Vunau kei na Veiyalayalati 2021
iDusidusi ni Gauna ni Lagalagasere

“iDusidusi ni Gauna ni Veiwasei kei na Nodra Vakaitavi na Gone ena Soqoni ni Sakaramede,” Lako Mai, Mo Muri Au—Baleta na Lalai: Vunau kei na Veiyalayalati 2021 (2020)

“iDusidusi ni Gauna ni Lagalagasere,” Lako Mai, Mo Muri Au—Me Baleti Ira na Lalai: 2021

lagasere o ira na gone

iDusidusi ni Gauna ni Lagalagasere kei na Nodra Vakaitavi na Gone ena Soqoni ni Sakaramede

Kemuni na Mataveiliutaki ni Lalai kei na iLiuliu ni Sereivakatagi,

Na sere ni Lalai sa dua na iyaragi kaukauwa me ra vukei kina na gone me ra vulica me baleta na ituvatuva ni bula marau nei Tamada Vakalomalagi kei na yavu ni dina ni kosipeli i Jisu Karisito. Ni ra lagata na gone baleta na ivakavuvuli ni kosipeli, ena vakadinadinataka na Yalo Tabu na kedra dina. Na qaqana kei na ivakatagi ena tiko ga ena nodra vakasama kei na lomadra na gone ena nodra bula taucoko.

Vakasaqara na veivuke ni Yalotabu ena nomu vakavakarau mo vakavulica na kosipeli ena sereivakatagi. Ni wasea na nomuni ivakadinadina me baleta na dina o ni dau lagata. Ni vukei ira na gone me ra raica e semati vakacava na sereivakatagi kei na veika era sa vulica ka sotava tiko e vale kei na kalasi ni Lalai. Era na vakalougatataki na gone kei na nodra matavuvale mai na nomuni igu yalodina.

Keitou lomani kemuni ka vakadewataka na neitou vakavinavinaka me baleta na veiqaravi yalodina o ni solia tiko me ra maroroi ka taqomaki kina na noda gone talei.

Na Mataveiliutaki Raraba ni Lalai

iDusidusi me Baleta na Vakaitavi ena Soqoni ni Sakaramede

Ena veidusimaki ni bisopi se peresitedi ni tabana, me na dau vakayacori ena ikava ni vulatolu ni yabaki na nodra vakaitavi na gone ena soqoni ni sakaramede. Ni o ni mataveiliutaki ni Lalai kei na iliuliu ni sereivakatagi, tuva mo ni sota ena itekivu ni yabaki kei daunivakasala ena matabisopi ka raica tiko na Lalai me tekivu na veivosakitaki na kena tuvanaki na vakaitavi. Ni o ni sa vakacavara na ituvatuva, taura na nona veivakadonui baleti ira.

Na tautau e dodonu me vakatarai ira na gone me ra vakaraitaka na ka era sa vulica kei na nodra matavuvale me baleta na kosipeli i Jisu Karisito mai vale kei na Lalai, oka kina na sere ni Lalai era lagata tiko ena loma ni yabaki. Vakasamataka ena yalomasumasu na ivakavuvuli ni kosipeli cava kei na sere e tokona na veika era sa vulica. Mo dau vola toka ena loma ni yabaki taucoko, na nodra vosa kei na veika era sa cakava na gone me rawa ni vakayagataki ena gauna ni nodra vakaitavi. Sureti ira na gone me ra wasea na ivolanikalou, italanoa, kei na nodra ivakadinadina me baleta na iVakabula kei na nona kosipeli ena gauna ni vakaitavi. Ni o tuvanaka na tautau, vakasamataka na sala eso e rawa ni vukea na ivavakoso me vakanamata vua na iVakabula kei na Nona ivakavuvuli.

Na tabanilotu era lewe lailai kina na gone sa rawa ni vakasamataki na sala ka rawa ni vakaitavi kina na lewe ni matavuvale kei ira na luvedra. Me na qai tinia e dua vei iratou na matabisopi na soqoni ena dua na itukutuku lekaleka.

Ni ko sa vakarautaka tiko na tautau, mo nanuma tiko na idusidusi eso oqo:

  • Na vakatovotovo me kakua ni kauta tani vakalevu na gauna ni kalasi ni Lalai se matavuvale.

  • E sega ni veiganiti kei na soqoni ni sakaramede na iyaloyalo, isulu ni drama, kei na itukutuku mai na monalivaliva.

Raica na iVoladusidosi 2: Veiliutaki ena Lotu, 11.5.3, ChurchofJesusChrist.org.

iDusidusi ni Gauna ni Lagalagasere

5 na miniti (mataveiliutaki ni Lalai): iDolamasu, na ivolanikalou se ni yavu ni vakabauta, kei na dua na vosa

20 na miniti (na iliuliu ni sereivakatagi): Gauna ni Lagalagasere

Na inaki ni gauna ni lagasere o ya mera vukei na gone me vakatitobutaka na nodra vakabauta na Tamada Vakalomalagi kei Jisu Karisito mai na sere kei na ivakatagi. Na mataveiliutaki ni Lalai kei na iliuliu ni sere kei na ivakatagi e digitaka na sere e na veivula yadua vata kei na inaki oqo. Na sere e dodonu me vaqaqacotaki kina na ivakavuvuli era sa vulica tiko na gone me baleta na kosipeli i Jisu Karisito ena nodra dui kalasi ka vakakina ena vuvale. E dua na lisi ni sere ena vaqaqacotaki ira na ivakavuvuli oqo e okati ena idusidusi oqo. O ira na sere oqori era vakaturi talega ena ituvatuva ena Lako Mai, Mo Muri Au—Me Baleti Ira na Lalai.

Ni ko vakavulica na sere eso vei ira na gone, sureti ira me ra wasea na veika era sa vulica me baleta na italanoa kei na ivakavuvuli vakaivunau e vakavulica na sere. Sa rawa mo ni railesuva na ituvatuva ni Lako Mai, Mo Muri Au—Me Baleti Ira na Lalai ka ra vulica tiko na gone ena nodra kalasi. Oqo ena vukei kemuni mo ni kidava rawa na italanoa kei na ivakavuvuli era sa vulica tiko me rawa ni o ni vakasamataka me tokoni vakacava na nodra vuli mai na sereivakatagi.

Ena gauna ni lagalagasere, e rawa talega ni o ni railesuva na sere era sa vulica oti na gone kei na sere era marau me ra lagata. Ni ko railesuva tiko, sureti ira na gone me ra wasea na nodra vakasama kei na nodra vakila na dina e tiko ena sere.

Na iVolanisere na Gonelalai sa yavu ni ivurevure me baleta na sereivakatagi ena Lalai. Na sere ni lotu kei na sere era tiko ena iTokani kei na Liaona era veiganiti talega. Me vagauna na nodra rawa ni lagata talega na gone na sere ni vanua se olidei e veiganiti ena Sigatabu kei na nodra yabaki ni bula na gone. Na vakayagataki ni duatani mai na sere ena Lalai e dodonu me na vakadonui mai vei iratou na matabisopi (raica na na iVoladusidusi 2: Veiliutaki ena Lotu, 11.2.4).

o ira na gone era lagasere ena soqoni ni sakaramede

Rai vakararaba ni Lalai

Ena veimacawa, na Lalai e oka kina na:

Gauna ni Lagalagasere:25 na miniti

Veisau:5 na miniti

Kalasi:20 na miniti

O ira na iliuliu ni Lalai kevaka era lewe levu me ra na wasei ira na gone ki na rua na ilawalawa ka me dua na ilawalawa ena kalasi ni Lalai ka dua ena gauna ni lagalagasere. Ka qai veisau na rua na ilawalawa oqo. Ena kena ituvaki vakaoqo, o ira na iliuliu ni Lalai era gadreva beka me ra moica na gauna ka vakaraitaki toka e cake me rauta na nodra ituvaki.

Sereivakatagi ena Gauna ni Lagalagasere

Janueri

Feperueri

Maji

Epereli

Me

June

Julai

Okosita

Sepiteba

Okotova

Noveba

Tiseba

Vakayagataki ni Sereivakatagi me Vakavulici kina na iVunau

Mo nanuma tiko ni sa sega na inaki ni gauna ni lagasere ga me vakavulici ira na gone me ra laga vakacava, ia mera vakayagataka na sere kei na ivakatagi me vakatitobutaka na nodra vakabauta na Tamada Vakalomalagi kei Jisu Karisito. Na vakasama eso oqo e rawa me vakauqeti iko ni ko tuvanaka na sala me caka kina.

Vulici i Tamada Vakalomalagi kei Jisu Karisito. Sureti ira na gone me ra wasea na veika era sa vulica me baleta na Tamada Vakalomalagi kei Jisu Karisito mai na sere o lagata. Sureti ira mera wasea na nodra vosa taleitaki mai na sere e vakamacalataki kina na Kalou kei na iVakabula.

Wilika na tiki ni ivolanikalou veisemati. Ki na vuqa na sere mai na iVolanisere ni Gonelalai kei na serenilotu, era cavuti kina na tiki ni ivolanikalou veisemati. Vukei ira na gone me wilika e dua na malanivosa ni ivolanikalou, ka veivosakitaka me baleta na kena semati ki na sere o lagata. Ko rawa talega ni vola e vica na tiki ni ivolanikalou ena papa ni volavola ka sureti ira na gone me ra vakasotara vata e dua na idusidusi ki na dua na sere se e dua na tikina mai na dua na sere.

Vakalewena na vanua lala Vola e dua na tiki ni sere ena papa ka yali kina e vica na vosa bibi. Qai kerei ira na gone me ra lagata na sere, ka vakarorogo ki na vosa mena vakatawana na vanua lala. Ni ra vakalewena tiko na vanua e lala yadua, veitalanoataka na ivakavuvuli cava ni kosipeli o sa vulica mai na vosa me vakaleweni.

o ira na gone era lagasere ena soqoni ni sakaramede

Qaqanivosa mai vei Ira na iLiuliu ni Lotu Sureti ira na gone me ra vakarogoca e dua na qaqanivosa mai na dua na iliuliu ni Lotu e vakavulica na ivakavuvuli ni kosipeli vata ga ena sere ni Lalai. Kerei ira me ra laveta na ligadra ni ra rogoca e dua na ka e vukei ira me ra kila na dina ka ra lagata tiko. Kerei ira me ra wasea na veika era rogoca.

Vakadinadinataka Wasea vakalekaleka na nomu ivakadinadina vei ira na gone me baleta na dina ni kosipeli ka kunei ena sere ni Lalai. Vukea me ra kila na gauna ni lagasere e dua na sala e rawa ni ra wasea kina na nodra ivakadinadina ka vakila na Yalotabu.

Tucake mo dua na ivakadinadina Sureti ira na gone me ra veivukevuke ni tucake ka wasea na veika era sa vulica mai na sere era lagata se na veika era vakila me baleta na dina e vakavulici tiko ena sere. Tarogi ira ena veika era vakila ni ra lagata na sere, ka vukei ira mera raica rawa na veiyavalati ni Yalo Tabu.

Vakayagataka na iyaloyalo. Kerei ira na gone me ra vukei iko vakasaqara se bulia na iyaloyalo me lako vata kei na vosa bibi se malanivosa mai na sere. Sureti ira mera wasea e semati vakacava na iyaloyalo ki na nodra sere kei na cava e vakavulica tiko na sere. Me kena ivakaraitaki, kevaka o vakavulica tiko na sere “Ena Lesu Tale Beka Mai” (iVolanisere ni Gonelalai, 46), o rawa ni biuta na iyaloyalo ena loma ni rumu me ra vakatakarakarataka na vosa bibi mai na sere (me vakataka na agilosi, uca cevata, kei na kalokalo). Mera qai kumuna vata na gone ka taura cake ena kena ituvatuva dodonu ni ko ni lagata vata tiko na sere.

Wasea e dua na lesoni vakaraitaki. Sa rawa mo vakayagataka e dua na ka me vakauqeta na veitalanoa me baleta e dua na sere. Me kena ivakaraitaki, vakamacalataka ni tau na uca na sere “When I Am Baptized” (Children’s Songbook, 103). O rawa ni vakaraitaka vei ira na gone e dua na iyaloyalo ni uca se e dua na bilo wai ka tukuna ni papitaiso kei na Yalo Tabu e vakasavasavataka na yaloda me vaka na wainiuca vakasavasavataka na vuravura; oqo ena muataki ki na dua na veivosaki me baleta na veivakalougatataki ni noda papitaiso kei na ciqomi ni isolisoli ni Yalo Tabu.

Sureti ira me ra wasea na veika era sotava yadua. Vukei ira na gone me ra semata na ivakavuvuli e vakavulici tiko ena sere vata kei na veika era sa sotava vata kei na vei ivakavuvuli oqori. Me ivakaraitaki, ni bera ni o lagata “I Love to See the Temple” (Children’s Songbook,95), e rawa mo kerei ira na gone me ra laveta na ligadra kevaka era sa raica e dua na valetabu. Sureti ira me ra nanuma ni ra lagata tiko me baleta na veika era sa vakila ni ra raica e dua na valetabu.

Taro. Era tu e vuqa na taro e rawa ni o taroga ni o ni lagalaga sere tiko. Me ivakaraitaki, ko rawa ni tarogi ira na gone na cava era sa vulica mai na qaqa ni sere yadua. E rawa talega ni o kerei ira me ra vakasamataka na taro ka sauma mai na sere. Oqo na rawa ni veimuataki ki na dua na veivosaki me baleta na dina e vakavulici tiko ena sere.

Vakarogoca na isau ni taro Kerei ira na gone mera vakarogoca na isau ni taro. Me kena ivakaraitaki, na sere “Tala Mai Na Luvena” (iVolanisere ni Gonelalai, 20) e tiko kina e vica na taro kei na kena isau. O na tarogi ira na gone na taro ka mera qai vakarogoca na kena isau ni ra lagasere tiko.

Vukei Ira na Gone Me Ra Vulica ka Nanuma Tiko na Sere ni Lalai

Era na vulica na gone na sere ni ra rogoca ka laga tale tiko. Mo dau lagata na qaqani dua na sere vou vei ira na gone—ka kakua ni wilika se cavuqaqataka ga vei ira. Oqo ena vukei ira na gone me ra semata na kena ilagalaga ki na qaqana. Ni vakavulici oti e dua na sere, talelesuva ena vuqa na kena iwalewale marautaki ena loma taucoko ni yabaki. E ra sa tu kina eso na vakasama me ra vukei kina na gone me ra vulica ka talelesuva na sere eso.

Vakaraitaka na rorogo. Me vukei ira na gone me ra vulica na ilagalaga ni dua na sere, vakababataka na ligamu, ni o lagata tiko na qaqana, laveta cake na ligamu ni lako cake na domo ka biuta sobu mai ni lutu sobu na domo.

Voqa. Sureti ira na gone me ra na nomu voqa ena nodra vakatotomuria na ka o sa lagata. Lagata vei ira na gone e dua na malanivosa lekaleka se iyatuvosa, ka mera qai lagata lesu mai vei iko.

Vakayagataka na duidui. Lagata na sere ena veisala duidui eso, me vaka na vakasolokakana, vagudru, sauvaka na kena ividi, vakaduiduitaka na kena itautau, se lagasere ni o dabe se tucake. O rawa talega ni cakava e dua na kiube ena pepa ka ena yasana yadua, vola kina na ivakarau duatani ni kena lagati. Sureta e dua na gone me vaqiqica na kiube me vakatulewataka me ra lagata vakacava o ira na gone na sere.

Lagasere vakailawalawa. Solia vei ira na kalasi yadua se tamatayadua e dua na malana me ra lagata ni ra tucake tu, me ra qai veiveisau me yacova ni ra sa lagata na kalasi yadua se tamatayadua na veimalanivosa yadua.

Vakayagataka na cakacaka. Sureti ira na gone me ra vakasamataka na cakacaka ni liga rawarawa me vukea na nodra nanuma tiko na vosa kei na itukutuku ni dua na sere. Me kena ivakaraitaki, ni lagati na “Rokovi, Lomani” (iVolanisere ni Gonelalai, 11), sa rawa mo sureti ira na gone me ra roqota na ligadra, cuvara na uludra ka tara na seredra ni ra sa lagata na laini veiganiti ena sere.

Lagasere na goneyalewa, lagasere na gonetagane. Droinitaka e dua na iyaloyalo ni dua na gonetagane kei na dua na iyaloyalo ni dua na goneyalewa lailai. Ena nomu talelesuva e dua na sere, taura cake tu e dua na iyaloyalo me vakaraitaka o cei mera lagata na iwase ni sere oya.

Viri ki na basikete Biuta eso na basikete nabataki se so tale na koniteina e mata ni rumu—me levu na koniteina me rauta na qaqa ni dua na sere digitaki. Sureta e dua vei ira na gone me viritaka e dua na taga ni pinati se tiki ni pepa ki loma ni dua na koniteina nabataki se volekata. Me ra lagata na gone na qaqana ka naba vata kei na koniteina.

Vakasotara na iyaloyalo kei na dua na malanivosa. Vola na laini yadudua ni dua na sere ena duidui tiki ni pepa, ka kunea e dua na iyaloyalo e matataka tiko na laini yadudua. Biuta na iyaloyalo ena dua na yasa ni rumu kei na tikinipepa ni vosa ena yasana kadua. Lagata na sere, ka kerei ira na gone me ra vakasotara na iyaloyalo ki na qaqana.

Bulia na ivolakabi Vakaraitaka tu na ivolakabi ena veivosa mai na qaqana se iyaloyalo ka matataka na dui vosa. Ni ra lagasere tiko na gone, ubia eso na vosa se na iyaloyalo me yacova ni ra sa rawa ni lagata na qaqana taucoko ka sega na ivolakabi. Sa rawa talega mo sureti na gone me ra vukei iko mo cakava na ivolakabi.