Nativity in Copper and Umber, ni J. Kirk Richards

Disiembre 20–26

Paskua

Ti Awan Kapadana a Sagut ti Nasantuan nga Anak ti Dios

Ti Paskua ket naragsak a panawen para iti adu nga ubbing. Ibilangmo no kasano a matulongamto ida a mangikonekta ti rag-o iti panawen ti Paskua ken iti rag-o iti ebanghelio ti Mangisalakan.

Isuratmo dagiti Impresionmo

Yawis ti Panagbibinninglay

Kiddawen kadagiti ubbing a mangibinglay no ania ti inaramidda iti napalabas a lawas kas panangrambak iti pannakayanak ti Mangisalakan.

Isuro ti Doktrina: In-inaudi nga Ubbing

Mabalinko nga “ipaay ti pammaneknek[ko]” a kas panangrambak iti pannakaiyanak ni Jesus.

Iti “Ti Sibibiag a Cristo” (ChurchofJesusChrist.org), nangted ti Umuna a Panguluen ken ti Korum dagiti Sangapulo-ket-dua nga Apostol iti pammaneknekda ken Jesucristo kas “panglaglagip iti pannakayanak ni Jesucristo.” Ibilangmo no kasano a maallukoymo dagiti ubbing a mangibinglay ti pammaneknekda kadagiti dadduma.

Dagiti Mabalin nga Aktibidad

• Ipakitam kadagiti ubbing ti kopia ti “Ti Sibibiag a Cristo” (kitaen ti balabala ita a lawas iti Umaykayo, Surotendak—Para kadagiti Indibidual ken Pamilia). Itudo ti balikas a Cristo iti paulo, ket ipaitudo met kadagiti ubbing dayta a balikas. Ipakita met dagiti pirma iti baba a paset iti panid, ken ibaga kadagiti ubbing nga idi 2000, insurat ti Umuna a Panguluen ken ti Korum dagiti Sangapulo-ket-dua nga Apostol ti pammaneknekda ken Jesucristo, impirmada ti naganda, ken imbinglayda daytoy iti lubong.

• Ipakitam ti maysa a ladawan ni Jesucristo, ken awisem ti tunggal ubing a mangibinglay iti maysa a banag nga ammona maipapan Kenkuana. No kasapulanda ti tulong, isingasing dagiti kinapudno manipud iti “Ti Sibibiag a Cristo.” Ipalagip kadagiti ubbing a no isaritada iti dadduma maipapan ken ni Jesus, ibingbinglayda dagiti pammaneknekda.

• Ibagam kadagiti ubbing no kasano a nagun-odmo ti pammaneknekmo maipapan ken ni Jesucristo ken no ania ti ar-aramidem tapno agtalinaed a napigsa ti pammaneknekmo. Tulongam ida nga agpanunot kadagiti wagas a pakapapigsaanda kadagiti pammaneknekda maipapan ken ni Jesucristo, ket awisem ida a pumili iti maysa a banag nga aramidendanto.

Impatulod ti Nailangitan nga Ama ti Anakna kas maysa a sagutna kadatayo.

Ti panangted ken panangawat kadagiti sagut ti nakaugalianen a paset ti Paskua para iti adu a tao. Daytoy a kannawidan ti mangtulong koma kadatayo a manglagip iti “awan kapadana a sagut ti nasantuan nga Anakna” (“Ti Sibibiag a Cristo”).

Dagiti Mabalin nga Aktibidad

• Kiddawem kadagiti ubbing a mangisarita maipapan kadagiti sagut a naited kadakuada wenno naawatda. Ibasam kadakuada ti maudi a binatog iti “Ti Sibibiag a Cristo,” ken awisem ida a dumngeg para iti sagut nga inted ti Dios kadatayo. (No kasapulan, tulongam ida a makaawat a ti “awan kapadana” kayatna a sawen “nasaysayaat ngem iti ania man a banag.”) Apay a ti Anak ti Dios, a ni Jesucristo, “ti kasayaatan a sagut”?

• Aggigiddan nga agkansion iti kanta a maipapan ken ni Jesucristo, kas iti “He Sent His Son” (Children’s Songbook, 34–35). Tulongam dagiti ubbing a mangpili iti ragup dagiti balikas manipud iti kanta a kayatda nga idrowing (kas iti “kayanak a maladaga” wenno “nakipagna kadagiti lallaki”). Bayat ti panagdrowingda, kiddawem kadagiti ubbing nga ibagada kenka no kasano ti mariknada maipapan iti no ania ti inaramid ni Jesus para kadakuada. Ibinglaymo met dagiti marikriknam.

Awisennak ni Jesucristo a sumurot iti pagwadanna.

Paset ti “dakkel nga … impluensia” ti Mangisalakan iti lubong ket isu ti naan-anay a pagwadanna. Kasano a maparegtam dagiti ubbing a sumurot Kenkuana?

Dagiti Mabalin nga Aktibidad

• Manipud iti maikadua a parapo iti “Ti Sibibiag a Cristo,” ibasam kadagiti ubbing dagiti sumagmamano a banag nga inaramid ni Jesus. Mangipakita kadagiti ladawan manipud iti biagna (kitaen ti panid ti aktibidad iti daytoy a lawas), ken awisem dagiti ubbing a mangisarita maipapan kadagiti inaramid ti Mangisalakan kas maar-aramid kadagiti ladawan. Tulongam ida nga agpanunot kadagiti wagas a pakasurotan iti pagwadanna.

• Pumili iti “Light the World” video (ComeuntoChrist.org) nga ipabuyam kadagiti ubbing, wenno isaritam maipapan iti maysa a gundaway idi nabendisionanka babaen ti nakristianuan a panagserbi iti maysa a tao. Awisem ti maysa nga ubing a mangyakem ti maysa a simple nga aramid ti panagserbi, ken kiddawen dagiti dadduma nga ubbing a mangpugto no ania ti ar-aramidenna. Ikkam iti batang ti tunggal ubing. Tulongam dagiti ubbing a mangpanunot iti maysa a banag a makapagserbida iti maysa a tao iti pamiliada.

Isuro ti Doktrina: In-inauna nga Ubbing

“Ipaaytayo ti pammaneknektayo.”

Ti pagwadan dagiti propeta ken dagiti apostol a nagsurat iti “Ti Sibibiag a Cristo” ti makaparegta kadagiti ubbing a mangibinglay kadagiti pammaneknekda ken ni Jesucristo.

Dagiti Mabalin nga Aktibidad

• Isurat iti pisarra ti Ammok a ni Jesucristo … ken kiddawem kadagiti ubbing a mangibinglayda kadagiti wagas a pangileppasanda iti binatog. Isingasing a sukisokenda iti “Ti Sibibiag a Cristo” para kadagiti kapanunotan. Ania ti maaramidtayo tapno mapatibker dagiti pammaneknektayo ken ni Jesucristo? Kasano a mabendisionan dagiti dadduma no ibinglaytayo dagiti pammaneknektayo?

• Ilawlawag a ti “Ti Sibibiag a Cristo” ket pinirmaan ti Umuna a Panguluen ken ti Korum dagiti Sangapulo-ket-dua nga Apostol. Aggigiddan a basaen ti Doktrina ken Katulagan 107:23. Ania ti pakaidumaan dagiti Apostol “kadagiti dadduma pay nga opisial i ti simbaan“? Pumili iti maysa kadagiti “Special Witnesses of Christ” video nga ibinglay kadagiti ubbing (ChurchofJesusChrist.org). Apay nga agyamantayo nga addaantayo kadagiti naisangsangayan a saksi ni Cristo iti aldawtayo?

“Awanen ti sabali nga addaan iti napalaus nga impluensia.”

Iti “Ti Sibibiag a Cristo,” impalawag dagiti propeta ken apostol nga awanen sabali nga addaan iti naindaklan nga impluensia kadagiti annak ti Dios ngem ni Jesucristo. Utobem no kasano a matulongamto dagiti ubbing a makasursuro iti maipapan iti napalaus nga impluensia kadatayo ti Mangisalakan.

Dagiti Mabalin nga Aktibidad

• Ikkan dagiti ubbing ti maysa a ragup dagiti balikas wenno binatog manipud iti “Ti Sibibiag a Cristo,”, ket kiddawem kadakuada a mangidrowing iti maysa a ladawan iti dayta a ragup ti balikas wenno binatog. Bayat ti panangipakita ti tunggal ubing iti ladawanna, kiddawen kadagiti dadduma pay nga ubbing a mangpugto no ania ti ipakpakita ti ladawan ken mangsapul iti maitutop binatog iti “Ti Sibibiag a Cristo,” Kasano a nabendisionantayo gapu iti biag ken mision ni Jesucristo?

• Tulongam dagiti ubbing nga agsapul kadagiti nadumaduma a nagan wenno dagiti pangawag ken ni Jesucristo iti “Ti Sibibiag a Cristo” ken ugedam dagitoy, no mabalin (sumagmamano a pagarigan ti pakairamanan ti Mesias, Inauna, ti umuna ken ti maudi, mangibabaet, ken ti kangrunaan a bato a panuli ). Pagsasaritaan maipapan iti no ania ti isuro kadatayo dagitoy a pangawag maipapan Kenkuana. (Sumagmamano kadagitoy a pangawag ti nailawlawag iti Pangiwanwan iti Nasantuan a Kasuratan wenno Bible Dictionary.)

“Isu ti silaw, ti biag, ken ti namnama ti lubong.”

Ti Paskua ket maysa a naragsak a panawen gapu iti namnama nga inyeg ni Jesucristo iti lubong babaen kadagiti pannursuro, pagwadan, ken ti pangsubbot a sakripisiona.

Silaw ti Lubong, ni Howard Lyon

Dagiti Mabalin nga Aktibidad

• Awisem ti maysa nga ubing nga agdrowing iti maysa a kayo ti Paskua [Christmas tree], wenno agdrowing iti maysa iti pisarra. Awisen dagiti ubbing a mangarkos iti kayo kadagiti balikas wenno ragup dagiti balikas manipud iti “Ti Sibibiag a Cristo” a mangiladawan iti maysa a sagut nga inted kadatayo ti Mangisalakan (kas iti “silaw,” “biag,” ken “namnama,” Bay-an ida nga agsarita maipapan iti no apay a pilienda dagita a balikas wenno ragup dagiti balikas.

• Tulongam dagiti ubbing nga agsapul kadagiti kanta ti Paskua a mangibagbaga iti silaw, biag, ken namnama a nangyeg ditoy lubong gapu iti pannakaiyanak ti Mangisalakan—kas pagarigan, “O Little Town of Bethlehem” wenno “Hark! The Herald Angels Sing” (Hymns, nos. 208–9). Aggigiddan a kantaen dagiti himno, ket paibinglaymo kadagiti ubbing a mangibinglay no kasano a nangted ti Jesus iti silaw, biag, ken namnama iti biagda.

• Awisen ti maysa kadagiti ubbing a mangbasa maipapan kadagiti agpaspastor iti Lucas 2:8–20. Idawat iti dadduma pay a mangbasa maipapan ken ni Simeon iti Lucas 2:25–33. Awisem ida a mangibinglay iti tunggal maysa no kasano ti narikna dagiti agpaspastor ken ni Simeon idi natakuatanda a naipasngayen ni Jesus. Apay a nariknada ti kastoy? Apay a mangyeg kadatayo iti “naindaklan a rag-o” ti pannakayanakna?

Yallukoy ti Panagsursuro iti Pagtaengan

Awisem dagiti ubbing a mangpanunot kadagiti tao iti pamiliada a mabalinda a pangibinglayan kadagiti pamaneknekda maipapan ken ni Jesucristo. Tulongam ida a mangibilang no ania ti mabalinda nga isao a mangpatibker iti pammati dayta a tao Kenkuana.

Panangpadur-as iti Panangisurotayo

Agsagana babaen ti panagadal kadagiti nasantuan a kasuratan. “Ti nainkararagan a panagadal iti balikas ti Dios ti mangitunos kadatayo iti Espiritu Santo. Maparegtanatayo a manglagip kadagiti inadaltayo kabayatan ti panangisuro ken panangitag-aytayo kadagiti dadduma.” (Panangisuro iti Wagas ti Mangisalakan, 12).