Dinto pulos kaano man ipalubos ti Apo kaniak wenno asino man nga agtakder a Presidente daytoy a Simbaan a maiturongkayo iti pakayaw-awanan. Awan iti programa. Awan iti panunot ti Dios. No panggepek ti kasta, ikkatennak ti Apo iti lugarko, ket kasta met ti aramidenna iti asino man a mangpanggep a mangiturong kadagiti annak ti tattao iti pakayaw-awananda manipud iti orakulo ti Dios ken manipud iti pagrebbenganda. (Maikanem-a-pulo-ket-maysa a Maikadua-iti-tawen a Sapasap a Taripnong ti Simbaan, Lunes, Oktubre 6, 1890, iti Salt Lake City, Utah. Naipakaammo iti Deseret Evening News, Oktubre 11, 1890, p. 2.)

Awan ti aniamanna no asino ti agbiag wenno asino ti matay, wenno asino ti matudingan a mangidaulo iti daytoy a Simbaan, nasken nga idauloda babaen ti pammaregta ti Mannakabalin a Dios. No saanda nga aramiden iti kasta a wagas, didanto pulos maaramid. …

Adda sumagmamano a paltiingko iti kallabes, ket napategda unay kaniak, ket ibagak kadakayo no ania ti imbaga kaniak ti Apo. Palubosandak a mangiseksek iti panunotyo no ania ti maaw-awagan iti manipesto. …

Imbaga kaniak ti Apo a pagsaludsodak dagiti Santo iti Ud-udina nga Aldaw, ken imbagana pay kaniak a no dumngegda iti ibagak kadakuada ken sungbatanda ti saludsod a maipaay kadakuada, babaen ti Espiritu ken bileg ti Dios, agpapada ti sungbatda, ken agpapada ti pammatida maipanggep iti daytoy a banag.

Daytoy ti saludsod: Ania ti kasayaatan a dana a suroten dagiti Santo iti Ud-udina nga Aldaw—ti mangituloy iti gagem a mangaramid iti panagasawa iti adu, a mailabsing iti paglintegan ti pagilian ken iti isusuppiat ti innem-a-pulo a milion a tao, ken pakaigapuan ti pannakasamsam ken pannakapukaw dagiti amin a Templo, ken ti pannakapasardeng dagiti amin nga ordinansa kadagitoy, para man kadagiti sibibiag wenno natay, ken ti pannakaibalud ti umuna a Panguluen ken dagiti Sangapulo-ket-dua ken dagiti amma ti kaamaan iti Simbaan ken ti pannakasamsam dagiti bukod a sanikua dagiti tao (pakaipuonan amin dagitoy ti pannakaisardeng ti aramid); wenno, kalpasan ti panangaramid ken panagpasar iti adda kadatayo babaen ti ikakanunongtayo iti daytoy a pagbatayan a mangtallikud iti aramid ket agtungpaltayo iti paglintegan, ket babaen ti panagtungpal mabati dagiti Propeta, Apostol ken amma iti pagtaengan, tapno maiwardasda dagiti tao ken maasikasoda dagiti pagrebbenganda iti Simbaan, ken kasta met a mabati dagiti Templo kadagiti ima dagiti Santo, tapno maasikasoda dagiti ordinansa ti Ebanghelio, kadagiti man sibibiag ken dagiti natay?

Impakita kaniak ti Apo babaen ti parmata ken paltiing ti awan kurangna a mapasamak no saantayo nga isardeng daytoy nga aramid. No saantayo nga insardeng, nalabit nga awan koman ti kapay-anyo … asino man kadagiti tao iti daytoy a templo iti Logan; ta maisardeng la ketdi dagiti amin nga ordinansa iti intero a daga ti Zion. Agturay ti riribuk iti intero nga Israel, ket adu la ketdi ti tao a maibalud. Mapasamak la ketdi ti riribuk iti intero a Simbaan, ket mapilitantayo koma a mangisardeng iti aramid. Ita, ti saludsod ket, no nasken a maisardeng iti kastoy a wagas, wenno iti wagas nga impakita ti Apo kadatayo, ket mabati a nawaya a tattao dagiti Propetatayo ken Apostol ken amma, ken dagiti templo kadagiti ima dagiti tao, tapno iti kasta masubbot dagiti natay. Adun kadakuada ti nawayawayaan manipud iti pagbaludan a balay iti lubong ti espiritu babaen dagitoy a tao, ket maituloyto kadi wenno maisardeng ti trabaho? Daytoy a saludsod ti idatagko kadagiti Santo iti Ud-udina nga Aldaw. Nasken a kednganyo iti bagbagiyo. Kayatko a sungbatanyo iti bagbagiyo. Diakto sungbatan; ngem kunak kadakayo a dayta a mismo ti kasasaad ti yantayo a tattao no saantayo a sinurot ti dana a yantayo ita.

…Nakitak ti naan-anay a mapasamak no awan ti banag a naaramid. Nabayagen nga adda kaniak daytoy nga espiritu. Ngem kayatko a sawen daytoy: Nabalinak koma a binaybay-an a mapukaw dagitoy a templo kadagiti imatayo; nabaelak koma nga impaibalud ti bagik, ket binay-ak a napan sadiay ti tunggal tao, no saannak a binilin ti Dios iti langit a mangaramid iti inaramidko; ket idi dimteng ti oras a pannakabilinko a mangaramid iti dayta, nalawag aminen kaniak. Napanak iti sango ti Apo, ket insuratko ti imbaga kaniak ti Apo nga isuratko…

Ibatik daytoy kadakayo, a pagpanunotan ken amirisenyo. Agtartrabaho ti Apo kadatayo. (Iti Taripnong ti Istaka ti Cache, iti Logan, Utah, Domingo, Nobiembre 1, 1891. Naipadamag iti Deseret Weekly, Nobiembre 14, 1891.)

Ibagak ita kadakayo ti naipakita kaniak ken no ania ti inaramid ti Anak ti Dios iti daytoy a banag … Napasamak koma amin dagitoy a banag, a kas iti kaadda ti Mannakabalin a Dios, ket saan a naited dayta a Manipesto. Ngarud, narikna ti Anak ti Dios a baybay-anna dayta a banag a maidatag iti Simbaan ken iti lubong para kadagiti bukodna a panggep. Impaulog ti Apo ti pannakabangon ti Zion. Impaulogna ti pannakaileppas daytoy a templo. Impaulogna a maited kadagitoy a tanap ti kabambantayan ti pannakaisalakan dagiti sibibiag ken natay. Ken impaulog ti Mannakabalin a Dios a nasken a saan a pengdan daytoy ti Sairo. No maawatanyo dayta, dayta ti tulbek daytoy. (Manipud iti diskurso iti maikanem a sesion ti pannakaidaton ti Templo ti Salt Lake, idi Abril 1893. Naimakinilia a Pangidaton a Serbisio, Archives, Church Historical Department, Salt Lake City, Utah.)