au Peresitene Sili na tusia i le aso 8 o Iuni, 1978 o loo sii mai i le Folafolaga Aloaia 2 (e amata i le “Ua faafofogaina e Ia a matou talosaga …”). Fai atu i tamaiti e faitau pe faafia ona vaaia ia upu nei “faamanuiaga” ma “faamanuiaga e tele.” O a faamanuiaga e maua mai le talalelei? Valaaulia tamaiti e lisi i luga o le laupapa i tafatafa o le ata tusi po o ata o le lalolagi. Tuu atu lau molimau e alofa le Atua i Ana fanau uma i le lalolagi atoa ma e finagalo e faamanuia i latou i Lana talalelei.

Uunaia le Aoaoina i le Aiga

Fesoasoani i tamaiti e filifili se mataupu faavae o le faatuatua latou te mananao e tauloto, ma fesoasoani ia latou faia se fuafuaga e faia ai.

Faaleleia o Lo Tatou Aoao Atu

E fiafia tamaiti e faasoa mai mea o loo latou aoaoina. E ui ina laiti i latou, e mafai e tamaiti ona faamalolosia le faatuatua o tagata o o latou aiga. Fautuaina ia tamaiti e faasoa atu i o latou aiga se mea sa latou aoaoina i le Peraimeri. (Tagai Aoao Atu i le Ala a le Faaola,30.)