dagiti ubbing nga agkankanta

Dagiti Pangiturong para iti Oras ti Panagkanta ken Pabuya dagiti Ubbing iti Miting iti Sakramento

Patpatgenmi a Panguluen iti Primary ken Lider iti Musika,

Dagiti kanta iti Primary ket nabileg a ramit a makatulong kadagiti ubbing a masursuruan maipapan iti plano ti Nailangitan nga Ama iti kinaragsak ken dagiti pundasion iti kinapudno ti ebanghelio ni Jesucristo. Kabayatan ti panagkanta dagiti ubbing maipapan kadagiti pagbatayan ti ebanghelio, paneknekanto ti Espiritu Santo maipapan iti kinapudno dagitoy. Agtalinaedto dagiti balikas ken musika iti pampanunot ken puspuso dagiti ubbing iti unos ti panagbiagda.

Ikarigatam a gun-oden ti tulong ti Espiritu bayat ti panagsaganam a mangisuro iti ebanghelio babaen iti musika. Ibinglaymo ti pammaneknekmo maipapan kadagiti kinapudno a kantaenyo. Tulongam dagiti ubbing a mangkita no kasano a mainaig ti musika iti no ania dagiti masursuro ken mapadpadasanda iti pagtaengan ken kadagiti klase iti Primary. Maparaburanto dagiti ubbing ken dagiti pamiliada babaen kadagiti napasnek a panagkagumaanmo.

Ay-ayatendakayo ket agyamankami iti naanep a panagserbiyo tapno mapapigsa ken masaluadan dagiti napapateg nga annaktayo.

Ti Sapasap a Panguluen ti Primary

Dagiti Pangiwanwan para iti Pabuya [Presentation] iti Miting iti Sakramento

Babaen ti panangiturong ti bishop, gagangay a maang-angay ti pabuya dagiti ubbing iti miting iti sakramento kabayatan ti maikapat a kuarter ti tawen. Kas panguluen ti Primary ken lider iti musika, makipagurnos a makimiting a nasapsapa iti tawen iti mamagbaga [counselor] iti bishopric a mangimaton iti Primary tapno marugian a pagsasaritaan dagiti plano para iti pabuya. No nakumpletoyon dagiti plano, gun-odenyo ti pananganamongna para kadagitoy.

Ti pabuya ket mangipalubos kadagiti ubbing a mangidatag no ania dagiti nasursuroda maipapan iti ebanghelio ni Jesucristo manipud iti Doktrina ken Katulagan iti pagtaengan ken iti Primary, agraman dagiti kanta iti Primary a kinantada kabayatan ti tawen. Nainkararagan nga ibilangmo no ania dagiti pagbatayan ti ebanghelio ken kanta a mangsuporta no ania ti nasursuroda. Iti unos ti tawen, isuratmo dagiti bitla ken bukod a padas dagiti ubbing para iti mabalin a pangusaran iti pabuya. Awisenyo dagiti ubbing a mangibinglay kadagiti nasantuan a kasuratan, estoria, ken dagiti pammaneknekda iti Mangisalakan ken iti ebangheliona iti presentasion. Kabayatan ti panagplanoyo iti pabuya, panunoten dagiti wagas a makatulong daytoy iti kongregasion a mangipokus iti Mangisalakan ken dagiti kinapudno nga insublina kadagiti ud-udina nga aldaw.

Dagiti yunit nga addaan iti bassit a bilang dagiti ubbing ket mabalin nga ibilang dagiti wagas a mabalin a makiraman dagiti miembro ti pamilia a kadua dagiti annakda. Mabalin nga igibus ti maysa a miembro ti bishopric ti miting iti ababa a panagsaritana.

Kabayatan ti panangisaganayo iti presentasion, laglagipen dagiti sumaganad a pangiwanwan:

• Nasken a saan a mangala iti saan a kasapulan nga oras dagiti panagpraktis manipud kadagiti klase ti Primary wenno pamilia.

• Saan a maitutop para iti miting iti sakramento dagiti pangtulong a ladawan [visuals], kawes [costumes], ken dagiti presentasion iti media.

Kitaen iti Handbook 2: Administering the Church, 11.5.3, ChurchofJesusChrist.org.

Dagiti Pangiturong para iti Oras ti Panagkanta

5 minuto (Panguluen iti Primary): Panglukat a kararag, nasantuan a kasuratan wenno pagannurotan ti pammati, ken maysa a bitla [talk]

20 minuto (lider iti musika): Oras ti panagkanta

Ti panggep iti oras ti panagkanta ket mangtulong kadagiti ubbing a mapabileg dagiti pammatida iti Nailangitan nga Ama ken ni Jesucristo babaen iti musika. Agpili ti panguluen ti Primary ken ti lider ti musika kadagiti kanta para iti tunggal bulan nga addaan daytoy a panggep iti panunot. Nasken a mangpabileg dagiti kanta kadagiti pagbatayan a masursuro dagiti ubbing maipapan iti ebanghelio ni Jesucristo kadagiti klaseda ken iti pagtaengan. Dagiti listaan dagiti kanta a mangpabileg kadagitoy a pagbatayan ket nairaman iti daytoy a pangiwanwan. Naisingasing pay dagitoy a kanta kadagiti balabala iti Umaykayo, Sumurot Kaniak—Para iti Primary.

No isuroyo dagiti kanta kadagiti ubbing, awisenyo ida a mangibinglay no ania ti nasursurodan maipapan kadagiti estoria ken pagbatayan iti doktrina nga isursuro ti kanta. Mabalin a kayatyo nga irebyu dagiti balabala iti Umaykayo, Sumurot Kaniak—Para iti Primary nga ad-adalen dagiti ubbing kadagiti klaseda. Daytoy ti mangtulongto kadakayo nga agbalin a mannakaammo kadagiti estoria ken pagbatayan a sursuruenda tapno maibilangyo no kasano a masuportaranyo ti panagsursuroda iti musika.

Kabayatan ti oras ti panagkanta, mabalinyo met nga irebyu dagiti kanta a nasursurodan iti kallabes ken dagiti kanta a paggugustoda a kankantaen. Kabayatanyo nga irebyu, awisem dagiti ubbing a mangibinglay kadagiti kapanunotan ken riknada maipapan kadagiti kinapudno a masarakan kadagiti kanta.

Ti Children’s Songbook ti pangrugian a resource para iti musika iti Primary. Dagiti himno manipud iti hymnbook ken dagiti kanta manipud iti Friend ken Liahona ket maitutop pay. Sagpaminsan a mabalin a kantaen dagiti ubbing dagiti kanta a mainaig iti kinabannuar wenno piesta opisial a mayannatup para iti Domingo ken maibagay iti tawen dagiti ubbing. Nasken nga anamongan ti bishopric ti pannakausar ti ania man a sabali pay a musika iti Primary (kitaen iti Handbook 2: Administering the Church, 11.2.4).

dagiti ubbing nga agkankanta iti miting ti sakramento

Pakagupgopan ti Primary

Tunggal lawas, iraman iti Primary ti:

Oras ti panagkanta:25 a minuto

Transision:5 a minuto

Dagiti klase:20 a minuto

Mabalin a bingayen dagiti lider ti daddadakkel a Primary dagiti ubbing iti dua a grupo ket adda ti maysa a grupo iti klase ti Primary idinto nga adda ti sabali pay a grupo iti oras ti panagkanta. Kalpasanna agsinnukat dagiti dua a grupo iti lugarda. Kadagiti kasta a kasasaad, mabalin a kasapulan dagiti lider ti Primary a mangbalbaliw kadagiti tiempo a naipakita iti ngato tapno maibagay kadagiti kasasaadda.

Musika para iti Oras ti Panagkanta

Enero

• “Joseph Smith’s First Prayer,” Hymns, no. 26

• “Search, Ponder, and Pray,” Children’s Songbook, 109

• “Family History—I Am Doing It,” Children’s Songbook, 94

Pebrero

• “I Want to Be a Missionary Now,” Children’s Songbook, 168

• “The Priesthood Is Restored,” Children’s Songbook, 89

• “I Stand All Amazed,” Hymns, no. 193

Marso

• “The Church of Jesus Christ,” Children’s Songbook, 77

• “When I Am Baptized,” Children’s Songbook, 103

• “When He Comes Again,” Children’s Songbook, 82–83

Abril

• “Jesus Has Risen,” Children’s Songbook, 70

• “I Want to Be a Missionary Now,” Children’s Songbook,168

• “Jesus Said Love Everyone,” Children’s Songbook, 61

Mayo

• “When He Comes Again,” Children’s Songbook, 82–83

• “Have I Done Any Good?” “Hymns, no. 223).

• “Choose the Right,” Hymns, num. 239

Hunio

• “I’m Trying to Be like Jesus,” Children’s Songbook, 78–79

• “Reverence Is Love,” Children’s Songbook, 31

• “Help Me, Dear Father,” Children’s Songbook, 99

Hulio

• “I Know That My Redeemer Lives,” Hymns, num. 136

• “Have I Done Any Good?” “Hymns, num. 223

• “I Feel My Savior’s Love,” Children’s Songbook, 74–75

Agosto

• “The Priesthood Is Restored,” Children’s Songbook, 89

• “The Holy Ghost,” Children’s Songbook, 105

• “I Am a Child of God,” Children’s Songbook, 2–3

Septiembre

• “Reverently, Quietly,” Children’s Songbook, 26

• “I Am like a Star,” Children’s Songbook, 163

• “I Will Be Valiant,” Children’s Songbook, 162

Oktubre

• “The Spirit of God,” Hymns, num. 2

• “I Love to See the Temple,” Children’s Songbook, 95

• “The Church of Jesus Christ,” Children’s Songbook, 77

Nobiembre

• “Family History—I Am Doing It,” Children’s Songbook, 94

• “Families Can Be Together Forever,” Children’s Songbook, 188

• “Praise to the Man,” Hymns, num. 27

Disiembre

• “I Will Follow God’s Plan,” Children’s Songbook, 164–65

• “He Sent His Son,” Children’s Songbook, 34–35

• “Hark! The Herald Angels Sing,” Hymns, num. 209

Panangusar iti Musika a Mangisuro iti Doktrina

Laglagipem a ti panggep ti oras ti panagkanta ket saan laeng tapno isuro dagiti ubbing iti no kasano ti agkanta, ngem tapno usaren ti musika a mangtulong a mangpabileg ti pammatida iti Nailangitan nga Ama ken ni Jesucristo. Mabalin a makaparegta kenka ti sumaganad a kapanunotan bayat iti panagplanom kadagiti wagas tapno maaramid daytoy.

Sursuruem ti maipapan iti Nailangitan nga Ama ken ni Jesucristo. Awisem dagiti ubbing a mangibinglay iti no ania ti nasursuroda maipapan iti Nailangitan nga Ama ken ni Jesucristo manipud kadagiti kanta a kansionem. Awisem dagiti ubbing a mangibinglay kadagiti paboritoda a balikas manipud iti kanta a mangiladawan iti Dios ken iti Mangisalakan.

Basaen dagiti mainaig a nasantuan a kasuratan. Para iti adu a kanta iti Children’s Songbook ken iti hymnbook, nailista dagiti reperensia a mainaig kadagiti nasantuan a kasuratan. Tulongam dagiti ubbing a mangbasa iti bersikulo ti nasantuan a kasuratan, ket isaritam ti maipapan iti no kasano a mainaig daytoy iti kanta a kankantaem. Mabalin met nga ilistam iti pisarra ti sumagmamano a reperensia iti nasantuan a kasuratan ket awisem dagiti ubbing a mangiparis iti tunggal reperensia iti maysa a kanta wenno maysa a berso manipud iti kanta.

Punnuen ti blangko. Mangisurat iti maysa a berso ti kanta iti pisarra nga awan dagiti sumagmamano a kangrunaan a balikas [key words]. Kalpasanna kiddawen kadagiti ubbing nga agkansion iti maysa a kanta, a dumdumngeg kadagiti balikas a mangpunno kadagiti blangko. Bayat ti panangpunnoda iti tunggal blangko, ilawlawag no ania dagiti pagbatayan ti ebanghelio a masursuroyo manipud kadagiti awan a balikas.

dagiti ubbing nga agkankanta iti miting ti sakramento

Dagiti adaw manipud kadagiti lider iti Simbaan. Awisem dagiti ubbing a dumngeg iti maysa nga adaw manipud iti maysa a lider ti Simbaan a mangisuro iti isu met laeng a pagbatayan ti ebanghelio a kas iti kanta iti Primary. Awisem ida a mangingato ti imada no mangngeganda ti maysa a banag a mangtulong kadakuada a makaawat iti kinapudno a kankantaenda. Awisem ida a mangibinglay no ania ti nangngeganda.

Agpaneknek. Mangiburay iti ababa a pammaneknek kadagiti ubbing maipapan kadagiti kinapudno ti ebanghelio a masarakan iti kanta iti Primary. Tulongan dagiti ubbing a makaawat a ti panagkanta ket maysa a wagas a mabalin a pangiburayanda iti pammaneknek ken pakariknaanda iti Espiritu.

Agtakder a kas maysa a saksi. Awisen dagiti ubbing nga agsisinnublatda iti panagtakder ken panangibinglay iti no ania ti masursuroda manipud iti kanta a kankansionenda wenno kasano a mariknada maipapan kadagiti kinapudno a naisuro iti kanta. Saludsodem kadakuada no ania ti riknada bayat nga agkansionda ti maysa a kanta, ken tulonganyo ida a mangilasin iti impluensia ti Espiritu Santo.

Agusar kadagiti ladawan. Kiddawen kadagiti ubbing a tulongandaka nga agsapul wenno agaramid kadagiti ladawan a maikadua kadagiti napapateg a balikas wenno ragup dagiti balikas iti kanta. Awisen ida a mangibinglay no kasano a mainaig dagiti ladawan iti kanta ken no ania ti isuro ti kanta. Kas pagarigan, no isursurom ti kanta a “When He Comes Again” (Children’s Songbook, 82–83), mabalinmo nga ikabil dagiti ladawan iti intero a siled a mangiladawan kadagiti napapateg a balikas manipud iti kanta (kas dagiti anghel, niebe, ken bituen). Kiddawen kadagiti ubbing a mangummong kadagiti ladawan ken mangingato kadagitoy iti husto nga urnos bayat ti aggigiddan a panagkantayo.

Ibinglay ti maysa a banag nga adalen [object lesson]. Mabalinmo nga usaren ti maysa a banag a mangparegta iti panaglilinnawag maipapan iti maysa a kanta. Kas pagarigan, ti kanta a “When I Am Baptized” (Children’s Songbook, 103) dakamatenna ti tudo. Mabalinmo nga ipakita kadagiti ubbing ti maysa a ladawan ti tudo wenno maysa a baso ti danum ken isaritam ti maipapan iti no kasano a dalusan ti panagbuniag ken ti Espiritu Santo dagiti espiritutayo a kas iti panangdalus ti danum ti tudo ti daga; mangiturong daytoy iti maysa a panagsasarita maipapan kadagiti bendision iti panagpabuniag ken iti panangawat ti sagut ti Espiritu Santo.

Yawis ti panagbibinninglay kadagiti bukod a padas. Tulongan dagiti ubbing a manginaig kadagiti pagbatayan a maisursuro iti kanta kadagiti padas kadagita a pagbatayan. Kas pagarigan, sakbay iti panangkanta iti “I Love to See the Temple” (Children’s Songbook, 95), mabalin a kiddawen kadagiti ubbing a mangingato kadagiti imada no nakakitadan iti maysa a templo. Awisem ida nga agpanunot bayat ti panagkantada maipapan iti no kasano ti riknada no makitada ti maysa a templo.

Agdamag kadagiti saludsod. Adu dagiti saludsod a mabalinmo a damagen no agkansionkayo kadagiti kanta. Kas pagarigan, mabalinmo a saludsoden kadagiti ubbing no ania ti masursuroda manipud iti tunggal berso iti kanta. Mabalinmo pay a kiddawem kadakuada nga agpanunot kadagiti saludsod a sungbatan dayta a kanta. Makaiturong daytoy iti panaglilinnawag maipapan kadagiti kinapudno a maisursuro iti kanta.

Dumngeg kadagiti sungbat. Kiddawem dagiti ubbing a dumngeg kadagiti sungbat. Kas pagarigan, ti kanta a “He Sent His Son” (Children’s Songbook, 34–35) ket naglaon ti sumagmamano a saludsod ken sungbat. Mabalinmo a damagen kadagiti ubbing dagiti saludsod ket kalpasanna dumngegda kadagiti sungbat bayat nga agkantada.

Panangtulong kadagiti Ubbing a Mangsursuro ken Maglagip kadagiti Kanta iti Primary

Masursuro dagiti ubbing ti maysa a kanta babaen ti panangdengngeg ken panangulit a panangkanta iti daytoy. Kanayon a kantaem dagiti balikas ti maysa a baro a kanta kadagiti ubbing—saan laeng a basaen wenno isao dagitoy. Daytoy ti mangtulong kadagiti ubbing a manginaig iti ayug [melody] kadagiti balikas. Kalpasan a naisuro ti maysa a kanta, irebyum daytoy iti nadumaduma a naragsak a wagas iti unos ti makatawen. Iti baba isu ti sumagmamano a kapanunotan a mangtulong kadagiti ubbing a makasursuro ken mangrebyu kadagiti kanta.

Ipakita ti tono. Tapno masursuro dagiti ubbing ti ayug ti maysa a kanta, ipuestom ti imam iti posision a paidda, ken bayat ti panagkantam kadagiti balikas, ingatom ti imam tapno mangipakita iti nangato a tono ken ibabam ti imam tapno mangipakita iti nababa a tono.

Aweng. Awisem dagiti ubbing nga agbalin nga awengmo babaen ti panangulitda iti kantaem. Kantaam dagiti ubbing iti ababa a ragup ti balikas wenno linia, ket kalpasanna ipakantam kadakuada kenka daytoy.

Agusar iti panagduduma. Agkansion kadagiti kanta iti agduduma a wagas, kas iti panagarasaas, panagdayyeng, panagsipat iti beat, panagbaliw iti tempo, wenno panagkanta kabayatan a nakatugaw wenno nakatakder. Mabalinka met ti agaramid iti kubiko manipud iti papel ken, iti agsumbangir a sikigan iti kubiko, isurat ti sabali a wagas iti panagkanta. Awisem ti maysa nga ubing a mangitulid iti kubiko tapno maikeddeng no kasano a kantaen dagiti ubbing ti kanta.

Agkanta iti kada grupo. Ikkam ti tunggal klase wenno tunggal tao iti maysa a ragup ti balikas a kantaen bayat a panagtakderda, ken kalpasanna pagsisinnukatem ida kadagiti ragup ti balikas agingga a naaddaan ti tunggal klase wenno tunggal maysa iti batang nga agkanta iti tunggal ragup ti balikas.

Agusar kadagiti tignay. Awisem dagiti ubbing a mangpanunot kadagiti simple a tignay a mangtulong kadakuada a manglagip kadagiti balikas ken mensahe ti maysa a kanta. Kas pagarigan, no agkantakayo ti “Reverently, Quietly” (Children’s Songbook, 26), mabalinmo nga awisen dagiti ubbing nga agdalikepkep kadagiti imada, agdumogda, ken sagidenda ti pusoda no agkantada kadagiti mainaig a linia ti kanta.

Agkanta dagiti ubbing a babbai, agkanta dagiti ubbing a lallaki. Mangidrowing ti ladawan ti maysa nga ubing a lalaki ken babai. Kabayatan ti panangrebyu iti maysa a kanta, ingatom ti maysa kadagiti ladawan tapno ipakita no asino ti nasken a mangkanta iti dayta a paset ti kanta.

Panangibansag iti basket. Mangikabil kadagiti nanumeruan a basket wenno dadduma pay a container iti sango ti siled—kapada ti kaadu dagiti container dagiti berso ti maysa a kanta. Awisem ti maysa kadagiti ubbing a mangipuruak iti beanbag wenno nakunes a papel iti uneg wenno asideg ti nanumeruan a container. Pagkantaem dagiti ubbing iti berso a kapada ti nanumeruan iti container.

Iparis ti maysa a ladawan iti maysa a ragup ti balikas. Isurat ti tunggal linia ti kanta iti sabali pay a papel, ket sapulen ti ladawan a mangibagi iti tunggal linia. Ikabil dagiti ladawan iti maysa a bangir ti siled ken ikabil dagiti papel iti sabali pay a bangir. Agkansion iti maysa a kanta, ken kiddawem kadagiti ubbing nga iparis dagiti ladawan kadagiti balikas.

Agpartuat kadagiti poster. Ipakitam dagiti poster nga addaan kadagiti balikas manipud iti tunggal berso wenno ladawan a mangibagi kadagiti balikas. Kabayatan ti panagkanta dagiti ubbing, abbongan ti sumagmamano kadagiti balikas wenno ladawan agingga a makansionda ti sibubukel a berso nga awan ti poster. Mabalinmo met nga awisen dagiti ubbing a tumulong kenka nga agaramid kadagiti poster.