o se aiga

13–19 Tesema

O Le Aiga: O Se Folafolaga i le Lalolagi

“O Le Aiga O Le Totonugalemu Lea o le Fuafuaga a Lē Foafoa”

O a mataupu faavae e te maua i le “O Le Aiga: O Se Folafolaga i le Lalolagi” e te lagona le musuia e faasoa atu i tamaiti? Ao e sauniuni e aoao atu, ia faamaumauina uunaiga e te maua mai le Agaga.

Tusi Faamaumau Ou Lagona Uunai

aikona o le faasoa

Valaaulia le Fefaasoaai

Valaaulia tamaiti e aumai pe tusi se ata o o latou aiga e faasoa mai i le vasega. Fai i tamaiti e faasoa mai se mea latou te fiafia ai e uiga i o latou aiga pe na latou aoaoina e uiga i aiga i lenei vaiaso.

aikona o le aoao atu

Aoao atu le Aoaoga Faavae: Tamaiti Laiti

E taua aiga i le fuafuaga a le Tama Faalelagi.

E mafai faapefea ona e faaaogaina le folafolaga i le aiga e fesoasoani ai i tamaiti ia malamalama i le taua o aiga i le fuafuaga a le Atua?

Gaoioiga e Mafai Ona Fai

• Fesoasoani i tamaiti e mafaufau i mea e sili ona taua latou te mananao e taʻu atu i tagata uma. Faaali atu i tamaiti se kopi o le “O le Aiga: O se Folafolaga i le Lalolagi,” ma faamatala atu na tusia e perofeta ma aposetolo lenei folafolaga e ta’u atu ai i tagata uma le taua o aiga i le Tama Faalelagi. Fesili atu i tamaiti pe aisea latou te manatu ai e taua tele aiga i le Tama Faalelagi. Faasoa atu se mea mai le folafolaga e te lagona e tatau i tagata uma ona iloa.

• Faaali atu i tamaiti se ata o se malumalu ma se ata o se aiga. Tuu atu i tamaiti e uu ata ao e faitauina le fuaiupu mulimuli o le parakalafa lona tolu o le folafolga i le aiga. Fai atu ia i latou e faasino atu i le ata sao pe a e faitauina upu “malumalu” ma “aiga.” Molimau atu ona o sauniga o le malumalu, e mafai ai ona tuufaatasia o tatou aiga e faavavau. Usu faatasi se pese e faatatau i aiga e faavavau, e pei o le “Ou Te Fia Vaai i le Malumalu” (Tusipese a Tamaiti,99), ma fesoasoani i tamaiti e faalogologo mo upu nei “malumalu” ma le “aiga.”

• Fesili atu i tamaiti pe o le a le mea e mafai ona tatou faia e faʻamalosia ai mea e pei o o tatou nifo, o tatou tino, poʻo se fale. O le a se mea e mafai ona tatou faia e faamalosia ai o tatou aiga? Fesoasoani i tamaiti ia malamalama i mataupu faavae e taitai atu ai i le fiafia i le olaga faaleaiga, o loo maua i le parakalafa fitu o le folafolaga i le aiga (tagai foi i le itulau o gaoioiga o lenei vaiaso). Fesoasoani i tamaiti e fuafua auala latou te faamalolosia ai o latou aiga.

  o se aiga o loo kukaina ni taumafataga

  E tatau i matua ona tausia a latou fanau i le alofa ma le amiotonu.

O au o se atalii po o se afafine agaga faapelepele o ni matua faalelagi.”

O le folafolaga i le aiga e aoao mai o i tatou uma lava o fanau a ni Matua Faalelagi ma ua tatou i ai iinei i le lalolagi ia avea atili e faapei o i Laua.

Gaoioiga e Mafai Ona Fai

• Usu faatasi le “O Au o se Atalii o le Atua” (Tusipese a Tamaiti, 2–3). Ona togi lea o se polo po o se mea vaivai i se tamaitiiti ao e fai atu, “Ou te iloa se atalii o le Atua e igoa ia [igoa o le tamaitiiti].” Fai atu i le tamaitiiti e togi le mea faitino i se isi tamaitiiti, ma fai atu upu lava ia e tasi ae tuu i ai le igoa o lena tamaitiiti. Ia toe fai seia oo ina tofu avanoa uma le vasega. Molimau atu o tamaiti taitoatasi o se “atalii po o se afafine agaga faapelepele a ni matua faalelagi.”

• Mafaufau i ni auala e mafai ona e faamalamalama atu ai, ona o i tatou o fanau a ni Matua Faalelagi, e mafai ona tatou avea faapei o i Laua. Mo se faʻataʻitaʻiga, faʻaali atu ni ata o manu ma a latou pepe, pe o oe ma ou matua poʻo tamaiti, ma fesoasoani i tamaiti e vaʻai i mea e tutusa ai. Molimau atu e pei lava ona tuputupu ae pepe e faapei o o latou matua, e mafai ona avea i tatou i se aso e pei o o tatou Matua Faalelagi.

aikona o le aoao atu

Aoao atu le Aoaoga Faavae: Tamaiti Matutua

O aiga o le totonugalemu lea o le fuafuaga a le Tama Faalelagi.

O le folafolaga i le aiga na tuuina mai e toe faamautu ai upumoni e faavavau e uiga i le aiga. Mafaufau pe o le a faapefea ona e fesoasoani i tamaiti ia loloto a latou molimau e uiga i nei upumoni.

Gaoioiga e Mafai Ona Fai

• Fesili atu i tamaiti pe latou te iloa po o ai na tusia le folafolaga i le aiga. (I lana savali “O Le Fuafuaga ma le Folafolaga” [Ensign po o le Liahona, Nov. 2017, 28–31], na faamatala ai e Peresitene Dallin H. Oaks le auala na tusia ai.) Fesoasoani i tamaiti ia malamalama i le uiga o upu “folafola atu ma le faamaoni” i le parakalafa amata. Fai atu ia i latou e faasoa mai o latou manatu e uiga i le mafuaaga e mananao ai perofeta ma aposetolo e “folafola atu ma le faamaoni” upumoni e uiga i le aiga i o tatou aso.

• Faasoa atu ni nai faʻamatalaga mai le folafolaga i le aiga e sili ona taua ia te oe. Valaaulia tamaiti e faasoa mai o latou lagona e uiga i na upumoni. Mata e ese faapefea o tatou olaga pe ana faapea tatou te le iloa nei mea? Usu faatasi se pese e fesootaʻi ma upumoni o loo maua i le folafolaga, e pei o “O Le a Ou Mulimuli I Le Fuafuaga a le Atua” po o le “E Mafai Ona Faavavau Aiga” (Tusipese a Tamaiti, 86-87, 98).

• Faaali atu i tamaiti ni ata (pe valaaulia i latou e tusi ni ata) e faaalia ai mea moni o loo maua i totonu o le folafolaga i le aiga. E mafai ona avea ma ata o se malumalu, o se aiga o tatalo pe taaalo faatasi, po o se ulugalii o loo faaipoipo. Valaaulia tamaiti e saili fuaiupu i le folafolaga i le aiga e fetaui ma ata. O a ni mea o aoao mai e nei fuaiupu ia i tatou?

• Saunia ni fesili e mafai ona tali i totonu o le folafolaga i le aiga, e pei o le “O a ni lagona o le Atua e uiga i le faaipoipoga?” ma le “O le a se mea e maua ai e se aiga le fiafia?” Tuu atu i tamaiti taitasi e fai se fesili, ma fesoasoani ia i latou e sailia tali i le folafolaga.

• Valaaulia se tina ma se tamā o se tasi o tamaiti e faasoa mai i le vasega pe faapefea ona latou “fesoasoani le tasi i le isi o se paaga tutusa” i o latou “tiutetauave paia” i o latou aiga. Valaaulia tamaiti e talanoaina mea e mafai ona latou faia i le taimi nei e saunia ai e avea ma ni avā ma ni tane, tina ma ni tamā amiotonu.

E sili ona fiafia aiga pe a latou mulimuli ia Iesu Keriso.

E alofa le Tama Faalelagi i Ana fanau taitasi, ma e finagalo o Ia e fiafia i latou. E mafai faapefea ona e fesoasoani i tamaiti o loo e aoaoina ina ia malamalama o le fiafia moni e sau mai le mulimuli i aoaoga ma faataitaiga a lo tatou Faaola o Iesu Keriso?

Gaoioiga e Mafai Ona Fai

• Tusi se ata lapoa o se fatu i luga o le laupapa, ma valaaulia tamaiti e faitau le parakalafa fitu o le folafolaga. Fai atu ia i latou e vaavaai mo mea e mafai ona latou faia e fesoasoani ai i o latou aiga ia fiafia, ma tusi a latou tali i totonu o le fatu. Valaaulia tamaiti e filifili se mea e mafai ona latou galulue ai ina ia faateleina le fiafia i o latou aiga.

• Valaaulia tamaiti e faasoa mai ni aafiaga ina ua latou lagonaina le alofaina e se tagata o le aiga. Fesoasoani i tamaiti ia iloa mataupu faavae mai le parakalafa fitu o le folafolaga e mafai ona fesoasoani i tagata o le aiga ia lagona le alofagia. E faapefea e lo tatou malamalama i le talalelei a Iesu Keriso ona aafia ai le auala tatou te tausia ai o tatou aiga?

• Fesili atu i tamaiti pe o le a se latou tala e fai pe afai e fesili mai se uo ia i latou pe aisea e taua ai le faaipoipo poʻo le maua o se fanau. E faapefea ona tatou fesoasoani i lenei uo ia malamalama i le taua o aiga i le Tama Faalelagi? Fesoasoani i tamaiti e sue faʻamatalaga i totonu o le folafolaga i le aiga e mafai ona fesoasoani; tagai foi i le vitio “What is the Purpose of Family?” (ChurchofJesusChrist.org).

aikona o le aoaoina

Uunaia le Aoaoina i le Aiga

Valaaulia tamaiti e faia se fuafuaga e faia ai se mea e faamalosia ai o latou aiga. Uunaia i latou e faasoa atu a latou fuafuaga ma o latou aiga i le fale.

Faaleleia o Lo Tatou Aoao Atu

Ia nofouta. Ao e aoao atu upu moni o loo aoaoina i totonu o le folafolaga i le aiga, faamolemole ia nofouta o le toatele o tamaiti o loo tausia i aiga e le fetaui ma manatu o loo faamatalaina i le folafolaga. Ia faaeteete ia aua nei fai atu se mea atonu latou te lagona ai le lotovaivai po o le leai o se faamoemoe.

itulau o gaoioiga: e taua aiga i le fuafuaga a le Tama Faalelagi