Idi 30 ti Septiembre, 1978, iti maika-148 a Maikadua-iti-tawen a Sapasap a Taripnong ti Ti Simbaan ni Jesucristo dagiti Santo iti Ud-udina nga Aldaw, indatag ni Presidente N. Eldon Tanner, Umuna a Mamagbaga iti Umuna a Panguluen ti Simbaan ti sumaganad:

Kadagiti immuna nga aldaw ti Hunio daytoy a tawen, impakaammo ti Umuna a Panguluen nga adda paltiing nga inawat ni Presidente Spencer W. Kimball a mangipaay iti kinasaserdote ken bendision iti templo kadagiti amin a maikari a lallaki a kameng ti Simbaan. Dinawat ni Presidente Kimball nga ibagak iti taripnong a kalpasan ti panangawatna iti daytoy a paltiing, a dimteng kenkuana kalpasan ti nayatiddog a panagut-utob ken panagkararag kadagiti sagrado a siled ti nasantuan a templo, indatagna kadagiti mamagbagana, a nangawat iti daytoy ken nanganamong. Naidatag kalpasanna iti Korum dagiti Sangapulo-ket-dua nga Apostol, a nagkaykaysa a nanganamong, a sinaruno ti pannakaidatagna kadagiti amin a sabsabali a Nangato nga Agrebbeng, a nagkaykaysa met a nanganamong.

Dinawat ni Presidente Kimball nga ibasak ita daytoy a surat:

Iti pannakasaksimi iti panagsaknap ti aramid ti Apo iti daga, agyamankami ta dimngeg dagiti tao kadagiti adu a pagilian iti mensahe ti naisubli nga ebanghelio, ket immad-adu ti bilang dagiti timmipon iti Simbaan. Daytoy, kas supapak, ti nangparegta kadakami a binuyogan ti tarigagaymi a mangipaay iti tunggal maikari a kameng ti Simbaan kadagiti amin a gundaway ken bendision a maipaay ti ebanghelio.

Iti pannakaammomi kadagiti inkari dagiti propeta ken presidente ti Simbaan nga immun-una ngem dakami nga iti maysa a panawen, iti agnanayon a plano ti Dios, mabalin amin dagiti maikari a kakabsattayo a lallaki ti umawat iti kinasaserdote, ket iti pannakasaksimi iti kinapudno dagiti naitantan ti yaawatda iti kinasaserdote, nabayagen ken siaanepkami a nangidawat para kadagitoy, dagiti napudno a kakabsattayo a lallaki, a binubosmi ti adu nga oras iti Upper Room ti Templo iti panangyararawmi iti Apo para iti nadiosan a panangiwanwan.

Dinengngegna dagiti kararagmi, ket impaneknekna babaen ti paltiing a dimtengen ti nabayagen a naikari nga aldaw a tunggal napudno, maikari a lalaki iti Simbaan mabalindan ti umawat iti nasantuan a kinasaserdote, kabuyog ti bileg a mangipatungpal iti nadiosan a turayna, ken sagrapenda kadagiti ipatpategda ti amin a bendision a nabuslon a dumteng, a pakairamanan ti bendision iti templo. Maibatay iti daytoy, mabalinen a maordenan dagiti amin a maikari a lallaki a kameng ti Simbaan iti kinasaserdote a saanen a nasken no ania man ti puli wenno marisna. Maiwanwan dagiti dadaulo ti kinasaserdote a mangsurot iti annuroten iti naannad a pannakisao iti nalimed kadagiti amin a kandidato para iti pannakaordena iti man Kinasaserdote nga Aaron wenno Melchizedek tapno manamnama a natungpalda dagiti pagrukodan iti pannakaikari.

Ipakdaarmi a sipaparbeng nga imbagan ti Apo ti pagayatanna para iti bendision dagiti amin nga annakna iti intero a daga a dumngeg iti timek dagiti napusgan a katulonganna, ket isaganada ti bagbagida nga umawat iti tunggal bendision ti ebanghelio.

Iti panangbigbig ken ni Spencer W. Kimball a kas propeta, mammadto, ken mammaltiing, ken presidente ti Ti Simbaan ni Jesucristo dagiti Santo iti Ud-udina nga Aldaw, maisingasing a datayo a kas kameng ti taripnong awatentayo daytoy a paltiing a kas balikas ken pagayatan ti Apo. Amin dagiti umanamong pangngaasida koma ta ipamatmatda babaen ti panangitag-ayda iti kanawan nga imada. Asino man a sumuppiat aramidenda met ti kasta.

Sangsangkamaysa ti butos a kimmanunong iti pannakaanamong ti naidatag a singasing.