Iti Amin a Maikari a Lallaki a Miembro, ni Emma Allebes

Disiembre 6–12

Ti Pagannurotan ti Pammati ken Opisial a Palawag 1 ken 2

“Mamatikami”

Bayat ti panagadalmo iti Pagannurotan ti Pammati ken Opisial a Palawag 1 ken 2, ibilangmo ti epekto dagitoy iti Simbaan. Ania ti makaawis iti imatangmo maipapan kadagiti kinapudno nga isuroda?

Isuratmo dagiti Impresionmo

Iti 200 a tawen manipud ti Umuna a Parmata ni Joseph Smith, nagtultuloy a nangted ti Dios iti “paltiing iti kada paltiing, pagsiriban iti kada pagsiriban” kadagiti lider ti Simbaanna (Doktrina ken Katulagan 42:61). Iti sumagmamano a kasasaad, dayta a paltiing ti inturong dagiti lider ti Simbaan a mangbalbaliw kadagiti annuroten ken kannawidan ti Simbaan, “a maibatay iti pagayatan ti Apo, a mainugot iti kinamanangngaasina maibatay iti kasasaad dagiti annak ti tattao” (Doktrina ken Katulagan 46:15). DagitiOpisial a Palawag 1 ken 2 ti mangibagi iti daytoy a kita ti paltiing—maysa ket ti nangiturong iti panakaisardeng iti panagkallaysa iti ad-adu ngem maysa, ket ti sabali pay ket ti panangaramid kadagiti bendision ti priesthood, a pakairamanan dagiti bendision iti templo, a sidadaan a magun-od dagiti tao ti amin a puli. Dagitoy a panagbalbaliw ket paset ti no ania ti kayat a sawen ti maaddaan iti “pudno ken sibibiag a simbaan” (Doktrina ken Katulagan 1:30), addaan iti pudno ken sibibiag a propeta.

Ngem adda met dagiti banag a saan nga agbalbaliw—dagiti mainaig iti pundasion, agnanayon a kinapudno. Ken no dadduma ti panggep ti paltiing ket mangipaay iti nayon a nalawag a pannakaammo ken pannakaawat kadagitoy a kinapudno, a mangtulong kadatayo a maawatan a nalawlawag dagitoy. Ti Pagannurotan ti Pammati—ti 13 nga ababa ngem napateg a palawag ni Joseph Smith maipapan iti no ania ti patien dagiti Santo iti Ud-udina nga Aldaw—a kasla agserbi iti daytoy a panggep a pangilawlawag. Ti agpada a kita ti paltiing ket mangiwanwan ken mangbendision iti Simbaan, a maysa a Simbaan a natibker a nabuangay iti agnanayon a kinapudno kasta met a kabaelanna ti agdur-as ken agbalbaliw bayat ti panangpadakkel ti Apo iti pannakaawattayo a makatulong kadatayo a mangsango kadagiti karit iti agdama. Iti sabali a pannao, “Mamatikami iti amin nga impalgak ti Dios, amin nga ipalpalgakna, ken mamatikami nga adu pay ti ipalgakna a naindaklan ken napateg a banag maipapan iti Pagarian ti Dios” (Pagannurotan ti Pammati 1:9).

Dagiti Kapanunotan para iti Bukod a Panagadal iti Nasantuan a Kasuratan

Ti Pagannurotan ti Pammati

Naglaon ti Pagannurotan ti Pammati kadagiti kinapudno a mainaig iti pundasion iti naisubli nga ebanghelio.

Maysa a wagas a mabalinmo nga adalen ti Pagannurotan ti Pammati ket panangilista kadagiti kinapudno a masarakan iti tunggal maysa ket kalpasanna mangsapul kadagiti nasantuan a kasuratan a mainaig kadagitoy a kinapudno. Kasano a pabaknangen dagitoy a nasantuan a kasuratan ti pannakaawatmo kadagiti kinapudno iti Pagannurotan ti Pammati?

Kitaen met iti Pangiwanwan iti Nasantuan a Kasuratan, “Pagannurotan ti Pammati,” ChurchofJesusChrist.org; L. Tom Perry, “The Doctrines and Principles Contained in the Articles of Faith,” Ensign wenno Liahona, Nob. 2013, 46–48; “Chapter 38: The Wentworth Letter,” iti Teachings of Presidents of the Church: Joseph Smith, 435–47.

Pagannurotan ti Pammati 1:9; Opisial a Palawag 1 ken 2

Maiwanwan ti Simbaan ni Jesucristo babaen iti paltiing.

“Mamatikami nga adu pay ti ipalgak [ti Dios] a napateg ken naindaklan a banag a maipanggep iti Pagarian ti Dios” (Pagannurotan ti Pammati 1:9), uray no dagidiay a banag kaipapananna ti panangbalbaliw iti annuroten ken kannawidan ti Simbaan. Bayat ti panangpampanunotmo iti daytoy a pagbatayan, irebyu ti Opisial a Palawag 1 ken 2, ket sapulem dagiti balikas ken ragup dagiti balikas a mangpapigsa iti pammatim iti agtultuloy a paltiing. Ania dagiti dadduma a pagarigan ti agtultuloy a paltiing ti propeta ti Apo a mapanunotmo? Kasano nga inapektuan dagitoy a paltiing ti biagmo? Kasano nga impagnada ti aramid ti Nailangitan nga Ama iti pagarianna?

Kitaen met iti Amos 3:7; 2 Nephi 28:30.

Opisial a Palawag 1

Rumbeng nga agtultuloy a dumur-as ti aramid ti Dios.

Iti “Dagiti Naadaw manipud Kadagiti Tallo a Mensahe ni Presidente Wilford Woodruff maipapan iti Manipesto” (iti gibus ti Opisial a Palawag 1), ania dagiti gapu a nangtedan ti propeta para iti Apo tapno aggibus ti kannawidan a panagkallaysa iti ad-adu ngem maysa? Ania ti isuro kenka daytoy maipapan iti aramid ti Dios?

Para iti ad-adu pay nga impormasion maipapan iti nagtaudan ti pakasaritaan ti Opisial a Palawag 1, kitaen iti “The Messenger and the Manifesto” (Revelations in Context, 323–31) ken “Plural Marriage and Families in Early Utah” (Gospel Topics, topics.ChurchofJesusChrist.org).

Wilford Woodruff, ni H.E. Peterson

Opisial a Palawag 2

Makapagtalektayo iti Apo, uray no awanantayo iti naan-anay a pannakaawat.

Isuronatayo dagiti nasantuan a kasuratan nga agtalek iti Apo (kitaen iti Dagiti Proverbio 3:5), ket dayta ti inaramid dagiti adu a miembro ti Simbaan nga addaan puon nga Aprikano idi nilapdan ti Simbaan ti ordenasion iti priesthood ken dagiti ordinansa ti templo manipud kadakuada. Uray no saanda a naawatan no apay adda daytoy nga annuroten—ken masansan a nasaktanda kadagiti pannakailawlawag a naisuro iti daydi a panawen, nga iniddian ti Simbaan itan—adu kadagiti deboto a miembro nga addaan puon nga Aprikano ti nagtalek iti Apo ken nagtalinaed a napudno iti unos ti panagbiagda. Bayat ti panangbasam iti Opisial a Palawag 2, utobem no kasano a nasursurom nga agtalek iti Apo uray no awananka iti naan-anay a pannakaawat.

Mabalin a mangparegta kenka ti panagsursuro maipanggep iti pammati dagiti nangisit a miembro ti Simbaan. Dagitoy ti sumagmamano a pakaammuanda, a masarakan iti: history.ChurchofJesusChrist.org:

• “Jane Elizabeth Manning James” (Church History Topics)

• “In My Father’s House Are Many Mansions” (estoria ni Green Flake)

• “You Have Come at Last” (estoria ni Anthony Obinna)

• “Break the Soil of Bitterness” (estoria Julia Mavimbela)

• “I Will Take It in Faith”(estoria ni George Rickford)

Kitaen met iti “Witnessing the Faithfulness,” Revelations in Context, 332–41; Gospel Topics, “Race and the Priesthood,” topics.ChurchofJesusChrist.org; Ahmad Corbitt, “A Personal Essay on Race and the Priesthood,” parts 1–4, history.ChurchofJesusChrist.org; BeOne.ChurchofJesusChrist.org.

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Ti Pagannurotan ti Pammati.Ibilangmo no kasano a makaaramid ti pamiliam iti “mini-lessons” iti Pagannurotan ti Pammati. Kas pagarigan, iti unos ti makalawas, mabalin a pumidot ti tunggal miembro ti pamilia iti maysa nga artikulo ken mangsapul iti mainaig a nasantuan a kasuratan, ladawan, himno wenno kanta dagiti ubbing wenno mangibinglay iti bukod a padas.

Wenno mabalin dagiti miembro ti pamilia nga agsisinnublat iti panagdamag kadagiti saludsod iti tunggal maysa maipapan iti Simbaan ken iti pammatitayo ket kalpasanna mangsungbat kadagita a saludsod iti maysa a pagannurotan ti pammati.

DagitiOpisial a Palawag 1 ken 2.DagitiOpisial a Palawag 1 ken 2 ket makatulong kadatayo a maawatan ti akem ti kabaruanan a paltiing iti Simbaan. Bayat ti aggigiddan a panagbasa ti pamiliam, ibilang ti panangilawlawag no kasano nga idalannatayo ti propeta “babaen ti pammaregta ti Mannakabalin a Dios” (Opisial a Palawag 1). Kasano a mapatibkerda dagitoy dua a palawag iti pammatitayo iti maysa a sibibiag a Dios a personal a mangiwanwan ti Simbaanna? Kasano a makitatayo ti imana iti aramid ti Simbaan ita? Mabalinyo nga ikeddeng nga aggigiddan a mangsukisok iti sumagmamano a pagadawan (resources) iti “Dagiti Kapanunotan para iti Bukod a Panagadal iti Nasantuan a Kasuratan” iti ngato.

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a kanta: “Keep the Commandments,” Children’s Songbook, 146–47.

Panangpadur-as iti Panangisurotayo

Surnadam dagiti awis nga agtignay. “No surnadam ti maysa nga awis nga agtignay, ipakitam [kadagiti miembro ti pamiliam] nga ipatpategmo ida ken no kasano a pinaraburan ti ebanghelio ti biagda. Ikkam pay ida kadagiti gundaway a mangibinglay kadagiti padasda” (Panangisuro iti Wagas ti Mangisalakan,35).