Benneg 30
Paltiing a naited kada David Whitmer, Peter Whitmer, Jr., ken John Whitmer babaen ni Joseph Smith a Propeta, iti Fayette, Nueva York, idi Septiembre 1830 kalpasan ti tallo nga aldaw a taripnong iti Fayette, ngem sakbay ti panagsisina dagiti elder ti Simbaan (History of the Church, 1:115–116). Immuna a naipablaak daytoy a sinurat iti tallo a paltiing; pinagtipon ti Propeta iti maymaysa a benneg para iti edision ti 1835 ti Doktrina ken Katulagan.
1–4, Nadusa ni David Whitmer iti dina panagserbi a sireregta; 5–8, Kuyogen ni Peter Whitmer, Jr., ni Oliver Cowdery nga agmision kadagiti Lamanite; 9–11, Natudingan ni John Whitmer a mangikasaba iti ebanghelio.
1 Adtoy, kunak kenka, David, a nagbutengka iti tao ket saanka a nagtalek kaniak iti pigsa a kinalikagumam.
2 Ngem naitalimudok ti panunotmo kadagiti banag iti daga nga ad-adda ngem kadagiti banag nga adda kaniak, ti Namarsuam, ken iti panagserbi a nakaitudingam; ket saanka a dimngeg iti Espirituk, ken kadagiti naituding kenka, ngem naaritka kadagiti diak imbilin.
3 Gapuna, nabatika nga agsaludsod iti bagim iti imak, ken agamiris kadagiti banag nga inawatmo.
4 Ket agnaedkanto iti balay ti amam, agingga nga ikkanka iti ad-adu pay a bilin. Ket makiramankanto iti panagserbi iti simbaan, ken iti imatang ti lubong, ken kadagiti luglugar iti aglawlaw. Amen.
5 Adtoy, kunak kenka, Peter, nga agdaliasatkayo iti kabsatmo a ni Oliver; ta dimtengen ti panawen a nasken unay kaniak nga ungapemto ti ngiwatmo a mangipakdaar iti ebangheliok; ngarud, dika agbuteng, ngem denggem dagiti balikas ken pammagbaga ti kabsatmo, nga itednanto kenka.
6 Ket rigatmonto amin dagiti rigatna, nga iti panangitag-aymo iti pusom kaniak iti kararag ken pammati, para iti pannakaisalakanyo; ta intedko ti bileg kenkuana a mangbangon iti simbaanko kadagiti Lamanite;
7 Ket awan ti tinudingak nga agbalin a mamagbagana iti simbaan, maipanggep kadagiti banag ti simbaan, malaksid ti kabsatna, ni Joseph Smith, Jun.
8 Gapuna, denggem dagitoy a banag ket agregtaka a mangtungpal kadagiti bilinko, ket maparaburankanto iti agnanayon a biag. Amen.
9 Adtoy, kunak kenka, katulongak a John, nga irugimto manipud iti daytoy a kanito nga ipakdaar ti ebangheliok, a kas iti aweng ti trumpeta.
10 Ket agtrabahokanto ken ni kabsatmo a Philip Burrough, ken iti aglawlaw ti lugar, wen, iti sadino man a pakangngegan kenka, agingga a bilinenka a pumanaw.
11 Ket ti sibubukel a trabahom addanto iti Zion, iti amin a kararuam, manipud ita; wen, ungapemto ti ngiwatmo para kaniak, a saan nga agbuteng iti mabalin nga aramiden ti tao, ta addaak kenka. Amen.