Ti Pannakayanak iti Tanso ken Umber, ni J.Kirk Richards

Disiembre 20–26

Paskua

Ti Awan Kapadana a Sagut ti Nadiosan nga Anak ti Dios

Maysa a wagas a pangipamaysaan kadagiti pampanunotmo iti Mangisalakan iti daytoy a Paskua isu iti panangadal iti “Ti Sibibiag a Cristo: Ti Pammaneknek dagiti Apostol.” Mangisingasing daytoy a balabala kadagiti wagas a mabalinmo nga aramiden iti daytoy a naimpadtuan a pammaneknek a paset iti bukod ken sangapamiliaan a panagadalmo iti ebanghelio.

Isuratmo dagiti Impresionmo

Idi 1838, impakdaar ni Propeta Joseph Smith a “Dagiti kangrunaan a pagbatayan ti pammatitayo ket ti pammaneknek dagiti Apostol ken Propeta, maipanggep ken ni Jesucristo, nga Isu ti natay, ket naitanem, ken nagungar iti maikatlo nga aldaw, ket immuli sadi langit; ken amin a dadduma pay a bambanag a mainaig iti pammatitayo ket nayon laeng dagitoy” (Teachings of Presidents of the Church: Joseph Smith,49). Kalpasan dagiti tawen, imbaga ni Presidente Russell M. Nelson a “daytoy a mismo a palawag ti Propeta ti nangted iti maysa a pammaregta kadagiti 15 a propeta, mammadto, ken mammaltiing tapno mangted ken agpirma iti pammaneknekda a mangrambak ti maika-2,000 nga anibersario ti pannakayanak ti Apo. Napauluan dayta napnuan pakasaritaan a pammaneknek iti ‘Ti Sibibiag a Cristo.’ Adu a miembro ti nangiyulo kadagiti kinapudnona. Saan unay nga ammo dagiti dadduma iti kaaddana daytoy. Bayat ti panagsukisokyo nga agsursuro iti ad-adu pay maipapan ken ni Jesucristo, guyugoyenkayo a mangadal iti ‘Ti Sibibiag a Cristo’” (“Drawing the Power of Jesus Christ into Our Lives,” Ensign wenno Liahona, Mayo 2017, 40).

Kas dagiti Santo iti Ud-udina nga Aldaw, agrag-otayo iti bendision ti agtultuloy a paltiing babaen kadagiti kabaruanan a propeta ken apostol. Pagyamanantayo dagiti naparegta a balikasda a pammagbaga, ballaag, ken pammaregta. Ngem kangrunaan ti amin, naparaburantayo kadagiti nabileg a pammaneknekda ken ni Jesucristo—iti panawen ti Paskua ken iti unos ti tawen. Dagitoy ti ad-adda pay ngem dagiti sugsog a balikas dagiti nalalaing a mannurat wenno mannarita iti publiko wenno dagiti nalawag a pannakaammo ken pannakawat manipud kadagiti eksperto iti nasantuan a kasuratan. Isuda dagiti balikas dagiti pinili, inawagan, ken tinudingan ti Dios “dagiti naisangsangayan a saksi ti nagan ni Cristo iti intero a lubong” (Doktrina ken Katulagan 107:23).

Dagiti Kapanunotan para iti Bukod a Panagadal iti Nasantuan a Kasuratan

“Awan ti sabali pay a kaindaklanan nga impluensia.”

Ania dagiti kapanunotan nga umay kenka bayat ti panangbasam iti Lucas 2:10–11 a kagiddan ti umuna a parapo ti “Ti Sibibiag a Cristo”? Ania ti makunam a pangsuporta iti palawag nga “awan ti sabali pay a kaindaklanan nga impluensia [a kas ken Jesucristo] iti amin a nagbiag ken agbiagto pay laeng iti daga”? Agsapul kadagiti kinapudno iti “Ti Sibibiag a Cristo” a mangiladawan iti kaindaklanan nga impluensia ti Mangisalakan. Kasano a naimpluensiaannaka ken nangyeg kenka iti “naindaklan a rag-o”?? (Lucas 2:10).

“Nagungar manipud iti tanem.”

Iti “Ti Sibibiag a Cristo,” nagpaneknek dagiti Apostol iti Panagungar ti Mangisalakan, a mangdakdakamat iti tallo a panagparang ti nagungar nga Apo (kitaen iti maikalima a parapo). Ibilangmo ti panangbasa maipapan kadagitoy nga isasarungkar iti Juan 20–21; 3 Nephi 11–26; ken Joseph Smith—Pakasaritaan 1:14–20. Ania ti masursurom maipapan iti Mangisalakan manipud kadagiti balikas ken tignayna kabayatan dagitoy a panagparang?

“Naisubli ti Priesthoodna ken ti Simbaanna.”

Kabayatan ti panagadalmo iti Doktrina ken Katulagan iti daytoy a tawen, naaddaanka iti gundaway a nakasursuro iti ad-adu pay maipapan iti no kasano a “naipasubli ti priesthood ken ti Simbaan ti Mangisalakan.” Ania kadagitoy naipasubli a kinapudno wenno pagbatayan ti naipangpangruna nga addaan kaipapananna kenka? Ibilang ti panangrebyu iti sumagmamano a sumaganad a nasantuan a kasuratan a mangisuro maipapan iti Pannakaisubli: Doktrina ken Katulagan 1:17–23; 13; 20:1–12; 65; 110; 112:30–32; 124:39–42; 128:19–21. Utobem no kasano a matulongannaka dagiti kinapudno ti naisubli nga ebanghelio a mangammo ken agdaydayaw ken ni Jesucristo (kitaen iti Doktrina ken Katulagan 93:19).

“Maysa nga aldaw agsublinto Isuna iti daga.”

Ti Paskua ket maysa a panawen a pananglagip iti pannakayanak ni Jesucristo ken panangpadpadaan iti aldaw nga umayto manen Isuna. Ania ti masursurom maipanggep iti panagsublina manipud iti maikadua iti maudi a parapo ti “Ti Sibibiag a Cristo”? Mabalin met a makaay-ayo ti agbasa, agkansion, wenno dumngeg kadagiti himno ti Paskua a mangisuro maipapan iti Maikadua a Yaay, kas iti “Joy to the World” wenno “It Came upon the Midnight Clear” (Hymns, num. 201, 207).

“Isu ti silaw, ti biag, ken ti namnama ti lubong.”

Iti maudi a parapo ti “Ti Sibibiag a Cristo”, ilistam dagiti kababalin ken pangawag a naited para iti Mangisalakan. Dagiti sumaganad a nasantuan a kasuratan ti makatulong kenka a mangutob no kasano a ni Jesucristo “ti silaw, biag, ken ti namnama ti lubong”: Lucas 2:25–32; 1 Taga Corinto 15:19–23; Moroni 7:41; Doktrina ken Katulagan 50:24; 84:44–46; 93:7–10. Kasano nga Isu ti silaw, biag, ken namnamayo? Ania dagiti sabali pay a kababalin wenno pangawag iti Mangisalakan a kangrunaan ti kaipapananna kenka?

Kasano a naaringan ti panagadalmo iti “Ti Sibibiag a Cristo” iti pammatim ken ayatmo iti Mangisalakan?

Silaw ti Lubong, ni Howard Lyon

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

“Ti Sibibiag a Cristo.”Tapno matulongan ti pamiliam a makaawat kadagiti kinapudno a naisuro maipapan iti Mangisalakan iti “Ti Sibibiag a Cristo,” mabalinmo ti pumili iti sumagmamano a kangrunaan a ragup ti balikas ket agtitinnulong a mangsapul wenno mangidrowing kadagiti ladawan a mangiladawan kadagiti ragup ti balikas. Kalpasanna mabalinmo nga urnosen dagiti ladawan ken ragup ti balikas nga agbalin a maysa a libro.

“Idiayatayo ti pammaneknektayo.”Ania ti masursurotayo manipud iti “Ti Sibibiag a Cristo” maipapan iti no ania ti kayat a sawen ti panangiburay ti pammaneknek? Mabalin a kayatmo nga isurat dagiti pammaneknekmo a panglagip ti pannakayanak ti Mangisalakan.

“Isu a napan nagaramid iti naimbag.”Kasano a mabalin a suroten ti pamiliam ti pagwadan ti panagserbi ti Mangisalakan ita a Paskua? Kasano nga isaknapmonto ti “kappia ken kinaimbag” iti pamiliam ken komunidad? Kasano a matulongam a mayeg ti “panangpaimbag [iti] masakit”? Masarakam dagiti kapanunotan iti sumagmamano iti Christmas videos iti Gospel Media app wenno Gospel Media library (medialibrary.ChurchofJesusChrist.org).

“Agyamantayo iti Dios para iti awan kapadana a sagut ti nadiosan nga Anakna.”Ania dagiti naawattayo a sagut gapu ken ni Jesucristo? Nalabit a mabalin a masarakan dagiti miembro ti pamilia dagiti sungbat iti “Ti Sibibiag a Cristo” ket kalpasanna agbungon kadagiti aytem a mangibagi kadagita a sagut manipud iti Mangisalakan. Mabalin a lukatan ti pamiliam dagiti sagut (regalo) iti aldaw ti Paskua wenno iti unos ti makalawas ken basaen dagiti nasantuan a kasuratan a mainaig iti tunggal maysa. Adtoy ti sumagmamano a mabalin iti nasantuan a kasuratan, nupay adu ti dadduma pay a masarakan ti pamiliam: Lucas 2:10–14; 1 Pedro 2:21; Mosiah 3:8; Alma 11:42–43; Doktrina ken Katulagan 18:10–12. Mabalinyo pay ti agkansion iti kanta maipapan iti Mangisalakan, kas iti “He Sent His Son” (Children’s Songbook, 34–35), tapno mangsapul iti dadduma pay a sagut a dumteng manipud Kenkuana.

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a kanta: “Hark! The Herald Angels Sing,” Hymns, no. 209.

Panangpadur-as iti Bukod a Panagadal

Ipamaysam ti Mangisalakan. “Ti nainkararagan a panagbasa iti ‘Ti Sibibiag A Cristo’ mayarig iti panagbasa kadagiti pammaneknek da Mateo, Marcos, Lucas, Juan, ken dagiti propeta ti Libro ni Mormon. Papigsaennanto ti pammatim iti Mangisalakan ken tulongannaka nga agtalinaed a nakapokus Kenkuana” (M. Russell Ballard,“Return and Receive,” Ensign wenno Liahona, Mayo 2017, 65).